Me kau ke kongei el kmo a lsekum a rechad er a beluu a meruul a chelebirukel, e a kabelment er ngii a dirrek el mo mui er a chelebirukel? Me a leuaisei, e a kabelment el diak a telemellel a kmal kirel el ngarbab el mei. Me a Biblia a mesaod er tiaikid el kabelment, el ngii a Rengedel a Dios, el Jesus a ullisechakl er a redisaiplo er ngii me loluluuch el kirel.​—Mateus 6:9, 10.

A Rengedel a Dios a mera el kabelment el ngar er a eanged, e ngii a mo omtechei aika el rokui el kabelment er a rechad. (Psalm 2:8, 9; Ocholt 16:14; 19:19-21) Tia el Renged a mo torob a chelebirukel el omeruul er a kabelment e dirrek el meruul a lmuut el betok el mo uchul a klungiolir a rechad. Me bo dosaod a elolem el telengtengil tia el Renged el oterekeklii tia el tekoi.

A TELEMELLEL: A kabelment er a rechad a melemolem el oureor el okiu a tax er a rechad me a dirrek el siobai. Me tiaikid el rolel a osisebellel a udoud a rulleterir a rebebil el chad er a kabelment el mo merechorech ngii el udoud, e a rekuk bebil a kongei er a rechad el omesterir a udoud el mengeluch er tir me bo el sebechir el di harau er a kekerei el tax el mo er a kabelment. E tia el mekngit el omeruul a di melemolem el uchul me a kabelment a mo olengesechekl a tax me bo el sebechel el omtechei aike el ririid el udoud, e tiang a mo uchul a lmuut el klou el chelebuul. Me ngokiu tiaikid el blekeradel, e tirke el melemalt a omerellir el chad a kmal mo chuarm.

A SEMECHEKLEL TIA EL TEKOI: A Jehovah * el Dios el Olab a Bek el Klisiich a ngike el uchul me a Rengedel a melemolem el oureor. (Ocholt 11:15) Me tia el Renged a diak lousbech a tax er a rechad el orrurt er ngii. Ngbai oeak a “imis el klou” el klisichel a Dios me a omerellel el kmal bekururau, e ngoterekeklii el kmo tiaikid el Rengedel a mo omesterir a rechedal aike el rokui el lousbech.​—Isaia 40:26; Psalm 145:16.

A TELEMELLEL: A Susan Rose-Ackerman, el ngar er sel uchei el suobel a mesaod el kmo a ureor el mo merrob a chelebirukel el omeruul “a kirel omuchel er tirke el ngarbab el chad.” A rechad a mo diak loumerang er a kabelment a lsekum a kabelment a melasem el merrob a chebirukel el omerellir a rebulis me a rechad er a custom, e di mechititerir a rengarbab el chad me te meruul aike el sorir. Me ngmo lmuut er a kot el melemalt a omerellel el mengedereder me ngdiak el cherrungel e sebechel el meruul a mekngit. Me ngdi ua lolekoi a Biblia el kmo: “Ng meral diak a tal chad er a beluulechad el di ungil omerellel el diak a tal le mekngit er ngii.”​—Olisechakl 7:20.

A SEMECHEKLEL TIA EL TEKOI: A Jesus Kristus, el Dios a mla ngiltii el mo mengedereder er a Renged, a diak el sebechel el mekesuseu el mo meruul a mekngit, el ua rediak lemecherrungel el chad. Ngulechotii tiang er sera lotngeklii a kot el ngarbab el rolel a omengesuseu. A Diabelong el ngike el mengedereder er a beluulechad a dilu er ngii el kmo ngmo msang a “rokui el rengedel a beluulchad ma bek el klebkellel” a lsekum ngkongei el mo terrob e mengull er ngii. (Mateus 4:8-10; Johanes 14:30) A Jesus a mle blak a rengul el mo lmuut er sel taem er a lemodechelakl el mo ocherur a kodall, e dimlak lekengei el nguu sel kar el mekodir a ringelel e le ngmle sebechel el rullii me ngmo diak lungil el omdasu. (Mateus 27:34) Me chelechang e a Dios a mla nguu el lmuut mo er a eanged me ngii el Jesus a mla oterekeklii el kmo ngkmal rredemelel a mo mengedereder er a Renged.​—Filipi 2:8-11.

A TELEMELLEL: Ngar er a betok el beluu e ngblechoel el ngar er ngii a sengkio el mesterir a techellir a rechad me te sengkio el oleiis er tirke el ngarbab el chad el meruul a chelebirukel. Engdi ngmo lmuut er a chelsel aike el  merau el beluu me ngar er ngii a chelebirukel el omeruul el meketmokl er a temel a sengkio. Me ngokiu a omerellir me a ngelsurir a remerau el chad e ngmo er ngii a klisichir el mengedereder er a rechad el mo er aika el ngarbab el deruchall.

A Justice John Paul Stevens er a U.S. Supreme Court a milluches el kmo, aika el omeruul a “sebechel el tomellii me a lechub e ngchoitechetur a Kabelment e dirrek el rulleterir a rechad el mo diak loumerang.” Me ngdiak lemechas a rengud a lsekum a rebetok el chad a kongei el kmo a cheldebechel er a balatiks a kot el klou a chelebirukel er a chelsel a domekesiu er ngii er a bek el ureor.

A SEMECHEKLEL TIA EL TEKOI: A Rengedel a Dios a mo mengedereder el diak a ulebengelel me ngmo diak a omengesuseu er a temel a sengkio me a blulak el sengkio. (Daniel 7:13, 14) Me a Dios a mla ngiltii ngike el mo mengedereder, me a Rengedel a diak lultuil er a sengkio er a rechad e dirrek el diak el sebechir a rechad el oleiis er ngii. Me a klemengetel a omengederederel a uchul me ngsebechel a tekoi el lolib el di mo uchul a klungiolir a rechad.

A TELEMELLEL: Ke locha mo omdasu el kmo a kabelment a sebechel el merrob a chelebirukel el okiu sel loruul a beches el llach. Engdi a rechellimosk a mla metik el kmo a lebebil e aika el beches el llach a mo uchul me ngbai mo er ngii a techellir a rechad el meruul a chelebirukel. Me a lmuut el tang, aika el llach el mle kirel el olengeasek a chelebirukel a blechoel el mo uchul a klou el omengitel a udoud e di telkib a klungiolel.

A SEMECHEKLEL TIA EL TEKOI: A llechul a Rengedel a Dios a kuk ngarbab er a llechul a ngii di el kabelment er a rechad. El ua tiang, a Jesus a dimlak leruul a betok el llach e ngbai dilu el kmo: “Moruul el mor a re chad a ikel somiu a loruul el ekor kemiu.” (Mateus 7:12) Me a lmuut el tang, a llechul a Renged a olekebai a mekngit el omeruul me a dirrek el mekngit el uldasu. A Jesus a dilu el kmo: “Bo le betik a rengum er a ngar bitar kau el ua le betik a rengum er kau.” (Mateus 22:39) Me a Dios el ngii a sebechel el merriter a rengud a uchul me ngsebechel el oltaut a chouaika el llach.​—1 Samuel 16:7.

A TELEMELLEL: A rechad a meruul a chelebirukel e le tir el melatk er a di tir e nguibes a rengrir er a udoud. Me a rebetok el chad er a kabelment me a rechad er a beluu  a di dul olecholt aika el mekngit el blekeradel. Tirke el tileketekii sel klou el stoang el mlongkangk er a beluu er a Seoul el dulsaod er ngii er a uchei, a milengeluch er a rechad er a kabelment e le te mle medengei el kmo ngbai kesai el udoud a bo lechoit er a omengeluch er a bo lomechar a ungil el klekedall er a okedecherul a blai me a melemalt el rolel a okedecherul a blai.

Ngsebechel el mo diak a chelebirukel a lsekum a rechad a mosisechakl el mo mengoit a mekngit el blekerdelir el di melatk er a di tir e nguibes a rengrir. Me nguaisei, engdi a kabelment er a rechad a diak el sorir me a dirrek el diak a duch er tir el kutmokl a chouaika el tekoi.

A SEMECHEKLEL TIA EL TEKOI: A Rengedel a Dios a sebechel el sumechokl aika el tekoi el okiu sel lolisechakl er a rechad el mo mengoit a mekngit el blekerdelir. * Tia el osisechakl a uchul me a uldesuir me a rengrir a rechad a mo “mukbeches el rokui.” (Efesus 4:23) Me ngmo diak di lolatk er a di tir e lengibes a rengrir, e bai mo melatk er a rebebil e dirrek el mo ungilbesul er a rengrir aike el ngar er ngii er tir.​—Filipi 2:4; 1 Timothy 6:6.

A TELEMELLEL: Me alta e a rechad a mukeroul er a chelsel a ungil el delengchokl e mo mosisechakl el kirel a tekoi er a kldung, engdi a rebebil er tir a dirk melilt el mo meruul a chelebirukel el tekoi. Me a remesuub a tekoi a kongei el kmo tiaikid a uchul me a kabelment er a rechad a diak el sebechel el okngemed a chelebirukel el omeruul. Me a betok el kabelment a mo melatk el kmo, ngii di bo el sebechir el kokeringii a chelebirukel me a telemellel a chelebirukel el omeruul.

A SEMECHEKLEL TIA EL TEKOI: Sel United Nations Convention Against Corruption a kmo, a kabelment a mo sebechel el olengeasek a chelebirukel el omeruul a lsekum ngmo melisiich er a rechedal el mo “melemalt a omerellir, melekoi a klemerang, e dirrek el mo bekongerachel.” Me alta e tiang a kmal ungil el moktek, engdi a Rengedel a Dios a diak di lolisiich aika el blekeradel, e ngbai mengerechir er a rechedal el mo oltaut aika el tekoi. A Biblia a kmo, a “re bechelechelingaol a rengrir” me a “rokui el bulak” a diak el sebechir el mo oudiukes er a Rengedel a Dios.​—1 Korinth 6:9-11; Ocholt 21:8.

A rechad a sebechir el mesuub el mo oltirakl aika el llach el di ua Rekristiano er a irechar. El ua tiang, sel taem er a lolasem a disaiplo el Simon el mengeluch er a rechapostol me lebsang a chedaol reng, e te dilu er ngii el kmo: “Mobult er tial mekngit el uldesuem.” Me a Simon er a bo lolechesuar a mekngit el blekerdelel e ngullengit er a rechapostol me loluluuch el kirel me bo lak leuaisei a omerellel.​—Rellir 8:18-24.

A rechad er a rokui el beluu a ngar er ngii a techellir el mo chedal a Rengedel a Dios. (Rellir 10:34, 35) Me tia el Rengedel a Dios a mla kutmokl a osisechakl el ngosukau me ngsebechem el mo chedal tia el Renged. A Resioning er a Jehovah a dmeu a rengrir el mo ochotii er kau a diak locheraol el omesubel a Biblia, el sebechel el meketmokl er a chelsel a di teruich el bung er a bek el sandei. Ngsebechem el mesuub a betok el tekoi, el uldimukl er a “Ungil Chais er a Rengedel a Dios” me a rolel a bo lolekngemed a chelebirukel el omeruul er a kabelment. (Lukas 4:43) Me aki mengemedaol er kau el mo mengedecheduch er a Resioning er a Jehovah me a lechub e ke mo er a Web site er tir el jw.org/pau.