A BERKEL a klumech a kot el klou a ultutelel el ureor el meketmokl er a beluulechad er chelecha el sils. Me ngar er ngii a ileakl el techelled el mo omtechei er a Jehovah el meruul tia el ureor el olisechakl er a rechad. Me nguaisei, engdi a lebebil er a taem e ngsebechel mo meringel el kirir a re pioneer me a re publisher el melemolem el blak a rengrir el omerk er a klumech. E ngera uchul?

A rebebil er a re publisher a metik el kmo te di mekesai el chad a longedecheduch er tir sel loldingel a obliil, e le ngoumesingd el diak a rechad el ngar er a blai. E sel kuk lengar er a blai e nglocha diak el semeriar me a lechub e ngmo kesib a rengrir er kid. A rekuk bebil a meklou a basio el loldingel er ngii e betok a resemeriar el chad er ngii, engdi te bekikl a bo lak el sebechir el merkii a klumech el mo er a rokui el chad el ngar tia el basio. E a relmuut el bebil a mla mo betok el rak el omerk er a klumech me ngmocha mechitechut a rengrir e le ngii el dirkak lemei a ulebongel.

Me a urered er a berkel a klumech a sebechel el mo meringel, e tiang a sebechel el mo mengitechut a rengud. Kid a kiei er a beluulechad el chederedall er “Ngikel Mekngit” el Satan el Diabelong, me kede ungil el medengei el kmo ngsebechel el mo meringel er kid el omerk er a ungil chais.​—1 Jn. 5:19.

Me a ngii di el omelsemai el bo mchelebangel er a omesiungem, me kau a di sebechel el mo ulterekokl rengum el kmo a Jehovah a mo ngosukau el mo mesisiich er ngii. Engdi ngera sebechem el meruul me lolemolem a blakerreng er kau el kirel a ureor er a berkel a klumech? Ka me bo dosaod a bebil er a ngeso el ngar er ngii.

A bek el rak e a rebetok el telael a metecholb el mo Sioning er a Jehovah. Me a lsekum ke dirk miltecholb e ngsebechem el suub a betok er tirke el mla omerk er a klumech el betok el rak. E a lsekum ke mla omerk er a klumech el betok el rak, kau ngsebechem el olengeseu er tirke el dirk beches? Ngmo dmeu a rengum sel moruul el uaisei.

A Jesus a mle medengei el kmo a redisaiplo er ngii a uluusbech a ulekrael me bo lsebechir el mo meduch el olisechakl, me ngulsisecheklterir er a rolel a lomerk  er a klumech. (Lk. 8:1) Me chelecha el sils e a rebeches el chad el omerk er a klumech a dirrek el ousbech a osisiu el ulekrael el ngosuterir el mo meduch el omerk er a klumech.

Me ngdiak el kired el omdasu el kmo a beches el publisher sel lomuchel el oldingel a obliil, e seikid a temel el mesuub el mo olisechakl. Ngousbech a ngeso er a betik a rengul el chad el osisecheklii. A publisher el klou a duch er ngii a kirel el osisecheklii el kmo ngmekerang (1) sel longetmokl e lolasem aike el tekoi el bo lolekoi er a chad er a blai, (2) sel lechadecheduch ngii me a chad er a blai, (3) sel lorous a babier, (4) sel lluut el mo oldingel er tirke el semeriar, (5) me sel lomuchel a omesubel a Biblia. A beches el publisher a sebechel el mo meduch el omerk er a klumech a lsekum e ngomes e mesuub er a rolel e ngike el klou a duch er ngii el publisher a lolisechakl. (Lk. 6:40) Me ngika el beches el publisher a mo ulterekokl a rengul sel lodengei el kmo ngar er ngii a chad el kongei el ngosuir er a ngii di el taem el ousbech a ngesou. Ngdirrek el mo sebechem el ngosuir sel cho mchat er ngii e molengeseu er ngii er a ungil el uldasu.​—Oli. 4:9, 10.

A bebil er a taem e alta e ke millasem el mengedecheduch er a rechad er a blai, engdi a kot el ungil rolel a cheldecheduch a mo er ngii er a delongelem kau me a kldemem el oldingel. Molatk el kmo a Jesus a uldercheterir a redisaiplo er ngii el mo omerk er a klumech “el derteru” el chad. (Lk. 10:1) Me sel ledak el oureor e ngmle sebechir el kasisiich er a delongelir. Me kede oba ungil techall el mo “kaodengei er a rolel a doumerang” sel doldingel el obengterir a rudam me a rudos er kid.​—Rom 1:12.

Me ngera bebil er a tekoi el sebechiu el mesaod? Ngar er ngii a ta er kemiu el mla er ngii a dilubech el tekoi el mo er ngii el uchul a omelisiich? Kom mla suubii a ungil el suobel er a omesubel a Biblia el di kemiu el tang me a lechub e ngtemel a omengull el telungalek? Ngar er ngii a omelisiich el mngiluu er a suobel er a miting el mrirengesii? A lebebil er a taem e ke locha mo oureor el obengkel a publisher el diak kom sal medengelii. Me nglocha sebechem el oker er ngii el kmo ngmilekerang e suubii a klemerang. Ngera rirellii el mo omdasu el kmo tiang a mera el cheldebechelel a Jehovah? Ngera el techall er a omesiou me a lechub e ngtekoi el dilubech er a klengar er ngii a sebechel ouchais el kirel? Nglocha sebechem el ouchais er ngii a bebil er a tekoi el dilubech er a klengar er kau. Me a ngii di el blekerdelir a rechad el ngar er a basio el doldingel er ngii el cho bo mchelebangel a lungil me a lemekngit, engdi sel moldingel el obengkel a kldemem, e ngklou a techelliu el “melemolem el kasisiich a rengmiu.”​—1 Th. 5:11.

Me a lsoad el melemolem er a blakerreng er kid er a berkel a klumech, e ngkmal kired el mo ungil el mesuub er a Biblia el di kid el tang. Me a “blak a rengul e  mellomes a rengul el mesiou” a oltobed a kakerous el suobel el sebeched el mesuub el kirel. (Mt. 24:45) Ka molatk er a ta er a ungil el suobel el sebechem el mesuub er ngii el di kid el tang: Ngera uchul me a berkel a klumech a kmal klou a ultutelel? Ngsebechem el metik a bebil el uchul er sel baks el “Ngera Uchul Me Ngkirem el Lomelemii a Blakerreng er Kau er a Berkel a Klumech?”

Sel mosuub aike el suobel el ngar er a chelsel a baks e ngsmisichau me ngmo blak a rengum el melemolem el omerk er a klumech. Me ngar er tia el omesubem e moluches a bebil er a omesodel a bades el kirel a uchul me ngkirel el mo blak a rengud el oldingel a obliil. E bo mkerekikl el melebedebek aika el tekoi. Sel moruul el uaisei, e ngsmisichau me nglmuut el mo blak a rengum er a omesiungem.

Me a cheldebechelel a Jehovah a blechoel el ouchais er kid el kirel a rolel el mo sebeched el olengeriakl er a omesiunged. Nguldimukl er a odingel a obliil, e ngdirrek el sebeched el melasem el omerk er a klumech el okiu sel doluches a babier, e ousioning el ousbech a dengua, e omerk er a klumech el ngar er a rael me a buai, e ousioning el mo er a rechad er a ngii di el taem me a dirrek a basio er a ureor. Nglocha dirrek el sebeched el melasem el mo omerk er a klumech er a basio el di mekesai me a lechub e ngdiak a Resioning er ngii.

Me kau ke kongei el melasem er aika el beches el rolel a domerk er a klumech? A rebebil el millasem aika el ulekrael a mlo ungil er a omesiungir. Me bo dosaod a edei el olechotel.

A odos el April a ngklel a uleltirakl a ulekrael el ngar er a ta er a Omesiunged el Kirel a Renged er a suobel el kirel a domuchel a omesubel a Biblia. Me ngmillasem el omuchel a omesubel a Biblia el obengterir a retedei el chad er a urerel. Ngkmal kmal mlo mechas a rengul er a lekengei tirka el tedei el chad el mo mesuub a Biblia el obengkel, e bo lomuchel el ngar er a miting er a ongdibel.

 Kede dirrek el ngiluu a omelisiich el mo osiik er a rechad el semeriar a suobel el tuobed er aike el magazine er kid. A odam el oldingel a ongdibel er a beluu er a Merikel a millasem el merous er a Awake! el mla er ngii a suobel el mesaod el kirel a tyre er a mlai el mo er a rokui el stoang er tia el basio el olterau a tyre. Ngii me a bechil a dirrek el mirrous er a ta er a suobel el dai er ngii a kmo: “Bo Modengelii a Toktang er Kau” el mo er a betok er a 100 el obis er a retoktang. Ngdilu el kmo aika el odngelam a ngilsuterir a rechad el mo medengelii a belkul a urered er a berkel a klumech me aika el babilenged. Me a uriul er a bo lungil medengelterir a rechad er tia el basio el oldingel er ngii, e ngii me a bechil a mlo sebechir el metik er a rebetok el chad el semeriar me te liluut el mo oldingel er tir.

A odos el Judy a milluches el mo er a klou el obis er kid e le ngii el uleba omereng el saul el kirel a omelisiich el dengiluu el mo ousioning el ousbech a dengua. Ngmillekoi el kirel a delal el mla mo 86 a rekil e betok a secherel, engdi ngmle blechoel el omerk er a klumech el mo er a rebebil el ousbech a dengua. Tiang a mlo uchul me ngulemuchel a omesubel a Biblia el obengkel a redil el mle 92 a rekil.

Aike el ngesou el mengai er a babilenged a mera el ngosukid. Bo molasem aikang! A omoruul el uaisei e ngosukau el mo melemolem er a deuil a rengum me a blakerreng er kau el teloi er a ureor er a berkel a klumech.

Ngera rullid el mo meduch el omerk er a klumech? Ngdiak el ultuil er a ildisel a babier el dorous, me a lechub e ngildisir a rechad el dosuub a Biblia el obengterir, me a lechub e ngildisir a rechad el bla dengesuterir el mo mesiungel a Jehovah. Ka molatk er a Noah. Te mle tela el chad el diak luldimukl er a telungalek er ngii a le ngilsuterir el mo mesiungel a Jehovah? Me nguaisei, engdi ngulterekokl el mle ungil el mesiungel a Jehovah. Sel klou a ultutelel a kmo kede mesiou er a Jehovah el oba blakerreng.​—1 Ko. 4:2.

A rebetok el publisher a mla mo medengei el kmo a bo ledeu a rengrir el ngar er a ureor er a berkel a klumech, e ngkirir el meruul a turrekong el sebechir el oltaut. Ngera bebil er aika el turrekong? A bebil er ngii a llechukl er a baks el “Mruul a Turrekong el Sebechem el Oltaut.”

Molengit er a Jehovah me lengesukau el rullii a omesiungem el mo ungil e mo er ngii a belkul. Sel bo moltaut a turrekong er kau e ngmo dmeu a rengum el medengei el kmo ke mirruul aike el sebechem el omerk er a ungil chais.

Me alta e a ureor er a berkel a klumech a sebechel mo uchul a omelsemai, engdi ngar er ngii a tekoi el sebechem el meruul me bo leblak a rengum er a omesiungem. Bo mungil el chadecheduch kau me ngike el chad el mdak el oldingel. Bo mungil el mesuub el di kau el tang e moterekokl a temel a omesubem. Molasem el oltirakl aike ngeseu el mla er a blak a rengul e mellomes a rengul el mesiou, e moruul a turrekong el sebechem el oltaut. E a kot el klou a ultutelel er aika el rokui, e lak mobes el kmo a Jehovah a mla meskau a ileakl el techellem el mo omerk er a klumech el ta er a Resioning er Ngii. (Isa. 43:10) Ochoi, ke mo metik er a klou el deurreng sel molemolem er a blakerreng er kau el kirel a omesiungem.