A UCHUL ME A REBEBIL A MERINGEL ER TIR EL OUMERANG: A rebebil a kmal ousbech a ongelaod engdi te omdasu el kmo a lsekum te olengit er a Dios me losmechokl a mondai er tir e lengesuterir el mo outekangel e ngua lolechotel a kmo te di melatk er a di tir. A redil el Raquel a kmo: “Sel kulatk er a ildisir a rechad er a beluulechad el rokir el chelebangel a kmal meringel el mondai, e ak mo omdasu el kmo ngua lsal mekekerei a mondai er ngak me ngdiak a ultutelel a bo kulengit a ngeso er a Dios el kirel.”

A OSISECHAKL EL NGAR ER A TEKINGEL A DIOS: A Dios a mla rullii a kmal klou el tekoi el mo olengeseu e mengelaod er a rechad. A rokui el chad a uldiukes er a klengit me ngdiak el sebechir el mo cherrungel el oltirakl a llechul a Dios. Me nguaisei, engdi a Dios a “mle betik a rengul er kid me ng ulderchii a Ngelekel [el Jesus Kristus], el doeak ngii e ng musubes a kngtid.” (1 Johanes 4:10) Me ngokiu a kodellel a Jesus, e a Dios a mla kutmeklii a rolel e ngsebechel el musubes a kngtid, e mo klikiid a ukltked, e dirrek el mo er ngii a omeltked el mo kiei el mo cherechar er a chelsel a beches el beluulechad el mui er a budech. * Engdi tia el tenget, ngdi sengk el kirel a uldekial a klechad el rokir, me a lechub e ngdirrek el olechotel a bltkil a rengul a Dios el mo er a derta me a derta er kid?

Ka di molatk er a apostol el Paulus. Ngmilsa klungel a ultutelel a olubet el tengetengel a Jesus me ngmilluches el kmo: “Ngak el oumera er a Ngelekel a Dios, el ngikel mle betik a rengul er ngak me ng tilengetengii a klengar er ngii el kirek.” (Galatia 2:20) Me alta e a Jesus a mlad er a uchei er a bo el Kristiano a Paulus, engdi a Paulus a ulemes er a olubet el tenget el ua ileakl el sengk el mla er a Dios el mo er ngii.

Me a olubet el tengetengel a Jesus a dirrek el ileakl el sengk er a Dios el eko er kau, e meketeklii el kmo a Dios a omes er kau el kmal mekreos el chad. Tia el sengk a dirrek el sebechel el meskau a ‘klisichel a rengum ma ultebechel el omelatk,’ el uchul me “di bo blechoel el meruul a ungil e molekoi a ungil tekoi.”​—2 Thesalonika 2:16, 17.

Me nguaisei, engdi a Jesus a tilengetengii a klengar er ngii er a bekord el 2,000 el rak er a uchei. Me ngera ochotii el kmo a Dios a olekeed er ngii er kau er chelechang?