OMESODEL A SUOBEL ER A MEDAL TIA EL BABIER | NGMERA EL NGAR ER NGII A SATAN?
Ngmera el Ngar er Ngii a Satan?
“Ak mlukeroul er a beluu er a El Salvador. Me sel bo lak kurrenges a tekoi, e a delak a dmu er ngak el kmo, ‘Alii, a Diabelong a oltoir er kau!’ Seikid e ak dmu er ngii el kmo, ‘Mdu er ngii me lemei!’ Ele ngak a uluumerang er a Dios, engdi ngdimlak kuumerang el kmo ngar er ngii a Satan.”—ROGELIO.
Me kau, ke ua uldesuel a Rogelio? Ngera er aika el uldasu a cho mobang?
-
A Satan a diak el mera el chad e ngbai di okesiul a mekngit.
-
A Satan a mera el ngar er ngii, engdi ngdiak el semeriar er a rechad.
-
A Satan a mekngit el anghel el mesisiich e kmal sebechel el mengesuseu er a rechad.
Te locha betok el miliol el chad a oumerang a derta er aika el uldasu. Engdi a ker a kmo, ngar er ngii a ultutelel a bo dodengei el kmo ngera er ngii a melemalt el uldasu? A lsekum a Satan a diak el mera el chad e tirke el oumerang er ngii a kmal cheleuid a uldesuir. Engdi a lsekum a Satan a mera el ngar er ngii e diak el semeriar er a rechad e ngbelkul a kmo, a rebetok a di bekikl e medakt el di diak a ungil el uchul. Engdi a lsekum a Satan a ngar er ngii a klisichel el mengeblad er a rechad, e ngkmal kdekudel e a rebetok el chad a diak lodengei el kmo nguaisei.
Me bo domes a omesodel a Chedaol Llechukl el kirel aika el ker el kmo: A Satan ngdi okesiul a mekngit me a lechub e ngmekngit el anghel? A lsekum a Satan a mera el ngar er ngii, e ngsebechel el tomellid? Me a leuaisei, e ke mekerang e mo diak ko mechetikaik er ngii?
