Mketmeklau er Chelechang el Kirel a Klengar er a Chelsel a Beches el Beluulechad

“Mdu er tir me bo loruul a ungil . . . me bo le sebechir el mo nguu a meral klengar.”​—1 TI. 6:18, 19.

CHELITAKL: 43, 40

NGMEKERANG A OMONGER?

Ngera mo uchul a deuil a rengud er a chelsel a beches el beluulechad?

Kede mekerang e kutmeklid el kirel a beches el beluulechad?

Ngmekerang a turrekong er kid e ngosukid el mo kltmokl el kirel a beches el beluulechad?

1, 2. (a) Ke omes el beduluchei el kirel a ngerang er a chelsel a Baradis? (Momes er a siasing er a uchelel a suobel.) (b) Ngera mo uchul a deurreng er kid er a chelsel a beches el beluulechad?

 KEDE kmal semeriar el mengiil el mo nguu a “diak a ulebengelel klengar.” A apostol el Paulus a milsaod er tiang el “meral klengar.” (Monguiu er a 1 Timothy 6:12, 19.) Me a ruumesingd el chedal a Dios a oba omelatk el mo kiei er a Baradis el chutem el mo cherechar. Ngmeringel er a rechad el omdasu er sel rolel a klengar el bo lebekiis el mesisiich a bedengir e dmeu a rengrir er a bek el tutau. (Isa. 35:5, 6) Ka di molatk er a klungiolel a rengum el mo sebechem el teloi er a resechelim me a rechad er a blim, el uldimukl er tirke el mo mekiis er a kodall. (Jn. 5:28, 29; Rel. 24:15) Ngmo er ngii a techellem el mesuub a beches el tekoi, e lmuut el mo meduch el meruul aike el tekoi el soam. Nglocha mo sebechem el mesuub a betok el kirel a science me a chelitakl me a lechub e ngdi kau el meluches er a llecheklel a blim.

² Me alta e kede semeriar el mengiil aika el tekoi, engdi a omengull  er kid el mo er a Jehovah a mo meskid a lmuut el klou el deurreng. Ka di molatk er seikid el taem el bla lemechedaol a ngklel me a rokui el chad a mo kongei el chederedall er Ngii. (Mt. 6:9, 10) Kede kmal mengiil el mo mesang a beluulechad el mo mui er a remecherrungel el chad el oltirakl er sel moktek er a Dios. Me a lmuut el tang, ngkmal mo beot er kid el okesengii a deleuill er kid me a Jehovah, e le cherengel a taem e kede merael el mo cherrungel.​—Psa. 73:28; Jak. 4:8.

3. Kede mengetmokl er kid er chelechang el kirel a ngerang?

³ Kede oumerang el kmo a Jehovah a mo oltaut aika el rokui e le Ngii a “di sebechel a rokui el tekoi.” (Mt. 19:25, 26) Me a lsekum ngsoad el mo kiei er a chelsel a beches el beluulechad el mo cherechar, e chelechang e ngmla mo taem el dongetmokl er kid. Kid a medengei el kmo a ulebongel a kmal kmedang, me ngkired el kiei el omerelled a ochotii el kmo kede mengiil er ngii er a bek el taem. Me ngkmal kired el meruul aike el sebeched er chelechang el kutmeklid el kirel a beches el beluulechad. Me bo dosaod.

A ROLEL A DONGETMOKL ER KID

4. Kede mekerang e kutmeklid el kirel a beches el beluulechad? Msodii a okesiu.

⁴ Kede mekerang a dongetmokl er kid el kirel a beches el beluulechad? A lsekum kede melatk el mo kiei er a ta er a beluu e nglocha ngar er ngii a tekoi el kired el meruul er a uchei er a debong. Nglocha mo kired el mesuub a tekoi er sel beluu me a siukang er a rechad er ngii. Ngdirrek el sebeched el mengarm a bebil el kall er sel beluu. Me ngdi osisiu, ngkired el kutmeklid er chelechang el kirel a beches el beluulechad el okiu sel dekiei el omerelled a ochotii el kmo ngua bla bo dekiei er a chelsel tia el beches el beluulechad. Ka me bo dosaod a bebil el rolel e kede meruul el uaisei.

5, 6. Ngmekerang a blekongesenges er kid el mo er a cheldebechelel a Jehovah e kutmeklid el kirel a beches el beluulechad?

⁵ Ngar tia el beluulechad e a Satan a soal el meruul er a rechad el mo omdasu el kmo ngsebechir el di meruul aike el sorir. Me a rebetok a omdasu el kmo ngklou a ultutelel el kirir el di tir el melilt a tekoi el loruul me ngdiak a belkul el bo lolengesenges er a Dios. Me tiang ngmla mo uchul a ngerang? Nguchul a betok el ringel me a chelebuul. (Jer. 10:23) Engdi a Jehovah a kot el betik a rengul el Merreder, me ngkmal mo ungil a klengar er a beches el beluulechad e le rokui el chad a mo olengesenges er Ngii!

⁶ Ngar er a chelsel a beches el beluulechad e ngmo dmeu a rengud el oltirakl a ulekrael er a cheldebechelel a Jehovah e mengetmokl er tia el beluulechad el mo baradis e dirrek el olisechakl er tirke el mo mekiis er a kodall. Ngkmal betok a urered el bo lebeskid a Jehovah. Engdi ngmo ua ngera uldesued a lsekum tirke el oungerachel a ureor a meskid a chetid el ureor? Kede mo olengesenges er tir? Ngmo blak a rengud el rullii a urered? Ngkmal kired el mo olengesenges a ulekrael el mei el okiu a cheldebechelel a Jehovah er chelechang, me bo dekltmokl el kirel a klengar er a chelsel a beches el beluulechad.

7, 8. (a) Ngera me ngkired el olengesenges er tirke el oungerachel? (b) Ngera el omelodech a mle kirir a rebebil el Kristiano el meruul? (c) Ngmo ua ngera uldesued sel bo dekiei er a chelsel a beches el beluulechad?

⁷ A lsoad el mo ungil el kltmokl el kirel a beches el beluulechad e ngdiak di bo dolengesenges a ulekrael er a cheldebecheled e lemerekong. Ngdirrek el kirel el mo dmeu a rengud er a ngerachel el moterekokl er kid e mo meduch el oureor el teloi er a rechad. Me sel lebeskid a beches el ngerecheled e ngkired el kongei el olengesenges e mo er a tkurrebab el sebeched el meruul er ngii. Me a lsekum kede mesuub er chelechang el mo olengesenges er tirke el oungerachel  a ureor e ngmo sebeched el olengesenges er a chelsel a beches el beluulechad. (Monguiu er a Hebru 13:17.) Sera bo lsiseb er a Beluu er a Nglat a rechad er a Israel e ngmla er ngii a ulterekokl el basio el kirir el mo kiei er ngii. (Ule. 26:52-56; Jos. 14:1, 2) Me ngdiak dodengei el kmo kede mo kiei er ker er a chelsel a beches el beluulechad. Engdi a lsekum kede mla mo meduch el olengesenges e ngmo ungil a rengud el meruul a soal a Jehovah el diak lultuil er a basio el dekiei er ngii.

⁸ Me kede oba ileakl el techall el mo kiei el chederedall er a Rengedel a Dios. Tiaikid a uchul me ngdmeu a rengud el olengesenges a ulekrael el dengai er chelechang e meruul a ureor el mla moterekokl er kid. A lebebil er a taem e ngmo mengodech a ureor el doruul. El ua tiang, a rebebil el uluureor er a Bethel er a Merikel a mlo mesiou el omerk er a klumech. Ngdirrek el mlo ultuil er a rekrir me a lmuut el bebil er a tekoi e a rebebil el rudam el uleldingel a ongdibel a mlo mesiou el special pioneer. Ngkmal dmeu a rengrir el meruul aika el beches el urerir me a Jehovah a omekngeltengat er tir. Me a lsekum kede meluluuch el olengit a ngeso er a Jehovah, e mo er a tkurrebab el sebeched el meruul a urered el omeskid, e ngmo dmeu a rengud e a Jehovah a dirrek el mo omekngeltengat er kid. (Monguiu er a Osisechakl 10:22.) Engdi kede mo mekerang a lsekum ngar er ngii a ulterekokl el basio el soad el mo kiei er ngii er a chelsel a beches el beluulechad engdi a cheldebechelel a Jehovah a olengit er kid el mo melukl el mo er a ta er a basio? Seikid el taem e ngdikea ultutelel el dolatk el kmo kede mo kiei er ker e ngera kede mo meruul. Ngbai di mo dmeu a rengud e le kede mla mo kiei er a chelsel a beches el beluulechad.​—Neh. 8:10.

9, 10. (a) Ngera me ngkired el mo oba kllourreng er a chelsel a beches el beluulechad? (b) Kede mekerang e ochotii a kllourreng er chelechang?

⁹ Ngar er a chelsel a beches el beluulechad e nglocha dirrek el mo kirel el klou a rengud. El ua tiang, kede locha mo remenges a chisir a rebebil el kmal dmeu a rengrir e le rechederir me a resechelirir a mla mekiis er a kodall. Me nguaisei, engdi kid a kired el dirk mengiil er a rebetik er a rengud el mo mekiis. Me a lsekum ngmo uaisei, e kid ngmo dmeu a rengud el teloi er a rebebil e mo klou a rengud el mengiil? (Rom 12:15) A lsekum chelechang e ngmo klou a rengud el mengiil er a Jehovah el mo oltaut a telbilel, e tiang a ngosukid el mo oba kllourreng er seikid el taem.​—Oli. 7:8.

¹⁰ Ngdirrek el sebeched el kutmeklid el kirel a beches el beluulechad el oeak sel doba kllourreng e dengai a melemalt el semecheklel a tekoi el kirel a klemerang er a Biblia. Me kid, kede mo mesuub el kirel tia el beches el tekoi e melemolem el klou a rengud alta e ngdiak dungil el medengelii a belkul? A bo leuaisei a uldesued er chelechang, e ngmo beot er kid el mo klou a rengud er a bek el taem el Jehovah a ouchais er kid a beches el tekoi el soal a bo doruul er a chelsel a beches el beluulechad.​—Osi. 4:18; Jn. 16:12.

11. Ngera uchul me ngkired el mesuub el mo ousubes er a rebebil er chelechang? E tiang ngmekerang e ngosukid er a chelsel a beches el beluulechad?

¹¹ A ta er a rolel e kede kutmeklid el kirel a beches el beluulechad a sel dolasem el mo ousubes er a rebebil. Ngar sel Ta el Telael el Rak el Omengederederel a Kristus e kede dirk ousbech er a klou el taem el mo cherrungel. (Rel. 24:15) Me a ker a kmo, kede mo kaubltikerreng e kausubes er a delongeled? A lsekum kede mesuub er chelechang el mo meduch el ousubes e mo ungil a deleuill er kid me a rebebil e ngmo beot er kid el meruul el uaisei er a chelsel a beches el beluulechad.​—Monguiu er a Kolose 3:12-14.

12. Ngera uchul me kede mengetmokl er kid er chelechang el kirel a klengar er a chelsel a beches el beluulechad?

¹² Ngar er a chelsel a beches el beluulechad e  nglocha diak el sebeched el di mereched el ngmai a rokui el soad. Me ngkirel el mo dmeu a rengud er aike el ngar er ngii er kid er seikid el taem. Ngdirrek el mo kired el olecholt a blekeradel el Jehovah a olisechakl er kid er chelechang. Me sel dolecholt aika el ungil el blekeradel er chelechang e kede ochotii el kmo a beches el beluulechad a mera el tekoi er a rengud, e kid a dirrek el mengetmokl er kid el kirel a diak a ulebengelel el klengar. (Heb. 2:5; 11:1) Ngdirrek el mo sebeched el ochotii el kmo kede kmal semeriar el mo kiei er a chelsel a beluulechad el rechad er ngii a olengesenges er a Jehovah.

BO LEBLAK A RENGUM EL MESIOU ER A JEHOVAH

13. Ngera el tekoi a kirel el mo kot er a klengar er kid er a chelsel a beches el beluulechad?

¹³ Ngar er a chelsel a beches el beluulechad e ngmo er ngii aike el rokui el dousbech el oldeu er a rengud er a klengar. Engdi sel kot el klou el deurreng er kid a mo er ngii el okiu a kmes el deleuill er kid me a Jehovah. (Mt. 5:3) Kede mo mechesang el meruul er a omesiunged el mo er Ngii e mo dmeu a rengud el mesiou er Ngii. (Psa. 37:4) Me sel denguu el mo kot er a klengar er kid er chelechang, e kede kutmeklid el kirel a beches el beluulechad.​—Monguiu er a Mateus 6:19-21.

14. Ngera el turrekong a sebechir a remekekerei el chad el meruul?

¹⁴ Ngmekerang e mo dmeu a rengud el mesiou er a Jehovah er chelechang? A ta er a rolel a sel doterekokl a turrekong er kid. Me a lsekum ke dirk kekerei el chad e ngungil el molatk el kirel a omesiungem el mo er a Jehovah. Ngdiak el soam el merriter a babilenged el mesaod el kirel a kakerous el rolel a mui el taem el omesiou? Ngsebechem el rullii tiang me ngta er a turrekong er kau. * Mongedecheduch er a rebebil el mla mesiou er a Jehovah el betok el rak. E le lsekum ke ousbech er a klengar er kau el mesiou er a Jehovah e ke mo ngmai a lmuut el betok el ungil el osisechakl. E aikang a mo ngosukau el mesiou er a Jehovah er a chelsel a beches el beluulechad.

15. Ngera bebil el turrekong el sebeched el meruul?

¹⁵ Ngar er ngii a betok el turrekong el sebeched el meruul. El ua tiang, ngsebeched el lmuut el mo meduch el omerk er a klumech. Me a lechub e kede menglou er a klemedengei er kid er a omellach er a Biblia e mesuub el mo oltaut er a klengar er kid. Ngdirrek el sebeched el lmuut el kilungii a duch er kid sel donguiu el ngar er a delongelir a rechad me a lechub e kede meruul a cheldechedechad, me sel donger er a  miting. E le sel mruul a turrekong er kau er chelechang e ngmo ngosukau el lmuut el mo blak a rengum e kutmeklau el kirel a klengar er a chelsel a beches el beluulechad.

A KOT EL UNGIL EL ROLEL A KLENGAR ER CHELECHANG

16. Ngera me sel dosiou er a Jehovah e ngkot el ungil el rolel a klengar?

¹⁶ Me kid, ngolengesonges a klengar er kid er chelechang sel dongoit a temed el mengetmokl er kid el kirel a beches el beluulechad? Ngdiak, e le kot el ungil el rolel a klengar a sel dosiou er a Jehovah. Ngdiak dosiou er Ngii e le rechad el orrimel er kid me a lechub e ngkuk di soad el mo suobel er a kloul ringel. Ngbai dmeu a rengud e ungil a klengar er kid sel lebo er ngii a kmes el deleuill er kid me Ngii. Kede ulebeob el kirel uaisei a klengar er kid. Ngdiak a lmuut el ngaruchei el tekoi el ua sel lebetik a rengul er kid a Dios e lomekrael er kid. (Monguiu er a Psalm 63:1-3.) Kede rokui el kmal mo dmeu a rengud sel dosiou er a Jehovah el mera el ngar er a rengud. Me a rebebil el mla mesiou er Ngii el betok el rak a sebechir el melekoi el kmo tiaikid a kot el ungil el rolel a klengar.​—Psa. 1:1-3; Isa. 58:13, 14.

17. Ngera el tekoi a kirel el mo kot er a chelsel a klengar er kid el ngar er a Baradis?

¹⁷ Ngar er a chelsel a Baradis e ngmo er ngii a techelled el meruul aike el soad el tekoi. E le Jehovah el ngike el ulemeob er kid a rirellid el soad el oldeu a rengud, e dirrek el tibir el kmo ngmo “mesterir a rokui a ikel lousbech.” (Psa. 145:16; Oli. 2:24) Me kid a ulebeob el kired el milil e olengull, engdi nglmuut el mo dmeu a rengud sel denguu a deleuill er kid me a Jehovah el mo kot er a rokui. E tiang a di mo osisiu el tekoi er a chelsel a beches el beluulechad. Me nguchul a llomeserreng sel ‘bo le blak a rengud er a Rengedel a Dios’ e dolatk a klengeltengat el dengai el okiu a omesiunged el mo er a Jehovah er chelechang.​—Mt. 6:33.

18. Kede mekerang e ochotii el kmo kede mengetmokl er kid el kirel a diak a ulebengelel el klengar?

¹⁸ Ngar er a chelsel a beches el beluulechad e a klengar a lmuut el mo ungil el diak a mo mekesiur. Me a omerelled bo lochotii el kmo ngkmal soad el mo nguu a “meral klengar.” E bo dolecholt aike el blekeradel el Jehovah a olisechakl er kid e bo leblak a rengud er a omesiunged. Ngoeak tiang e kede mo melechesuar a deurreng e le kid el nguu a omengull er kid el mo er a Jehovah el mo kot. Kede mui el oumerang el kmo a Jehovah a mo remuul a rokui el tekoi el letilib el mo meruul. Mada dekiei el omerelled bo lochotii el kmo ngua bla bo dekiei er a chelsel a beches el beluulechad!

[Footnote]

[Aike el Ker er a Suobel]