A David a milluches el kmo: “Ngdi kmal dirkak kisa tal ungil chad el mechoit er a RUBAK, ma lechub e a re ngelekel di lolengetngit a kall.” Me tia el tekingel a ledillii el okiu a tekoi el dilubech er a klengar er ngii. Ngmle ungil el medengelii a ulekerreuil a Dios el mo er ngii. (Psa. 37:25) Engdi a tekingel a dimlak lebelkul a kmo a remesiungel a Dios a dirkak a ta el bo lesengerenger me a lechub e te di melemolem el ngar er ngii a kelir.

Ngmla er ngii a taem el David a mlo chelebangel a meringel el blekeradel, el ua sel taem er a lechiis er a Saul. Ngmlo diak a kelel me ngmlo olengit a blauang el bo longang ngii me a rechedal. (1 Sa. 21:1-6) Me ngar tiaikid el taem e ngullengit a kall, engdi ngmle ungil medengei el kmo a Jehovah a dirkak lechitii. Ngar er a Biblia e ngdiak a ta el taem el debetik er ngii el kmo a David a mle kirel el di olengetngit a kall er a tkul a rael.

Ngar er a Mateus 6:33, e a Jesus a tilbir el kmo, a Dios a mo mesterir aike el lousbech a reblak a rengrir el mesiungel el tir a nguu a Renged el mo kot er a klengar er tir. Ngdilu el kmo: “Bo le blak a rengmiu er a Rengedel a Dios ma ikel soal, e a ikal rokui [el uldimukl er ngii a kall, ilumel, me a bail] a bo lebeskemiu.” Me nguaisei, engdi a Jesus a dirrek el mileketeklii el kmo a ultok a sebechel el mo uchul e a ‘rudam’ er ngii a mo songerenger. (Mt. 25:35, 37, 40) E tiang a dilubech el mo er a apostol el Paulus. Ngmla er ngii a taem el blo lesengerenger e meched a rengul.​—2 Ko. 11:27.

A Jehovah a subedid el kmo kede mo modechelakl el okiu a kakerous el rolel. Ngsebechel el mechikid me kede mo chuarm me bo el sebeched el olengeseu el onger a otelecheklel a Diabelong. (Job 2:3-5) El ua tiang, a rebebil el kldemed el Kristiano a mlo chelebangel a meringel el ultok el ua tirke el mlekelebus er a meringel el kelebus er a Nazi. Tirka el chad er a Nazi a kmal mle mekngit el omeka er tir me te kmal mlo songerenger, e le te millasem el mengitechut er a blakerreng er tir el mo er a Dios. Me tirke el blak a rengrir el Sioning a millemolem el olengesenges er a Jehovah, e Ngii a dimlak lechititerir. Ngdi kilengei me te mlo chuarm el di ua omerellel el mechititerir a rokui el Kristiano me te mo chuarm a kakerous el rolel a ongarm. Me nguaisei, engdi a Jehovah a ngosuterir tirke el rokui el mo chuarm el kirel a ngklel e di outekangel. (1 Ko. 10:13) Me ngsoad el melatk a tekoi el medung er a Filipi 1:29 el kmo: “Kom rruul el kiriu el mesiou er a Kristus, el diak di moumerang er ngii e le merekong, e ko bai dirrek el chuarm el kirel.”

A Jehovah a tibir el kmo ngmo obengterir a remesiungel. El ua tiang, a Isaia 54:17 a kmo: “Ngdi diak a klekedall er a mekemad el merruul el mo sebechel tomellau.” Tia el telbiil me a lmuut el bebil a oterekeklii el kmo a Dios a mo omekerreu er a rechedal el ua ta el cheldebechel. Me nguaisei, engdi a derta el Kristiano a sebechel el mo mukcharm me a lechub e ngmad el klaumerang er ngii a uchul.