1-3. Ngera uchul me a Paulus a uluumerang er a Jehovah? (Momes er a siasing er a uchelel a suobel.)

 A REKRISTIANO el kiliei er a beluu er a Rom er a irechar a chillebangel a kdekudel el blekeradel, e le rechad er sel beluu a mle meringel el omekcharm er tir. Te uleltelechakl er tir el kmo te uluuketui er a rechad e dirrek el mle uchul a klou el seseb er a beluu. Me te betok a rudam me a rudos el mlekelebus. A rebebil er tir a lebilechei a charm me ngoldechelakl er tir, me a relmuut el bebil a lulleel er tir er a kerrekar e melul er tir el mo ua okal a leklebesei. Me oleko ke mle Kristiano er sel taem e ke medengei el kmo ngsebechel a ta er aika el tekoi el duubech el eko er kau er a ngii di el taem.

² Ngar er tiaikid el taem e a apostol el Paulus a mlekelebus. Me nglocha ulemdasu el kmo kele lak a Kristiano el mo ngosuir e le ngmla ta el leduubech tia el tekoi el mo er ngii. Engdi seikid el taem e a Jesus a ngilsuir, me ngdilu el kmo: “Ngdi Rubak a mlar bita er  ngak el melisiich er ngak,” e dilechelii el kmo: “E ngak a mlengidel ra ngerel a laion.”​—2 Ti. 4:16, 17, BT. *

³ A Paulus a millatk er a rolel e a Jehovah a ngilsuir er a uchei. Me ngmle ulterekokl a rengul el kmo a Jehovah a mo ngosuir er chelechang me a ngar medal taem me ngmo sebechel el outekangel. Tiaikid a uchul me ngdilu el kmo: “A Rubak a mo sobecheklak er a rokui el mekngit.” (2 Ti. 4:18) Me a Paulus a mle ungil el medengei el kmo, alta e a rechad a mo diak el sebechir el ngosuir, engdi ngii a di sebechel el ultuil er a Jehovah me a Jesus el kirel a ngeso.

4, 5. (a) Ngtecha sebechel el ngosukau er aike el mousbech? (b) Ke mekerang e okesengii a deleuill er kau me a Jehovah?

⁴ Kau ke mla ta el mchelebangel a kmal meringel el mondai e ulemdasu el kmo ngdiak a chad a sebechel el ngosukau? El ua tiang, nglocha dikea moureor, me a lechub ke chillebangel a orrimel er a skuul, me a lechub e ke kmal mlo smecher. Me ke locha mlo olengit a ngeso er a rebebil, engdi ngmlo mekngit a rengum e le ngdimlak lengesukau er aike el mousbech. Ngbleketakl el kmo, ngdiak el rokui el mondai a sebechir a redi chad el sumechokl. Me ke mo mekerang? A Biblia a kmo: “Moumeral ulsirs er a RUBAK.” (Osi. 3:5, 6) Me a Dios ngmera el sebechel el ngosukau? Ochoi! A Biblia a meketeklii el kmo a Jehovah a mera el olengeseu er a rechedal.

⁵ A lsekum a rechad a diak lengesukau er aike el mousbech e lak bo el kesib a rengum. Ngbai ungil el momes er tia el mondai er kau el ua letechellem el mo mui el ulsirs er a Jehovah. Ngdirrek el mo sebechem el mesang a ulekerreuil a Jehovah el eko er kau. Me tiang a mo uchul e ngmengal mo mesisiich a klaumerang er kau e okesengii a deleuill er kau me ngii.

6. Ngera uchul me sel lebo er ngii a mondai er kid e ngsebechel el mo meringel er kid el oumerang er a Jehovah?

⁶ Nglocha ngar er ngii a tekoi el suebek a rengum er ngii. Me ke mla meruul aike el sebechem el kirel tia el tekoi e dirrek el mla meluluuch el olengit a ngeso er a Jehovah. Me chelechang, e ngsebechem el chelellakl a rengum e oumerang el kmo ngmo ngosukau? Ngkmal sebechem! (Monguiu er a Psalm 62:8; 1 Petrus 5:7.) A lsoam el olekes er a deleuill er kau me a Jehovah e ngkmal kirem el mesuub el mo oumerang er ngii. Engdi a lebebil er a taem e tiang a diak el beot. E ngera uchul? A ta er a uchul a kmo, a Jehovah a locha mo diak lemereched el onger er a nglunguchem.​—Psa. 13:1, 2; 74:10; 89:46; 90:13; Hab. 1:2.

7. Ngera uchul me a Jehovah a diak leblechoel el mereched el onger a nglunguched?

⁷ Ngera uchul me a Jehovah a diak leblechoel el mereched el onger a nglunguched? A Biblia a omekesiu er a Jehovah el ua chedam. (Psa. 103:13) Me a chedam a diak di lemereched el msa ngelekel a rokui el tekoi el olengit. Ngmedengei el kmo a ngelekel a sebechel el di mo soal a klalo er chelechang e di telkib e ngmo chetil. Ngdirrek el medengei aike el mo klungiolel a ngelekel me a rebebil. Ngmedengei aike el lousbech a ngelekel e medengelii a ungil el taem el lebsang. Engdi a lsekum a chedam a di mereched el msa ngelekel a rokui el soal, e ngmocha mesiungel a ngelekel. A Demad el Jehovah a kmal betik a rengul er kid. Me ngii el milebid a uchul me ngmedengei aike el dousbech e medengelii sel ungil el taem el bo lomeskid. Me ngungil a bo leklou a rengud  e dongiil er a Jehovah el mo onger a nglunguched.​—Momekesiu er a Isaia 29:16; 45:9.

8. Ngera telbilel a Jehovah el kirel a mondai el dechelebangel?

⁸ Lak mobes el kmo, a Jehovah a medengei a sebeched me a diak el sebeched. (Psa. 103:14) Me ngsmisichid el mo sebeched el outekangel. A lebebil er a taem e kede mo omdasu el kmo ngdikea el sebeched. Engdi a Jehovah a tibir el kmo a lsekum a mondai er kid a kmal mo meringel e ngmo ‘meskid a rolel e kede tuobed er ngii.’ (Monguiu er a 1 Korinth 10:13.) Me kede mo mechelaod sel dodengei el kmo a Jehovah a medengei aike el sebeched me aike el diak el sebeched el mtekangel.

9. Kede mo mekerang a lsekum ngdiak lemereched el monger a nglunguched?

⁹ A lsekum kede meluluuch engdi ngdiak lemereched el monger a nglunguched, e ngkirel el mo klou a rengud. Lak dobes el kmo, a Jehovah a kmal soal el ngosukid, engdi ngmengiil er sel kot el ungil el taem el bo lebeskid a ngeso. A Biblia a kmo: “Ngdi RUBAK a dirk mengiil el mo ungil a tekingel er kemiu sel bo le chebkemiu. Ng kldmokl el mo chubkemiu ele ng di blechoel el meruul a melemalt. A deurreng a mei sel moumeral ulsirs er a RUBAK.”​—Isa. 30:18.

10-12. (a) Ngera el omelsemai a sebechel el mo er a chad el omekerreu er a smecher el chedal? (b) Ngerang rullii er a deleuill er kau me a Jehovah sel multuil er ngii er a chelsel a meringel el taem? Ka mosaod.

¹⁰ A lebebil er a taem e nglocha mo er ngii a mondai el kmal omekringel er a uldesuem, me ke mo ua Paulus el omdasu el kmo ngkirem el mo mosobel er a “ngerel a laion.” (2 Ti. 4:17, BT) Me ngar er a chelsel tia el blekeradel, e ngkmal klou a ultutelel el kirem el mo oumerang er a Jehovah. El ua tiang, ke locha omekerreu er a ta er a chedam el kmal smecher, e mla meluluuch el mo er a Jehovah me lengesukau el mo mesisiich e ungil el melilt a tekoi. * Me chelechang e ngtelkib el mla mo budech a uldesuem e le Jehovah a ungil el medengei a tekoi el mchelebangel. Me ngmo ngosukau el melemolem el blak a rengum.​—Psa. 32:8.

¹¹ Ngsebechem el mo omdasu el kmo a Jehovah a dirkak lengesukau. A retoktang a locha kakebosech a uldesuir el kirel ngika el smecher el chedam. Me a lechub e ke oureng me a rechedam lengesukau, engdi te bai di dechelel a mondai. Me di moumerang er a Jehovah e ngmo smisichau. E molemolem el olekes er a deleuill er kau me Ngii. (Monguiu er a 1 Samuel 30:3, 6.) Me sel bo molechesuar el kmo ngmla ngosukau, e ke lmuut el mo kmeed er Ngii.

¹² Tiang a dilubech el mo er a Linda. * Ngmle betok el rak el omekerreu er a demal me a delal er a uchei er a lemad. Ngdmu el kmo: “Seikid el taem e ngak me a bechik me a ochedak a dimlak ki modengei el kmo aki mo mekerang.” E dilechelii el kmo: “Engdi chelechang e aki mla mo medengei el kmo a Jehovah a mera el ngilsukemam. Ngmillisiich er kemam e milskemam a ngeso el ki muluusbech er ngii, alta aki mlo omdasu el kmo ngdikea ngera el sebecham el rullii.”

13. Ngmilekerang a klaumerang er a Rhonda e ngosuir el mo outekangel a chelebuul?

¹³ A mui el klaumerang er kid er a Jehovah a dirrek el sebechel el ngosukid el mo outekangel a chelebuul. A Rhonda a mlo chelebangel er tia el tekoi. A diak el Sioning el bechil a mirrort er a chebechiielir. E a osisiu el taem e a  ochedal a mlo smecher er a meringel el rakt el lupus. E telkib el taem er a uriul e a bechil a ochedal a mlad. Me a uriul er a leduubech aika el tekoi el mo er a Rhonda, e ngmlo omuchel el regular pioneer. Engdi a delal a mlad. Me ngmilekerang e mo sebechel el outekangel? Ngdmu el kmo: “Ngmle bek el sils el kungedecheduch er a Jehovah el ouchais a ngar er a renguk el mo lmuut er aike el mekekerei el tekoi. Tiang a millisiich a klaumerang er ngak. Ngulsisecheklak el mo meduch el ultuil er Ngii er a bai di kultuil er a uldesuek me a uldesuir a rebebil. Me ngmera el ngilsukak er aike el rokui el kuusbech. Me chelechang e ak mla mesa chimal a Jehovah el olengeseu er ngak.”

14. Ngmekerang a Jehovah e ngosukau er sel taem el lemesuld a ngklel a chad er a blim?

¹⁴ Ka molatk er a kuk ta er a meringel el blekeradel. Oleko ta er a chad er a blim a mesuld a ngklel. E kau a medengei a ulekrael er a Biblia el kirel a chad el seluld a ngklel. (1 Ko. 5:11; 2 Jn. 10) Engdi a bltkil a rengum el mo er ngii a rullau me ngkmal mo meringel er kau el olengesenges aika el uleklatk er a Biblia. * Me kau, ke oumerang el kmo a Jehovah a sebechel el smisichau el mo olengesenges er ngii? Ngsebechem el omes er tia el omelsemai el ua letechellem el mo kmeed er a Jehovah?

15. Ngera uchul me a Adam a dimlak lolengesenges er a Jehovah?

¹⁵ Ngua ngerang a domekesiu er tia el blekeradel el mo er a omerellel ngike el kot el chad el Adam? Ngikang ngulemdasu el kmo ngsebechel el mo ikrii a llechul a Jehovah e diak lemad? Ngdiak, e le Adam a ‘dimlak lemecheblad.’ (1 Ti. 2:14) Me ngera uchul me ngdimlak  lolengesenges er a Jehovah? Ngkillii sel rodech el bechil a ngiluu el msang e le ngkuk mle betik a rengul er a bechil el ngaruchei er a Jehovah. Me ngkilengei el orrenges er a bechil er a bai lorrenges er a Jehovah.​—Gen. 3:6, 17.

16. Ngkirel el mo mesisiich a bltkil a rengud el bedul techang, e ngera uchul?

¹⁶ A mekngit el omerellel a Adam a osisecheklid el kmo ngkirel a bltkil a rengud el mo er a Jehovah el mo er uchei er a ngii di le chad. (Monguiu er a Mateus 22:37, 38.) Sel bo deuaisei e ngmo sebeched el ngosuterir a rechedad el ngar er a kot el ungil el rolel, alta te mesiou er a Jehovah me a lechub e ngdiak. Molemolem el melisiich er a bltkil a rengum me a klaumerang er kau el mo er a Jehovah. Me a lsekum ngsuebek a rengum el kirel a seluld a ngklel el chedam, e moluluuch el ouchais aike el rokui el ngar er a rengum el mo er a Jehovah. * (Rom 12:12; Fil. 4:6, 7) Me alta ngkmal mo meringel er kau, engdi ngkirem el omes er tia el omelsemai el ua letechellem el lmuut el mo kmeed er a Jehovah. Seikid e ngmo sebechem el oumerang er ngii e ulterekokl a rengum el kmo a blekongesenges er kau a mo uchul a klungiolem kau me ngika el chedam.

17. Ngerang mla tibir a Jehovah el mo er tirke el meruul aike el sebechir el omerk er a klumech?

¹⁷ Ngera uchul me a Jehovah a ulsebelii a Paulus er a “ngerel a laion”? A Paulus a dilu el kmo: “Me bo lsebechek el churrungel a berekel a tikingel a Dios.” (2 Ti. 4:17, BT) A Jehovah a dirrek el meskid a techelled el mo omerk er a “Ungil Chais,” e omes er kid el ua ‘kldemel er a ureor.’ (1 Th. 2:4; 1 Ko. 3:9) Me sel doruul aike el rokui el sebeched el mo omerk er a klumech, e ngmo ulterekokl a rengud el kmo a Jehovah a mo meskid aike el rokui el dousbech. (Mt. 6:33) Ngdirrek el mo sebechel el klou a rengud el mengiil er a temel a Jehovah el mo onger a nglunguched.

18. Ke mekerang e smisichii a klaumerang me a deleuill er kau me a Jehovah?

¹⁸ Mada mousbech a bek el techall el mo melisiich er a deleuill er kau me a Jehovah. Me sel bo el sebek a rengum el mondai er kau a uchul, e momes er ngii el ua letechellem el lmuut el mo kmeed er a Jehovah. Bo blechoel el menguiu, e mosuub er a Biblia, e molebedebek a tekoi el mosuub. Molemolem el meluluuch e leblak a rengum el mesiou er a Jehovah. Me sel moruul aikang, e bo moumerang el kmo ngmo ngosukau el outekangel a ngii di el mondai er chelechang me a ngar medam el klebesei.