A Jesus a Betik a Rengul er a Rechad
A Jesus a Betik a Rengul er a Rechad
“Ng ungil a renguk er a beluulchad e obotech a renguk er a re chad el ngar ngii.”—OSI. 8:31.
NGSEBECHEM EL MESAOD?
Ngera ochotii el kmo a Jesus a kmal betik a rengul er a rechad?
Ngmekerang a ongasireng el lurruul a Jesus e oterekokl a rengud el kirel a ngar medad el klebesei?
Me kau ke omes el beduluchei el kirel a ngera el mengasireng el tekoi el bo loruul a Jesus?
1, 2. Ngmilekerang a Jesus e ochotii el kmo ngbetik a rengul er a rechad?
NGIKE el kot el Ngelekel a Dios a kot el ungil el kerebai el kirel a llomeserreng, e dirrek el mla er a bita er a Demal el ua “chad er omelib el blai.” Ka di molatk er a deuil a rengul a Jesus er sel taem el Demal a lilia “melidiul er a le ngar ngii” e “lolecha er a omekedecheraol er a beluulchad.” Me nguaisei, engdi a Jesus a kmal mle ‘obotech a rengul er a re chad el ngar ngii.’ (Osi. 8:22-31) Me ngmera el betik a rengul er a rechad er a uchelel el mei.
2 A uriul e a Jesus a ulechotii a bltkil a rengul me a blakerreng er ngii el mo er a Demal me a dmolech el bltkil a rengul el mo er a rechad er a lekengei el choitii a delengcheklel er a eanged e lemei er a chutem el ua chad. Ngmirruul er tia el tekoi el mo “odersii a klengar er ngii el olsobel er a re betok el chad.” (Mt. 20:28; Fil. 2:5-8) Me sera lengar er a chutem, e a Dios a milsang a klisichel el meruul a mengasireng el tekoi. Me aikang a ochotii el kmo ngkmal betik a rengul er a rechad e di kmedung el mo meruul a meklou el tekoi el kirel a klechad.
3. Ngera kede mo mesaod er tia el suobel?
3 Sera dirk lengar er a chutem a Jesus, e ngulemerk er a “Ungil Chais er a Rengedel a Dios.” (Lk. 4:43) Ngmle medengei el kmo tiaikid el Renged a mo kobkellii a ngklel a Demal e dirrek el mo sumechokl a rokui el mondai er a klechad. Me ngar er a omesiungel e ngmirruul a betok el mengasireng el tekoi. Me aika el tekoi a olechotel a klou el ulekerreuil el mo er a rokui el chad. Ngera uchul me tiang a klou a ultutelel el kired? E le tekoi el lurruul a meskid a ulterekokl el omelatk el kirel a ngar medad el klebesei. Me bo dosaod a eua er a mengasireng el tekoi el leriruul a Jesus.
‘NG MLAR NGII A KLISICHEL EL OMEKUNGIL ER A RE SMECHER’
4. Ngera dilubech er a taem el Jesus a mlo metik er a chad el chebedes?
4 A ta el taem el luleldingel a Jesus e ngmlo er a beluu er a Galilea e miltik er a chad el chebedes. (Mk. 1:39, 40) Ngikang a kmal mle smecher a uchul me a toktang el Lukas a milsaod er ngii el mle chebedes “a bedengel el rokir.” (Lk. 5:12, BT) Me sera lesa Jesus e ngmlo “terrob ra chutem e olengit er ngii el kmo, ‘Rubak, a lungilbesul ra rengum, e ngsebechem el kikidak.’” Ngika el chad a mle medengei el kmo a Jesus a ngar er ngii a klisichel el omekungil er ngii, engdi ngmle soal el mo medengei el kmo a Jesus ngsoal el omekungil er ngii me a lechub e ngdiak. E ngera uchul? E le ngikang a mla mo smau er a omerellir a Refarisi el di blechoel el metengel a osengir er a rechad el chebedes. Engdi ngmle ua ngerang a uldesuel a Jesus? Ngmo ua ngerang a omerellel el mo er ngika el chad el chebedes? Oleko ke mla er isei e ke mo mekerang?
5. Ngera uchul me a Jesus a mle soal el omekungil er a chad el chebedes?
5 Me ngika el chad a locha dimlak loldiu el kmo: “Ng diak kklikiid, ng diak kklikiid” el oltirakl er a Llach er a Moses. (Lev. 13:43-46) Engdi a Jesus a dimlak bo lekesib a rengul er ngii, e ngbai mle chubur me ngmle soal el ngosuir. Ngdiak dodengelii a uldesuel a Jesus, engdi kede medengei el kmo ngkmal mle mekngit a rengul er ngika el chad. Me ngmlo rutechii, e tiang a omeruul el dirkak a chad el rullii. Ngkmal mle ungil a tekingel el mo er ngii el kmo: “Ng soak, me bo mklikiid! Me ng di mle mereched el mo ungil ngiil chad.” (Lk. 5:13) Me ngbleketakl el kmo a Jehovah a milsang a klisichel a Jesus el mo meruul a mengasireng el tekoi e dirrek el ochotii a klou el bltkil a rengul el mo er a rechad.—Lk. 5:17.
6. Ngerang a utebengall er a ongasireng el lurruul a Jesus, e aikang ngolechotel a ngerang?
6 Ngokiu a klisichel a Dios e a Jesus a mle sebechel el meruul a betok el mengasireng el tekoi, el dimlak di lomekungil er a rechebedes. A Biblia a mesaod el kmo, a rechad a kmal mlo mechas a rengrir er a “leseterir a re bengong el mocha mengedecheduch, ma re chelemus el mocha cherrungel a bedengir, ma re chitechut ocherir el mocha merael, ma re meiko el mocha omes.” (Mt. 15:31) A Jesus sel lomekungil er a chad e ngdiak lousbech er a klekedellel a bedengel a ta er a chad el mo omekungil er ngii. E le ngmla er ngii a klisichel el omekungil a tellemall er a bedengel a chad. E dirrek el kmal di mereched sel lomekungil a tellemall, el mo lmuut me a lsekum a chad el smecher a ngar er cheroid er ngii. (Jn. 4:46-54) Me aikang ngolechotel a ngerang? Ngochotii el kmo a Jesus Kristus a ngar er ngii a klisichel me a urungulel el soal el olekngemed a secher. Me a dosuub a omerellel el mo er a rechad e kede mo medengei el kmo, ngar er a chelsel a beches el beluulechad e ngmo “chubteterir a re mechitechut ma re mechebuul.” (Psa. 72:13) Seikid el taem e ngmo omekungil er a rokui el chad el chuarm e le ngmera el soal.
“BEKIIS EL NGMA BERUM E MORAEL”
7, 8. Ngera ngmirruul er ngii a Jesus er a lengar er a omerollel el mo er a Juda?
7 Telkib el taem er a uriul er a lomekungil er ngike el chebedes, e a Jesus a mirrael er a Galilea el mo er a Judea e millemolem el omerk er a ungil chais el kirel a Rengedel a Dios. Me te locha mla er ngii a betok el telael el rirengesii a klumech el lulemerk er ngii e dirrek el mlo melechesuar a bltkil a rengul. Ngii el Jesus a kmal mle soal el mengelaod er a remechebuul e mesterir a omelatk.—Isa. 61:1, 2; Lk. 4:18-21.
8 Sel buil er a Nisan, e a Jesus a mlo er a Jerusalem el mo meruul er a Baskua. E tia el mats a kmal mle meseked e le rechad a mlong el kirel tia el chedaol sils. Ngar er a mo bedul a diluches er a templo e ngmla er ngii a diosech el Bethesda. Ngar tia el basio e a Jesus a miltik er a chad el chitechut me ngdiak lorael.
9, 10. (a) Ngera uchul me a rechad a mlo er a diosech er a Bethesda? (b) Ngmilekerang a Jesus er a lebo er tia el diosech, e ngera kede suubii er tiang? (Momes er a siasing er a uchelel a suobel.)
9 A rebetok el smecher a mo er a Bethesda. E ngera uchul? E le te ulemdasu el kmo a lsekum te mo mengedub er tia el diosech sel lemechederemaot a ralm e te mo ungil er a rektir. Ka di molatk er a uldesuir tirka el chad el kmal dimlak a omeltkir e sorir el mo ungil er a rektir. Engdi a Jesus a mle cherrungel e dimlak lousbech a ukeruul, me ngera uchul me ngmla er isei? A bltkil a rengul el mo er a rechad a uchul me ngmlong. Ngar tiaikid el basio e ngmiltik er a chad el mle smecher el kuk kemanget er a klengar er a Jesus el ngar tia el chutem.—Monguiu er a Johanes 5:5-9.
10 A Jesus a uleker er ngika el chad el kmo: “Ng soam el mo ungil er a rektem?” Ka di molatk er ngika el rubak er a ledu er a Jesus el kmo ngkmal soal el mo ungil, engdi ngdiak el sebechel e le ngdiak a ngosuir el nguu el mo er a diosech. Me a Jesus a dilu er ngii me ngmeruul er a tekoi el dimlak el sebechel el rullii. Ngdilu er ngii me lengai a berul e lorael. Me ngii el chad a ngiluu a berul e mekiis el merael! Me tia el ongasireng a klou el olechotel a tekoi el bo loruul a Jesus er a chelsel a beches el beluulechad, e dirrek el olechotel a dmolech el bltkil a rengul el mo er a rechad. Ngmirrael el osiik er a rechad el uluusbech a ngeso. Me a kerebil a kmal kirel el melisiich er kid el mo melemolem el osiik er a rechad el ngar er a beluad el tir a chuarm er a betok el mekngit el omeruul er tia el beluulechad.
“NG TECHA RIRTECHII A BILEK?”
11. Ngmekerang a bades er a Markus 5:25-34 e ochotii el kmo a Jesus a mle betik a rengul er a resmecher?
11 Monguiu er a Markus 5:25-34. Ngar er ngii a ta el redil el mle smecher el 12 el rak er a meringel el rakt. Ngkmal chilarm er tia el rektel el ngii a dirrek el rirellii el mo meringel er ngii el mengull er a Dios. Ngmlo omes er a rebetok el toktang e ulekngemed a ududel, e di diak el sebechel el mo ungil er a rektel. Me a ta er a sils e ngmlo omdasu er a ngodech el rolel e ngmo ungil er a rektel. Ngmillatk el kmo ngdi mo merael er a delongelir a rechad el mo rutechii a bilel a Jesus me ngmo ungil. (Lev. 15:19, 25) Me sera bo lodengei a Jesus el kmo a klisichel a Dios a tilobed er ngii e nguleker el kmo ngtecha rirtechii. Me ngii el redil a mlei “el di omritel er a dakt, e mlo terrob er medal a Jesus e uluuchais a rokui el tekoi er ngii.” Me a Jesus a mle medengei el kmo a Demal el Jehovah a ulemekungil er ngika el redil me ngmle ungil el melekoi er ngii el kmo: “Rungalek, kuluumerang a uchul me ke mla mo ungil, me morael el ngar a budech.”
12. (a) Ngokiu aika el bla desuub e ngmekerang a omosaod er a Jesus? (b) Ngera el kerebai a lebilecherei el kired?
12 Ngkmal mo mechelaod a rengud er a bltkil a rengul a Jesus el mo er a rechad, el ileakl tirke el smecher. Ngkmal ngodech er a omerellel a Satan el ngii a melasem el meruul er kid el mo omdasu el kmo ngdiak a ultuteled. Me a ongasireng el lurruul a Jesus a ochotii el kmo ngmera el omekerreu e soal el olengeseu er kid. Me kede kmal mereng a saul e le ngika el King e Ngarbab el Prist er kid a kmal betik a rengul! (Heb. 4:15) Nglocha mo meringel er kid el medengelii a uldesuel a chad el mla smecher el kemanget el taem el ileakl a lsekum kid a diak desecher. Engdi ka molatk er a Jesus. Ngkmal mle chubteterir a rechad el smecher alta ngdirkak a ta el lsecher. Me debo er aike el sebeched el oukerebai er tia el bltkil a rengul.—1 Pe. 3:8.
“MA JESUS A LILANGEL”
13. Ngera el blekerdelel a Jesus a mocholt el okiu a okisel a Lasarus?
13 A Jesus a dirrek el mo mekngit a rengul sel lomes er a rechad el chuarm. Sera lemad a sechelil er a Lasarus e “ng kmal mlo imis el mekngit a rengul” er a lomes er a rechedal me a resechelil el mekngit a rengrir. (Monguiu er a Johanes 11:33-36.) Me alta e ngmle medengei el kmo ngsebechel el lmuut el okisii a Lasarus, engdi ngdirrek el lilangel. Ngdimlak lemerur er a rechad a lomes er ngii el lmangel. Me a Jesus a kmal mle betik a rengul er a Lasarus me a telungalek er ngii me nguluusbech er a klisichel a Dios el okisii er a kodall!—Jn. 11:43, 44.
14, 15. (a) Ngera ochotii el kmo a Jehovah a soal el mo olekngemed a rokui el ringel er a klechad? (b) Ngmekerang a okiis e ochotii a klisichel a Dios el melatk a tekoi?
14 A Biblia a mesaod er a Jesus el kmal di ua Demal el Jehovah. (Heb. 1:3) Me a ongasireng el lurruul a Jesus a ochotii el kmo a Jehovah me ngdirrek el kmal soal el mo okngemed a secher me a ringel me a kodall. Ngdi kmedung e a Jehovah me a Jesus a mo olekiis er a rebetok el chad er a kodall. A Jesus a dilu el kmo: “A belsechel a mei el tirkel rokui el mla mad a . . . mo tuobed er a debellir.”—Jn. 5:28, 29.
15 A okiis a olechotel a klisichel a Dios el melatk a tekoi. Ngii a Olab a Bek el Klisiich e Ulemeob me ngkmal sebechel el melatk a rokui el tekoi el kirir a remla mad el betik er a rengud el uldimukl er a blekerdelir. (Isa. 40:26) Ngdiak di lsebechel el lmatk e ngdirrek el kmal soal el melatk er tir. Me a okiis el medung er a Biblia a kmal ungil el olechotel aike el okiis el mo er ngii er a chelsel a beches el beluulechad.
A KLUBELED EL DENGAI ER A ONGASIRENG EL LURRUUL A JESUS
16. Ngera el techall a mo er a rebetok el mesiungel a Dios?
16 Me a lsekum kede melemolem el blak a rengud e ngmo er ngii a techelled el mo chormii a ta er a kot el klou el ongasireng el mo er ngii, el mo suobel er a kloul ringel! Me sel lebo lemerek a Armakedon, e kede mo mes a betok el mengasireng el tekoi. Sel taem e a rokui el chad a mo mecherrungel a bedengir. (Isa. 33:24; 35:5, 6; Och. 21:4) Ka di molatk er kau el omes er a rechad el ngubet a eyeglass er tir me a skersir, me a wheelchair me a hearing aid. A Jehovah a medengei el kmo tirke el mo suobel er a Armakedon a kirir el mo mesisiich a bedengir e le ngkmal betok a ureor el kirir el mo meruul. Tirkang a tirke el mo kutmeklii tia el beluulechad el rokir el mo klebokel el baradis.—Psa. 115:16.
17, 18. (a) Ngera uchul me a Jesus a mirruul a ongasireng? (b) Ngera me ngkirem el mo er a tkurrebab el sebechem el mo soiseb er a beches el beluulechad?
17 Aika el ongasireng el lurruul a Jesus a melisiich a klaumerang er a “kloul seked” er a rechedal a Dios, e dirrek el ngosuterir el omes el beduluchei el kirel sel taem el bo lemecherrungel a bedengir. (Och. 7:9) Ngdirrek el ochotii a klou el bltkil a rengul a kot el Ngelekel a Dios el mo er a klechad. (Jn. 10:11; 15:12, 13) Me a klou el klechubechub er a Jesus a olechotel a dmolech el bltkil a rengul a Jehovah el mo er a derta el mesiungel.—Jn. 5:19.
18 A beluulechad er chelechang a mui er a ringel me a chelebuul me a kodall. (Rom 8:22) Tiaikid a uchul me kede kmal ousbech er a beches el beluulechad er a Dios, el mo sebechir a rokui el chad el mo mesisiich el ua telbiil el ledillii. A Malakai 4:2 a meskid a omelatk el kmo: “E kemiu a mo mimokl e mo dmeu a rengmiu el ua chelsimer el ngelekel a kerbou a le tobed er a blil.” Me ngmo dmeu a rengud e le ngmla mo cherrungel a bedenged. Me a omereng el saul er kid el mo er a Jehovah me a klaumerang er kid er a telbilel a mo uchul e kede mo er a tkurrebab el sebeched el mo soiseb er tia el beches el beluulechad. Me a ongasireng el lurruul a Jesus a mera el ochotii el kmo a klechad a kmedu el mo er a ulengull er cheungel a omengederederel!
[Aike el Ker er a Suobel]
