A kodellel a Jesus a kot el klou a belkul el tekoi er a reksi. A Jesus a mlad me bo lsebechel moluut a klengar er a rechad el mo uai ngii er a uchelel. A rechad a dimlak lobeob el kirir el meruul a mekngit, e bo lsecher me a lechub e lemad. (Genesis 1:31) Engdi a klengit a siliseb er a beluulechad el ulekiu a kot el chad el Adam. Me a Jesus a tilengetengii a klengar er ngii el mo olsobel er kid er a klengit me a kodall.​—Monguiu er a Mateus 20:28; Rom 6:23.

A Dios a ulechotii a klou el bltkil a rengul er a lodureklii a Ngelekel el mei er a chutem el mo mad el kired. (1 Johanes 4:9, 10) A Jesus a milengelechel er a redisaiplo er ngii el mo melatk er a kodellel el okiu sel longedaol er ngii el ousbech er a blauang me a bilong. Me sel doruul er tia el tekoi er a bek el rak e kede olecholt a omereng el saul er kid el kirel a bltkil a rengul a Dios me a Jesus.​—Monguiu er a Lukas 22:19, 20.

A Jesus a milsaod el kirel a telbiil er sera lekot el mengelechel er a redisaiplo er ngii me bo lolatk er a kodellel. (Mateus 26:26-28) Tiang a milsterir a techellir me te mo uldimukl er a rebebil el telutk a ildisir el mo king e prist el obengkel el ngar er a eanged. Me alta e te betok el miliol a mengedaol er a kodellel a Jesus, engdi ngdi tirke el uldimukl er tia el telbiil a sebechir el menga blauang e melim er a bilong.​—Monguiu er Ocholt 20:6.

Ngmla mo bekord el 2,000 el rak el Jehovah a melilt er tirke el mo king. (Lukas 12:32) Te di mekesai sel domekesiu er a ildisir el mo er tirke el mo kiei er tia el beluulechad el diak a ulebengelel.​—Monguiu er a Ocholt 7:4, 9, 17.