Ngsebechem el Odeuir a Rengul a Dios?

Ke mla ta el monguiu el kirel a chad el ngar er a Biblia el kmal blak a rengul e mlo omdasu el kmo ‘Ngkmal diak el sebechek el mo uai ngii! Ngak a diak sal melemalt el chad e dirrek el diak di leblechoel el melemalt a omerellek.’

A Biblia a mesaod er a Job el kmo: “Ng kmal mle ungil chad.” (Job 1:1) Me a Lot a mle okedongall el “ungil chad.” (2 Petrus 2:8) Me a David a “di mirruul a ikel mle melemalt” er medal a Dios. (1 King 14:8) Me nguaisei, engdi ngungil a deluut el mo mesaod a rolel a klengar er tirka el chad e bo desang el kmo: (1) Te riruul a cheleuid el tekoi. (2) Ngsebeched el suub a betok er a kerebai er tir. (3) A rediak lemecherrungel el chad a sebechir el oldeu er a rengul a Dios.

TE RIRUUL A CHELEUID

A Job a kmal mlo chuarm er a betok el chelebuul. Me ngmlo cheleuid a uldesuel el ulemdasu el kmo a Dios a diak lomekerreu er ngii a leblak a rengul el mo er Ngii me a lak. (Job 9:20-22) Ngkmal mlo mesisiich el omdasu el kmo ngmle melemalt a omerellel, me ngua ledu el kmo ngii a lmuut el melemalt er a Dios.​—Job 32:1, 2; 35:1, 2.

A Lot a dimlak lemereched el olengesenges er a bleketakl el ulekrael. Ng “kmal mlo imis el chuarm er  a bek el sils er a mekngit el omerellir” a rechad er a Sodom me a Gomora. (2 Petrus 2:8) Me a Dios a uluuchais el kmo ngmo melemall aika el beluu e dirrek el milsang a techellel a Lot me ngmo suobel ngii me a telungalek er ngii. Me ke locha omdasu el kmo ngdi mereched a Lot el chemiis. Engdi ngar sel taem e ngdirk mirrus er a rengul, me a rechanghel a mlo kirir el choteklii ngii me a telungalek er ngii el otebedeterir er a beluu.​—Genesis 19:15, 16.

A David a mla er ngii a taem e ngmlo diak lekilmeklii a rengul e mlo er a laokreng el obengkel a bechil a ta er a chad. Me ngmillasem el omart er a kngtil e milekodir ngii el chad. (2 Samuel, 11 el bliongel) Me a Biblia a mesaod el kmo a Jehovah a “dimlak lungil a rengul er omerellel a David.”​—2 Samuel 11:27.

Me a Job me a Lot me a David a dul riruul a cheleuid el tekoi el bebil er ngii a kmal mle mekngit. Engdi ngsebeched el mo mesang el kmo te rokui el kmal mle sorir el olengesenges er a Dios. Te kilengei el kmo te mlo mekngit e uluuchel a rengrir e ulebult er aike el mekngit el omerellir. Me a Dios a mle betik a rengul er tir me a Biblia a mesaod er tir el rokui el kmo te mle blak a rengrir el chad.

NGERA KLUBELED ER A OMERELLIR?

Me kid el diak demecherrungel a uchul me kede mo remuul a cheleuid. (Rom 3:23) Engdi sel bo deuaisei, e ngkired el obult er a kngtid e kongei el meruul aike el sebeched el sumecheklii a tekoi el detilemellii.

Me ngmilekerang a Job me a Lot me a David er a cheleuid el tekoi el leriruul? A Job a kmal mle melemalt a rengul el chad. Me sera lebeketakl a tekoi a  Dios el mo er a Job e ngkilengei el ngodechii a uldesuel e uluuchel er a rengul er a tekoi el ledilung. (Job 42:6) Me a uldesuel a Lot el kirir a rechad er a Sodom me a Gomora a di mle ua uldesuel a Dios. Engdi a omerellel el ulemai er a rengul a mle uchul a mondai er ngii. Engdi a uriul e ngmlo sebechel el chemiis me ngsilobel. Ngullengesenges me ngdimlak a ta el omes el bedul uriul. Me alta e a David a rirellii a kmal oberaod el klengit, engdi ngkmal uluuchel er a rengul e ullengit a klausubes er a Dios.​—Psalm 51.

A Dios a ulemes er tirka el chad el kmo te melemalt e le ngsel tabesul el uldesuel el kirir a rediak lemecherrungel el chad a uchul. Ngungil el “medengei el kmo kede rruul er a ngerang; ng melatk el kmo kid a di chebechab.” (Psalm 103:14) Me a lsekum ngungil el medengei el kmo kede ulterekokl el mo meruul a cheleuid, e ngerang mengerechir er ngii er kid?

KEDE MEKERANG E ODEUIR A RENGUL A DIOS?

A tekingel a David el mo er a Salomon a ochotii a rolel e ngsebeched el mo odeuir a rengul a Dios. Ngdilu el kmo: “Kau e rungalek er a Salomon, bo modengelii a Dios er a demam, e mosiou er ngii er a rengum el rokir.” (1 Kronika 28:9) Me ngmekerang a chad e mesiou er a Dios er a rengul el rokir? Ngkirel el betik a rengul er a Dios e kongei el mo olengesenges er Ngii. Me alta ngdiak el cherrungel engdi ngkongei el olengesenges er a Dios e melai a osmechokl er Ngii. Me a bltikerreng me a blekongesenges el mo er a Dios a meketeklii el kmo a Job me a Lot a mle “ungil el chad” me a David a “di mirruul a ikel mle melemalt” er medal a Dios. Me alta e tirkang a riruul a cheleuid, engdi ngmle sebechir el odeuir a rengul a Dios.

Me a lsekum ngar er ngii a mekngit el uldesued e soad el suldii, me a lechub e kede dillii a tekoi el demerur er ngii, me a lechub e kede remuul a tekoi e a uriul e kede mo medengei el kmo ngdimlak lungil, e a kerebai er tirka el chad a kmal sebechel el melisiich er kid. A Dios a ungil el medengei el kmo ngdiak demecherrungel er chelechang. Engdi ngmengerechir er kid el mo betik a rengud er ngii e melasem el olengesenges er ngii er a bek el taem. Me a lsekum kede meruul el uaisei el mera el ngar er a rengud, e kede mo odeuir a rengul a Dios.

[Blurb el ngar er a 25 el llel]

A Dios a “medengei el kmo kede rruul er a ngerang; ng melatk el kmo kid a di chebechab.”​—Psalm 103:14

[Blurb el ngar er a 26 el llel]

A chad el mesiou er a Dios er a rengul el rokir a kmal soal el olengesenges er Ngii