KEDE kiei er a chelsel a kot el meringel el taem er a reksi er a klechad. (2 Ti. 3:1-5) Me a bek el sils e ngmeasem a bltkil a rengud el mo er a Jehovah me a blekongesenges er kid el kirel a melemalt el llechul. A Jesus a mle medengei el kmo tia el taem a kmal mo meringel, me ngtilbir el mo mesterir a rultirakl er ngii a ngeso el lousbech me bo el sebechir el outekangel el mo er a ulebongel. (Mt. 24:3, 13; 28:20) Me a bo lomeskid tia el ngeso, e a Jesus a tiltkii a blak a rengul el mesiou el mo meskid a ‘kall er sel belsechel.’​—Mt. 24:45, 46.

Ngika el blak a rengul el mesiou a miltutk er a rak er a 1919. Ngar er seikid el taem el me er chelechang, e ngika el mesiou a mla omekang er a rechedal a Dios el ousbech a tekingel a Dios el ngar er a kakerous el omelekoi. (Mt. 24:14; Och. 22:17) Me nguaisei, engdi ngar er a bebil el beluu e ngkuk betok el babier a mla moiuid el mo er a tekingir er a kuk bebil el beluu. E dirrek el diak el bek el chad a ngar er ngii a techellir el ousbech a computer me a Internet. El ua tiang, a rebetok a diak el sebechir el omes a video me a lechub a suobel el motobed er a jw.org. Me tiang belkul a kmo a rebebil el Kristiano a diak a techellir el melai a kall el lousbech er a tekingel a Dios? Me a bo donger er tia el ker, e me bo dosaod a eua el meklou a ultutelel el ker.

A Satan er sera longesuseu er a Jesus el mo omult a bad el mo blauang, e a Jesus a dilu el kmo: “A klengar er a chad a diak di lultuil er a kall e le merekong; ng dirrek el ultuil er a bek el tekoi el tuobed er a ngerel a Dios.” (Mt. 4:3, 4) A tekingel a Jehovah a ngar er a chelsel a Biblia. (2 Pe. 1:20, 21) Me a Biblia a uchetemel a kall el lomeskid a Jehovah.​—2 Ti. 3:16, 17.

A cheldebechelel a Jehovah a mla otebedii a New World Translation of the Holy Scriptures. Tia el oidel a Biblia a ngar er ngii el cherrungel me a lechub e ngkedeb el ngar a kuk betok er a 120 el omelekoi, e a bek el rak e ngmedechel a lmuut el bebil er a omelekoi. Ngdirrek el ngar er ngii a lmuut el bebil el oidel a Biblia el ngar er a betok el bedengel a omelekoi, e betok el biliol er aika el Biblia a mla motobed. Me tia el tekoi a mileketmokl el oltirakl er a soal el Dios el “soal a rokui el chad a bo le sobel e bo lodengelii a klemerang.” (1 Ti. 2:3, 4) A Jehovah a medengei a rengrir a rokui el chad, me ngulterekokl a rengud el kmo ngmo mengurs er tirke el “medengei el kmo te chebuul a lak lousbech er a Dios” el mo er a cheldebechelel, e omesterir a kall el okiu a Tekingel.​—Mt. 5:3, 6; Jn. 6:44; 10:14, 15; Heb. 4:13.

A chad a bo lemesisiich a klaumerang er ngii, e ngkmal kirel el menguiu er a Biblia e mo ungil el medengelii e mo oltaut aike el losuub. (Jak. 1:22-25) E tiaikid a mle kirel el meruul er ngii ngika el chad er a Ethiopia er a irechar. Me a Filip er a lesa ngika el chad el menguiu er a Tekingel a Dios e nguleker er ngii el kmo: “Ke medengelii a belkul sel monguiu er ngii?” Me ngdilu el kmo, “Ng mekera e sebechek el mo medengelii a lak a chad el smodii er ngak?” (Rel. 8:26-31) Misei e a Filip a ngilsuir ngika el chad el mo medengei a belkul aike el tekoi el longuiu. Me ngika el chad a kmal mlo soal a tekoi el lesiluub me ngtilbir el mo metecholb. (Rel. 8:32-38) Me ngdi osisiu, aika el babilenged a ngosukid el mo medengelii a klemerang el tekoi el ngar er a Tekingel a Dios. A tekoi el donguiu a ngar er ngii a lerellii er a rengud e rullid el mo oltaut aike el tekoi el dosuub.​—Kol. 1:9, 10.

Aika el babilenged a meskid kid a remesiungel a Jehovah a kmal betok el ungil ‘kall ma ilumel.’ (Isa. 65:13) El ua tiang, A Ongkerongel a ngar er ngii er a kuk betok er a 210 el omelekoi. Ngmesaod a ulaoch, e ngosukid el mo medengei a meklou a ultutelel el klemerang e smisichid el mo kiei el oltirakl a llechul a Dios. E a Awake! el magazine a ngar er ngii er a bekord el 100 el omelekoi. Ng ngosukid el mo mesuub a lmuut el betok el kirel a klebokel el blebelel a Jehovah e olisechakl er kid er a rolel a bo doltaut a ungil el ulekrael el ngar er a Biblia. (Osi. 3:21-23; Rom 1:20) A blak a rengul el mesiou a oltobed a babier el mengai a uchetemel er a Tekingel a Dios el ngar er a kuk betok er a 680 el omelekoi! Me kau ke blechoel el menguiu er a Biblia er a bek el sils? Ke menguiu a derta el beches el magazine me a rokui el beches el babier el motobed er a omelekingem?

A cheldebechelel a Jehovah a dirrek el mengetmokl a outline er aike el cheldecheduch el motobed er a miting me aike el meklou el ongdibel. Me kau ngdmeu a rengum er a cheldecheduch, sibai, demonstration me a interview el motobed er isei? Nguaisei, a Jehovah a meskid a kmal betok el kall el melisiich a klaumerang er kid!​—Isa. 25:6.

A nger a kmo, ngdiak! Ngdiak el kirel el mo mechas a rengud a lsekum a rebebil el Kristiano a ngmai a kuk betok el osisechakl er a rebebil. E ngera uchul? El ua tiang, ngar er sel taem er a Jesus e a rechapostol er ngii a ngilai a betok el osisechakl er a rekuk bebil er a redisaiplo. (Mk. 4:10; 9:35-37) Engdi tirke el bebil er a redisaiplo a ngilai a kall el luluusbech el mo melisiich er a klaumerang er tir.​—Efe. 4:20-24; 1 Pe. 1:8.

Lak dobes el kmo a oumesingd er aike el tekoi el leriruul me a ledilung a Jesus er a lengar er a chutem a diak el llechukl er a Biblia. A apostol el Johanes a milluches el kmo: “Ng lmuut el betok el tekoi a le riruul a Jesus. E ngdi chomko kede mo oudertal meluches, e a kumdasu e tial beluulchad el rokir a mo kekerei el diak el sebechel el tokau a ikel rokui el babier el mo meluches.” (Jn. 21:25) Me a Rekristiano er a irechar a mle medengei a lmuut el betok el kirel a Jesus er aike el dodengei. Engdi ngdiak lebelkul a kmo ngolengesonges a klemedengei er kid. E ngera uchul? E le a Jehovah a mla ouchais er kid aike el kired el mo medengei el kirel a Mastang er kid el Jesus, me bo el sebeched el oukerebai er ngii.​—1 Pe. 2:21.

Ka dirrek el molatk aike el babier el lulluches a rechapostol el mo er a ongdibel er a irechar. A ta er aike el babier el lulluches er ngii a Paulus a diak el uldimukl er a Biblia. (Kol. 4:16) Me tiang belkul a kmo ngolengesonges a keled e le ngdiak doba tia el babier? Ngkmal diak. A Jehovah a medengei aike el dousbech me ngmla meskid a ungil a ildisel el kall el ngosukid el melemolem el mesisiich a deleuill er kid me ngii.​—Mt. 6:8.

A rebebil el chedal a Jehovah a kmal betok a kall el lolai el melisiich a klaumerang er tir. Engdi a omelekoi el modengelii, ngdi mekesai a babier el mla moiuid el mo er ngii el omelekoi? A lsekum nguaisei, e bo modengei el kmo a Jehovah a omekerreu er kau. Mosuub aike el babier el ngar er a omelekingem, e bo er a miting el ousbech a omelekoi el modengelii. Ngokiu tiaikid el rolel e a deleuill er kau me a Jehovah a mo melemolem el mesisiich.​—Psa. 1:2; Heb. 10:24, 25.

Aike el magazine er kid me a lmuut el bebil er a babier a motobed er sel Web site er kid. Tia el site a dirrek el ngar er ngii a suobel el sebechel el ngosuterir a rubekel, ruungalek, rengeasek, me a remekekerei el ngalek. A betok el telungalek a ngmai a klungiolir a lousbech aikang el ngar sel temel a omengull el telungalek er tir. A Web site er kid a ouchais el kirel a ileakl el prokuram, el ua Gilead graduation me a annual meeting, e dirrek el meskid a beches el chais el kirel a meklou el tellemall me a kerrekeriil el ngar er ngii a lerellii er a rechedal a Jehovah. (1 Pe. 5:8, 9) Tia el Web site a dirrek el kmal klou a ultutelel el dongu el kirel a urered er a berkel a klumech, e le ngmo uchul e ngsebechel a ungil chais el oberk el mo er aike el beluu el merrob a ureor er a berkel a klumech.

Me nguaisei, engdi a klaumerang er kau a sebechel el melemolem el mesisiich alta e ngdiak a techellem el mo er tia el Web site er kid. A blak a rengul el mesiou a mla oltobed a ungil a ildisel el babier me a rokui el Kristiano a ngmai aike el kall el lousbech. Misei e lak bo momdasu el kmo ngkmal kirem el mo omechar er a klekedall el uai a computer me a lechub e ng tablet me bo el sebechem el mo er a jw.org. A rebebil a di tir el print a bebil er aika el suobel er a Web site er kid el kirir tirke el chad el lodengelterir el kmo ngdiak a techellir el mo er a Internet. Engdi ngdiak el belkul a kmo a ongdibel a kirel el meruul el uaisei.

Kede oba omereng el saul el kirel a Jesus el oltaut er a telbilel el mo omeskid aike el dousbech me kede melemolem el mesisiich. Me ngsebechel el mo ulterekokl a rengud el kmo a Jehovah a mo melemolem el omeskid a ‘kall er sel belsechel’ el mo lmuut er a ulebengelel tia el mekngit el beluulechad er a Satan.