Ngsebechem el Mo Mesisiich er a Satan!
Ngsebechem el Mo Mesisiich er a Satan!
“Bo mesisiich el oumerang e momtok [er a Satan].”—1 PE. 5:9.
KEDE MEKERANG E DIAK DOBEDIKL ER A . . .
kldidairreng?
skel a kerruul?
deleboes el omeruul?
1. (a) Ngera uchul me ngkmal kired el omtok er a Satan er chelechang? (b) Kede mekerang e medengei el kmo ngsebeched el mo mesisiich er ngii?
A SATAN a blak a rengul el oldechelakl er a rengellitel el dirk ngar er a chutem me a ‘rekuk bebil el sib.’ (Jn. 10:16) Ngmedengei el kmo ngdi kedeb ku temel, me ngmo er a tkurrebab el sebechel el melemall er a blakerreng er tir el mo er a Jehovah. (Monguiu er a Ocholt 12:9, 12.) Me nguaisei, engdi ngsebeched el mo mesisiich er a Satan! A Biblia a kmo: “Momtok er a Diabelong, me bo lechiis er kemiu.”—Jak. 4:7.
2, 3. (a) Ngera uchul me ngsoal a Satan a bo lak loumerang er ngii a rechad? (b) Ke mekerang e medengei el kmo ngmera el ngar er ngii a Satan?
2 A rebetok a diak loumerang el kmo ngar er ngii a Satan. Te omdasu el kmo ngii me a remekngit el anghel er ngii a di ngar er a delbochel el cheldecheduch, me a mubi, me a video game. Te dmu el kmo, a lsekum ngmellomes a rengud, e ngdiak doumerang el kmo ngar er ngii a Satan. Me a omomdasu, ngkesib a rengul a Satan e le rechad a diak loumera er ngii me a remekngit el anghel er ngii? Ngdiak, e le ngmo beot er ngii el mengeblad er tir. (2 Ko. 4:4) A Satan a bai melisiich a chouaika el uldasu me ngmo sebechel el mengeuid er a rebetok el chad.
3 Engdi kid a remesiungel a Jehovah a diak demecheblad. Kede ungil el medengei el kmo a Diabelong a mera el ngar er ngii, e le Biblia a ochotii el kmo nguluusbech er a bersoech el mengedecheduch er a Eva. (Gen. 3:1-5) Sera longedecheduch er a Jehovah e nguluumededenger er a blakerreng er a Job. (Job 1:9-12) Ngmillasem el mengesuseu er a Jesus. (Mt. 4:1-10) Me a uriul er a bo el King a Jesus er a rak er a 1914 e a Satan a dirrek el mlo “oldechelakl” er a rengellitel el dirk ngar er a chutem. (Och. 12:17) Me ngdirk melasem el melemall er a blakerreng er tir me a rekldemir el kuk bebil el sib. Me ngkmal kired el melemolem el omtok er a Satan e melisiich er a klaumerang er kid. Ngar er tia el suobel e kede mo mesaod a edei el rolel a doruul el uaisei.
LAK BO EL KEDIDAI A RENGUM
4. Ngmilekerang a Satan e ochotii el kmo ngkmal kedidai a rengul?
4 A Satan a kmal kedidai a rengul. Tiaikid a uchul me ngmla er ngii a blekengel el mo omtok er a llemeltel a Dios el mengedereder, e mengetikaik er a rebebil el mo mengull er ngii. Tiang a klou el olechotel a kldidairreng. Me ngkmal kired el oltngakl a kldidairreng e mo ngariou a rengud.—Monguiu er a 1 Petrus 5:5.
5, 6. (a) Ngmekngit a lungil a uldesued el kired? Mosaod. (b) Ngera bebil el kerebai el ngar er a Biblia el ochotii a telemellel a kldidairreng?
5 Me nguaisei, engdi ngdiak a kngtil a lungil a uldesued el kired a lsekum kid me a lechub a resechelid a remuul a ungil el tekoi. A apostol el Paulus a mle ungil a uldesuel el kirir a rengar er a Thesalonika me ngdilu el kmo: “Maki blechoel el ouchais er a bek el ikelesia er a Dios el kmo ng kmal meduch a rengmiu e oumera er a Dios er a chelsel a ringel ma odechelakl el mcharm er ngii.” (2 Th. 1:4) Me ngungil el tekoi a lungil a uldesued el kired me aike el ungil el tekoi el loruul a rebebil. Ngdiak el kired el mo merur el telungalek er kid, me a siukang er kid me a lechub e ngbeluad a uchul.—Rel. 21:39.
6 Engdi a kldidairreng a sebechel el tomellii a deleuill er kid me a rebebil me a dirrek el Jehovah. Ngdirrek el sebechel el rullid el mo kesib a rengud e otngeklii a omellach, er a bai bo lengariou a rengud e dekengei er ngii. (Osi. 9:8) Me a chad el kedidai a rengul a blechoel el omdasu el kmo ngkuk ungil er a rebebil e kmal meduch er a tekoi, engdi a mera er ngii ngdiak el uaisei. Me a Jehovah a kmal ouketui a kldidairreng. (Ese. 33:28; Amo. 6:8) Engdi a Satan a kmal dmeu a rengul el omes er a rechad el kedidai a rengrir el uai ngii e sorir el oumead er tir. Ka molatk er a deuil a rengul er a lomes er a Nimrod me a Farao me a Absalom el di tir el chemat er tir! (Gen. 10:8, 9, NW; Exo. 5:1, 2; 2 Sa. 15:4-6) A kldidairreng a dirrek el ta er a uchul me a Kain a urridii a deleuill er ngii me a Dios. A Jehovah a milengelechel er ngii, engdi ngdimlak lenguu a uleklatk. Ngmle medecherecher a rengul me ngmlo ruebet er a klengit.—Gen. 4:6-8.
7, 8. (a) Ngerang a omengetukel, e ngera me ngolechotel a kldidairreng? (b) Mosaod er a rolel e a kldidairreng a tomellii a budech er a chelsel a ongdibel?
7 Chelecha el taem e a kldidairreng a kmal klou a telemellel. Me a lebebil er a taem e a kldidairreng a uchul a omengetukel. A doltirakl er a ta el dictionary, e a chad el mengetukel a “oumerang el kmo a rechad er a rekakerous el beluu a kakerous a duch er tir me a blekerdelir, me a rechad er a bebil er a beluu a kuk ungil er a rechad er a kuk bebil el beluu.” Me a omengetukel a uchul a betok el klakoad, me a mekemad el mla mo er ngii, me a dirrek el okodellir a rebetok el chad.
8 Me ngbleketakl el kmo a chouaika el tekoi a diak el kirel el meketmokl er a chelsel a ongdibel er a Rekristiano. Me nguaisei, e le kldidairreng a sebechel el mo uchul a chetituokel el tekoi er a delongelir a rudam me a rudos, e aika el tekoi a sebechel el mukeroul el mo meklou. Tia el tekoi a dilubech er a delongelir a rebebil el Kristiano er a irechar, me a Jakobus a uleker er tir er tia el klou a belkul el ker el kmo: “A ikel bek el klakoad ma klaititekangel er a delongeliu ng ngar ker el mei?” (Jak. 4:1) Me a lsekum ngar er ngii a kltui er a rengud el kirir a rebebil e dirrek el omdasu el kmo kede kuk ungil er tir, e ngsebeched el mo dmung me a lechub e kede remuul a tekoi el mo tomall a rengrir. (Osi. 12:18) Me ngbleketakl el kmo a kldidairreng a tomellii a budech er a chelsel a ongdibel.
9. Ngmekerang a Biblia e ngosukid me ngmo diak dongetukel er a rechad e bai mo ngariou a rengud? (Momes er a siasing er a uchelel a suobel.)
9 A lsekum kede omdasu el kmo kede kuk ungil er a rebebil, e ngkired el melatk el kmo, a Jehovah a “ouketui er a re bek el mekedidai a rengrir.” (Osi. 16:5) Ngdirrek el kired el di kid el oker el kmo: ‘Ngak a kumdasu el kmo ak kuk ungil er a rechad er a ngodech el beluu?’ A leuaisei e lak mobes el kmo, a Dios a “uleak a tal chad e mileob a bek el bedengir a re chad.” (Rel. 17:26) Me kid el rokui a di osisiu, e le kede rokui el mla er a Adam el mei. Ngkora klebelung el tekoi a bo domdasu el kmo a Dios a ulemeob er a rebebil er a rechad el kuk mo ungil er a rebebil. Me a chouaika el uldasu a bai msa Satan a techellel el mo tomellii a bltikerreng me a kltarreng er a delongeled. (Jn. 13:35) Me a lsekum ngsoad el mo mesisiich er a Satan e ngkmal kirel el mo ngariou a rengud.—Osi. 16:18.
LAK MOBEDIKL ER A SKEL A KERRUUL ME A TEKOI ER TIA EL BELUULECHAD
10, 11. (a) Ngera uchul me ngsebechel el beot er kid el mo betik a rengud er a beluulechad? (b) Ngera dilubech e le Demas a mlo betik a rengul er a beluulechad?
10 A Satan a “merreder er tial beluulchad.” (Jn. 12:31; 1 Jn. 5:19) Misei a uchul me a beluulechad a blechoel el melisiich a tekoi el omtok a ulekrael er a Biblia. Me alta ngdiak el rokui el tekoi er a beluulechad a mekngit, engdi a Satan a ulterekokl el mo ousbech er tia el beluulechad er ngii el mengetikaik er kid e rullid me ngmo soad el meruul a mekngit. Ngdirrek el melasem el rullid el mo betik a rengud er tia el beluulechad e mo mechitechut er a omesiunged el mo er a Jehovah.—Monguiu er a 1 Johanes 2:15, 16.
11 A rebebil er a Rekristiano er a irechar a mle betik a rengrir er a beluulechad. El ua tiang, a Paulus a milluches el kmo: “Ele Demas, a mla obekall er a tekoi er tial beluulchad me ng mla choitak.” (2 Ti. 4:10) A Biblia a diak lochotii el kmo ngera sel tekoi er a beluulechad el uchul me a Demas a chilitii a Paulus. Engdi nglocha mlo betik a rengul er a tekoi er a kerruul el kuk ngaruchei er a omesiungel el mo er a Jehovah. A leuaisei, e ngmlo diak el sebechel el meruul a ileakl el ureor el mesiou er a Dios. Me ngmle ungil a omelilt el lerirellii a Demas? Ngkmal diak. Ngmle sebechel el melemolem el kldemel a Paulus, e dimlak a ngerang er a beluulechad el mle sebechel el mekesiur aike el ungil el tekoi el bo lebsang a Jehovah!—Osi. 10:22.
12. Ngmekerang e sebechel a chad el obedikl er a “ngibes er a kerruul”?
12 A osisiu el tekoi a sebechel el duubech el me er kid. Kid a Rekristiano a soad el osiik aike el dousbech kid me a telungalek er kid. (1 Ti. 5:8) Kede medengei el kmo, a Jehovah a soal a bo ledeu a rengud er a klengar er kid, e le ngmilsang a Adam me a Eva a klebokel el baradis el mo delengcheklir. (Gen. 2:9) Engdi a Satan a sebechel el ousbech a “ngibes er a kerruul” el rullid me ngmo diak el tabesul a uldesued el kirel aika el tekoi. (Mt. 13:22) A rebetok a oumerang el kmo a udoud me a kerruul a uchul a deurreng me a ungil el klengar. Me a lsekum nguaisei a uldesued, e ngsebeched el oridii sel kot el mekreos el tekoi, el ngii a deleuill er kid me a Jehovah. A Jesus a dilu el kmo: “Ng diak a chad el sebechel el mo sibrir a re terul mastang; ng mo chetil a tang e mo soal ngikel kuk tang; ng mo blak a rengul er a tang e mo mengemikr er ngikel tang. Ng diak el sebechiu el di tang e mesiou er a Dios ma udoud.” (Mt. 6:24) Me a lsekum kede kmal di mechesang el osiik a tekoi er a kerruul, e ngbelkul a kmo ngdikea dosiou er a Jehovah. E tiaikid a soal a Satan. Me lak denguu a udoud me a kerruul el mo er uchei er a deleuill er kid me a Jehovah. A lsoad el mo mesisiich er a Satan, e ngkmal kirel el mo melemalt a osenged el kirel a tekoi er a kerruul.—Monguiu er a 1 Timothy 6:6-10.
MOLTNGAKL A DELEBOES EL OMERUUL
13. Ngua ngera uldesuir a rebetok el chad el kirel a chebechiil me a durs er a chebechiil?
13 A Satan a dirrek el omedikl er a rechad el ousbech a deleboes el omeruul. A rebetok er chelechang a omdasu el kmo a chebechiil a tekoi er a irechar e dirrek el rulleterir el mo diak a ilmeklir. A ta el redil el actress a dilu el kmo, ngdiak el sebechir a rechad el obengkel a di ta el chad e lemerekong. Ngdirrek el dilu el kmo: “Ngdiak kudengelii a ta el chad el blak a rengul el mo er a bechil, e diak a ta er tir el soal el mo uaisei.” Me a ta el sechal el actor a dilu el kmo: “Nglocha dimlak dobeob el di mo obengkel a ta el chad er a klemengetel a klengar er kid.” Me a Satan a ulterekokl el kmal dmeu a rengul e le remerael a chisir el chad a melekoi a mekngit el kirel a sengk er a Dios el chebechiil. A Satan a diak lolisiich a chebechiil, e diak el soal a bo lungil a chebechiielir a rechad. Me a lsekum ngsoad el mo mesisiich er ngii, e ngkmal kired el mo oba uldesuel a Dios el kirel a chebechiil.
14, 15. Ke mekerang e mo sebechem el oltngakl a deleboes el omeruul?
14 Me alta e kede bechiil me a lechub e kede mesobil, engdi ngkired el mo mesisiich el oltngakl a bek el bedengel a deleboes. Tiang beot el tekoi? Ngdiak! A rengeasek a locha orrenges er a rengalek er a skuul el mesaod el kirir tirke el leko te mlo bad el obengterir. Te locha dirrek el mesaod el kirel a sexting, el ngii a omeruul el rechad a kaudurokl a text el mesaod er a deleboes el omeruul me a lechub e te kaudurokl a siasing el olecholt er tir el di meau. Me a ngar er a bebil el beluu e tia el omeruul a lomes er ngii el ua chad el oldurokl a siasing er a remeau el ngalek el mo er a ta er a chad. A Biblia a kmo: “Ngikel mor a deleboes el delengerenger a mo rullii a klengit el kirel a bedengel.” (1 Ko. 6:18) A betok el rakt el mo er ngii el okiu a deleboes el omeruul a uchul me a rebetok a chuarm me a lechub e te mad. Me a ruumesingd el ngeasek a ouuchel a rengrir er a uriul er a bo el bad el obengkel a kuk ta er a chad. A mubi me a TV a blechoel el melisiich er a uldasu el kmo ngsebeched el melemall a llechul a Dios e diak demekesakl. Engdi a bo doumerang a chouaika el blulak el tekoi, e ngklou a techelled el mecheblad er a “chelebeldil a klengit.”—Heb. 3:13.
15 A lsekum ngmeringel er kau el oltngakl a deleboes el omeruul, e ngkirem el mekerang? Ngungil a cho mkengei el kmo, tiaikid a chelitechetum. (Rom 7:22, 23) Me moluluuch el mo er a Dios me lengesukau. (Fil. 4:6, 7) E mongeroid er kau er a blekeradel el sebechel el mo uchul e ke ruebet er a deleboes. (Osi. 22:3) E sel leduubech a ongetikaik, e di mereched el otngeklii.—Gen. 39:12.
16. Ngerang dilung a Jesus er sel taem er a longetikaik er ngii a Satan, e ngera kede suubii er tiang?
16 A Jesus a kiltmeklii a kot el ungil el kerebai el kired. Ngdimlak lemecheblad er a blulekngel a Satan, e dirrek el dimlak a belkul a longoit a klou el taem el melatk er ngii. Me ngdi mle mereched el dmu er a Satan el kmo: “A Chedaol Llechukl a kmo.” (Monguiu er a Mateus 4:4-10.) A Jesus a mle ungil el medengelii a Tekingel a Dios me ngmle sebechel el mereched el mesaod a bades er sel taem er a longetikaik er ngii a Satan. Me a lsekum ngsoad el mo mesisiich er a Satan, e ngkmal kired el oltngakl a ongetikaik el mo er a deleboes el omeruul.—1 Ko. 6:9, 10.
MOUTEKANGEL ME BO MESISIICH
17, 18. (a) Ngera lmuut el bebil er a bedeklel a Satan, e ngera uchul me ngdiak el mechas a rengud el kirel tiang? (b) Ngera mo duubech el mo er a Satan, e tiang mekerang e smisichau el mo outekangel?
17 A kldidairreng, me a skel a kerruul, me a deleboes el omeruul a di kldei er aike el betok el bedeklel a Satan. A rebebil el Kristiano a dirrek el chelebangel a ultok er a rechederir me a lechub e a rengalek er a skuul a melenguul er tir. Me a rekuk bebil a kiei er aike el beluu el kabelment a merrob er a ureor er a berkel a klumech. Kede medengei el kmo kede mo chelebangel a chouaika el tekoi, e le Jesus a dilu el kmo: “A re bek el chad a mo ouketui er kemiu el ngak a uchul. E ngdi ngikel outekangel el mor a ulebongel a mo suobel.”—Mt. 10:22.
18 Me kede mekerang e mo mesisiich er a Satan? A Jesus a dilu el kmo: “A le meduch a rengmiu el outekangel, e kom mo osobel a klengar er kemiu.” (Lk. 21:19) A ngii di el odechelakl a di tedeb a telemellel. E diak a chad el sebechel el tomellii a deleuill er kid me a Dios, e le tiang a di mo ultuil er kid. (Rom 8:38, 39) Me alta e ngmad a ta er a mesiungel a Jehovah, engdi tiang a diak el belkul a kmo a Satan a mlo mesisiich, e le Jehovah a mo okisii. (Jn. 5:28, 29) Engdi a Satan a diak a omeltkel el kirel a ngar medal el klebesei. Uriul er a lemokngemed tia el beluulechad, e ngmo mechesimer er a diak a btil el deliobech el kirel a 1,000 el rak. (Och. 20:1-3) Me sel bo lemerek a Ta el Telael el Rak el Omengederederel a Kristus, e a Satan a “mo mekedoked e tuobed er a kelebsengel.” E tiang a mo ulebongel el techellel el mengesuseu er a rechad el tir a mla mo cherrungel. E sola e ngmo mokngemed. (Och. 20:7-10) Engdi kau a diak mua Diabelong e le ngar er ngii a omeltkem! Mada molemolem el omtok er a Satan e molisiich er a klaumerang er kau, e le ngkmal sebechem el mo mesisiich er ngii!
[Aike el Ker er a Suobel]
