“Misei e a RUBAK el Dios a ngiluu ngiil chad el loia er a chelsel a Sers er a Eden el mo mengedmeklel e mengkerengel. E dilu er a chad el kmo, ‘Ng di subed cho mongang a redechel a rokui el kerrekar el ngar a chelsel a sers, e ngdi sel kerrekar er a mo medengei a ungil ma mekngit a diak monga er a redechel. Ele sel sils el mkelii e kom mad.’”​—Genesis 2:15-17.

A Dios a ngiluu ngike el kot el chad el Adam el loia er a sers er a Eden, el ngii a baradis el mui er a betok el charm me a ungil el dellomel. Ngmla er ngii a betok el kerrekar el mle sebechel a Adam el menga rdechel. Engdi a Jehovah el Dios a mle bleketakl el subedii a Adam el kirel a chimo el kerrekar el kmo ngdimlak el kirel el menga rdechel, e le lsekum ngmo menga er ngii e ngmo mad.

Me a Adam ngmle medengelii a belkul tia el omengelechel? Ngmle medengelii a tekoi el kodall, e le ngulemes a charm sel lemad. Me a lsekum a Adam a ulebeob el mle kirel el mo mad, e sel omengelechel el ledillii a Dios a dimlak a belkul e lolekoi er ngii. A Adam a mle medengei el kmo a lsekum ngolengesenges er a Dios me ngdiak bo longa er a rdechel sel kerrekar e ngulterekokl el sebechel el di ngar el mo cherechar e diak lemad.

A rebebil a oumerang el kmo sel kerrekar a okesiu el kirel a durs er a chebechiil, engdi tiang a diak el sebechel el tekoi. E le Jehovah a dimla moktek er ngii el soal a Adam me a bechil er a Eva a ‘bo le betok a re ngelekir, ma ruldidellel a rsechir bo le kiei er ker me ker er a beluulchad e bo lorreder er ngii.’ (Genesis 1:28) Me tia el omengelechel a milsaod el kirel a mera el kerrekar, el lulemekedong er ngii a Jehovah el “kerrekar er a mo medengei a ungil ma mekngit.” E le tiang a mle olechotel a kmo Ngii a ngar er ngii a llemeltel el melilt el kmo ngera ungil el kirir a rechad me a ngera mekngit. Me oleko a Adam a dimlak bo longa er a rdechel tia el kerrekar, e ngdimlak di lochotii el kmo ngmle bekongesenges, e ngdirrek el ulechotii a omereng el saul el bedul ngike el Ulemeob, el ngii a dirrek el ulemsang a betok el klengeltengat.

A Dios a dilu er a Adam el kmo: “Ke killii sel rodech el kulengelechel er ngii er kau el kmo ng diak bo monga er ngii. . . . Ke mo kesib e mo meringel el oureor el omekdubech a dellomel el dimerkmo cho mluut el mor a chutem el ngii cho mlengai er ngii. Ele kau a ulebeob er a chutem, me ke lmuut el mo chutem.”​—Genesis 3:17, 19.

 A Adam a mlo kolii a rdechel a kerrekar el dimlak el kirel el menga er ngii. Me a omerellel el dimlak lolengesenges a kmal oberaod el tekoi. Ngmle ultok, el ngii a omeruul el di olechotel a kmo ngdimlak lomekerreu a rokui el ungil el tekoi el bla leruul a Jehovah el kirel. Me sera bo lekelii tia el rodech a Adam, e ngultngeklii a Jehovah e millilt el mo cheroid er Ngii, me tiang a mlo uchul a klou el chelebuul.

Me ngua ledilu Jehovah, a Adam a mlad er a uriul. A Dios a milebii a Adam el ullab a “sesel chutem” e a uriul e ngdilu er ngii el kmo: “Ele kau a ulebeob er a chutem, me ke lmuut el mo chutem.” Me a Adam a dimlak bo lechad el kiei er a kmung ker el basio. Sera lemad e ngmlo diak lolechesuar a ngii di lengerang el di ua chebechab el le mlengai er ngii.​—Genesis 2:7; Olisechakl 9:5, 10.

“A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit.”​—Rom 5:12.

A omerellel a Adam el dimlak lolengesenges a mlo uchul a klou el chelebuul. Sera lerebet er a klengit e ngdimlak di lurridii a klengar er ngii el di mlo 70 me a lechub e ngmlo 80 a rekil e le mad, e ngbai urridii sel techellel el mle sebechel el kiei el mo cherechar. Me a lmuut el tang, a kngtil a Adam a uchul me ngmlo diak el cherrungel, e dirrek el mlo uchul e a rengelekel a milechell el dimlak lemecherrungel.

Me kid a rokui el uldidellel a rsechel a Adam. Me ngokiu ngii e a lechetid me a lsoad me kid a di oudiukes er a diak el cherrungel el klengar el uchul me kede ngar er a klengit e mo mad er a uriul. A Paulus a kmal ungil el smodii tia el blekeradel el dengar er ngii. Ngmilluches el kmo: “Ngak a chad el mo mad, el mloterau el sibai er a klengit. Kele kkol chebuul el chad! Ng techa mo osebelak er tial bedengek el obekak el mor a kodall?” E sola e di mle ngii el onger er a keril el kmo: “Le modanges a Dios, el meruul er itiang el oeak a Rubak er kid el Jesus Kristus.”​—Rom 7:14, 24, 25.

“A Chedam a ulderchii a Ngelekel el me olsobel er a beluulchad.”​—1 Johanes 4:14.

 A Jehovah el Dios a kiltmeklii a rolel me ngmo sebeched el mengubet er a klengit me a belsel a kodall. Me ngmilekerang? Nguldureklii a betik er a rengul el Ngelekel el mla er a eanged e me mechell er a chutem el ua cherrungel el chad el Adam. Engdi a Jesus a mle ngodech er a Adam e le “ng dimlak a tal le bor a klengit.” (1 Petrus 2:22) Me ngii el mle cherrungel a uchul me ngdimlak el blals el kirel a kodall me ngmle sebechel el kiei el mo cherechar el ua cherrungel el chad.

Me nguaisei, engdi a Jehovah a milecherei a Jesus me ngmlad er a chimorir a recherrouel. E a edei el klebesei er a uriul e ngii el Jehovah a ulekisii er a kodall me bo el sebechel el lmuut el mengai el mo er a eanged. Me ngar isei e ngmlo er medal a Dios e odersii a kerresel a cherrungel el klengar er ngii el mo mengkad er a belsel a klengit me a kodall el Adam a kiltmeklii el mlo uchul a chelebuul el mo er ngii me a ruldidellel a rsechel. Me a Jehovah a kilengei er tia el tengetengel, me bo el sebechir tirke el mo oumerang er a Jesus el mo nguu a diak a ulebengelel el klengar.​—Rom 3:23, 24; 1 Johanes 2:2.

Me a Jesus a ullutii a tekoi el Adam a urridii. Ngmlo chuarm e mlad el kired me bo el sebeched el mo kiei el mo cherechar. A Biblia a kmo: ‘A Jesus uleak a krasia er a Dios e ngmlad el kirir a rokui el chad.’​—Hebru 2:9.

Me tia el ileakl el tenget a meketakl a betok el tekoi el kirel a Jehovah. A ngarbab el llechul el kirel a llemalt a rirellii el mo meringel er a rediak lemecherrungel el chad el di tir el losobelterir. Me nguaisei, engdi a bltkil a rengul me a klechubechub er ngii a mlo uchul me ngkiltmeklii a kmal klou el char el mlo tongetengii a klengar er a Ngelekel el mo mengkad er a blals el mileketmokl.​—Rom 5:6-8.

“A Dios a ulekisii a Kristus er a kodall el ochotii el kmo tirkel mla mad a dirrek el bo lokisterir er a kodall. A kodall a mlei el okiu a tal chad, me ng dirrek el ua isei a okiis er a kodall a mlei el okiu a tal chad. Ele ng Adam a mlo uchul e a rokui el chad a mor a kodall, me ng dirrek el ua isei el Kristus a mlo uchul e a rokui el chad a mo mekiis er a kodall.”​—1 Korinth 15:20-22.

Kede ungil el medengei el kmo a Jesus a kiliei e dirrek el mlad, engdi ngerang a ochotii el kmo ngmilekiis er a kodall? A ta er a kot el klou el olechotel a okisel a Jesus, a ngii el mlo duum er a rebetok el kakerous el chad er a kakerous el taem me a basio. A ta er a taem e ngmlo chemolt er a delongelir a rekuk betok er a 500 el chad. Me a apostol el Paulus er sera loluches er a babilengel el mo er a Rekristiano er a Korinth, e ngmilsaod el kmo a rebebil er tirke el milsang a Jesus a dirk mle chad er sel taem, el belkul a kmo tirka el chad a sebechir el ouchais a tekoi el lerirenges me a lulemes.​—1 Korinth 15:3-8.

Me ngkmal bleketakl, sera loluches a Paulus el mesaod el kmo a ‘Dios a ulekisii a Kristus er a kodall’ e ngdirrek el milsaod el kmo te ngar er ngii a rebebil el dirrek el mo mekiis er a uriul. Me a Jesus a dirrek el dilu el kmo, ngmo er ngii a taem el mei “el tirkel rokui el mla mad a mo rongesii a ngerel me te mo tuobed er a debellir.”​—Johanes 5:28, 29.

“Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”​—Johanes 3:16.

 A kot el babier er a Biblia a mesaod el kirel a taem el lulemuchel a kodall me a Baradis a ririid. E a ulebongel el babier er a Biblia a mesaod el kirel a taem el bo lemokngemed a kodall e a Dios a lmuut el mo olutii a Baradis el mei er a chutem. Seikid e a rechad a mo sebechir el dmeu a rengrir e kiei el mo cherechar. A Ocholt 21:4 a kmo: “Ng dikea lluut el mor ngii a kodall.” E sel 5 el bades a lmuut el smisichii tia el tekoi e le ngdmu el kmo: “Ele ikal tekoi a merang e ulterekokl el mo tmaut.” Me a telbiil el ledung a Jehovah a ulterekokl el kmal sebechel el mo remuul.

Me kau, ke oumerang el kmo “ikal tekoi a merang e ulterekokl el mo tmaut”? Mluut el mesuub a betok el kirel a Jesus Kristus, e bo mui el oumerang er ngii. Sel moruul el uaisei, e ke mo nguu a kengei er a Jehovah. Ke mo ngmai a betok el klengeltengat er chelechang e dirrek el mo oba omelatk el mo kiei er a Baradis el chutem, el ngii a basio el “dikea lluut el mor ngii a kodall, e mo diak a klengiterreng, ma langel ma ringel.”