1, 2. (a) Ngera el okesiu a lulsaod er ngii a Jesus el mo er tirke el kmal sechelil? (Momes er a siasing er a uchelel a suobel.) (b) Ngkired el mo medengei a belkul a ngera el tekoi er a okesiu er a sib me a kaming?

 A JESUS er a longedecheduch er tirke el kmal sechelil el Petrus, me a Andreas, me a Jakobus, me a Johanes, e ngmilsaod a meklou a ultutelel el tekoi. Sera bo lemerek el mesaod aike el okesiu el kirel a blak a rengul el mesiou, me a teruich el ekebil, me a retedei el mesiou, e nguluuchais er tir er a lmuut el ta er a okesiu. Ngsilebedeterir el kirel a taem el “Ngelekel a Chad” a mo oukerrekeriil er a “rechad er a bek el beluu er a beluulchad,” e omii er tir el mo eru el cheldebechel, el tang a ua sib, e a tang a ua kaming. Ngdirrek el milsaod el kirel a ongedei el cheldebechel er a rechad el tir a “odam” er a King.​—Monguiu er a Mateus 25:31-46.

² Me kid a rechedal a Jehovah er chelechang a di ua tirka el apostol er a Jesus el soad el mo medengelii a belkul tia el okesiu e le klengar er a rechad a ultuil er ngii. A Jesus a mileketeklii el kmo, a rebebil a mo nguu a diak a ulebengelel el klengar, engdi a rebebil  a mo nguemed. Tiaikid a uchul me ngklou a ultutelel el bo dodengelii a belkul tia el okesiu me a rolel e ngsebeched el kiei el mo cherechar. Me ngar er tia el suobel e kede mo onger aika el ker el kmo: Ngmilekerang a Jehovah e ngosukid el mo ungil el medengelii a belkul tia el okesiu? Kede mekera e medengei el kmo tia el okesiu a melisiich er a klungel a ultutelel tia el ureor? Te rua techang a kirir el omerk er a klumech? Ngera uchul me ngkmal kired el olengeseu er a “King” me tirke el “odam” er ngii er chelechang?

3, 4. (a) A lsekum ngsoad el mo ungil el medengelii a belkul tia el okesiu, e ngkired el mo medengei a ngera el tekoi? (b) Ngmle ua ngera omesodel a Watch Tower er a rak er a 1881?

³ A lsekum ngsoad el mo ungil el medengelii a belkul a okesiu er a sib me a kaming, e ngkired el mo medengei el kmo: (1) Ngtechang a “Ngelekel a Chad” me a lechub e ng “King,” e rua techang a sib me a kaming, e rua techang a “odam” er a King? (2) Ngoingerang e a “Ngelekel a Chad” a mo omii a sib me a kaming? (3) Ngera uchul me a rebebil a okedongall el sib e a rebebil a kaming?

⁴ Sera rak er a 1881 e a Watch Tower a milsaod el kmo, a “Ngelekel a Chad” me a lechub e ng “King” a melutk el kirel a Jesus. Ngdirrek el milsaod el kmo a “odam” er a King a melutk er tirke el mo mengedereder el obengkel a Jesus el ngar er a eanged me tirke el mo kiei er a chutem er sel taem el bla bo el cherrungel. A Watch Tower a dirrek el milsaod el kmo, a rechad a mo obii er a chelsel a Ta el Telael el Rak er a Omengederederel a Kristus, me tirke el oubltikerreng el uai a Dios a mo okedongall el sib.

5. Ngmle ua ngera klemedengei er a rechedal a Dios er tia el okesiu er a rak er a 1923?

⁵ Me sera rak er a 1923 e a Jehovah a ngilsuterir a rechedal el mo medengei a lmuut el bebil el omesodel tia el okesiu. A Watch Tower er a October 15 er seikid el rak a liluut el mesaod el kmo, a “Ngelekel a Chad” a melutk el kirel a Jesus. Engdi ngmilsaod a bades el meketeklii el kmo, a “odam” el ngar er tia el okesiu a di melutk er tirke el mo mengedereder el obengkel a Jesus el tir a ngar er a eanged er a taem er a Ta el Telael el Rak. Ngmileketeklii el kmo, a sib a melutk er tirke el mo kiei er a chutem el chederedall er a omengederederel a Jesus me a rudam er ngii. Me a doltirakl er a okesiu e tirkang a olengeseu er a rudam er a King, me ngbelkul a kmo te mo mukerrekeriil er sel taem el dirk lengar er a chutem tirka el ngellitel el odam er a Jesus er a uchei er a lomuchel a Ta el Telael el Rak. Tia el suobel a dirrek el milsaod el kmo, a rua sib a oumera er a Jesus e oumera el kmo a Rengedel a Dios a mo uchul a ungil el klengar.

6. Ngerang a ulebeketakl er a rak er a 1996?

⁶ Ngmle betok el rak el duluumerang el kmo a rechad a mukerrekeriil el okiu a ureor er a berkel a klumech el meketmeklang er a taem er a ulebongel. Kede uluumerang el kmo, tirke el kongei er a klumech el domerk er ngii a sib, e tirke el otngeklii a kaming. Me nguaisei, engdi sera 1996 e ngulebeketakl a klemedengei er kid er a okesiu. A Ongkerongel a ulemekesiu er a Mateus 24:29-31 (monguiu) me a Mateus 25:31, 32 (monguiu), * e mileketeklii el kmo a Jesus a mo oukerrekeriil er a rechad er a temel a kloul ringel er sel taem el  Ngelekel a Chad a mei “el oba klisiich ma klou el klebkall.”

7. Ngera belkul a okesiu?

⁷ Me chelecha el sils e kede ungil el medengelii a belkul a okesiu er a sib me a kaming. Kede medengei el kmo a “Ngelekel a Chad” me a lechub e ng “King” a melutk el kirel a Jesus. Me a “odam” er a King a melutk er a rengellitel el Kristiano, el tir a mo mengedereder el obengkel a Jesus el ngar er a eanged. (Rom 8:16, 17) A “sib” me a “kaming” a melutk el kirir a rechad er a bek el beluu. Te mo mukerrekeriil er a mo bedul a ulebongel er a kloul ringel, el ngii a di kmedung el mo omuchel. Kede dirrek el medengei el kmo, a Jesus a mo oukerrekeriil er a rechad el ultuil er a omerellir el mo er a rengellitel el dirk ngar er a chutem. Me kede oba klou el omereng el saul e le Jehovah a mla meketeklii a belkul tia el okesiu me aike el bebil er a okesiu el debetik er a 24 me a 25 el bliongel er a Mateus!

8, 9. Ngera uchul me a Jesus a milsaod er tirke el ua sib el kmo te “melemalt”?

⁸ Sera losaod er a okesiu er a sib me a kaming a Jesus, e ngdimlak a omesodel el kirel a berkel a klumech. Me kede mekera e medengei el kmo tia el okesiu a melisiich er a klungel a ultutelel tia el ureor?

⁹ Ngungil a domtab el kmo, a Jesus a milsaod er a okesiu el olisechakl er a redisaiplo er ngii. Ngbleketakl el kmo ngdimlak losaod el kirel a charm el sib me a kaming. Me ngdi osisiu, ngdimlak longerechir er a rokui el ua sib el mo olengeseu el mesterir a rengellitel a kall me a bail me a lechub e ngkirir el oldingel er tir sel lsecher me a lechub e lemekelebus. A Jesus a bai milsaod er tirke el ua sib el kmo te “melemalt,” e le tir el blak a rengrir el olengeseu er a rudam er ngii er a chelsel tia el taem er a ulebongel el medbedubech a ringel er ngii.​—Mt. 10:40-42; 25:40, 46; 2 Ti. 3:1-5.

10. Te mekerang a sib e olengeseu er a rudam er a Kristus?

¹⁰ A Jesus a milsaod er a okesiu er a sib me a kaming er sera losaod aike el tekoi el mo duubech er a taem er a ulebongel. (Mt. 24:3) El ua tiang, ngdilu el kmo: “Tial Ebangkelio el kirel ngii el Renged a mo mosisechakl er a beluulchad el rokir.” (Mt. 24:14) Me a uchei er a losaod er a okesiu er a sib me a kaming e ngmilsaod er a okesiu er a retedei el mesiou, el ulsisecheklterir a rengellitel el kmo ngkirir el mo blak a rengrir el omerk er a klumech. Engdi chelechang e te di mekesai el ngellitel el Kristiano a ngar er a chutem, e dirk medechel a klou el ureor! Me tirka el ngellitel a kirir el omerk er a ungil chais el mo er a “rechad er a bek el beluu er a beluulchad.” Me a okesiu er a sib me a kaming a meketeklii el kmo tirke el ua “sib” a mo olengeseu er tirka el odam er a Jesus. Me a ta er a kot el ungil el rolel e a sib a sebechir el olengeseu er a rudam er a Jesus a okiu sel lolengeseu er tir el meruul er a berkel a klumech. Engdi ngsebechir el di melenget a udoud el kirel tia el ureor me a lechub e lolisiich er a rengellitel me lolemolem el omerk er a klumech e merekong?

11. Ngera el ker a duubech, e ngera uchul?

¹¹ Chelechang e te ngar er ngii a eai el miliol el disaiplo er a Jesus el ruumesingd er tir a diak el ngellitel. Me a Jesus a dimlak lomesterir a udoud el talent, e bai milsterir a  rengellitel el odam er ngii. (Mt. 25:14-18) Me ngduubech a ker el kmo, ‘A lsekum a Jesus a dimlak lebesterir aika el talent, e ngdirk kirir el omerk er a klumech?’ Ochoi. Me bo dosaod.

12. Ngera kede suubii er a tekingel a Jesus el medung er a Mateus 28:19, 20?

¹² A Jesus a dilu er a rokui el disaiplo er ngii me bo lomerk er a klumech. A uriul er a lebekiis a Jesus, e ngdilu er a rultirakl er ngii me loruul er a rechad ‘el mo obengkel’ e lolisechakl er tir me bo loltirakl ‘a ikel rokui el bla ldu er tir.’ Me tirke el mo disaiplo a dirrek el mle kirir el oltirakl a tekingel a Jesus el kirel a berkel a klumech. (Monguiu er a Mateus 28:19, 20.) Me ngbleketakl el kmo, kid el rokui a kired el omerk er a klumech, alta e a omeltked a mo kiei er a eanged me a lechub e ngchutem.​—Rel. 10:42.

13. Ngera kede suubii er a ues el lilsang a Johanes?

¹³ A babier er a Ocholt a meketeklii el kmo a rengellitel me a relmuut el bebil a mo omerk er a klumech. A Jesus a milsang a apostol el Johanes a ues el kirel a “Redil el kldmokl el kirel mo bechiil” el omekedong er a rechad el me melim er a ralm er a klengar. Ngika el “Redil” a melutk er tirke el 144,000 el ngellitel el tir a mo mengedereder el obengkel a Jesus el ngar er a eanged. (Och. 14:1, 3; 22:17) Me a ralm a omtechei er a olubet el tengetengel a Jesus el uchul me ngsebechir a rechad el mo mimokl er a klengit me a kodall. (Mt. 20:28; Jn. 3:16; 1 Jn. 4:9, 10) A rengellitel a blak a rengrir el olisechakl er a rechad el kirel a olubet me a rolel e ngsebechir el ngmai a klungiolir er ngii. (1 Ko. 1:23) Engdi tia el ues a dirrek el mesaod el kirir a relmuut el bebil el diak el ngellitel e bai oba omelatk el mo kiei er a chutem. Tirkang a dirrek el kirir el omekedong el kmo: “Mei!” Me te meruul er tiang el okiu sel lolisechakl er a ungil chais el mo er a rechad. Me a leuaisei, e tia el ues a  meketeklii el kmo tirke el rokui el kongei er a ungil chais a kirir el omerk er ngii el mo er a rebebil.

14. Kede mekerang e olengesenges a “llechul a Kristus”?

¹⁴ Tirke el rokui el olengesenges a “llechul a Kristus” a kirir el omerk er a klumech. (Gal. 6:2) A Jehovah a mengerechir er a rokui el chedal el mo oltirakl a osisiu el llach. Ngar er a mong e ngmilengerechir er a rechad er a Israel me a rechad er a ngodech el beluu el kiliei er a delongelir el mo oltirakl a llechul. (Exo. 12:49; Lev. 24:22) Me chelecha el taem e ngdikea doltirakl a Llach er a Moses, engdi a dengellitel me a lak, me kid a di kired el olengesenges a “llechul a Kristus.” Me a ta er a kot el klou a ultutelel el llechul a kmo, ngkired el oubltikerreng. (Jn. 13:35; Jak. 2:8) Ngkirel el mo betik a rengud er a Jehovah, me a Jesus, me a rechad. Me a kot el ungil el rolel a doubltikerreng el mo er a rechad a sel douchais er tir er a ungil chais er a Rengedel a Dios.​—Jn. 15:10; Rel. 1:8.

15. Ngera me ngsebeched el dmu el kmo a Jesus a uleldurech er a rokui el disaiplo er ngii el mo omerk er a klumech?

¹⁵ A tekingel a Jesus el mo er a remekesai el disaiplo er ngii a dirrek el sebechel el melutk el mo er a rebetok el disaiplo. El ua tiang, a Jesus a tilbir el mo er a redi 11 el disaiplo er ngii el kmo te mo obengkel el mengedereder er a Rengedel. Engdi te ngar er ngii a 144,000 el mo mengedereder el obengkel. (Lk. 22:29, 30; Och. 7:4-8; 20:6) Me a uriul er a lebekiis a Jesus, e te di mle mekesai a rirengesii er a longelechel er tir el mo omerk er a klumech. (Rel. 10:40-42; 1 Ko. 15:6) Engdi a rokui el disaiplo er sel taem a ullengesenges er ngii e mlo omerk er a klumech. (Rel. 8:4; 1 Pe. 1:8) Me ngdi osisiu er chelechang, a Jesus a dimlak el ileakl el mengedecheduch er tirke el eai el miliol el tir a omerk er a klumech. Engdi tir el rokui a medengei el kmo ngkirir el olecholt a klaumerang er tir er a Jesus el okiu sel lomerk er a klumech.​—Jak. 2:18.

16-18. Kede mekerang e olengeseu er a rudam er a Kristus, e ngera uchul me ngklou a ultutelel er chelechang?

¹⁶ A Satan a kmal blak a rengul el oldechelakl er a rengellitel el odam er a Kristus el dirk ngar er a chutem, e le ngmedengei el kmo “ng di kedeb ku temel.” (Och. 12:9, 12, 17) Me nguaisei, engdi a rengellitel a melemolem el omekrael er a ureor er a berkel a klumech me te kmal betok a rechad el orrenges er a ungil chais er a beluulechad el rokir. Me ngbleketakl el kmo, a Jesus a olengeseu er a rengellitel e omekrael er tir.​—Mt. 28:20.

¹⁷ Kede oba ileakl el techall el mo olengeseu er a rudam er a Kristus el okiu sel domerk er a klumech. Kede dirrek el olengeseu er tir sel dolenget a udoud e dolengeseu el meleketek a meklou me a mekekerei el Blil a Ongdibel me a branch office. Me sel dolengesenges er a remechuodel me a relmuut el bebil el lolilt er tir a “blak a rengul e mellomes a rengul el mesiou,” e kede ochotii el kmo ngsoad el olengeseu er a rudam er a Kristus.​—Mt. 24:45-47; Heb. 13:17.

¹⁸ Ngdi telkib kung e a rengellitel a mo nguu a ulebongel el olangch. E sola e a rechanghel a mo kodoked aike el “eual uchul a eolt er a beluulchad” me ngomuchel a kloul ringel. (Och. 7:1-3) Me a uchei er a lomuchel a Armakedon e a Jesus a mo ngoititerir a rengellitel el mo er a eanged. (Mt. 13:41-43) Me a lsekum ngsoad el mo ta er a sib er sel taem el lemei a Jesus, e ngkmal kired el olengeseu er a rengellitel el odam er ngii er chelechang.