1, 2. Ngera uchul me a uldidellel a rsechel a redil a mle kirel el mukerreu?

 A LSOAD el mo medengelii a rolel e a moktek er a Dios a mo tmaut e ngkmal kired el mo ungil el medengelii a belkul sel kot el ulaoch el medung er a Biblia. A Dios a dillii tia el ulaoch el ngar er a Eden el kmo: “Kau [el Satan] ma redil a mo kauketui, ma ruldidellel a rsechem ma ruldidellel a rsechel a redil a di mo blechoel el kaucherarou.” Ngmo ua ngera berredel tia el kltui? A Jehovah a dilu er a Satan el kmo: “A uldidellel a rsechel [a redil] a mo rukemii a bdelum e kau a mo mengchii a kotel ochil.” (Gen. 3:15) Ngkmal mo mesisiich tia el kltui er a delongelel a bersoech me ngika el redil a uchul me a Satan a mo er a tkurrebab el sebechel el mo okngemedii a uldidellel a rsechel a redil.

² Tiaikid a uchul me a ta er a milluches er a Psalm a milluluuch el kirir a rechedal a Dios el kmo: “Momes, a re cherrouem a ouedikel, tirkel ouketui er kau a omtok a tekoi. Tomart a tekoi el lolib el omtok er a re chedam, te melib el omtok er tirkel mo mcheliu er tir. Te kmo, ‘Mei me di dokngemedii a belurir.’” (Psa. 83:2-4) A Satan a kmal mle soal el olekngemed er a klengelakel er a Mesias me a lechub e ngmelemall er sel omengull er tir el mo er a Dios. Me a Jehovah  a riruul a lmuut el bebil er a telbiil el mo omekerreu er a uldidellel a rasech e dirrek el oterekeklii el kmo a Rengedel a Mesias a mo kutmeklii a moktek er ngii.

3, 4. (a) Ngulemuchel el oureor er oingerang a Llach er a telbiil, e te kilengei el mo mekerang a rechad er a Israel? (b) A Llach er a telbiil ngmileketmokl el mo omekerreu er a ngerang?

³ Cherengel a taem e a rengelekel a Abraham me a Isak, me a Jakob a di mirrael el mo obdois el mo betok el miliol, me a Jehovah a childelterir e toketekii a renged er a Israel. A Jehovah a ulekiu a Moses e meruul a telbiil el obengkel tia el renged. Ngmilsterir a Llach e a rechad er a Israel a kilengei el olengesenges er ngii. A Biblia a kmo, a Moses a “ngiluu a babier er a telbiil e milenguiu er ngii el klou a ngerel el mor a re chad me te dilu el kmo, ‘Aki mo meruul a ikel rokui el bla le dung a RUBAK; aki mo olengesenges er ngii.’ Isei e a Moses a ngilai a [rsechel a sechal kerbou] el meliim er a re chad. Ng dilu el kmo, ‘Tiakid a rasech el omtebechel a telbiil el le rirellii a RUBAK el obengkemiu er ser a le beskemiu a ikal rokui el llach.’”​—Exodus 24:3-8.

⁴ A Llach er a telbiil a ulemuchel el oureor er a rak er a 1513 er a uchei er a Kristus. Me ngokiu tia el telbiil e a Jehovah a millilt er a renged er a Israel el mo ileakl el chedal. Ngii a mo oukerrekeriil er tir, mesterir a llecherir, e mo King er tir. (Isa. 33:22, 23; Jak. 4:12) Me a reksi er a rechad er a Israel a meketeklii el kmo ngera mo duubech sel lolengesenges a llechul a Dios a rechad me a lak. A llechul a Dios a ulekebai er a rechad er a Israel me lak bo longull a ngodech el chelid me a lechub e bo lebecherir a rechad el mengull a ngodech el chelid. Me a Llach a mileketmokl el mo omekerreu er a klengelakel er a Abraham me lak bo el chelsechusem er a klsuul el omengull.​—Exo. 20:4-6; 34:12-16.

5. (a) Ngera el techall a mlo er a rechad er a Israel el okiu a Llach er a telbiil? (b) Ngera uchul me a Dios a ultngeklii a renged er a Israel?

⁵ Ngokiu a Llach er a telbiil, e te mla er ngii a rebebil el milengilt el mo prist. E tirka el prist a mle okesiul a ta er a kleprist el mo er ngii, el tir a mo mesiou er a rechad el okiu a lmuut el ungil el rolel. (Heb. 7:11; 10:1) Me a doltirakl er a Llach er a telbiil, e a renged er a Israel a mla er ngii a ileakl el techellir el mo “chimol beluu el prist.” Engdi ngmle kirir el olengesenges a llechul a Jehovah me bo el sebechir el nguu tia el techall. (Monguiu er a Exodus 19:5, 6.) Engdi a rechad er a Israel a dimlak lolengesenges. Me sera lemei a Mesias, el ngike el kot el klou a ultutelel el chad er a uldidellel a rsechel a Abraham, e te dirrek el dimlak lekengei er ngii. Te bai ultngeklii, me a Dios a dirrek el ultngeklterir.

6. Ngera mle moktek er a Llach?

⁶ A renged er a Israel a dimlak bo el “chimol beluu el prist” e le ngdimlak lolemolem el  olengesenges er a Dios. Engdi tiang a diak el belkul a kmo ngmla er ngii a telemellel a Llach. A Llach a ulemekerreu er a uldidellel a rasech e ngilsuterir a rechad el mo sebechir el dongchii a Mesias. Me sera lemei er a chutem a Kristus e a rechad a dilengchii, me ngtilaut a moktek er a Llach. Me a Biblia a kmo: A “Kristus a rirellii a Llach el mo diak a klisichel.” (Rom 10:4) Me te rua techang a mo nguu tia el techall el mo “chimol beluu el prist”? A Jehovah a rirellii a lmuut el ta er a telbiil el toketekii a beches el renged.

7. A Jehovah ngulemlaoch el kirel a ngerang el okiu a Jeremia?

⁷ A betok el rak er a uchei er a bo lak a klisichel a Llach er a telbiil, e a Jehovah a ulemlaoch el okiu a profet el Jeremia el kmo, ngmo meruul er a “beches el telbiil” el obengkel a renged er a Israel. (Monguiu er a Jeremia 31:31-33.) E tia el telbiil a mo ngodech er a Llach er a telbiil e le ngmo diak a omelenget el charm el kirel a klausubes er a klengit. Tiang mekerang e mo uaisei?

8, 9. (a) A rsechel a Jesus ngmo uchul a ngerang? (b) Ngera el techall a mlo sebechir el nguu tirke el teloi er a beches el telbiil? (Momes er a siasing er a uchelel a suobel.)

⁸ A betok el dart el rak er a uriul, e a Jesus a miluchelii a Chedaol Blsoil er a Rubak er a Nisan 14 er a rak er a 33. Ngmilsaod el kirel a kob el bilong el mo er tirke el 11 el blak a rengrir el apostol er ngii el kmo: “Tial kob a beches el telbilel a Dios el mo mutebechel er a rsechek el mo modars el kiriu.” (Lk. 22:20) Me a doltirakl er a babier er a Mateus e a Jesus a dilu el kmo: “Tia ia rsechek el melisiich er a telbilel a Dios. Ngiil rsechek a mo metenget el kirir a re betok el chad el kirel el melubet a klengit.”​—Mt. 26:27, 28.

⁹ A rsechel a Jesus a rullii a beches el telbiil el mo oureor. Tia el rasech el di mle ta el le modars a mo uchul a klausubes el kirel a kngterir a rebetok el diak a ulebengelel. A Jesus a diak el teloi er a beches el telbiil. Ngdiak a kngtil, me ngdiak lousbech a klausubes. Engdi a Dios a sebechel el ousbech er a rsechel a Jesus el mo uchul a klungiolir a rechad. Ngdirrek el sebechel el ousbech er a chedaol klisichel el mengilt er a rebebil el blak a rengrir el chad e merodel er tir el mo “ngelekel a Dios.” (Monguiu er a Rom 8:14-17.) A Jehovah a sebechel el omes er tir el di ua Ngelekel el Jesus el diak a kngtil. Me tirka el ngellitel a ‘mo ngma dikesir el obengkel a Kristus.’ Ngdirrek el mo er ngii a techellir el mo “chimol beluu el prist,” el ngii sel techall el lurridii a renged er a Israel. A apostol el Petrus a milsaod er tir el kmo: “Kemiu a mlengilt el rasech, e king el priist, el chedaol renged, e chad el bereked ra Dios, el kirel me momerk a chetengel chomerellel ngikel milekedongemiu era ilkolk losisebemiu ra mengasireng el llemesel.” (1 Pe. 2:9, BT) Me ngbleketakl el kmo tia el beches el telbiil a kmal klou a ultutelel! E le ngmo uchul e a redisaiplo er a Jesus a mo uldimukl er a otutel a telbiil el kirel a uldidellel a rsechel a Abraham.

10. Ngulemuchel el oureor er oingerang a beches el telbiil, e ngera uchul me ngdimlak loureor er a uchei?

¹⁰ A beches el telbiil a dimlak lomuchel el oureor er sel blsechel a Chedaol Blsoil er a Rubak. E ngera uchul? E le Jesus a mle kirel el lmuut el mo er a eanged e odersii a kerresel a rsechel el mo er a Dios. Me a lmuut el tang, tirke el ‘mo ngma dikesir el obengkel a Kristus’ a mle kirir el mengilt el okiu a chedaol klisichel a Dios. Me a beches el telbiil a mlo oureor er sera Pentekost er a rak er a 33 er sel taem el redisaiplo er a Jesus a ngiluu a chedaol klisichel a Dios.

11. Ngmilekerang e mlo sebechir a rechad er a Judea me a Rechisentael el mo chedal a Israel er a Dios, e tela er tir a mo teloi er a beches el telbiil?

¹¹ A Jehovah er sera louchais el okiu a Jeremia el kmo ngmo meruul er a beches el telbiil el obengkel a renged er a Israel, e ngulebeketakl  el kmo ngmo er ngii a taem el Llach er a telbiil a mo diak lusbechall. Me a Llach a mlo diak a klisichel er sel taem er a lomuchel el oureor a beches el telbiil. (Heb. 8:13) Ngokiu a beches el telbiil, e a rechad er a Judea me a Rechisentael a di diul ngar er ngii a techellir el mo oudiukes er a Rengedel a Dios e le tir el ‘blotk a rengrir’ el okiu a chedaol klisichel a Dios, el ‘dimlak el oeak a Llach.’ (Rom 2:29) Me a Dios a mo dualem a llechul er a uldesuir me a rengrir. (Heb. 8:10) Tirke el chedal tia el beches el telbiil a 144,000 el ngellitel, el tir a toketekii a beches el renged el okedongall el “Israel ra Dios.”​—Gal. 6:16, BT; Och. 14:1, 4.

12. Ngerang a klekakerous er a Llach er a telbiil me a beches el telbiil?

¹² Ngerang a klekakerous er a Llach er a telbiil me a beches el telbiil? A Llach er a telbiil, a telbiil er a delongelel a Jehovah me a renged er a Israel, me a beches el telbiil, a telbiil er a delongelel a Jehovah me a Israel er a Dios. A Jehovah a ulekiu a Moses e meruul er a Llach er a telbiil, e dirrek el ulekiu a Jesus e rullii a beches el telbiil. A Llach er a telbiil a mlo oureor el okiu a rsechel a charm, me a beches el telbiil a mlo oureor el okiu a rsechel a Jesus. A Moses a mle mengeteklel a renged er a Israel el okiu a Llach er a telbiil. Me a Jesus el Bdelul a ongdibel, a Mengeteklir tirke el chedal a beches el telbiil.​—Efe. 1:22.

13, 14. (a) Ngerang rullii er a Rengedel a Dios a beches el telbiil? (b) Ngera usbechall me bo el sebechel a Israel er a Dios el mo mengedereder el obengkel a Kristus el ngar er a eanged?

¹³ Ngerang rullii er a Rengedel a Dios a beches el telbiil? Ngtoketekii a beches el renged el tir a oba techall el mo king e prist er a Renged el ngar er a eanged. Tirke el chedal tia el renged a dirrek el uldimukl er a otutel a telbiil el kirel a uldidellel a rsechel a Abraham. (Gal. 3:29) Me a beches el telbiil a oterekeklii el kmo a telbilel a Jehovah el mo er a Abraham a mo tmaut.

¹⁴ Ngoeak a beches el telbiil e a Israel er a Dios a meteketek, e tiaikid el telbiil a uchul me a rengellitel a sebechir el ‘ngma dikesir el obengkel a Kristus.’ Engdi ngmekerang e sebechir a rengellitel el mo mengedereder el king e prist el obengkel a Jesus el ngar er a eanged? A lmuut el ta er a telbiil a kutmeklii tia el tekoi.

15. Ngera el telbiil a lerirellii a Jesus el obengterir a reblak a rengrir el apostol er ngii?

¹⁵ A uriul er a luchelii a Chedaol Blsoil er a Rubak, e a Jesus a rirellii a telbiil el obengterir a reblak a rengrir el disaiplo er ngii el okedongall el telbiil el kirel a Renged. (Monguiu er a Lukas 22:28-30.) Tia el telbiil a kuk ngodech er aike el bebil er a telbiil, e le Jehovah a dimlak el teloi er ngii. Ngbai di telbiil er a delongelel a Jesus me a rengellitel. Me a Jesus er a ledu el kmo: “Ak mo meskemiu a klisiich el mo mengedereder, el di ua Demak el mla meskak a klisiich el mo mengedereder,” e nglocha millatk er sel telbilel a Jehovah el mo er ngii el kmo, ngmo “prist el mo cherechar el oltirakl er a deruchellel a Melkisedek.”​—Heb. 5:5, 6.

16. Ngera el techall a sebechir a rengellitel el Kristiano el nguu el okiu a telbiil el kirel a Renged?

¹⁶ Tirke el 11 el blak a rengrir el apostol a di ulebengkel a Jesus er a chelsel a rokui el ongarm el mlo er ngii. Me tia el telbiil el kirel a Renged a ulterekeklii el kmo te mo dengchokl er a kingall er omerreder e mengedereder el king e mesiou el prist el ngar er a eanged el obengkel. Engdi tirkang a dimlak di el tir el tang a nguu tia el techall. A Johanes a milsa Jesus el ngar er a ues el dilu el kmo: “Tirkel mo mesisiich a bo kbesterir a llemeltir el mo dengchokl er bita er ngak er a kingellek, el di ua ingak el mlo mesisiich me chelechang e ak dengchokl er bita er a Demak er a kingellel.” (Och. 3:21) Me tia el telbiil el kirel a Renged a mo er tirke el 144,000 el ngellitel el Kristiano.  (Och. 7:4; 20:6) Tiaikid a uchul me ngsebechir a rengellitel el mo obengkel a Jesus el mengedereder el ngar er a eanged. Tia el omeruul a di ua redil el mla mengilt el mo bechil a king, e le sel bo lebechiil, e ngsebechel el mo mengedereder el obengkel a king er ngii. Me a Biblia a mesaod er a rengellitel el kmo te ua “bechiil el Redil” el tir a “klikiid el ekebil” el telbiil el mo bechil a Kristus.​—Och. 19:7, 8; 21:9; 2 Ko. 11:2.

17, 18. (a) Mtelkib el mesaod aika el 6 el telbiil el ngar er ngii a lerellii er a Renged. (b) Ngera me ngulterekokl a rengud el kirel a Renged?

¹⁷ Ngar er aika el eru el suobel, e aika el rokui el telbiil el bla desaod a ngar er ngii a lerellii er a Renged. (Momes er a chart el “A Rolel e a Dios a Mo Otutii a Moktek er Ngii.”) Aika el telbiil a oterekeklii el kmo a Renged a kmal mesisiich a uchetemel. Me ngsebechel el mo ulterekokl a rengud el kmo a Dios a mo ousbech er a Rengedel a Mesias el mo otutii a moktek er ngii el kirel tia el chutem me a rechad.​—Och. 11:15.

¹⁸ Kede ungil el medengei el kmo a Renged a di ta el tekoi el sebechel el sumechokl a mondai er a rechad. E dirrek el ulterekokl a rengud el kmo ngmo uchul a diak a ulebengelel el klungiaol el mo er a rokui el chad. Misei, e bo leblak a rengud el ouchais er a rechad el kirel tia el kmal ungil el chais!​—Mt. 24:14.