1. A rechad te ousbech er a ngerang, e rua techa sebechir el meskid?

 A ROKUI el chad a kirir el mo melechesuar el kmo te kmeed er a rebebil. Ngrullid el mo dmeu a rengud sel lengar er ngii a rechedad me a resechelid el tir a mera el betik a rengrir, e omekerreu e dirrek el ungil el medengelkid. Engdi sel kot el kmes el deleuill el kired el olekes er ngii a deleuill er kid el obengkel ngike el Ulemeob er kid el Jehovah.​—Oli. 12:1.

2. Ngera el telbiil a bla letibir a Jehovah el mei er kid, e ngera uchul me a rebetok a diak loumerang er tia el telbiil?

² A Jehovah a mengemedaol er kid el mo sechelil. Ngtibir el kmo a lsekum kede olekeed er kid er ngii e ngmo olekeed er ngii er kid. (Jak. 4:8) Me kid el medengelii tia el tekoi a uchul me ngmo dmeu a rengud. Engdi a rebetok el chad a omdasu el kmo ngdiak a belkul el bo loumerang el kmo a Dios a soal el olekeed er ngii er tir. Te omdasu el kmo ngdiak lerredemelel a mo er ngii a deleuill er tir el obengkel me a lechub e a Dios a kmal cheroid er tir. Me ngmera el sebeched el mo kmeed er a Jehovah?

3. Ngkired el mo oumerang a ngera el tekoi el kirel a Jehovah?

³ Nguaisei, ngsebeched el mo medengelii a Jehovah e le ng “diak le cheroid er a derta” el chad el soal el osiik er ngii. (Monguiu er a Rellir 17:26, 27; Psalm 145:18.) Me alta e ngdiak demecherrungel  engdi a Jehovah a kmal kltmokl e kongei er kid el mo sechelil. (Isa. 41:8; 55:6) Ngokiu a tekoi el dilubech el mo er a ta er a milluches er a Psalm e ngmilsaod el kirel a Jehovah el kmo: “Konger a nglunguuch. A rokui el chad a mer kau el kirel a kngterir. Te ngeltengat tirkel mngilteterir.” (Psa. 65:2, 4) Me bo desang er a chelsel a Biblia el kmo ngmilekerang a King el Asa er a beluu er a Juda e mlo kmeed er a Dios, e milekerang a Dios e olekeed er ngii er a Asa.

4. Ngera el kerebai a lullecholt er ngii a King el Asa el mo er a rechad er a Juda?

⁴ A Asa a kmal mle blak a rengul er a mera el omengull. Ngmlo king er sel taem el beluu a mle mui er a omengull el bleob e mla er ngii a ruteruul el sechal me a redil el milsiou er a templo. Engdi ngii a ullengesenges er a Jehovah e milengikiid er a beluu er aika el mekngit el tekoi. (1 Ki. 15:9-13) Me ngii el ullekeed er ngii er a Jehovah e ullengesenges a Llechul a uchul, me ngmle sebechel el melekoi er a rechad er a Juda “me te mo osiik er a RUBAK el Dios er a re demerir, e mo oltaut a osisecheklel ma llechul.” Me a Jehovah a ulemekngeltengat er ngii e milsa budech er a chelsel aike el kot el teruich el rak el longedereder. Me a Asa a mle ungil el medengei el kmo tia el budech a mla er a Jehovah el mei me ngdilu er a rechedal el kmo: “Kede ulsiik er a RUBAK el Dios er kid, me ng omecheliu er kid er a beluu el rokir.” (2 Kr. 14:1-7) E ngera dilubech er a uriul?

5. Ngar er a chelsel a ua ngera el blekeradel e a Asa a ulechotii el kmo ngultuil er a Dios, e ngera mlo rsel?

⁵ Ka molatk er kau el leko ke King el Asa. E a Sera el chad er a Ethiopia a mengetakl er a 1,000,000 el soldau me a 300 el kuruma er a mekemad el merema oldechelakl er a beluam. (2 Kr. 14:8-10) A resoldau er ngii a bekord el eru el chachisois a ildisir er a resoldau er kau. Me ke mo mekerang? Ke mo omdasu el kmo ngera uchul me a Dios a diak leterebengii tia el mekemad? Kau ke di mo ultuil er a llemesem e meruul a tekoi? Me a lechub e ke mo oumerang el kmo a Jehovah a mo omekerreu er kau? A omerellel a Asa a ulechotii el kmo nguluumerang er a Jehovah e mle kmes a deleuill er ngii el obengkel. Ngdilu el kmo: “Mngesukemam e RUBAK el Dios, e aki ultuil er kau.” Me ngmilekerang er a longer er ngii a Dios? A “RUBAK a mlo mesisiich er a re chad er a Ethiopia.” Me a rokui el cheraro a di mlad.​—2 Kr. 14:11-13.

6. Ngoeak a ngera el rolel e ngsebeched el oukerebai er a Asa?

⁶ Ngmilekerang a Asa e mlo sebechel el mui el oumerang el kmo a Dios a mo omekerreu e omekrael er ngii? A Biblia a kmo, a “Asa a mirruul a melemalt er medal a RUBAK” e “mle cherrungel a rengul” el mo er Ngii. (1 Ki. 15:11, 14) Me kid me ngdirrek el kired el mo mesiou er a Dios er a rengud el rokir me bo el sebeched el olekeed er kid er ngii er chelechang me a dirrek el ngar medad. Me kede oba omereng el saul e le Jehovah a ulemuchel el olekeed er ngii er kid e dirrek el ngosukid me ngmo er ngii a kmes el deleuill er kid el obengkel. Me bo dosaod a eru el rolel e a Dios a olekeed er kid er ngii.

7. (a) Ngera ngmla remuul a Jehovah el olekeed er kid er ngii? (b) Ngera sel kot el ngarbab el rolel e ngolekeed er kid er ngii?

⁷ A Jehovah a ulechotii a bltkil a rengul el mei er kid er sera lebebii a kmal klebokel el chutem el mo beluad. Ngolecholt er a bltkil a rengul el mei er kid el oeak sel lomeskid aike el dousbech me lolemolem a klengar er kid. (Rel. 17:28; Och. 4:11) A lmuut el klou el olechotel a bltkil a rengul a mocholt er sel rolel a lomeskid a ulekrael el okiu a tekingel. (Lk. 12:42) Ngdirrek el oterekokl a rengud el kmo ngorrenges er kid sel doluluuch el mo er ngii. (1 Jn. 5:14) Engdi sel kot el ngarbab el rolel e ngolekeed er kid er ngii, e dirrek el olechotel a bltkil a rengul a okiu a olubet el tenget. (Monguiu er a 1 Johanes 4:9, 10, 19.) A  Jehovah a uldureklii a di ta el Ngelekel el me tongetengii a klengar er ngii el kired. Me ngokiu tiaikid el tenget e kede mo oba omelatk el mo kiei el mo cherechar el mecherrungel el chad.​—Jn. 3:16.

8, 9. Ngerang a ngerechelel a Jesus er a chelsel a moktek er a Jehovah?

⁸ A Jehovah a mle soal a olubet el tenget a bo luchul a klungiolir a rechad el rokui, el uldimukl er tirke el kiliei e mlad er a uchei er a lemeketmokl tia el olubet. Ngmekerang e mo uaisei? A Jehovah er sera lomlaoch el kirel ngika el Osobel, e ngua bla locherar tia el tenget e le ngmle medengei el kmo a moktek er ngii el kirel a klechad a ulterekokl el mo tmaut. (Gen. 3:15) A betok el dart el rak er a uriul e a apostol el Paulus a mirreng a sulel a Jehovah el kirel tia el “sengk er a Dios el okiu a Jesus Kristus el ngii a rulleterir el mo mimokl.” Me a Paulus a milsaod el kmo a Dios a uluusubes me a lechub “e ng uleba kllourreng el olechib a medal er a kngterir a re chad” er a ngar er a mong. (Rom 3:21-26) Me ngdi ta el Jesus a sebeched el okiu ngii e mo kmeed er a Dios.

⁹ A Jehovah a kongei er a rengariou a rengrir el chad me te mo medengelii e mo er ngii a kmes el deleuill er tir el obengkel el okiu a Jesus. A Biblia a kmo: A “Dios a ulechotii a bltkil a rengul er kid, ele ser a dirk de ngar a klengit, e a Kristus a mlad el kired.” (Rom 5:6-8) Ngdiak el ungil el omerelled a uchul e ngmileketmokl a olubet, e ngbai sel bltkil a rengul a Jehovah me a Jesus a uchul me ngmileketmokl. A Jesus a dilu el kmo: “Ng diak a chad el sebechel el mer ngak a lak le Chedam el ngikel ulderchak a mekrolii el mer ngak.” Ngdirrek el dilu el kmo: “Ng diak a chad el mor a Chedam, a lak lokiu ngak.” (Jn. 6:44; 14:6) Ngmekerang a Jehovah a lolekeed er a rechad el mo er ngii el okiu a Jesus, e lengesuterir me lolemolem el ngar er a chelsel a bltikerreng er ngii me bo el sebechir el kiei el mo cherechar? Ngmengetmokl er tiang el ousbech er a chedaol klisichel. (Monguiu er a Jude 20, 21.) Me chelechang e bo dosaod er sel ongeru el rolel e a Jehovah a olekeed er kid er ngii.

10. Ngmekerang a Biblia e ngosukid el mo kmeed er a Dios?

¹⁰ Ngar er a chelsel tia el suobel e kede mla ousbech a bades el ngar er a chelsel a 14 el babier er a Biblia. A Jehovah a uluusbech er a chedaol klisichel el omekrael er a rechad el mo meluches er a Biblia me bo el sebeched el mo kmeed er ngii. Me kede mekerang e mo medengei el kmo ngsebeched el mo kmeed er ngika el Ulemeob a lsekum ngdiak a Biblia? E mekerang e kede mesuub el kirel a olubet me sel rolel e a Jesus a ngosukid el mo kmeed er a Jehovah a lsekum ngdiak a Biblia? Ngdi ngar er a chelsel a Biblia e kede mesuub el kirel a kot el ungil el blekerdelel a Jehovah me a moktek er ngii el kirel a klechad. El ua tiang, a Jehovah a mesaod er a blekerdelel el ngar er a Exodus 34:6, 7 el kmo: “[Ak] mui er a blekokuii ma klechubechub, el diak le mereched el ngmasech a renguk, e olecholt er a blechoel bltikerreng ma blakerreng. Ak ultaut er a telbilek el mor a re betok el telael el chad e ousubes a chelebirukel, ma teluchakl, ma klengit.” Me kid, ngdiak el soad el olekeed er kid er ngika el Dios? A Jehovah a medengei el kmo a cherengel a dosuub el kirel e ngmo mera el Dios er a rengud e kid a mengal mo kmeed er ngii.

11. Ngera uchul me ngklou a ultutelel el dosuub el kirel a Jehovah? (Momes er a siasing er a uchelel a suobel.)

¹¹ Me sel dolekes er a deleuill er kid me a sechelid e kede mengal mo medengelii e dirrek el mo soad a ungil el blekerdelel. Me ngdi osisiu, a lsekum ngsoad el olekes er a deleuill er kid me a Dios e ngkired el mesuub er a Biblia me bo dungil el medengei el kmo ngua techa el Dios e ua ngerang a blekerdelel. Ngkired el mo oba omereng el saul e le Jehovah el rirellii a Biblia me ngbeot er kid el mo medengei a belkul a tekoi er a chelsel.

12. Ngera uchul me a Jehovah a uluusbech er a rechad el meluches er a Biblia?

 ¹² A Jehovah a mle sebechel el ousbech er a rechanghel el meluches er a Biblia. Tirkang a dirrek el kmal semeriar el mo medengelkid e mo medengei el kmo ngera kede meruul. (1 Pe. 1:12) Ngmle sebechir el cherrungel el lmuches a klemechel a Jehovah el mo er a rechad. Engdi tirka el anghel a diak el ua rechad. Tirkang a kuk ngodech a rolel a lomelechesiu a tekoi, e kuk ngodech aike el lousbech el tekoi e dirrek el diak a chelitecheterir. Me a Jehovah a medengei el kmo a rechanghel a ngodech er a rechad, seikid a uchul me ngmillilt er a rechad el mo meluches er a Biblia. Ngsebeched el mo melechesuar a ringelir tirke el milluches er a Biblia sel losaod a chelebulir, rraurreng er tir, dektir, me a cheleuid el lurruul tir me a rebebil. E mo dmeu a rengud sel donguiu el kirel aike el taem er a deurreng er tir. Me tirke el rokui el milluches er a Biblia a di ua profet el Elias el “di mle chad el ua ikid.”​—Jak. 5:17.

13. Ngua ngera uldesuem el kirel a nglunguchel a Jona?

¹³ Ka molatk er a profet el Jona. A Jehovah a milsang a ngerachel el mle kirel el meruul er ngii, engdi ngchiliis. A lsekum a anghel a milluches er a cheldechedechal e ngdimlak bo lungil el smodii a uldesuel a Jona. Seikid a uchul me a Jehovah a ngileltii me ngdi ngii el meluches er a cheldechedechal el uldimukl er a nglunguchel er sel taem er a lengar er a bertakl. Ngdilu el kmo: “Ser a bo kumelechesiu er ngak el kmo kmedkung, isei e RUBAK e ak liletkau.”​—Jon. 1:3, 10; 2:1-9.

14. Ngera uchul me ngsebeched el melechesuar a ringel el blo lechelebangel er ngii a Isaia?

¹⁴ Ka dirrek el molatk er a tekoi el lulluches er ngii a Isaia er sera lesang a klebkellel a Jehovah el uchul me ngmlo melechesuar el kmo ngmera el mekngit el chad. Ngdilu el kmo: “Ng dikea omelatk el kirek! Ak delebeakl! A bek el tekoi el tuobed er a ngerek a mekngit, me ngak a kiei er a delongelir a re chad el bek el tekoi el lolekoi a mekngit e diak le klikiid. E chelechang e a medak a mla mesa king, el RUBAK el Olab a Bek el  Klisiich.” (Isa. 6:5) Me a anghel a kmal diak el sebechel el mo melekoi a chouaika el tekoi. Engdi kid el diak demecherrungel a uchul me ngsebeched el melechesuar a ringel el blo lechelebangel er ngii a Isaia.

15, 16. (a) Ngera uchul me ngsebeched el mo medengei a tekoi el losaod a redi chad? Mosaod. (b) Ngera ngosukid el mo olekeed er kid er a Jehovah?

¹⁵ A rechanghel a diak el sebechir el di tir el mesaod er tir el kmo ‘ngdiak lerredemelel a blekokuii’ el ua ledilu Jakob, me a lechub e te ua Petrus el dilu el kmo: Ng “mekngit el chad.” (Gen. 32:10; Lk. 5:8) Ngdirrek el diak el sebechir el ‘kmal mo medakt’ a lebebil er a taem el ua redisaiplo er a Jesus. Te dirrek el diak lousbech er a blekeu el mo omerk er a klumech er a ungil chais er a taem el lemodechelakl el ua Paulus me a re lmuut el bebil. (Jn. 6:19; 1 Th. 2:2) E le rechanghel a mecherrungel e lmuut el mesisiich er a redi chad. Me kid a diak demecherrungel el di ua rechad el Jehovah a uluusbech er tir el meluches er a Biblia, me ngsebeched el mo ungil el medengei a tekoi el losaod. Me sel donguiu aike el tekoi el lulluches e ngsebeched el mo ‘dmeu a rengud el obengterir a re dmeu a rengrir, e lmangel el obengterir a re lmangel.’​—Rom 12:15.

¹⁶ Me sel dolebedebek er a omerellel a Jehovah el mo er a reblak a rengrir el mesiungel er a irechar e ngsebeched el mo medengei a lmuut el betok el mengasireng el tekoi el kirel ngii el Dios er kid. Ngmo sebeched el mesang sel rolel e ngullecholt er a bltikerreng me a kllourreng er a lolekeed er ngii er tirka el diak el mecherrungel el chad. Me sel dokurulii a klemedengei er kid er a Jehovah e deluut el mo betik a rengud er ngii, e kede mengal mo kmeed er ngii.​—Monguiu er a Psalm 25:14.

17. (a) Ngera el ungil el ulekrael a ledillii a Asaria el mo er a Asa? (b) Ngmilekerang a Asa e mlo diak loltirakl er tia el ulekrael, me ngera mlo rsel?

¹⁷ Ngsebeched el suub a lmuut el betok er a omerellel a King el Asa. A uriul er a bo lemesisiich er a resoldau er a Ethiopia, e a profet el Asaria a milsang a ungil el ulekrael. Ngdilu er ngii el kmo: “A RUBAK a obengkemiu a cho mobengkel. A lsekum kom osiik er ngii, e kom metik er ngii. E ngdi lsekum kom choitii e ng choitemiu.” (2 Kr. 15:1, 2) Engdi cherengel a taem e a Asa a mlo diak loltirakl er tia el ungil el ulekrael. Ngkmal mlo medakt er sel taem el renged er a Israel el ngar er a diluches a mlo oldechelakl er a belual er a Juda. Engdi ngdimlak bo losiik a ngeso er a Jehovah e bai ulemak a deleuill er ngii me a rechad er a Siria el tir a milengull a ngodech el chelid. Me a Jehovah a dilu er ngii el kmo: “Ng mlo klebelung tial omerellem me chelechal mong e ke di mo chemau a mekemad.” Me a tekingel a Jehovah a tilaut. (2 Kr. 16:1-9) Me ngera kede suubii er tia el tekoi?

18, 19. (a) Kede mo mekerang a lsekum kede mla mo cheroid er a Jehovah? (b) Kede mekerang e melemolem el olekeed er kid er a Jehovah?

¹⁸ Ngkmal diak el kired el mo cheroid er a Jehovah. Me a lsekum kede melechesukid el mocha cheroid er Ngii e ngungil a demereched el mo oltirakl er a ulekrael el medung er a Hosea 12:6 el kmo: “Mokiu a ngelsuil a Dios e mobult. Morekedii a bltikerreng ma llemalt, e di blechoel el mengiil er a Dios er kemiu el oba kllourreng.” Me sel deblechoel el melatk er a olubet el tenget e leblak a rengud el mesuub er a Biblia, e ngsebeched el mengal mo kmeed er a Jehovah.​—Monguiu er a Duteronomi 13:4.

¹⁹ A ta er a milluches er a Psalm a kmo: “Ngdi kuk le ngak e ng bai ungil a dekeed er a Dios!” (Psa. 73:28) Tiang a kmal ungil el kired el rokui, me deruul a turrekong er kid el mo melemolem el mesuub a beches el tekoi el kirel a Jehovah. Sel doruul el uaisei e kede mengal mo betik a rengud er ngii. E sel dolemolem el olekeed er kid er ngii e nglmuut el me kmeed er kid er chelechang el mo er a diak a ulebengelel!