Ngika el milluches er a Biblia er a irechar a ulemes er a kekedeb el klengar er a rechad el kmal kakerous ngii me tia el beluulechad el di melemolem el medechel. Tia el beluulechad a mle sebechel el oltekau er a klengar el ngar er a chelsel, me ngmla mo betok el telael el rak el telecheroll a mo er ngii e mo nguemed. Engdi chelechang e a beluulechad a mla mengodech.

Uriul er a Ongeru el Mekemedil a Beluulechad e ngkmal di mle mereched el mengodech a betok el tekoi er a klengar er a rechad, e tiang a ketengel el ledubech a chouaitia el tekoi. Ngar er a chelsel a ta el telecheroll, e a rechad a mla mesang a klou el omeldechel a tekoi er a olidiuul, rolel a omengedecheduch el mo er a cheroid el basio, me a lmuut el bebil er a beches el tekoi, el mlo uchul a ngelsecheklel a keizai er a beluu. Me a rebetok a oldeu a rengrir er a blekerdelel a klengar el dimlak er a uchei. E a osisiu el taem, e a ildisir a rechad el ngar tia el beluulechad a mla mo edei el taem el chachisois.

Me nguaisei, engdi aika el rokui a ngar er ngii a lolemall er ngii er tia el beluulechad. A rebebil a dmu el kmo, a omerellir a rechad a uchul me ngdi kmedung e a beluulechad a mo diak el sebechel el oltekau a klengar el ngar er a chelsel. Te dirrek el ngar er ngii a re scientist el melekoi el kmo ngar er a chelsel aika el mereko el 200 el rak e a tekoi el loruul a rechad a kmal klou a bla lengedechii er a chutem.

A Biblia a omlaoch el kirel a taem el rechad a mo “melemall er a beluulchad.” (Ocholt 11:18) Me a rebebil a omdasu el kmo kede locha kiei er tia el taem er chelechang. Me a ker a kmo, ngmo ua ngera klungel el tellemall a  dirk mo er ngii? A rechad te mo tomellii a chutem me ngdiak el lluut er a smechel?

Ngmo er ngii a taem el tia el beluulechad a mo metemall e mo diak el sebechel el lmuut el mo ungil? A rebebil er a re scientist a melekoi el kmo ngmeringel er tir el mo medengei el kmo ngera el tellemall a mo er ngii el okiu a ngeldechel a eltel a beluulechad. Tiang a uchul me ngsuebek a rengrir el kmo a lsekum ngdi mereched el mengodech a eltel a beluulechad e ngsebechel el mo uchul a kmal klou el tellemall el mei er a beluulechad.

Ka molatk er a klou el kori el domekedong er ngii el West Antarctic Ice Sheet. A rebebil a oumerang el kmo a lsekum a eltel a beluulechad a di merael el mo mekeald e ngmo uchul e tia el kori a toker el diak el lluut el mo medecherecher. Tiang a uaisei, e le medecherecher el kori a oluut a didichel a sils. Engdi sel lorael tia el kori el mo meliliut, e a daob el ngar er a cheungel a me chuob, el ngii a diak el sebechel oluut er a didichel a sils. Me tia el smiich el mellemau el chiro er a daob a orreked a kleald, el mo uchul me ngdi mereched el toker a kori. Me sel lomuchel tia el blekeradel e ngdikea el sebeched el torebengii. Tiang a mo uchul me a klungel a dolech er a daob a merael el mo klou, el uchul a chelebuul el mo er a rebetok el dart el miliol el chad.

A betok el uldasu a mla meketmokl el mo mesmechokl aika el kmal meklungang el telemellel a beluulechad. A ta er a rolel el losaod er ngii a rechad el kemanget el taem a sustainable development. Me tiang a belkul a kmo aike el loruul a rechad el kirel a okurulel a keizai er a beluu me a ungil okurulel a klengar er a rechad a kirel el diak bo lengelakl er a klisichel a chutem el di ngii el omekbeches er ngii. Me ngera mlo rsel?

Ngmekngit a rengud, e le ngdi uai a blals er a udoud el chelebangel a kakerous el beluu, me a telemellel tia el beluulechad me ngdi meleketek. A rechad a di olekngemed aike el ngar er ngii er tia el beluulechad e diak lebsang a techellel ngii el beluulechad el di ngii el omekbeches er ngii. Ngar er ngii a sebechel el meketmokl el tekoi el kirel tia el omeruul? A ta er a ecologist a mle beches el melekoi el kmo: “A mera er ngii e ngkmal diak dodengei el kmo kede mekerang e mo ungil el mekerreuii tia el beluulechad.” Me tia el blekeradel a kmal di osisiu ngii me a lolekoi a Biblia el kmo: Ng “diak a chad el sebechel el chodereder a blekeklel.”​—Jeremia 10:23.

Me nguaisei, a Biblia a oterekeklii el kmo a Dios el ngika el Ulemeob a kmal diak lebechititerir a rechad me letemellii tia el beluulechad me a klengar el ngar er a chelsel.  A Psalm 115:16 a melekoi el kirel a Dios el kmo: A “beluulchad a le bilsterir a re chad.” Me tia el beluulechad er kid a ta er a “ungil e cherrungel sengk” el mla er a Demad er a eanged. (Jakobus 1:17) Me kid kede omdasu el kmo a Dios a meskid a kmal ungil sengk engdi ngar er ngii a temel e ngmo diak? Ngkmal diak el uaisei. Kede medengelii tiang e le tia el chutem a kmal mle ungil el ulebeob.

A babier er a Genesis el ngar er a Biblia a ouchais er a mui el omesodel el kmo ngmilekerang a Dios e ungil el mebii tia el beluulechad. Ngar er a uchelel e a beluulechad a losaod er ngii el “dimlak a teletelel e bechachau,” e a “ilkolk a milchelchebii ngii el klou el daob.” Engdi ngar er ngii a ileakl el omesodel a “daob” el ngii a klou a ultutelel el kirel a klengar er tia el chutem. (Genesis 1:2) E a ongingil e a Dios a dilu el kmo: “Le bor ngii a llomes.” (Genesis 1:3) Me ngbelkul a kmo a dichel a sils a diliich er a melidiul, me ngmlo er ngii a llomes el ketengel el meues er a chutem. E a ongingil e kede menguiu el kirel a omebelel a medirt el chutem me a daob. (Genesis 1:9, 10) E a uriul, e a “a bek el bedengel a dellomel el ngar ngii a tane ma ikel ourodech el kerrekar” a dilubech. (Genesis 1:12) Me seikid el taem ngmla mo er ngii aike el tekoi el usbechall me lolemolem a omeruul el ua photosynthesis el ngii a klou a ultutelel el kirel a klengar. Me ngera uchul me a Dios a mileob aika el rokui?

A profet el Isaia er a irechar a milsaod er a Dios el kmo: “Ng mirruul er a beluulchad e omekord er ngii, ng rirellii el meduch e diak le ngemed! Ng dimlak le rellii el di bechachau el beluu, ng bai basio el kirir a re chad el kiei er ngii.” (Isaia 45:18) Me ngbleketakl a moktek er a Dios el kmo, ngsoal a rechad a lekiei er tia el chutem el diak a ulebengelel.

Ngmekngit a rengud e le rechad a mle mekngit el ousbech er tia el klebokel el sengk er a Dios e mla tomellii. Engdi a moktek er ngike el Ulemeob a dirkak lemengodech. A ta el chad er a irechar a dilu el kmo: “A Dios a diak le ua re chad el omulak; ng diak le chad me lolodech er a uldesuel. A ikel letib a lotaut.” (Ulecherangel 23:19) Me a klemerang a kmo, a Dios a diak bo lebecherei tia el beluulechad me lemetemall, e ngbai di kmedung el mo ‘melemall er tirkel melemall er a beluulchad!’​—Ocholt 11:18.

Ngar sel merael a chisel el Cheldechedechal er a Rois e a Jesus Kristus a dilu el kmo: “Te ngeltengat ar medemedemek, le te mo oudiukes ra belulechad.” (Mateus 5:5, BT) E ngar er a osisiu el cheldechedechal e nguluuchais  er a rolel e ngmo mesmechokl a telemellel tia el chutem. Ngullisechakl er a rulebengkel el mo meluluuch el kmo: “A Rengedem le mei; bo le motaut a soam er a beluulchad el ua ingii er a eanged.” Ochoi, a Rengedel a Dios me a lechub e ngkabelment er Ngii a mo otutii a moktek er Ngii el kirel tia el beluulechad.​—Mateus 6:10.

A Dios a ouchais el kirel a mengasireng el tekoi el bo leketmokl a Rengedel el kmo: “Chelechang e ak remuul a rokui el tekoi el mo beches!” (Ocholt 21:5) Me tiang belkul a kmo, a Dios ngmo okngemedii tia el chutem e mtechir el oba beches? Ngdiak, e le mera er ngii tia el chutem a kmal ungil el ulebeob. A Dios a bai mo olekngemed er ‘tirkel melemall er a beluulchad,’ el melutk el kirir a remekngit el chad me aika el kabelment er chelecha el sils. Me tiang a mo mutechei er a “beches el eanged ma beches el beluulchad,” el melutk el kirel a Rengedel a Dios el beches el kabelment el ngar er a eanged, el mo mengedereder er a beluulechad el mui er a rungil el chad.​—Ocholt 21:1.

A Dios a mo olutii a beluulechad el mo er a smechel me bo el sebechel el melemolem el oltekau er a klengar er a chelsel. A ta er a milluches er a psalm a milsaod el kirel aike el bo loruul a Dios el kmo: “Koldurokl er a chull el olecholt er a ulekerreuim el kirel a chutem; ke rullii el mo kekeuii e ungil a chetemel.” Me ngokiu a klengeltengat er a Dios me a ungil el eltel a beluulechad, e tia el chutem a lmuut el mo baradis e mo oltobed a betok el ungil el kall.​—Psalm 65:9-13.

A doltirakl er a melechesel el Pyarelal, e a Mohandas Gandhi el ngii a mle merael a chisel el sensei er a klechelid er a India a dilu el kmo: “A beluulechad a mengetmokl aike el lousbech a rokui el chad, engdi ngdiak longetmokl el kirel a ngelbesel a rengul a chad.” A Rengedel a Dios a mo sumecheklii a uchul a mondai er tia el chutem el okiu sel bo lolodech aike el ngar er a chelsel a rengrir a rechad. A profet el Isaia a ulemlaoch el kmo, ngar er cheungel a omengederederel a Renged e ng “mo diak a ngeral kdekudel ma lechub e ng mekngit” el omerellir a rechad el melemall er a rebebil me a lechub e ngtia el chutem. (Isaia 11:9) A mera er ngii, chelechang e te betok el miliol el chad er a kakerous el beluu me a klengar a mesuub el kirel a ngarbab el llechul a Dios. Te mosisechakl el mo betik a rengrir er a Dios me a rengar er a bita er tir, e mo mereng a saul, e omekerreu er a beluulechad me aike el tekoi er a chelsel, e mesuub el mo kiei el oltirakl er a moktek er ngike el Ulemeob. Me te mengetmokl er tir el kirel a klengar er a chelsel a baradis el chutem.​—Olisechakl 12:13; Mateus 22:37-39; Kolose 3:15.

Ngar sel orokiolel a omesodel a babier er a Genesis el kirel a omebelel a beluulechad e ngmelekoi el kmo: A “Dios er a le ues a ikel bek el bla leruul e ng kmal mlo ungil a rengul.” (Genesis 1:​31) Me ngkmal diak lebechititerir a rechad me bo letemellii tia el chutem. Ngungil a rengud el medengei el kmo a Jehovah el Dios el ngike el betik a rengul el Ulemeob a mo melemolem el omekerreu er tia el chutem. Ngmla tibir el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psalm 37:29) Misei, e bo er a tkurrebab el sebechem el melasem el mo ta er tirke el “melemalt” el chad, e le ngdi tir a mo kiei er tia el chutem el mo cherechar.