1, 2. A Jehovah ngera ngdilu er a Moses el mo meruul, e ngera el telbiil a lerirellii a Jehovah?

 KA MOLATK er kau el kirem el mo mengedecheduch er a kot el ngarbab el merreder el ngar er a chutem el omtechei er a rechedal a Dios. Ngmo ua ngerang a uldesuem? Ke locha kmal mo medakt e suebek a rengum e diak el sebechem el mengedecheduch. Ngmekerang a obo mongetmokl aike el tekoi el bo molekoi? E kau el oderchelel a Dios, ngmekerang e mo er ngii a klisichel a tekingem?

² A Moses a mla er a osisiu el blekeradel. Ngkmal mle ngariou a rengul el chad. (Ule. 12:3) Engdi a Jehovah a ulderchii el mo mengedecheduch er a Farao, el kedidai a rengul e mekngit a blekerdelel el chad. A Jehovah a dilu er a Moses me lebsang a tekingel el mo er a Farao. A tekingel a kmo bechititerir a rebekord el edei el miliol el chedal a Dios me bo lemimokl er a klsibai. (Exo. 5:1, 2) Ngsebeched el mo medengelii a uchul me a Moses a uleker er a Jehovah el kmo: “Ngak ak techang me ng kirek el mor a Farao el mo oltobed er a re chad er a Israel er a Ekipten?” A Moses a locha ulemdasu el kmo ngdiak a dechal el mo mengedecheduch er a Farao. Engdi a Jehovah a tilbir el mo er a Moses el kmo ngdiak di bo lengii el tang. A Jehovah a dilu el kmo: “Ak mo obengkem.”​—Exo. 3:9-12.

3, 4. (a) Ngera uchul me a Moses a mle medakt? (b) Ngera me ngsebechem el mo oba osisiu el uldasu el ua Moses?

 ³ Ngera uchul me a Moses a mle medakt? Ngmle medakt e le ngulemdasu el kmo a Farao a diak bo loumerang el kmo ngii a mera el oderchelel a Jehovah el Dios. A Moses a dirrek el mle medakt e le rechad er a Israel a locha mo oumededenger el kmo a Dios a ngileltii el mo mengetakl er tir el tuobed er a Ekipten. Ngdilu er a Jehovah el kmo: “Ngdi lsekum a re chad er a Israel a diak loumera er ngak, e diak lorrenges a kulekoi e dmu el kmo, ‘A RUBAK a dimlak le cholt er kau,’ e ak mekerang?”​—Exo. 3:15-18; 4:1.

⁴ E kau a kuk mekerang? Nglocha diak a ta el bo mongedecheduch er a ngarbab el merreder. Engdi ngmekerang a lsekum ngmeringel er kau el mengedecheduch er a rechad el ngar er a beluam el kirel a Jehovah me a Rengedel? A tekingel a Jehovah el mo er a Moses me a tekoi el dilubech er a uriul a sebechel el olisechakl er kid a kmal klou a ultutelel el suobel.

5. A Jehovah ngmilsang a Moses a ngerang er a chimal, e tiang ngmilekerang e ngosuir el mo ulterekokl a rengul? (Momes er a siasing er a uchelel a suobel.)

⁵ A Moses er a ledu er a Jehovah el kmo ngmle medakt e le rechad a diak bo loumerang er ngii, e a Dios a ngilsuir a Moses el mo ungil el meruul er a urerel. A Biblia a kmo: “Ma RUBAK a uleker er ngii el kmo, ‘Ngera ngar a chimam?’ Me ng ulenger el kmo, ‘Ng skors.’ Ma RUBAK a dilu el kmo, ‘Bideklii er a chutem.’ Ma Moses er a le bideklii, e ng ulebult el mo bersoech, me ng chiliis er ngii. E sola ma RUBAK a dilu er a Moses el kmo, ‘Bo bedir a kemril e mnguu el mor bab.’ Ma Moses a mlo terrob el mdechemii, me ng liluut el mo skors el ngar a chimal. Ma RUBAK a dula el kmo, ‘Tiakid cho bo mrellii me te mo oumera el kmo a RUBAK . . . a mle chemolt er kau.’” (Exo. 4:2-5) Me ngoeak a klisichel a Dios, e a skersel a Moses a ulebult el mo bersoech! Tia el mengasireng el tekoi a ochotii el kmo a Moses a mle oderchelel a Dios e oba klisichel a omerreder er Ngii. A Jehovah a dilu er ngii el kmo: “Tial skors el mobang a cho mnguu ele ke mo ousbech er ngii el mo meruul a ikel ongasireng.” (Exo. 4:17) Me tia el tekoi a uchul me a Moses a mle ulterekokl a rengul el mo mengedecheduch er a Farao me a rechedal a Dios el dirrek.​—Exo. 4:29-31; 7:8-13.

6. (a) Ngerang a kired el obang er a chimad sel domerk er a klumech, e ngera uchul? (b) Mosaod el kmo ngmekerang a tekingel a Dios e “di ngar” e “mesisiich.”

⁶ Sel domerk er a klemechel a Dios el obengterir a rebebil, e ngerang a dobang er a chimad? Kede obang a Biblia e semeriar el mo ousbech er ngii. A rebebil a omdasu el kmo a Biblia a di ungil el babier e merekong. Engdi a Biblia a lmuut el klou a ultutelel. Ngar er ngii a klemechel a Dios er a chelsel el me er kid el rokui. (2 Pe. 1:21) Ngdirrek el ouchais er kid el kirel a telbilel a Dios me aike el bo loruul a Rengedel. A Paulus a milluches el kmo: “A tekingel a Dios a di ngar e mesisiich.” (Monguiu er a Hebru 4:12.) Ngmekerang a tekingel a Dios e di ngar? A rokui el telbilel a Dios a mekekokil el mo tmaut e di kmedung e ngmo tmaut el rokui. (Isa. 46:10; 55:11) Me a chad sel bo lodengei aika el klemerang el tekoi el kirel a Tekingel a Dios, e aike el bo longuiu er a Biblia a ngar er ngii a klou el klisichel el bo lerellii er a klengar er ngii.

7. Ngmekerang a bo de ‘melemalt el mesaod a klemerang el dolisechakl’?

⁷ A Jehovah a mla meskid a di ngar el Tekingel el Biblia. Me kede ousbech er tia el babier el olecholt el kmo a tekoi el dolekoi a sebeched el oumerang er ngii e le ngmla er a Dios el mei. Sei a uchul me a Paulus er a lolisechakl er a Timothy, e ngmillisiich er ngii el mo “melemalt a losaod a klemerang el lolisechakl.” (2 Ti. 2:15) Me kede mekerang e mo meduch el ousbech er a Tekingel a Dios? Ngkired el mo kerekikl el melilt a bades el bo donguiu el mo er a rechad. A turrekong er kid a remutech a rengrir tirke el orrenges er kid. Me aike el tract el dengilai er a rak er a 2013 a mileketmokl el mo ngosukid el kirel tia el tekoi.

8. Ngera ngdilung a ta el odam el oungerachel a tekoi er a odingel a obliil el kirel aika el tract?

⁸ A rokui el beches el tract a di osisiu a oketmeklel. Me sel desuubii a rolel a dousbech er a chimong, e kede mo medengelii a rolel a bo dousbech ngii el rokui. A odam el oungerachel a tekoi er a odingel a obliil er a ta er a ongdibel el ngar er a Hawaii, U.S.A., a milluches el kmo: “Ngkmal dimlak ki molechesuar a klungiolel aika el beches el babier el ngar er a odingel a obliil me a dousioning el ngar er a buai.” Ngera uchul me aika el tract a kmal beot a dousbech? Ngomdasu el kmo ngbeot e le a ker me a nger el ngar er a medal aika el babier a uchul. Me a chad er a blai a diak le kora mo bekikl el mo diak el ungil el onger er ngii. Me ngika el odam a melekoi el kmo a rolel e aika el tract a mileketmokl a uchul me a lmuut el betok el chad a kongei el mengedecheduch e tia mo uchul a ungil el cheldecheduch er kid me tir.

9, 10. (a) Ngmekerang aika el tract er kid e mileketmokl el mo ngosukid el ousbech er a Biblia? (b) Ngera er aika el tract a kmal ngilsukau er a omesiungem e ngera uchul?

⁹ A derta er aika el tract a ngar er ngii a kmal ungil el mlengilt el bades el sebeched el chiuii el mo er a chad er a blai. El ua tract el kmo Ngsebechel el Mo Diak a Ringel? Ngungil el moker er sel ker el ngar er a medal tia el babier. A chad er a blai a sebechel el ngiltii “chochoi,” “ngdiak,” me a lechub “nglocha sebechel” el nger. Me a ngii di lengerang el nger er ngii, e bisii a tract e molekoi el kmo, “Tiakid a lolekoi er ngii a Biblia.” E sola e monguiu er a Ocholt 21:3, 4.

¹⁰ Me sel mousbech er a tract el Ngua Ngera Osengem el Kirel a Biblia? e ngdiak a ultutelel a kmo ngera er aika el edei el nger a lengiltii a chad er a blai. Ke bai di misii el mo er a chelsel tia el tract e kmo, “A Biblia a melekoi el kmo: ‘A Dios a dilokou a Chedaol Llechukl el rokui er a dingerir a re milluches.’” E sebechem el dochelii el kmo, “A mera er ngii, tia el bades a melekoi a lmuut el betok.” E sola e bisii a Biblia e monguiu er a 2 Timothy 3:16, 17.

11, 12. (a) Ngoeak a ngera el rolel e ngsebechem el ousbech aika el tract el rullii a omesiungem el lmuut el mo ungil? (b) Ngmekerang aika el tract e ngosukau sel omluut el mo oldingel er a rechad?

¹¹ Ngsebechem el ngiltii el mo menguiu a lmuut el bebil el tekoi er a tract. Tia di mo ultuil er a omerellel a chad er a blai. Engdi a ngii di lengera el rolel a uldesuir a rechad, e tir a mla nguu a klumech er a tract e kau a mla chemuiu a bebil el tekoi er a Tekingel a Dios el mo er tir. Me alta e ngdi sebechem el menguiu a tang me a lechub a eru el bades sel omkot el mo oldingel er tir,  engdi ngsebechem el lmuut el mong e melemolem er a cheldecheduch.

¹² Ngar er a ikrel a derta el tract e ngar er ngii a kekerei el dai el kmo “Tekoi el Sebechem el Melatk.” Ngar cheungel tia el kekerei el dai, e ngar er ngii a bades me a ker el sebechem el mo mesaod sel omluut el mong. Ngar er a chelsel a tract el Ngua Ngera Osengem el Kirel a Ngar Medad el Klebesei? e a ker a kmo: “Ngmekerang a Dios e rullii tia el beluulechad el mo ungil?” A Mateus 6:9, 10 me a Daniel 2:44 a llechukl er ngii. A ker el ngar sel tract el Ngmera el Sebechir a Rulekoad el Lmuut el Me Ngar? a kmo: “Ngera uchul me kede mo chuodel e mad?” A bades el Genesis 3:17-19 me a Rom 5:12 a llechukl er ngii.

13. Mosaod er a rolel a dousbech aika el tract el mo omuchel a omesubel a Biblia.

¹³ Aika el tract a mileketmokl el mo ngosukid el omuchel a omesubel a Biblia. A chad a sebechel el scan er sel QR Code * el ngar er a ikrel a tract, me ngmo omes er sel Web site er kid. Ngar er isei, e ngmo er ngii a techellel el kongei el mo mesuub er a Biblia el obengked. Aika el tract a dirrek el olecholt er sel babier el Ungil Chais el Mla er a Dios! A derta el tract a melutk el kirel a suobel el ngar er sel babier. El ua tiang, a tract el Ngtechang a Mera el Mengedereder er a Beluulechad? a melutk el kirel a suobel 5 er sel babier. Me a tract el Ngerang a Mo Uchul a Deurreng er a Telungalek? a melutk el kirel sel suobel 9. Aika el tract a mileketmokl el mo ngosukid el ousbech er a Biblia sel dekot el mengedecheduch er a rechad me sel deluut el mo oldingel er tir. Ngoeak tiaikid el rolel e ngsebeched el mo omuchel a lmuut el betok el omesubel a Biblia. Ngera kuk ta er a rolel e ngsebechem el mo ungil el ousbech er a Tekingel a Dios?

14, 15. Ke mekerang e oltirakl er a kerebil a Paulus el ngar er a omesiungem?

¹⁴ A Paulus a kmal mle semeriar el mo medengei a uldesuir a “re betok el chad” el ngar a omesiungel. (Monguiu er a 1 Korinth 9:19-23.) E ngera uchul? Ngmle soal el ngosuterir a “rokui el chad,” el rechad er a Judea me a rebebil, el mo suubii a klemerang me bo el sebechir el mo suobel. (Rel. 20:21) Me ngmekerang e sebeched el oltirakl a kerebil a Paulus sel dongetmokl er kid el mo omerk er a klumech el mo er a “rokui el chad”?​—1 Ti. 2:3, 4.

¹⁵ A bek el buil, e a Omesiunged el Kirel a Renged a ngar er ngii a ulekrael er a rolel a domuchel a cheldechedechad. Molasem el ousbech. E kuk mekerang a lsekum a rechad er a beluam a melatk el kirel a kuk ta er a tekoi? Mketmeklau el mo dulii a tekoi el bo lesemeriar er ngii. Ngera el tekoi a lolatk er ngii? Mngiltii a bades el mesaod er tia el tekoi. A odam el oldingel a ongdibel me a bechil a mesaod er a rolel a lousbech er a Biblia el ngar er a omesiungir el kmo: “A ruumesingd el chad a kongei er kemam el mo chiuii a ta el bades a lsekum aki mereched el mesaod a tekingam. A uriul er a ki mouetkeu er tir el oba belkais el Biblia er a chimomam, e aki menguiu er a bades.” Ngar er aika el ongingil el parakurab, e molatk a bebil er a ungil el suobel, ker, me a bades el bla lousbech a rebebil el ngar er a omesiungir. Nglocha mo soam el melasem a bebil er ngii el ngar er a beluam.

16. Mosaod er a rolel a dousbech er a Isaia 14:7 el ngar er a omesiunged.

¹⁶ A lsekum ke kiei er a basio el mui a delengerenger me a kdekudel el omeruul er a chelsel, e nglocha sebechem el oker er a chad el kmo: “Omomdasu e ngmo er ngii a taem el chais el ngar er a medal a simbung a kmo: ‘A beluulechad el rokir a olengull el diak a uldikel er ngii. Me a rechad a mengitakl el dmeu a rengrir’? Tiaikid a lolekoi er ngii a Biblia er a Isaia 14:7. Nguaisei, a Biblia a ngar er ngii a telbilel a Dios er a chelsel el kirel a taem er a budech el kmedu el mei.” E sola e mchiuii a ta er aike el telbiil el ngar er a Biblia.

17. Ngmekerang e sebeched el ousbech er a Mateus 5:3 el ngar er a cheldechedechad?

¹⁷ Ngmeringel er a rebetok el sechal el ngar er a beluam el mengetmokl aike el lousbech a telungalek er tir? A leuaisei, e ngsebechem el omuchel  a cheldecheduch el oker el kmo: “Ngua ngera el ildisel a udoud a kirel a chad el mengereker el mo uchul a deurreng er a telungalek er ngii?” A uriul er a longer a chad, e ngsebechem el kmo: “A rebetok el chad a mengereker a lmuut el betok er aikang engdi a telungalek er tir a diak lungil a rengrir er ngii. Me ngera el tekoi a usbechall?” E monguiu er a Mateus 5:3 e mouchais er ngii el kmo ngsebechem el mesuub er a Biblia el obengkel.

18. Ngmekerang e sebeched el ousbech er a Psalm 37:11 el mengelaod er a rebebil?

¹⁸ A rechad el ngar er a beluam te chuarm er a dirk dilubech el tellemall? Ngsebechem el omuchel el melekoi el kmo: “Ak mle er a blim e le kede rokui el kmal ousbech a ongelaod. (Monguiu er a Psalm 37:11.) Ngsebechem el omtab a eru el tekoi el soal a Dios el omeskid? Ngdeurreng me a budech. Ngmo mechelaod a rengud sel bo dodengei el kmo a Dios a soal a bo lungil a klengar er kid. Engdi tiang ngmekerang e mo uaisei?” E seikid e mousbech er a ungil suobel el ngar er a Ungil Chais el babier.

19. Mosaod er a rolel e ngsebeched el ousbech er a Ocholt 14:​6, 7 el mengedecheduch er a rechad el semeriar a tekoi er a klechelid.

¹⁹ Kau ke kiei er a basio el rechad er ngii a semeriar a tekoi er a klechelid? A leuaisei, e nglocha sebechem el omuchel a cheldechedecham el kmo: “A lsekum a anghel a milengedecheduch er kau, e ke mo orrenges aike el lolekoi? (Monguiu er a Ocholt 14:6, 7.) Ngika el anghel a melekoi el kmo ‘Mkebkellii a Dios e mongull el meluluuch er ngii el ulemeob er a eanged, ma chutem.’ Ke medengelii a ngklel ngike el ulemeob er a eanged me a chutem?” E monguiu er a Genesis 2:4 me a footnote el ochotii el kmo a ngklel a Dios a Yahweh me a lechub e ng Jehovah. E moker er ngii a lsekum ngsoal el mo medengei a lmuut el betok el kirel a Jehovah el Dios.

20. (a) Ngmekerang e sebeched el ousbech er a Osisechakl 30:4 el osisecheklii a chad el mo medengelii a ngklel a Dios? (b) Ngera el bades a soam el ousbech er ngii el ngar er a omesiungem?

²⁰ Ngsebechem el omuchel a cheldechedecham el obengkel a ngeasek el chad el kmo: “Ngsoak el mo chiuii a bades el oker er a kmal klou a ultutelel el ker. (Monguiu er a Osisechakl 30:4.) Ngdiak a chad el sebechel el remuul aika el tekoi, me tia el bades a melutk el kirel ngike el Ulemeob er kid. Ngmekerang e sebeched el mo medengelii a ngklel? Ngkmal ungil a renguk el mo ochotii tia el ngakl el ngar er a Biblia.”

21, 22. (a) Ngmekerang a ungil el bades e sebechel el ngodechii a klengar er a chad? (b) Ngera ke mla tibir el mo meruul er ngii el ngar er a omesiungem?

²¹ Ngkmal diak dodengei el kmo ngmo ua ngerang a omerellel a chad sel lerengesii a kmal ungil el bades. El ua tiang, a reteru el Sioning el ngar er a Australia a millengod er a chesmerel a ta el redil. Me a ta er tir a ulleker er ngika el redil el kmo: “Ke medengelii a ngklel a Dios?” e sola e milenguiu er a Psalm 83:18. Ngika el redil a dilu el kmo: “Ngkmal mlo mechas a renguk! A uriul er a lorael, e ak ulemekall el 35 el mael el mo er a stoang el mo omes a bebil el oidel a Biblia e dirrek el omes er tia el ngakl er a dictionary. Me a bocha kudengei el kmo a ngklel a Dios a Jehovah, e ak mlo omdasu el kmo ngera lmuut el bebil er a tekoi el diak kudengei.” Ngdi mle mereched er a uriul e ngii me a bechil a ulemuchel el mesuub er a Biblia e mlo metecholb er a uriul.

²² A Tekingel a Dios a ngar er ngii a klisichel el ngmodech a klengar er a rechad. Me a chad sel longuiu er a Biblia, e ngsebechel el mekurulii a mesisiich el klaumerang el kirel a telbilel a Jehovah. E tia el klaumerang a rullii el mo soal el oltaut aike el tekoi el losuub. (Monguiu er a 1 Thesalonika 2:13.) A klumech er a Biblia a lmuut el mesisiich er a ngii di el tekoi el sebeched el mo melekoi. Me ngar er a omesiunged, e ngkired el mo blechoel el ousbech er a Tekingel a Dios, el ngii a di ngar e mesisiich!