1. Ngera uchul me a doukerebai er a Jesus e kede olekeed er kid er a Jehovah?

 KID a blechoel el soad el oukerebai a blekerdelir a rechad el soad. Me a chelsir a rokui el chad el mla kiei, e a Jesus a kot el ungil el chad el kired el oukerebai er ngii. E ngera uchul? E le ngmle ta el ledu el kmo: “Ngikel mla mesekak a mla mesa Chedam.” (Jn. 14:9) Ngdilu el uaisei, e le ngii a mle cherrungel el oukerebai a blekerdelel a Demal. Me sel dosuub el kirel a Jesus e kede dirrek el mesuub el kirel a Jehovah. Me a doukerebai er a Jesus e kede olekeed er kid er a Jehovah el ngike el kot el ngarbab el Dios. Tiang a kmal ileakl el techall el dobang!

2, 3. (a) Ngera uchul me a Jehovah a meskid a dmolech el omesodel a klengar er a Jesus, e ngera ngmengerechir er kid el mo meruul? (b) Ngera kede mo mesaod er a chelsel aika el eru el suobel?

² Ngar er a Biblia e a Jehovah a mla meskid a dmolech el omesodel a klengar er a Jesus. E ngera uchul? E le ngkmal soal a bo dodengelii ngika el Ngelekel me bo el sebeched el oukerebai a ungil el omerellel. (Monguiu er a 1 Petrus 2:21.) A Biblia a omekesiu er a kerebil a Jesus el mo er a ultil a uach. Me tiang ngera belkul? A Jehovah  a soal a bo doltirakl a ultil a ochil a Ngelekel, el belkul a kmo kede mo oukerebai aike el rokui el omerellel a Jesus. Me nguaisei, engdi a Jesus a mle cherrungel el chad me a Jehovah a diak longerechir er kid el mo cherrungel el oukerebai er ngii el Ngelekel. Ngbai soal a debo er a tkurrebab el sebeched el oukerebai er ngii.

³ Me bo dosaod a bebil el kot el ungil el blekerdelel a Jesus. Ngar tia el suobel e kede mo mesaod el kirel a blekerdelel el ngariou a rengul, e ungil a omerellel. E ngar sel ongingil el suobel e kede mo mesaod er a sekutaberreng er ngii me sel blekeurreng er ngii. Kede dirrek el mo onger a edei el ker el kirel a derta er aika el blekerdelel el kmo: Ngera belkul tia el blekeradel? Ngmilekerang a Jesus er a lolecholt er ngii? E kede mekerang e oukerebai er ngii?

4. Ngera belkul a bo lengariou a rengud?

⁴ Ngerang a klengariourreng? A rebetok el mekedidai a rengrir el chad a omdasu el kmo a klengariourreng a olechotel a kmo a chad a mechitechut a rengul. Engdi tiang klemerang el tekoi? Ngdiak el uaisei, e le chad el ngariou a rengul a kirel el mo mesisiich e bekeu a rengul. A klengariourreng a kuk ngodech er a kldidairreng. Ngar er a Biblia e a tekoi el “klengariourreng” a di osisiu a belkul er a omeruul el chad a ‘omdasu er a re bebil er a re chad el kmo te kuk ungil er ngii.’ (Fil. 2:3) Me a kot e ngkmal kirel el mo melemalt a uldesued el kired, e seikid e ngsebechel el mo ngariou a rengud. El ua tiang, a ta el dictionary er a Biblia a kmo: “A klengariourreng a blekerdelel a chad el di ngii el medengelii el kmo ngkuk ngariou er a Dios.” Me a lmuut el tang, a lsekum e ngariou a rengud, e ngdiak domdasu el kmo kede kuk ungil er a rebebil. (Rom 12:3) Ngkmal diak lebeot er a rediak lemecherrungel el chad el mo olecholt er tia el blekeradel. Engdi ngsebeched el mesuub el mo ngariou a rengud a lsekum kede melebedebek er a klengarbab er a Jehovah, e dirrek el mo oukerebai er a klengariourreng er a Jesus.

5, 6. (a) Ngtechang a Mikael el ngarbab el anghel? (b) Ngmilekerang e ochotii a klengariourreng?

⁵ Ngmilekerang a Jesus e ochotii a klengariourreng? Ngika el Ngelekel a Dios a di mla olecholt er a klengariourreng er sel taem er a dirk lemesisiich el anghel el ngar er a eanged me sera lemei er a chutem el cherrungel el chad. Me bo dosaod a bebil el omerellel.

⁶ A blekerdelel. Ngar er a babier er a Jude, e kede menguiu el kirel a klengar er a Jesus er a uchei er a lemei er a chutem. (Monguiu er a Jude 9.) Ngika el ngarbab el anghel el Mikael el ngii a Jesus a mle “kaititekangel ngii ma Diabelong” el kirel a “bedengel a Moses.” Sera lemad a Moses e a Jehovah a dileklii a bedengel er a basio el dimlak el sebechel a ngii di el chad el metik er ngii. (Dut. 34:5, 6) A Diabelong a locha mle soal el ousbech er a bedengel a Moses el mengesuseu er a rechad er a Israel el mo meruul a klsuul el rolel a omengull. Me a Mikael a mle bekeu el torob a ngii di el mekngit el uldasu el mle soal a Diabelong el meruul. Me a ta el babier a mesaod er a tekoi el “kaititekangel” el ngar er tia el bades el kmo a rechad a dirrek el ousbech er ngii el mesaod el kirel a llemeltir. Me tiang a sebeched el omes er ngii el kmo a Mikael a milengaititekangel er sel llemeltel a Diabelong el millasem el melai er a bedengel a Moses. Engdi ngika el ngarbab el anghel el Jesus a mle medengelii a telkelel a deruchellel. Seikid a uchul me ngullutii a kerrekeriil el mo er a Jehovah, el ngii a Kot el Ngarbab el Chad er a Kerrekeriil me ngar er ngii a llemeltel el oukerrekeriil er a Satan. Me tiang a mera el olechotel a klengariourreng er a Jesus!

7. Ngmilekerang a Jesus e ochotii a klengariourreng el okiu a tekingel me a omerellel?

⁷ Sera lengar er a chutem a Jesus e ngulechotii a klengariourreng el okiu a tekingel me a omerellel. A tekingel. A Jesus a dimlak el soal a  rechad a bo lomes er ngii el ua lekora ileakl el chad. Ngbai mle soal a rokui el chetengakl a lebo er a Demal. (Mk. 10:17, 18; Jn. 7:16) Ngdirrek el dimlak a ta el longedecheduch er a redisaiplo er ngii el rulleterir el mo omdasu el kmo ngdiak a ngera el lodengei. Ngbai kmal ullecholt a omengull el mo er tir, e ulechotii el kmo ngoumerang er tir el loeak sel leblechoel el chemat er tir. (Lk. 22:31, 32; Jn. 1:47) A omerellel. A Jesus a kiliei el mle beot a rolel a klengar er ngii me ngdimlak a betok el kloklel. (Mt. 8:20) Ngkilengei el meruul a ngariou el ureor el ngii a dimlak el sorir a rechad el meruul. (Jn. 13:3-15) Ngdirrek el ulechotii a cherrungel el kerebai el kirel a klengariourreng el okiu a blekongesenges er ngii. (Monguiu er a Filipi 2:5-8.) Ngdimlak leua omerellir a remekedidai a rengrir el tir a chetirir el olengesenges er a rebebil. Ngii el Jesus a bai ullengesenges er a Jehovah “el mo lmuut er a kodall.” Me ngbleketakl el kmo a Jesus el Ngelekel a chad a mle ‘ngariou a rengul.’​—Mt. 11:29.

8, 9. Kede mekerang e olecholt er a klengariourreng?

⁸ Ngmekerang a doukerebai er a klengariourreng er a Jesus? A blekerdeled. Sel doba klengariourreng e kede medengelii a deruchelled er a klechad. Seikid a uchul me kede medengei el kmo ngdiak a llemelted el oukerrekeriil er a rechad. Me ngdiak el kirel el mo mekngit a tekinged el bedul tir me a lechub e domdasu a mekngit el bedul tir. (Lk. 6:37; Jak. 4:12) Me a klengariourreng a ngosukid me ngdiak domdasu el kmo kede ‘kmal melemalt’ el chad. Tiang a belkul a kmo ngdiak el kired el mo omdasu el kmo kede kuk ungil er tirke el diak a duch er tir me a lechub e ngdiak lolab a ileakl el techall er omesiou. (Oli. 7:16) Me a rengariou a rengrir el mechuodel er a ongdibel a diak el kirir el mo omdasu el kmo te kuk ungil er a rudam me a rudos er tir. Ngbai kirir tirka el betik a rengrir el odam ‘el mo omdasu er a re bebil er a rechad el kmo te kuk ungil er tir.’​—Fil. 2:3; Lk. 9:48.

⁹ Ka molatk er a W. J. Thorn, el ta er a odam el mlo oldingel a ongdibel el ulemuchel er a rak er a 1894. Ngmle betok el rak el uluureor el omekeroul a malk er sel Kingdom Farm el ngar er a beluu er a New York. Me a bek el taem el bo lomdasu el kmo ngbai kirel el meruul a lmuut el meklou a ultutelel el ureor, e ngdi mle ngii el mengedecheduch er a rengul el kmo: “Kau a di kebekakl el ua chebechab, ngera me ngkedidai a rengum?” (Monguiu er a Isaia 40:12-15.) Me a omerellel a mera el olechotel a klengariourreng!

10. Kede mekerang e ochotii a klengariourreng el okiu a tekinged me a omerelled?

¹⁰ A tekinged. A lsekum ngmera el ngariou a rengud e ngmo chemolt er a cheldechedechad. (Lk. 6:45) Me sel dongedecheduch er a rechad e ngdiak di dosaod aike el tekoi el bla deruul me a lechub e ngtechall el dolab. (Osi. 27:2) Ngbai kmal kired el chemat er a rudam me a rudos er kid el kirel a ungil el tekoi el bla leruul, e dirrek el kerekikl el melatk a ungil el blekerdelir me a duch er tir. (Osi. 15:23) A omerelled. A ngariou a rengul el Kristiano a diak el soal el melasem el mo merael a chisel me a lechub e ngmo klou a ultutelel el chad er tia el beluulechad. Ngbai ngiltii el mo omekbeot er a rolel a klengar er ngii, e meruul a ngariou el ureor, me bo el sebechel el mengoit er a klou el temel el mesiou er a Jehovah. (1 Ti. 6:6, 8) E a kot el klou a ultutelel er ngii el rokui a mo sebechel el ochotii a klengariourreng el okiu a blekongesenges er ngii. Me kid el rokui a kmal kired el mo ngariou a rengud me bo el sebeched el mo ‘oltirakl a tekingir’ a remechuodel er a chelsel a ongdibel e dirrek el mo kongei el oltirakl a ulekrael el mei el okiu a cheldebechelel a Jehovah.​—Heb. 13:17.

11. Ngerang a klechubechub?

¹¹ Ngerang a klechubechub? A klechubechub  a olechotel a bltikerreng. Me a Biblia a ochotii el kmo a Jehovah me a Jesus a blechoel el olecholt a klechubechub me a bltikerreng. (Lk. 1:78; 2 Ko. 1:3; Fil. 1:8) A ta er a dictionary er a Biblia a mesaod er a klechubechub el kmo nglmuut el oberaod er a di lemekngit a rengud er a chad el ousbech a ngeso. Ngbai belkul a kmo, “kede kongei el mengoit a temed me a klisiched el mo olengeseu er a chad.” Me a klechubechub a blekeradel el rullii a chad me ngsoal el ngosuterir a rebebil el remuul a klengar er tir el mo ungil.

12. Ngera ochotii el kmo a Jesus a mle chubechubechad? E tia ngrirellii el mo mekerang?

¹² Ngmilekerang a Jesus e ochotii a klechubechub? Ngulekiu sel bo el mekngit a rengul me a omerellel. A Jesus a mlo mekngit a rengul er a lesterir a rechad el chuarm. Me sera lesa sechelil er a Maria me a relmuut el bebil el lilangel e le ngmla mad a Lasarus, e ngdirrek el lilangel a Jesus el obengterir. (Monguiu er a Johanes 11:32-35.) Tiaikid el osisiu el klechubechub er ngii el rirellii el mo okisii a ngelekel a melakl dil, a dirrek el rirellii me ngmlo okisii a Lasarus er a kodall. (Lk. 7:11-15; Jn. 11:38-44) Me tia el ungil el omerellel a mlo uchul me a Lasarus a locha mlo er ngii a omeltkel el mo kiei er a eanged. A uchei e a Jesus a ‘kmal mlo chubur’ a klou el seked el mle mekideb er bita er ngii. Me tia el kngtil a rengul a uchul me ngmlo “olisechakl er tir a betok el tekoi.” (Mk. 6:34) Me tia el omeruul a mlo uchul me tirke el ullengesenges a osisecheklel a Jesus a ngilodech a klengar er tir! Me a klechubechub er a Jesus a lmuut el oberaod er sel di uldesuel el bedul a chad. Tiang a rirellii me ngmlo soal el olengeseu er tirke el chad el uluusbech a ngeso.​—Mt. 15:32-38; 20:29-34; Mk. 1:40-42.

13. Ngokiu a ngera el rolel e a Jesus a mle ungil el mengedecheduch er a rechad? (Momes er a siasing er a uchelel a suobel.)

¹³ A ungil el cheldechedechal. A klechubechub er a Jesus a rirellii el mo ungil el mengedecheduch er a rechad, el ileakl tirke el chuarm a uldesuir. A apostol el Mateus er a losaod a tekoi el medung er a Isaia el kirel a Jesus, e ngdilu el kmo: “Ngdiak longam ra telemall el lild ma ka lomekoad ra llut el mengchat.” (Isa. 42:3; Mt. 12:20) Me tiang ngera belkul? A Jesus a dimlak el mekngit a tekingel me a omerellel el mo er a rechad. Ngbai mle ungil el mengedecheduch er tir e mengelaod er tir. Ngdirrek el ulemerk er a klumech el mo “omkar a chelemuurreng.” (Isa. 61:1) Ngdirrek el ulemekedong er tirke el “rokui el chorma er oberaod el chelungel” el mo er ngii me bo el sebechir el ‘metik er a ulengellir.’ (Mt. 11:28-30) Ngdirrek el tilbir el mo er a redisaiplo er ngii el kmo a Dios a kerekikl er a derta el mesiungel, el uldimukl er ‘tirkel mekekerei,’ el beluulechad a omes er tir el ua lak a ultutelir.​—Mt. 18:12-14; Lk. 12:6, 7.

14. Kede mekerang e mo chubechubechad?

¹⁴ Kede mekerang e oukerebai er a klechubechub er a Jesus? Sel bo el mekngit a rengud. A Biblia a mengelechel er kid el mo chubechubechad alta e ngdiak el lebeot er kid el mo meruul el uaisei. Tia el blekeradel a tedebechel a “beches el klengar” me a lechub e ngbeches el klechad el Jehovah a mengerechir er a rokui el Kristiano el mo olecholt er ngii. (Monguiu er a Kolose 3:9, 10, 12.) Me ke mekerang e mo chubechubechad? Molasem el oubltikerreng el mo er a rechad. (2 Ko. 6:11-13) Bo mkerekikl el orrenges er a chad sel louchais er kau a uldesuel me aike el tekoi el suebek a rengul er ngii. (Jak. 1:19) Bo mungil el omtab e di lekau el oker el kmo: ‘Ngmo ua ngera uldesuek oleko ak mo chelebangel er tia el mondai? A kuusbech a ngera el ngeso?’​—1 Pe. 3:8.

15. Ngera sebeched el meruul el olengeseu er tirke el chuarm a rengrir me a uldesuir?

¹⁵ A ungil el omerelled. A klechubechub er  kid a rullid el mo soad el olengeseu er a rechad, el ileakl tirke el chormang er a klengiterreng me a ringelel a uldasu. Me kede mekerang e ngosuterir? A Rom 12:15 a kmo: “Mlangel el obengterir a re lmangel.” Ngbetok el taem el rechad a mo ousbech a ongelaod el kuk ngaruchei er a ngeso er a uldasu. Te ousbech er a chad el ngii a semeriar er tir e soal el remenges a uldesuir. A ta el odos el kmal mlo mechelaod a rengul er a rudam me a rudos er ngii er a taem er a lemad a ngelekel el redil a dilu el kmo, “Ngkmal mlo mechelaod a renguk er sera lemei me lobengkek el di lilangel.” Ngdirrek el sebeched el ochotii a klechubechub el okiu sel doruul a mekekerei el tekoi el olengeseu er tir. El ua tiang, nglocha ngar er ngii a melakl dil el ousbech a ngeso el omtechei a mekekerei el telemall er a blil. Me a lechub e ngchudelang el Kristiano el ousbech er a chad el melai er ngii el mo er a miting, e mo oldingel me a lechub e ngmo omes er a toktang. Ngmo el lmuut er a kmal mekekerei el olechotel a klechubechub me ngdirrek el sebechel el ngodechii a klengar er a chad. (1 Jn. 3:17, 18) Engdi sel kot el klou a ultutelel el rolel a dochotii a klechubechub a sel domerk er a klumech er a ungil chais el mo er a rechad. Tiaikid a kot el ungil el rolel e kede ngosuterir a remelemalt a rengrir el chad el mo melodech a klengar er tir!

16. Ngera sebeched el dmung el mo er tirke el chuarm a uldesuir?

¹⁶ A ungil el cheldechedechad. A ungil el uldesued a rullid el mo soad el ‘ngosuterir a re mechitechut a rengrir.’ (1 Th. 5:14) Ngera sebeched el melekoi el mo melisiich er tir? Ngsebeched el ouchais er tir el kmo ngbetik a rengud er tir. Ngdirrek el sebeched el chemat er tir e ngosuterir el mo melemalt a uldesuir el kirel a ungil el blekerdelir me a duch er tir. Ngsebeched el omeklatk er tir el kmo a Jehovah a ngilsuterir el mo medengelii a klemerang me te ulterekokl el kmal mekreos er a osengel. (Jn. 6:44) Ngdirrek el sebeched el ouchais er tir el kmo a Jehovah a kmal omekerreu er a remesiungel el tir a “chelam a rengrir” e ‘dikea omeltkir.’ (Psa. 34:18) Me a ungil el cheldechedechad a sebechel el mengelaod er tirke el chormang.​—Osi. 16:24.

17, 18. (a) A Jehovah ngmengerechir er a remechuodel el mo ua ngerang a omerellir el bedul a sib er Ngii? (b) Ngera kede mo mesaod er a ongingil el suobel?

¹⁷ Me kemiu a remechuodel er a ongdibel, a Jehovah a mengerechir er kemiu el mo olecholt er a klechubechub el mo er a sib er Ngii. (Rel. 20:28, 29) Lak mobes, kemiu a ngerecheliu el olisechakl e melisiich e dirrek el mengelaod er a sib er a Jehovah. (Isa. 32:1, 2; 1 Pe. 5:2-4) Me a remechuodel el tir a chubechubechad a diak lolasem el mengedereder er a rudam er tir me a lechub e loruul a betok el llach. Ngdirrek el diak loruul er tir el mo mekngit a rengrir el okiu sel lorrimel er tir el mo meruul a tekoi el diak el sebechir el remuul. Ngbai sorir el oldeu a rengrir a rudam me a rudos er tir e mui el oumerang el kmo a bltkil a rengrir el mo er a Jehovah a mo rulleterir me te mo er a tkurrebab el sebechir el mesiou er a Dios.​—Mt. 22:37.

¹⁸ Me sel dolebedebek er a klengariourreng me a klechubechub er a Jesus e ngrullid el mo soad el oukerebai er ngii. Me ngar er a ongingil el suobel e kede mo mesaod er a rolel e ngsebeched el oukerebai er a blekeu me a sekutaberreng er a Jesus.