1. Te milekerang a remengeteklir a rechad er a Katolik me a Protestant er a taem er a mekemad?

 A DIOS ngsoal a Rekristiano a bo loumekemad e lomekoad er a rechad er a bebil er a beluu? Ngar er a chelsel aika el mereko el 100 el rak e a rebetok el leko te Kristiano a mlo kaumekemad. A Rekatolik a mla mekodeterir a Rekatolik me a Reprotestant a mla mekodeterir a Reprotestant. Me a remengeteklel aika el klechelid a dirrek el mla omekngeltengat a cheldebechel er a resoldau me a klekedall er a mekemad. Me sera Ongeru el Mekemedil a Beluulechad e aika el kdekudel el omeruul a kmal mle blechoel el duubech.

2, 3. Te milekerang a Resioning er a Jehovah er sera Ongeru el Mekemedil a Beluulechad, me a lmuut el bebil el mekemad er a uriul er ngii? E ngera uchul?

² Te milekerang a Resioning er a Jehovah er sera Ongeru el Mekemedil a Beluulechad? Ngdimlak lolab el mo er a bitang me a lechub e ngbitang. Ngdimlak bo leteloi er sel mekemad el mlo er ngii er a delongelel aike el beluu. E ngera uchul? E le ngmle sorir el oltirakl er a osisecheklel a Jesus e oubltikerreng el mo er a rechad el di ua omerellel. A Jesus a dilu el kmo: “Cho bo mkaubltikerreng, e a rokui el chad a mo medengei el kmo kom obengkek.” (Jn. 13:35) Te dirrek el millatk a omellach er a Biblia el mengai er a tekingel a Paulus el mo er a ongdibel er a Korinth el sebechel el melutk el kirel a blekeradel el lechillebangel er ngii.​—Monguiu er a 2 Korinth 10:3, 4.

 ³ A remera el Kristiano a oltirakl a ulekrael er a Biblia, me a ukltkir a diak lekengei er tir el mo teloi er a mekemad me a lechub e te mengetmokl er tir el kirel. E tiaikid el omerellir a uchul me a rebetok el telael er tir a mla chobengelii a ultok. A remeklou me a remekekerei el sechal me a redil a mla chuarm er a kelebus me a lechub e te mlorimel el mo meruul a meringel el ureor. Sera Ongeru el Mekemedil a Beluulechad er a taem el rechad er a Nazi a milengedereder er a beluu er a Dois, e te ulemekoad er a rebebil er tir. Me alta e a Resioning er a Jehovah el ngar er a Europe a mlodechelakl, engdi ngdimlak lobes er a ngerechelir el mo omerk er a ungil chais el kirel a Rengedel a Jehovah. Me te uluusbech a bek el techall el mo omerk er a klumech, el mo lmuut er a taem el bo lekelebus, me a lechub e te ngilititerir el mo er aike el kmal meringel el kelebus er a rechad er a Nazi, me a lechub e te mlodik er a belurir. * Me sera rak er a 1994, e a Resioning a dimlak el chelsechusem er a klou el koadelchad el mlo er ngii er a beluu er a Rwanda. Te dirrek el dimlak lolab el mo er a bitang me a bitang er a mekemad er sel di mla beluu er a Yugoslavia.

4. Ngua ngera uldesuir a rebetok el chad el kirel a omerellir a Resioning er a Jehovah el diak leteloi er a mekemad?

⁴ A omerellir a Resioning er a Jehovah el diak lolab el mo er a bitang me a bitang er a taem er a mekemad a uchul me a rebetok el meliuekl er a beluulechad a melekoi el kmo, te mera el betik a rengrir er a Dios me a retonari er tir me te mera el Kristiano. Ngera lmuut el bebil er a uchul me a rechad a oumerang el kmo a Resioning er a Jehovah a mera el Kristiano?

5. Ngera el beches el tekoi a mle kirir a redisaiplo er a Jesus el meruul er ngii?

⁵ A Jesus a mileketeklii el kmo a berkel a ungil chais er a Rengedel a Dios a sel kot el klou a ultutelel el ureor el ngar er tia el chutem. Me ngdi mle telkib el taem er a uriul er a lomuchel er a omesiungel e ngmillilt er a 12 el disaiplo er ngii el mo mechelii a ureor er a berkel a klumech el ngii a kirel el ketmekill er a beluulechad el rokir. E a uriul, e ngliluut el osisecheklterir a 70 el disaiplo el mo meruul er tia el ureor. (Lk. 6:13; 10:1, BT) Ngullisechakl er tir el mo meduch el olisechakl. Me a uchelel e ngdi mle kirir el olisechakl er a rechad er a Judea, engdi uriul e ngdilu er tir el mo omerk er a klumech el mo er a rechad er a bebil el beluu. Me tiang a kmal mle beches el tekoi el kirir a redisaiplo el chad er a Judea el meruul er ngii!​—Rel. 1:8.

6. Ngera ngilsuir a Petrus el mo medengei el kmo a Jehovah a diak longetukel er a rechad?

⁶ A Petrus a mlodurech el mo er a blil a Kornelius el ngii a dimlak el blotk el chad er a ngodech el beluu. Me a Petrus a mlo medengei el kmo a Dios a diak longetukel er a rechad. Ngbai soal a rechad el rokui a bo lerengesii a klemerang e bo lekengei er ngii. Me a Petrus a kilengei me a Kornelius me a telungalek er ngii a mlo metecholb. Me tirkang tirke el kot el dimlak leblotk el chad er a ngodech el beluu el mlo Kristiano. (Rel. 10:9-48) Me ngulemuchel er seikid el sils e a Petrus me tirke el bebil er a redisaiplo er a Jesus a mlo omerk er a klumech el mo er a rechad er a bek el beluu.

7, 8. Te mla mekerang a Resioning er a Jehovah me bo el sebechir a rebetok el rongesii a ungil chais? (Momes er a siasing er a uchelel a suobel.)

⁷ Tirke el omekrael er a cheldebechelel a Jehovah er chelechang a blak a rengrir el mengetmokl er a ureor el omerk er a ungil chais er a beluulechad el rokir e olisechakl er a rechad. Chelecha el taem e te ngar er ngii a kmeed er a 8 el miliol el Sioning er a Jehovah el meliuekl er a beluulechad. Te blak a rengrir el omerk er a klumech el ousbech a betok er a 600 el omelekoi, e tia el ildois a di meleketek. Te oldingel a obliil e mengedecheduch er a rechad el ngar er a buai. Me a lebebil er a taem e te ousbech a tebel me a cart el olecholt a babier el ngar er a kakerous el omelekoi. Me a rechad a sebechir el dongcheterir a Resioning er a Jehovah e le ngdi tir el tang a omerk er a klumech el okiu aika el rolel.

⁸ A cheldebechelel a Jehovah a mla olisechakl er a kuk betok er a 2,900 el rudam me a rudos el  mo meduch el oleiuid a Biblia me a babier el mengai a uchetemel er a Biblia. Te dirrek el oleiuid a babilenged el mo er a omelekoi el diak lodengelii a rebetok. El ua tiang, a Resioning er a Jehovah er a beluu er a Sebangiol a oleiuid a babier el mo tekoi er a Catalan. Telkib el taem er a uchei e a rebetok el chad a mlo melekoi a tekoi er a Catalan el ngar er a beluu er a Valencia, Alicante, Balearic Islands, me a Andorra. Me chelecha el taem e te betok el miliol el chad a melekoi er tia el omelekoi. Me a urerir a Resioning er a Jehovah el oleiuid a babier el mo tekoi er a Catalan a uchul me tirka el chad a sebechir el ngar er a miting e menguiu a babier el remutech a rengrir e le ngar er a omelekingir.

9, 10. Ngera el tekoi a meketeklii el kmo a cheldebechelel a Jehovah a soal a rokui el chad a bo lodengelii a klemerang?

⁹ Tia el ureor el oleiuid a babier e olisechakl er a rechad el melekoi a kakerous el omelekoi a meketmeklang er a beluulechad el rokir. El ua tiang, ngar er a beluu er a Mexico e a ruumesingd el chad a melekoi a tekoi er a Sebangiol, engdi a rebetok el chad a melekoi a kuk ngodech el omelekoi sel lengar er a rekeblirir. Me a ta er aika el omelekoi a Maya. Tirke el oleiuid a babilenged el mo tekoi er a Maya a mlo kiei er a telkib er tia el beluu el rechad er ngii a melekoi er tia el omelekoi. Me tirka el oleiuid a bek el sils el orrenges e mengedecheduch er a rechad el melekoi a tekoi er a Maya a uchul me ngsebechir el ungil el oleiuid el ousbech aike el tekoi el lodengei a rechad er a Maya. E kuk ngar er a beluu er a Nepal, e a rechad a melekoi a bekord el 120 el omelekoi. Engdi te betok er a 10 el miliol er tirke el 29 el miliol el chad er tia el beluu a melekoi a tekoi er a Nepal, e te betok a dirrek el medengelii tia el omelekoi alta ngdiak el blechoel el ousbech er ngii. Me chelechang e a rudam er kid a dirrek el oleiuid a babilenged el mo tekoi er a Nepal.

¹⁰ Me tia el ureor el oleiuid a babier a meketeklii el kmo a cheldebechelel a Jehovah a oltaut a ngerechelel el mo omerk er a ungil chais el mo er a beluulechad el rokir. A Resioning er a Jehovah a mla remous a betok el miliol el tract, brochure, me a magazine el diak locheraol. Tia el ureor a bai meketmokl el okiu a tengetengir a Resioning er a Jehovah. Te oltirakl er a ulekrael el lebilsterir a Jesus el kmo: “Ng dimlak momechar a ikel ilekor kemiu, me lak bo locheraol a cho momesterir a re chad.”​—Mt. 10:8.

11, 12. Ngua ngera uldesuir a rebetok el chad e le kid el omerk er a klumech er a beluulechad el rokir?

¹¹ A Resioning er a Jehovah a mesisiich el oumerang el kmo te mla metik er a klemerang, me te ousbech a klisichel a bedengir me aike el ngar er ngii er tir el omerk er a klumech el mo er a rekakerous el chad er a bek el beluu. A rebetok er  tirka el Sioning a mla omekbeot a klengar er tir, e milsuub a ngodech el omelekoi me a siukang. Me a urered el omerk er a klumech e olisechakl er a rechad el meliuekl er a beluulechad a uchul me a rebetok a melekoi el kmo a Resioning er a Jehovah a mera el oltirakl er a Jesus Kristus.

¹² A Resioning a meruul aika el rokui e le te oumerang el kmo te mla metik er a klemerang. Engdi ngera lmuut el bebil el uchul me a rudam me a rudos er kid a oumerang el kmo te mla metik er a klemerang?​—Monguiu er a Rom 14:17, 18.

13. Te mekerang a Resioning er a Jehovah e melemolem el mengikiid er a cheldebechellir?

¹³ Ngkakerous a uchul me a rudam me a rudos er kid a oumerang el kmo te mla metik er a klemerang. A ta el odam er kid el mla mo betok el rak el losiou er a Jehovah a dilu el kmo: “A cheldebechelel a Jehovah a mo er a tkurrebab el sebechel el meruul a tekoi me lolemolem el klikiid tia el cheldebechel, el diak lultuil er a kmo ngtecha el chad a kirel el nguu a uleklatk me a lechub e ngomellach.” Te mekerang a rechedal a Jehovah e melemolem el klikiid? A derta er tir a blak a rengrir el olengesenges a tekingel a Dios el medung er a Biblia e oukerebai er a Jesus me a redisaiplo er ngii. Te di mekesai el Sioning a mlo diak lekengei el oltirakl a llechul a Dios el uchul me ngmilsuld a ngklir, el belkul a kmo te mlo diak lechedal a ongdibel. A ruumesingd er a Resioning er a Jehovah a kiei el omerellir a klikiid er a osengel a Jehovah. Me a rebetok el tir a mirruul a mekngit er a ngar er a mong a mla ngmodech a omerellir e chelechang e te kiei el oltirakl a llechul a Dios.​—Monguiu er a 1 Korinth 6:9-11.

14. Te milekerang a rebetok el milsuld a ngklir, e ngera mlo rsel?

¹⁴ A doltirakl er a Biblia e a Rekristiano a kirir el chorideterir tirke el diak lekengei el olengesenges er a Dios me ngmo diak el chedal a ongdibel. Me ngdmeu a rengud e le rebetok el telael el milsuld a ngklir a uluuchel a rengrir er a kngterir e mla lmuut el me soiseb er a ongdibel. (Monguiu er a 2 Korinth 2:​6-8.) Me a ongdibel a melemolem el klikiid e le Resioning a melasem el oltirakl er a Biblia er a bek el taem. Tiang a ta er a tekoi el oterekokl a rengrir el kmo a Dios a kongei er a cheldebechellir. Me alta e a betok el ikelesia a di mechititerir a rechedal me di lengar aike el sorir, engdi a Resioning a kiei el oltirakl a llechul a Jehovah. Me tiaikid a mla rulleterir a rebetok el chad el mo oumerang el kmo a Resioning er a Jehovah a oba klemerang.

15. Ngera uchul me a ta el odam a oumerang el kmo ngmla metik er a klemerang?

¹⁵ Ngera uchul me a rebebil el Sioning a oumerang el kmo te mla metik er a klemerang? A ta el odam el 54 a rekil a mla mesiou er a Jehovah er a taem er a klengeasek er ngii. Ngdmu el kmo a klaumerang er ngii a ultuil er a edei el uchetemel a tekoi el: (1) ngar er ngii a Dios, (2) a Biblia a babilengel a Dios, e (3) a Resioning er a Jehovah a meruul a soal a Dios er a beluulechad er chelechang. Ngdmu el kmo: “Cherengel a taem el kusuub, e ak di blechoel el merriter aika el uchetemel a tekoi el kmo ngmesisiich a omekedecheraol er ngii me a lechub e ngdiak. Me sel lorael a taem el mong e a derta er aika el tekoi a lmuut el obeketakl el klemerang, me tiang a mla smisichii a  klaumerang er ngak e mla oterekeklii a renguk el kmo ak mla metik er a klemerang.”

16. Ngera uchul me a ta el odos a oumerang el kmo ngmla metik er a klemerang?

¹⁶ A ta el bechiil el odos el mesiou er sel klou el obis er a Resioning er a Jehovah el ngar er a New York a milsaod er a uchul me ngoumerang el kmo ngmla metik er a klemerang. Ngdmu el kmo, tia el cheldebechel a di ta el cheldebechel el ouchais er a rechad el kirel a ngklel a Jehovah el llechukl er a Biblia el bekord el 7,000 el taem. Ngdirrek el kmal soal sel bades er a 2 Kronika 16:9 el dmu el kmo: “A osengel a RUBAK a mekelekelii a beluulchad el rokir, me ng omesterir a klisichir tirkel blak a rengrir er ngii.” Ngmelekoi el kmo: “A klemerang a mla ngosukak el mo mesiou er a Jehovah el oba renguk el rokir, me ngmo sebechel el meskak a klisichel. Me ngkmal mekreos er a osengek a deleuill er ngak me a Jehovah. Ak dirrek el oba omereng el saul el kirel a rolel e a Jesus a olengeseu el olisechakl er kid el kirel a Dios e le ng ngosukak el mo outekangel.”

17. A ta el odam el dimlak loumerang er a Dios er a uchei ngulterekokl a rengul el kirel a ngerang, e ngera uchul?

¹⁷ A ta el odam el dimlak loumerang er a Dios er a uchei a dilu el kmo: “A rokui el bleob a oterekeklii a renguk el kmo a Dios a soal a rechad a bo loldeu a rengrir er a klengar er tir, misei a uchul me ngdiak lomechei a ringel me di lolemolem. Me alta blekeradel er a beluulechad a mekngit e merael el mengal mo mekngit, engdi a rechedal a Jehovah a di meleketek a klaumerang er tir, me a blakerreng me a bltikerreng er tir. Me ngdi okiu a klisichel a Jehovah e ngsebechel tia el mengasireng el tekoi el meketmokl.”​—Monguiu er a 1 Petrus 4:1-4.

18. Ngera uchul me tirka el teru el odam a oumerang el kmo te mla metik er a klemerang? Ngua ngerang a uldesuem el kirel tiang?

¹⁸ A kuk ta er a odam el mla mo betok el rak el losiou er a Jehovah a milsaod er a uchul me ngoumerang el kmo ngmla metik er a klemerang. Ngdilu el kmo: “Ngmla mo betok el rak el kusuub me ak medengei el kmo a Resioning er a Jehovah a mera el oukerebai a rokui el omerellir a rekot el Kristiano. Ak dirrek el mla mesarech a betok el beluu me ak mla mesang a kltarreng er a delongelir a Resioning er a Jehovah er a beluulechad el rokir. Me a klemerang er a Biblia el kudengelii a mla rullak el kmal mo dmeu a renguk.” A lmuut el ta er a odam el 60 me a derengel a rekil a dilu el kmo a Resioning er a Jehovah a mesisiich el oumerang er a Jesus. Ngmilsaod el kmo: “Kede kerekikl el mesuub er a klengar er a Jesus me a omesiungel me kede ungil el medengelii a blekerdelel. Kede mla ngmodech a blekerdelel a klengar er kid me bo el sebeched el olekeed er kid er a Dios el okiu a Kristus Jesus. Kede oumerang el kmo a olubet el tengetengel a Kristus a di ta el tekoi el mo uchul a osobel. E kede dirrek el medengei el kmo ngmilekiis er a kodall e le te mla er ngii a rechad el milsang er a uriul er a lebekiis.”​—Monguiu er a 1 Korinth 15:3-8.

19, 20. (a) Ngera el ngerachel a lulsaod er ngii a Paulus er a babilengel el mo er a ongdibel er a Rom? (b) Ngkirir el mekerang a rokui el mesiungel a Jehovah?

¹⁹ A remera el Kristiano a kmal betik a rengrir er a rechad. Me ngkmal kired el ouchais er a rechad aike el klemerang el tekoi el bla desuub. A Paulus a uluuchais er a rengar er a ongdibel er a Rom el kmo, a remera el oltirakl er a Jesus a ngerechelir el mo omerk er a klumech. Ngmilluches el kmo: A “lsekum ke dulii er a ngerem el kmo, ‘A Jesus a Rubak,’ e oumera er a chelsel a rengum el kmo a Dios a ulekisii er a kodall, e ke mo suobel. Ele chad a oumera er a chelsel a rengul, me ng muklemalt er medal a Dios, e melekoi a loumera el tekoi me ng suobel.”​—Rom 10:9, 10.

²⁰ A Resioning er a Jehovah a ulterekokl a rengrir el kmo te mla metik er a klemerang e dirrek el medengei el kmo te oba ileakl el techall el mo ouchais er a rechad er a ungil chais el kirel a Rengedel a Dios. Mada mrellii a turrekong er kau el diak di bo molisechakl er a rebebil el kirel a Biblia, e ke dirrek el ochotii el okiu a blekerdelel a klengar er kau el kmo ke oumerang el kmo ke mla metik er a klemerang.