A remenguiu a Biblia a medengelii a Pontius Pilatus el okiu a tekoi el leriruul el kirel a kerrekerilel me a kodellel a Jesus. (Mt. 27:1, 2, 24-26) Me nguaisei, engdi a lebebil er a taem e a ngklel a dirrek el medung el ngar er aike el reksi el milluches er a taem er a dirk el chad. A doltirakl er a The Anchor Bible Dictionary, e a chisel a klengar er ngii el medung er a reksi a “kuk betok e lmuut el dmolech a omesodel er a ngii di el chad er a Rom el mla kabernor er a beluu er a Judea.”

A ngklel a Pilatus a medung el betok el taem er aike el babilengel a Josephus el chad er a Judea el milluches a reksi. Ngmilluches el kirel a edei el meringel el tekoi el blo lechelebangel a Pilatus er a taem er a dirk el kabernor er a Judea. E a ongeua er a tekoi el dilubech er a klengar er ngii a lulsaod er ngii a chad er a Judea el Philo a ngklel. Me a chad er a Rom el Tacitus el milluches el kirel a reksi er a Remerreder er a Rom, a dirrek el ulterekeklii el kmo a Pontius Pilatus a kilengei me ngmo okodall a Jesus er sel taem er a lorreder a Tiberius.

Sera 1961 e a rechad er a omengiis el chutem a miltik er a tedebechel a oberberk el bad er a chelsel a miltemall el theatre er a rechad er a Rom el ngar er a Sesaria er a beluu er a Israel. E tia el bad a mle llechukl er ngii a ngklel a Pilatus el tekoi er a Latin. Tia el blotk el tekoi el ngar er a bad a mla obechebached, engdi a remesuub a tekoi a oumerang el kmo, a tekoi el llechukl er ngii a kmo: “Mo er a kuoll el chelid (ngika el) Tiberieum Pontius Pilatus, el Merreder er a Mats er a Judea.” Tia el blai el losaod el kirel a locha mle templo el uleldanges er a Merreder er a Rom el Tiberius.

A suobel el “A Ker el Mla er a Remenguiu” el ngar er a Watchtower er a July 15, 2002, a milsaod el kmo, a lsekum a odos a mesuub er a Biblia el obengkel a chad e a osisiu el taem e ngar er ngii a sechal el publisher el obengkel, e ngkirel el melekedek er a bdelul, alta ngikang a mla metecholb me a lechub e ngdirkak. Engdi a dmolech el omerriter er tia el tekoi a uchul me tia el ulekrael a kirel el mengodech.

A lsekum a odos a omekrael er a mla moterekokl el omesubel a Biblia el obengkel a chad, e ngkirel el melekedek er a bdelul a lsekum ngar er ngii a mla metecholb el odam el obengkel. Tia el omerellel a olechotel a omengull er ngii el kirel sel rolel a dereder el bla leketmeklii a Jehovah er a chelsel a ongdibel er a Rekristiano, e le sel taem el losuub e ngmeruul er a tekoi el ngii a ngerechelel a odam. (1 Ko. 11:5, 6, 10) Me a lechub e ngsebechel el olengit er ngike el odam el mo omekrael er a omesubir a lsekum e ngsebechel e rredemelel a meruul er tia el tekoi.

Engdi ngsebechel el diak lolekedek er a bdelul a lsekum ngomekrael er a mla moterekokl el omesubel a Biblia, e a osisiu el taem e ngobengkel a sechal el publisher el diak el bechil, e dirkak lemetecholb. Me nguaisei, engdi a rebebil el odos a melekedek a bderrir er a chelsel a chouaika el blekeradel el ukltkir a uchul.