Molatk er a Klou el Bltkil a Rengul a Jehovah
Molatk er a Klou el Bltkil a Rengul a Jehovah
“Ak mo melebedebek a rokui el urerem”—PSA. 77:12.
CHELITAKL: 18, 29
NGMEKERANG A OMONGER?
Kid el medengelii a bltkil a rengul a Jehovah a uchul me ngulterekokl a rengud el kirel a ngerang?
Ngera me ngsebeched el melekoi el kmo ngkmal klou a bltkil a rengul a Jehovah el mo er a rechedal?
Kede mekerang e ochotii el kmo ngbetik a rengud er a Jehovah?
1, 2. (a) Ngera me a rebebil a ulterekokl a rengrir el kmo a Jehovah a betik a rengul er a rechedal? (b) A rechad te ulebeob el ousbech a ngerang?
NGERA me ngulterekokl a rengud el kmo a Jehovah a kmal betik a rengul er a rechedal? A uchei er a omonger e molatk aika el tekoi: Cherengel a taem e a rudam me a rudos er a Taylene a millisiich er ngii el mo tabesul a uldesuel e lak di lengii el orrimel er ngii el mo er aike el diak el sebechel el meruul. Me ngdilu el kmo: “Oleko Jehovah a diak lebetik a rengul er ngak e ngdimlak di lolemolem el omeklemalt er a uldesuek.” A Brigitte el ulemekeroul er a reteru el ngelekel er a uriul er a lemad a bechil a kmo: “Ngkot el meringel el tekoi a di lekid el tang el omekeroul er a rengalek er a chelsel tia el beluulechad er a Satan. Engdi ngkmal ulterekokl a renguk er a bltkil a rengul a Jehovah el bedul ngak, e le ngomekrael er ngak er a chelsel aike el taem er a klengiterreng, e dimlak lebechikak me bo kchelebangel a tekoi el dimlak el sebechek el outekangel.” (1 Ko. 10:13) A Sandra a kuk smecher el rekdel a diak lemukar. Ngar er a ta el klou el ongdibel e ngkmal mlo dmeu a rengul er a tekingel a ta er a odos. Me a bechil a Sandra a dilu el kmo: “Alta e ngdiak ki msal medengelii engdi a ungil el cheldechedechal el ulechotii a klemeriarreng er ngii a mera el millisiich er kemam. Me a bltkil a rengrir a rudam me a rudos el bedul kemam a ochotii el kmo a Jehovah a kmal betik a rengul er kemam.”
2 A rechad a ulebeob el kirir el oubltikerreng e dirrek el ousbech er a bltikerreng. Me nguaisei, engdi ngbeot er kid el mo mechitechut a rengud a lsekum kede mo smecher, me a lechub e ngmo er ngii a mondai er a udoud me a lechub e ngkirel a omesiunged el mo er a Dios. Me a lsekum kede mo omdasu el kmo a Jehovah a dikea lebetik a rengul er kid, e lak dobes el kmo kid a kot el mekreos er a osengel e ngii a melisiich e olengeseu er kid. Ngkmal diak el sebechel el obes er kid a lsekum kede melemolem el blak a rengud el mo er ngii.—Isa. 41:13; 49:15.
3. Ngera el tekoi a lmuut el oterekokl a rengud el kirel a klou el bltkil a rengul a Jehovah el bedul kid?
3 Tirka el chad el dulsaod er tir a mle ulterekokl a rengrir el kmo a Dios a ulebengterir er a taem er a ringel. Me kid me ngdirrek el sebechel el ulterekokl a rengud el kmo a Jehovah a obengked. (Psa. 118:6, 7) Tia el suobel a mo mesaod er a rolel e a bltkil a rengul a Dios a mocholt el okiu a (1) blebelel me a (2) Tekingel me a (3) nglunguuch me a dirrek el (4) olubet el tenget. Me sel dolatk aike el ungil el tekoi el bla leruul a Jehovah e nglmuut el smisichii a omereng el saul er kid el kirel a klou el bltkil a rengul el bedul kid.—Monguiu er a Psalm 77:11, 12.
MOLATK A BLEBELEL A JEHOVAH
4. Ngera kede suubii sel dolatk el kirel a blebelel a Jehovah?
4 Me kid ngsebeched el mesang a bltkil a rengul a Jehovah el okiu a blebelel? Ngkmal sebeched, e le sel omerellel el ulemeob a olechotel a klou el bltkil a rengul. (Rom 1:20) Ngmle ungil el omeob er a beluulechad me ngsebeched el ngar e kiei er a chelsel e dirrek el mla meskid a rokui el dousbech. Me alta ngkired el omengur me lsebeched el ngar, engdi ngmla meskid a betok el kakerous el kall el rullid me ngmo dmeu a rengud! (Oli. 9:7) A odos er kid el Catherine a kmal soal el omes a blebelel a Jehovah el ileakl er sel taem el omung a dellomel er a beluu er a Canada. Ngdmu el kmo: “Ngkmal mengasireng a rolel a klengar. A bung a ngar er ngii a temel el duubech er a chutem me a charm a ngar er ngii a temel e nglmuut el me remei er a uriul er a lesebek el kuk mo er a ta er basio, el mo lmuut er a kiuid el meduch el sikii a rolel e me reborb er a blil a kelel a suebek el charm el ngar er a ikrel a mado er a blik. Me ngkmal ulterekokl a klou el bltkil a rengul a Jehovah el kired, e le ngomeskid a betok el ungil el tekoi.” Me ngika el betik a rengul el Demad a dmeu a rengul el meruul er a urerel el omeob, e dirrek el kmal soal a bo ledeu a rengud el omes aika el blebelel.—Rel. 14:16, 17.
5. Ngmekerang e mocholt a bltkil a rengul a Jehovah el okiu sel rolel e kede ulebeob?
5 A Jehovah a milebid el sebeched el meruul a meklou a ultutelel el tekoi el mo dechelel a deurreng er kid. (Oli. 2:24) Ngmle moktek er ngii el soal a rechad a bo lomekeek er tia el chutem e lekiei er ngii e bo longedereder a ngikel me a suebek el charm me a lmuut el bebil er a charm. (Gen. 1:26-28) Ngdirrek el mocholt a klou el bltkil a rengul el kired er a lebebid el sebeched el mo oukerebai aike el ungil el blekerdelel.—Efe. 5:1.
MOBA OMERENG EL SAUL EL KIREL A TEKINGEL A DIOS
6. Ngera uchul me kede oba omereng el saul el kirel a Tekingel a Dios?
6 A Dios a mla ochotii a klou el bltkil a rengul el okiu a Tekingel el Biblia. Tia el babier a ocholt aike el kired el mo medengei el kirel a Dios me a omerellel el mo er a rechad. El ua tiang, a Biblia a subedid el kirel a omerellel el mo er a rechad er a Israel el tir a di mle blechoel el diak lolengesenges er ngii. A Psalm 78:38 a kmo: “Ngdi Dios a chubechubchad, me ng uluusubes a telucheklir, e dimlak lokodeterir. Ng mle betok el taem el lolsarech er a rengul, me ng dimlak lesal mo kesib a rengul.” Me sel molatk er tia el bades e nglocha rullau el mo oba omereng el saul el kirel a bltkil a rengul me a ulekerreuil a Jehovah el ileakl el di kirem. Me bo lulterekokl a rengum el kmo a Jehovah a kmal betik a rengul er kau.—Monguiu er a 1 Petrus 5:6, 7.
7. Ngera uchul me ngkmal kired el oba omereng el saul el kirel a Biblia?
7 Ngkmal kired el semeriar er a Biblia e le tiaikid a kot el ngaruchei el rolel e a Jehovah a mengedecheduch er kid. A ungil e medemedemek el rolel a cheldecheduch er a delongelir a ruungalek me a rengelekir a klou a ultutelel e le ngmukeroul a klaumerang me a bltikerreng er a delongelir. Me a Jehovah a di ua betik a rengul el Demad. Me alta e ngdirkak a ta el desang me a lechub e kede rongesii, engdi ngii a mengedecheduch er kid el okiu a Tekingel el Biblia, me ngkmal kired el orrenges er ngii. (Isa. 30:20, 21) Me a Jehovah a kmal semeriar el omekrael er kid el rokui el mla tuib a rengud el mo chedal. Ngdirrek el kmal soal el omekerreu er kid er a ngii di el kdekudel el tekoi, e soal a bo dungil el medengelii e bo demui el oumerang er ngii.—Monguiu er a Psalm 19:7-11; Osisechakl 1:33.
8, 9. Ngera el tekoi a soal a Jehovah a bo dodengei? Mosaod er a ta er a kerebai er a Biblia.
8 A Jehovah a soal a bo dodengei el kmo ngbetik a rengul er kid me ngomes el engelakl er aike el chelitechetud. Ngomes er kid e osiik aike el klungioled. (2 Kr. 16:9) Tiang a chemolt er a omerellel el mo er a King er a Juda el Jehosafat. A ta el taem e ngika el Jehosafat a kilengei el obengkel a King el Ahab el mo oumekemad el omerober er a beluu er a Ramothgilead er a rechad er a Siria. Me alta e a re 400 el klsuul el profet a dilu er a Ahab el kmo ngmo mesisiich er a mekemad, engdi a mera el profet er a Jehovah el Mikaia a dilu er ngii el kmo ngmo mechitechut. Me a Ahab a mlad er a mekemad e a Jehosafat a kmal mlo metacherbesul el kileed e ngmad. Me sera lluut el mo er a Jerusalem e a Jehovah a ulderchii a Jehu el mo mellach er a Jehosafat. Engdi a Jehu a dirrek el dilu er ngii el kmo: “E ngdi ngar ngii a ungil er kau.”—2 Kr. 18:4, 5, 18-22, 33, 34; 19:1-3.
9 Ngar er a uchelel a omengederederel a Jehosafat e ngulderecheterir a remengeteklir a rechedal me a re Levait me a reprist el mo er a rokui el mats er a Juda el olisechakl er a rechad el kirel a Llechul a Jehovah. Me ngkmal mle ungil el merael a ureor el uchul me a rechad el kiliei el iliuekl er tir a dirrek el mlo oba dakt el bedul a Jehovah. (2 Kr. 17:3-10) Nguaisei, a Jehosafat a rirellii a klebelung el tekoi engdi a Jehovah a dimlak lobes a ungil el tekoi el leriruul. Me tia el cheldecheduch er a Biblia a mekltkid el kmo kid el diak demecherrungel a uchul me kede mo remuul a cheleuid, engdi a Jehovah a melemolem el olecholt er a bltkil a rengul el bedul kid a lsekum kede osiik a ngeso er ngii el mera el ngar er a rengud.
MOBA OMERENG EL SAUL EL KIREL A NGLUNGUUCH
10, 11. (a) Ngera uchul me a nglunguuch a ileakl el techall el mla er a Jehovah el kired? (b) Ngmekerang a Dios a longer a nglunguched? (Momes er a siasing er a uchelel a suobel.)
10 A betik a rengul el chedam a mengoit a temel el orrenges er a rengelekel sel bo el sorir el mengedecheduch er ngii. Ngsoal el mo medengei aike el tekoi el suebek a rengrir er ngii e le ngomekerreu er tir. Me a Demad el ngar er a eanged el Jehovah a dirrek el orrenges er kid sel dolengit a ngeso er ngii el okiu tia el ileakl el techelled el meluluuch.
11 Me ngsebeched el meluluuch el mo er a Jehovah er a ngii di el taem. Ngdiak loluk er a temed el meluluuch el mo er ngii, e le ngii a Sechelid el di blechoel el kltmokl el orrenges er kid. A Taylene el dulsaod er ngii er a uchei a kmo: “Ngsebechem el dmung aike el rokui el soam el mo er ngii.” Me sel desbedii er aike el mera el ngar er a rengud e ngsebechel el onger er kid el okiu a bades me a suobel el ngar er a babilenged me a lechub e ngungil el tekingir a rekldemed el melisiich er kid. A Jehovah a orrenges a nglunguched e dirrek el ungil el medengei a tekoi el dechelebangel alta ngdiak a chad el medengei. Me a nger er ngii el kirel a nglunguched a kot el ungil el olechotel a klou el bltkil a rengul el bedul kid.
12. Ngera uchul me ngungil el dolatk aike el nglunguuch el medung er a Biblia? Msodii a ta er a okesiu.
12 Ngdirrek el sebeched el suub a betok er aike el nglunguuch el medung er a Biblia. Aikang a kmal ungil el dosaod er sel temel a omengull el telungalek er kid. E le sel dolatk er a rolel e te ullecholt a dmolech el uldesuir a remesiungel a Jehovah er a irechar, e nglmuut el mo ungil a nglunguched. Ka molatk er a nglunguchel a Jona er a lengar er a chelsel a delel a klou el ngikel. (Jon. 1:17–2:10) E molatk er a nglunguchel a Salomon er sel taem er a omengedolel a templo. (1 Ki. 8:22-53) Ngdirrek el ungil el molatk er a klungiolel sel nglunguchel a Jesus el lulsisecheklii el mo er a redisaiplo er ngii. (Mt. 6:9-13) Me a ngaruchei er ngii el rokui “e bai molengit er a Rubak er a bek el nglunguchiu.” E seikid “e a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu.” Me sel bo de uaisei, e nglmuut el medechel a omereng el saul er kid el kirel a klou el bltkil a rengul a Jehovah.—Fil. 4:6, 7.
MOCHOTII A OMERENG EL SAUL EL KIREL A OLUBET EL TENGET
13. Me kid, kede oba ngera el techall el olubet el tenget a uchul?
13 Me tia el ileakl el sengk el ngii a olubet el tengetengel a Jesus a mlodars me bo el sebeched el “okiu ngii el mo nguu a klengar.” (1 Jn. 4:9) A Paulus a milsaod er tia el klou el olechotel a bltkil a rengul a Dios el kmo: “A Kristus a mlad el kirir a re mekngit el chad er isel belsechel el lulterkeklii a Dios. Ng meringel el tekoi er a chad a le mad el kirel a melemalt el chad, e ngdi a lta e a chad a mo kongei el mad el kirel a ungil chad. E ngdi Dios a ulechotii a bltkil a rengul er kid, ele ser a dirk de ngar a klengit, e a Kristus a mlad el kired.” (Rom 5:6-8) A olubet el tenget a kot el klou el olechotel a bltkil a rengul a Jehovah el meskid a techelled el mo nguu a kengei er Ngii.
14, 15. Ngera belkul a olubet el kirir (a) a rengellitel el Kristiano? (b) tirke el oba omelatk el mo kiei er a chutem?
14 Te ngar er ngii a remekesai el melechesuar a bltkil a rengul a Jehovah el ngar er a ileakl el rolel. (Jn. 1:12, 13; 3:5-7) Tirkang a mlechilt el okiu a chedaol reng me te mla “mo ngelekel a Dios.” (Rom 8:15, 16) A Paulus a milsaod er a rengellitel el Kristiano el ua bla lebekiis el mo obengkel a Jesus el ngar “er a ikel beluu er a eanged.” (Efe. 2:6) Te mla nguu tia el deruchall e le ‘Dios a lilia olengchelel er tir el kmo te chedal er a le besterir a Chedaol Reng . . . a uchul me te ulterekokl el mo nguu sel le tilbir a Dios el kmo ng mo mesterir.’ Me tiang a omelatk ‘el kldmokl el ngar er a eanged el kirir.’—Efe. 1:13, 14; Kol. 1:5.
15 E a klou el ildois er a rechad el tir a oumerang er a olubet el tenget, a ngar er ngii a techellir el mo sechelil a Dios e mo oba omelatk el mo kiei er a baradis el chutem el mo cherechar, e merodel el mo ngelekel a Dios. Me ngokiu a olubet el tenget e a Jehovah a ochotii a bltkil a rengul el mo er a rechad el rokui. (Jn. 3:16) Me a lsekum kede melemolem el blak a rengud el mesiou er a Jehovah, e ngulterekokl a rengud el kmo ngmo meskid a kot el ungil el klengar er a chelsel a beches el beluulechad. Me ngkmal kired el omes er a olubet el tenget el olechotel a klou el bltkil a rengul a Dios el bedul kid!
MOCHOTII A BLTKIL A RENGUM EL MO ER A JEHOVAH
16. Ngrullid el mo mekerang sel dolatk er a klou el bltkil a rengul a Jehovah?
16 Ngdiak el sebeched el omasech a rokui el tekoi el olechotel a bltkil a rengul a Jehovah el bedul kid. A David el ta er a milluches er a Psalm a kmo: “Dios, ng ua ngeral chaitituokel er ngak a uldesuem; ng kol tela ildisel! Chomko kmo omasech, e ng kuk betok er a chelechol. E sel kmekar, e ak dirk obengkem.” (Psa. 139:17, 18) Me ngungil el dolatk aika el tekoi me lluut el smisichii a bltkil a rengud el mo er a Jehovah e le ngii el kot el betik a rengul e omekerreu er kid. Mada debo er a tkurrebab el sebeched el msang aike el kot el ungil er kid.
17, 18. Ngera bebil el rolel e ngsebeched el ochotii a bltkil a rengud el mo er a Dios?
17 Ngbetok a rolel e ngsebeched el ochotii a bltkil a rengud el mo er a Jehovah. Kede ochotii a bltkil a rengud el mo er Ngii me a retonari er kid sel leblak a rengud el omerk er a klumech el kirel a Rengedel. (Mt. 24:14; 28:19, 20) Kede dirrek el ochotii el kmo ngmera el betik a rengud er a Jehovah sel doutekangel a omelsemai el kirel a klaumerang er kid. (Monguiu er a Psalm 84:11; Jakobus 1:2-5.) Me alta e kede kmal mo chuarm, engdi ngulterekokl a rengud el kmo a Dios a medengelii a ringel el dechelebangel er ngii, me ngmo ngosukid e le kede kot el mekreos er a osengel.—Psa. 56:8.
18 A bltkil a rengud el mo er a Jehovah a rullid el mo melatk a blebelel me a lmuut el bebil er a urerel. Kede ochotii el kmo ngbetik a rengud er Ngii e soad el oltirakl a Tekingel el okiu sel leblak a rengud el mesuub er a Biblia. Me sel deblechoel el meluluuch e melatk er a olubet el tenget e tia el bltkil a rengud el mo er Ngii a lmuut el mukeroul. (1 Jn. 2:1, 2) Me aikang a di bebil er a ungil el uchul me ngkirel el mo betik a rengud er a Jehovah e le ngkot el betik a rengul er kid.
[Aike el Ker er a Suobel]
