1. Ngera uchul me ngkired el melemolem el melisiich er a deleuill er kid me a Jehovah?

 A LSEKUM ke ta er a mla metecholb el Sioning er a Jehovah, e ngar er ngii a mekreos el deleuill er kau me Ngii. Engdi ngbek el taem e tia el deleuill er kau a measem er a betok el tekoi el ngar tia el beluulechad er a Satan me a dirrek el chelitechetul a klechad er kau. Sei a uchul me ngkmal kired el melemolem el melisiich er a deleuill er kid me a Jehovah.

2. Kede mekerang e lmuut el okesengii a deleuill er kid me a Jehovah?

² Ngua ngera klaumerang er kau er a Jehovah? Ke omes er ngii el ua mera el Sechelim? Ngsoam el melisiich er a deleuill er kau me Ngii? A Jakobus 4:8 a subedau er a tekoi el kirem el meruul er ngii el kmo: “Molekeed er kemiu er a Dios, me bo lekeed er kemiu.” Me sel momuchel el olekeed er kau er a Jehovah e ngmo olekeed er ngii er kau. Me a cherengel a taem el moruul el uaisei, e nglmuut el mo kmes a deleuill er kau me Ngii me ngsebechem el mo ua uldesuel a Jesus er a ledu el kmo: “Ng meral ngar ngii a ulderchak. E . . . ngak a medengelii.” (Jn. 7:28, 29) Engdi ngera  sebechem el remuul me mluut el mo kmeed er a Jehovah?

3. Ke mekerang e chadecheduch kau me a Jehovah?

³ A lsekum ngsoam el mo kmeed er a Jehovah e ngklou a ultutelel el kirem el blechoel el chadecheduch kau me Ngii. Engdi ngmekerang a omoruul er tiang? Ka di molatk, oleko ngar er ngii a sechelim el kiei er a cheroid el beluu, e ngsebechiu el blechoel el keluches e kaudengua. Me ngdi osisiu, ngkirem el blechoel el mengedecheduch er a Jehovah el okiu sel moluluuch el mo er ngii. (Monguiu er a Psalm 142:2.) Engdi ngmekerang a Jehovah a longedecheduch er kau? Ngokiu sel bo blechoel el menguiu er a tekingel el Biblia e molebedebek aike el tekoi el monguiu. (Monguiu er a Isaia 30:20, 21.) Me bo desa rolel e ngsebechel aika el tekoi el smisichii a deleuill er kau me a Jehovah me ngmo ua kmeed el Sechelim.

4, 5. Ngmekerang a Jehovah e mengedecheduch er kau sel monguiu er a Biblia? Mosaod.

⁴ Kede medengei el kmo a Biblia a klemechel a Dios el mo er a rokui el chad. Engdi a Biblia, ngsebechel el ngosukau el mo kmeed er a Jehovah? Ngsebechel! Bo leblak a rengum el omtab a tekoi el monguiu er a Biblia er a bek el taem. E molatk er a rolel e ngsebechem el oltaut aike el tekoi el mosuub. Sel moruul el uaisei, e ke mecherei a Jehovah me ngmengedecheduch er kau. Seikid e ngmo ua kmeed el Sechelim el olengeseu er kau, me kau a lmuut el mo kmeed er ngii.​—Heb. 4:12; Jak. 1:23-25.

⁵ Ngua ngerang a uldesuem sel mchiuii a tekingel a Jesus el kmo: “Lak mongudel a mekreos el klalo el kiriu er tial beluulchad”? A lsekum ke nguu a Jehovah el mo kot er a klengar er kau e ke mo medengei el kmo ngdmeu a rengul er kau. Engdi ke locha menguiu a tekingel a Jesus e mo omdasu el kmo ngkirem el omekbeot er a klengar er kau e lmuut el mo blak a rengum el mesiou er a Dios. Sel bo molechesuar tiang, e ngbelkul a kmo a Jehovah a olengeseu er kau el mo medengelii a rolel e ngsebechem el lmuut el mo kmeed er ngii.​—Mt. 6:19, 20.

6, 7. (a) A omesubed er a Biblia ngerang rullii er a bltkil a rengud el mo er a Jehovah me a bltkil a rengul el me er kid? (b) Ngkirel el ua ngerang a moktek er kid sel dosuub er a Biblia?

⁶ Ngmera el tekoi, sel dosuub er a Biblia e ngmo sebeched el melodech a omerelled me kede lmuut el mo ungil el mesiou er a Jehovah. Engdi kede dirrek el mesuub el kirel a bltkil a  rengul me a ungil el omerellel me nglmuut el mekurulii a bltkil a rengud el mo er ngii. Me sel loleketek a bltkil a rengud el mo er ngii, me ngii me nglmuut el kmal mo betik a rengul er kid, e a deleuill er kid me ngii a mengal mo kmes.​—Monguiu er a 1 Korinth 8:3.

⁷ A lsekum ngsoad el olekeed er kid er a Jehovah e ngklou a ultutelel el kirel el melemalt a uldesued e mesuub er a Biblia. A Jesus a dilu el kmo: “A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.” (Jn. 17:3) Me ngsebeched el suub a betok el ungil el tekoi sel donguiu er a Biblia, engdi a ngaruchei el moktek er kid a kired el mo ungil el medengelii a Jehovah.​—Monguiu er a Exodus 33:13; Psa. 25:4.

8. (a) Ngua ngera uldesuir a rebebil el kirel a omerellel a Jehovah el mo er a King el Asaria? (b) Ngmo ua ngera uldesuem el kirel a Jehovah a lsekum ke ungil el medengelii?

⁸ Sel bo dungil el medengelii a Jehovah, e ngdiak bo lerrau a rengud a lsekum a Biblia a diak el bleketakl a omesodel el kirel a tekoi el lerirellii. El ua tiang, sel taem er a longedereder er a beluu er a Juda a Asaria, e a rechad a milengull a ngodech el chelid, engdi ngii a dimlak. “Ng mle melemalt a omerellel er medal a RUBAK.” (2 Ki. 15:1-5) Me a leuaisei, e ngera uchul me a Jehovah a milelsii a Asaria me ngmlo chebedes? Ngdiak a bleketakl el omesodel tiang er a chelsel a cheldecheduch el kirel. Me ngua ngera uldesuem el kirel a omerellel a Jehovah? Ngmo rrau a rengum e mo omdasu el kmo a Jehovah a ulemals er a Asaria el di diak a ungil el uchul? A lsekum ke ungil el medengelii a Jehovah e ngdiak bo momdasu el uaisei. E le ke medengei el kmo a omellach er ngii a blechoel el melemalt e tabesul. (Jer. 30:11) Me alta e ngdiak modengelii a uchul me a Jehovah a ulemals er a Asaria, engdi ngulterekokl a rengum el kmo ngmle melemalt a tekoi el lerirellii a Jehovah.

9. Ngera ngosukid el mo medengelii a uchul me a Jehovah a ulemals er a Asaria me ngmlo chebedes?

⁹ A Biblia a meskid a lmuut el bebil er a omesodel a klengar er a King el Asaria el dirrek el mle okedongall el King el Usia. (2 Ki. 15:7, 32) A 2 Kronika 26:3-5, 16-21 a mesaod el kmo: “Ng mirruul a llemalt er medal a Dios.” Engdi ngdirrek el mesaod er ngii er a uriul el kmo: “Ng mlo kedidai a rengul el mlo uchul a temellel.” Ngika el king a millasem el mo meruul er a tekoi el di kirir a reprist el meruul er ngii. Me a re 81 el prist a milerrob er ngii e dilu er ngii el kmo a omerellel a kmal mekngit. Me ngmilekerang a Usia? Ngii el kmal mla mo kedidai a rengul a uchul me ngilasech a rengul er tir! Me aika el bebil er a omesodel a meketeklii a uchul me a Jehovah a milelsii me ngmlo chebedes.

10. Ngera uchul me ngdiak a ultutelel el dongerechir a betok el uchul me a Jehovah a meruul a tekoi? Ngmekerang e mo ulterekokl a rengud el kmo a Jehovah a di melemalt a omerellel?

¹⁰ Ngerang a klou a ultutelel el suobel el desuubii er tiang? Ngar tia el cheldecheduch, e ngar er ngii a bleketakl el omesodel el ngosukid el mo medengelii a uchul me a Jehovah a milelsii a Asaria. Engdi ke mo mekerang a lsekum ngdiak a bleketakl el omesodel a Biblia el kirel a tekoi? Ngmo rrau a rengum e omdasu el kmo a Jehovah a dimlak lemelemalt a omerellel? Me a lechub e ngsebechel aike el bebil er a omesodel a Biblia el rullau me ke mo oumerang er Ngii? (Dut. 32:4) Me a cherengel a taem el lemukeroul a klemedengei er kid er a Jehovah e ngmengal mo betik a rengud e oumerang er ngii. Seikid e ngmo diak mongerechir a betok el uchul me ngmirruul a tekoi. Me a cherengel a taem el mosuub er a Biblia e ngmukeroul a klaumerang er kau er a Jehovah  me ke lmuut el mo kmeed er Ngii.​—Psa. 77:12, 13.

11-13. Ke mekerang e medengei el kmo a Jehovah a orrenges a nglunguchem? (Momes er a siasing er a uchelel a suobel.)

¹¹ Sel doluluuch e kede olekeed er kid er a Jehovah. Kede oldanges er ngii, e oureng a sulel, e dirrek el olengit a ngeso er ngii. (Psa. 32:8) Engdi a lsekum ngsoam el mo kmeed er ngii e ngkirel el mo ulterekokl a rengum el kmo ngorrenges a nglunguchem.

¹² A rebebil a kmo a Dios a diak lorrenges a nglunguuch, e a nglunguuch a di tekoi el doruul er ngii me ngmo ungil a rengud. Te oumerang el kmo a nglunguuch a mo uchul e ngsebeched el mo ungil el melatk a mondai er kid e di kid el mo metik a nger er ngii. Ngmera el tekoi, tiang a sebechel el ngosukid a lebebil er a taem. Engdi a Jehovah a mera el orrenges er kau a lsekum ke meluluuch el mo er ngii. Me ke mekerang e mo medengei?

¹³ Ka di molatk, a uchei er a lemei er a chutem a Jesus e ngmilsang sel rolel er a Jehovah a longer a nglunguchir a remesiungel. Me sera lengar tia el chutem e ngmilluluuch el mo er a Demal el ouchais aike el ngar er a rengul. Ngmla er ngii a ta el taem el loluluuch el ta el kesus. (Lk. 6:12; 22:40-46) Me a Jesus ngkilengei el meruul er tiang oleko ngulemdasu el kmo a Jehovah a diak lorrenges a nglunguuch? Ngdirrek el ullisechakl er a rulebengkel er a rolel a loluluuch. Omomdasu e ngkilengei el meruul er tiang oleko ngulemdasu el kmo ngdiak lemorenges a nglunguchir? Me ngbleketakl, a Jesus a mle medengei el kmo a Jehovah a orrenges a nglunguuch, me ngdilu er ngii el kmo: “Ak mereng a sulem e Chedam, ele korrenges er ngak. Ak medengei el kmo ke di blechoel el orrenges er ngak.” (Jn. 11:41, 42) Me kid me ngdirrek el kirel el mo ulterekokl a rengud el kmo a Jehovah a orrenges a nglunguched.​—Psa. 65:2.

14, 15. (a) Ngmo uchul a ngera el klungioled sel lebleketakl a nglunguched? (b) Ngmilekerang a nglunguchel a Kathy e ngosuir el lmuut el mo kmeed er a Jehovah?

¹⁴ A lebebil er a taem e ngdiak el sal bleketakl a nger er a nglunguchem. Engdi a lsekum ke meluluuch el meketeklii a soam el mo er a  Jehovah, e ngmo beot er kau el mtebengii a nger er a nglunguchem, me nglmuut el smisichii a klaumerang er kau. Me a lsekum ke subedii a Jehovah er aike el rokui el uldesuem e nglmuut el mo olekeed er ngii er kau.

¹⁵ Ka molatk er a omerellel a Kathy * el mle blechoel el mo oldingel alta ngdimlak el soal el meruul er tia el tekoi. Ngdilu el kmo: “Ngmle chetik el mo oldingel. Ngmera el mle chetik el tekoi.” Engdi sera le retire er a ureor, e a ta er a remechuodel a millisiich er ngii el mo regular pioneer. Ngdilu el kmo: “Ngdirrek el milskak a application form. Me ak tilbir er a renguk el mo pioneer, e dirrek el ulemuchel el meluluuch el mo er a Jehovah er a bek el sils me lerellak el mo soak tia el ureor.” Me a Jehovah, ngulenger er a nglunguchel? A uriul er a edei el rak el losiou el pioneer, e ngdmu el kmo: “A klou el taem el kulengoit er ngii el oldingel e mesuub a omerellir a rudos a mla rullak el lmuut el mo meduch el omerk er a klumech. Me chelechang e ngdiak di el soak tia el ureor er a odingel, ngbai kmal imis el soak. Me a lmuut el tang, a deleuill er ngak me a Jehovah a mengal mla mo kmes.” Me a nglunguchel a Kathy a mla ngosuir el lmuut el mo kmeed er a Jehovah.

16, 17. (a) Ngera kired el meruul er ngii me bo lemesisiich a deleuill er kid me a Jehovah? (b) Ngera kede mo mesaod er a ongingil el suobel?

¹⁶ Me ngsebeched el melemolem el olekeed er kid er a Jehovah el diak a ulebengelel. Me dolemolem el orrenges er ngii el okiu a omesubed er a Biblia, e dongedecheduch er ngii el okiu a nglunguuch. Sel doruul el uaisei, e a deleuill er kid me ngii a lmuut el mo mesisiich e tiang a ngosukid me ngsebeched el outekangel a omelsemai.

¹⁷ Engdi a lebebil er a taem e ngmo meringel er kid el outekangel a mondai, alta e kede melemolem el meluluuch el mo er a Jehovah. Seikid e ngsebechel el mo meringel er kid el oumerang er Ngii. Me kede mo omdasu el kmo nglocha diak lorrenges a nglunguched, e dikea lesechelid. Me a lsekum kede mocha omdasu el uaisei, e kede mo mekerang? A ongingil el suobel a mo ngosukid el kirel tiang.