A Jehovah el Dios a ulemeob er a rebetok el miliol el anghel er a uchei er a lomeob er a rechad. (Job 38:4, 7) Tirka el anghel a kmal mesisiich el diak lemoues el mesiungel a Dios, e a lebebil er a taem e ngoldurokl er tir el mo omekrael e omekerreu er a remesiungel el ngar er a chutem. (Psalm 91:10, 11) Chelecha el taem, e a rechanghel a olengeseu er a rechad el mo ngmai a klungiolir er a ungil chais el lomerk er ngii a rultirakl er a Jesus.​—Monguiu er a Ocholt 14:6, 7.

Me kid, ngkired el meluluuch el mo er a rechanghel el olengit a ngeso? Ngdiak. A nglunguuch a ta er a rolel a omengull el di kirel el mo er a Dios. (Ocholt 19:10) A rechanghel a mesiungel a Dios a uchul me te oltirakl a ulekrael er ngii e diak loltirakl a tekingir a rechad. Sei a uchul me ngkired el blechoel el meluluuch el mo er a Dios el okiu a Jesus.​—Monguiu er a Psalm 103:20, 21; Mateus 26:53.

A rechanghel a di ua rechad el ulebeob el ngar er ngii a llemeltir el melilt el mo meruul a melemalt me a lechub a mekngit. Engdi ngklengiterreng, e le rebetok el anghel a mlo omtok er a Dios. (2 Petrus 2:4) Ngike el kot el mlo omtok a Satan, e a rebebil a uleltirakl er ngii e mlo mekngit el anghel. Me ngtelkib el taem er a uchei, e a Satan me a remekngit el anghel er ngii a mlodik er a eanged e ulebidokl el mei er a chutem.​—Monguiu er a Ocholt 12:7-9.

Me sera 1914 el mei e ngkmal mla mo klou a delengerenger me a kdekudel el omeruul el ochotii el kmo ngdi kmedung e a Dios a mo torob a urerel a Satan me a remekngit el anghel er ngii. E seikid e a Dios a mo olutii a Baradis er tia el chutem el oltirakl er sel di mla moktek er ngii.​—Monguiu er a Ocholt 12:12; 21:3, 4.