1, 2. Ngtecha Ngike el milskid a ukltked, e ngera uchul me ngungil a rengud el ngar er ngii a ukltked?

 A JEHOVAH EL DIOS a milebid e milskid a ilmekled el di kid el melilt a tekoi el doruul. Engdi ngmeskid a ulekrael el ngosukid el mo ungil el melilt a tekoi. E tia el ulekrael a domekedong er ngii el ukltked, el ngii a blekeradel el rullid el mo sebeched el kutukel a melemalt me a cheleuid. Me a lsekum kede ousbech er tia el ukltked el ngar er a melemalt el rolel, e ngsebechel ngosukid el mo meruul a ungil e mengeroid er kid er a mekngit. Me a ukltked a meketeklii el kmo a Jehovah a betik a rengul er kid e soal a bo lungil a klengar er kid.

² A rebebil er chelechang a sorir a ungil e ouketui a mekngit alta ngdiak lodengei a omellach er a Biblia. (Monguiu er a Rom 2:14, 15.) E ngera me nguaisei? E le tir el ngar er ngii a ukltkir, e tiang a ngosuterir me ngdiak bo loruul a mekngit. Ka di molatk er a kngtil a beluulechad a lsekum e ngdiak a ta el chad el ngar er ngii a ukltkel! Ngulterekokl a mekngit el omeruul el kmal chachisois a ildisel er chelecha el taem. Me ngkired el oba omereng el saul e le Jehovah el milskid a ukltked!

3. Ngmekerang a ukltked e ngosukid er a tekoi el doruul er a chelsel a ongdibel?

³ A ruumesingd el chad a diak lomdasu el kmo ngkirir el omeksau a  ukltkir. Me nguaisei, engdi a rechedal a Jehovah a sorir a ukltkir a bo lungil el oureor e le tiang a sebechel el mo uchul e te melisiich er a kltarreng er a chelsel a ongdibel. Me kid a soad a ukltked a bo lomeklatk er kid er a omellach er a Biblia el kirel a melemalt me a cheleuid me a ungil me a mekngit. Engdi a domeksau e dousbech er a ukltked e ngousbech a lmuut el betok el tekoi el diak di el omesubed er a Biblia e lemerekong. Ngbai kired el mo betik a rengud er a llechul a Dios e mo oumerang el kmo nguchul a klungioled. A Paulus a milluches el kmo: “A blkul tial omellach a melutk ra bltikerreng el tuobed ra klikiid el reng, ma ungil luklatk ma kloumerang el diak a telingaol er ngii.” (1 Ti. 1:5, BT) Me sel domeksau er a ukltked e doltirakl er ngii, e a bltkil a rengud me a klaumerang er kid el mo er a Jehovah a mukeroul. Me a rolel a dousbech er a ukltked a ochotii a kmes el deleuill er kid el obengkel a Jehovah e dirrek el ochotii el kmo ngkmal soad el oldeu er a rengul. E tia el ukltked a dirrek el ochotii el kmo kid kede ua ngera el chad.

4. Ngmekerang a domeksau er a ukltked?

⁴ Engdi ngmekerang a domeksau er a ukltked? Ngkired el mo blechoel el mesuub er a Biblia, e melebedebek aike el tekoi el desuub, e dirrek el olengit er a Jehovah me ngosukid el mo oltaut aike el tekoi el desuub. Me tiang a belkul a kmo, nglmuut el betok a kired el meruul el diak di bo dodengei a klemerang me a llach e lemerekong. Me a turrekong er kid sel dosuub er a Biblia a soad el lmuut el mo ungil el medengelii a Jehovah. Ngsoad el mo medengelii el kmo ngua techa el Dios e ngera soal me a ngera chetil. Me a bo leblak a rengud el mesuub a lmuut el betok el kirel a Jehovah, e ngmo omeksau er a ukltked el mo omes a tekoi el ua osengel el kirel a melemalt me a cheleuid. Me a bek el taem el domeksau er a ukltked, e ngmo sebeched el omdasu a tekoi el ua Jehovah.

5. Ngera kede mo mesaod er tia el suobel?

⁵ Me nguaisei, engdi ke locha mo melatk el kmo ngmekerang a ungil ukltkek e ngosukak sel kulilt a tekoi el bo kuruul? Ak mekerang e mo sebechek el kullii a ukltkel a kldemek el Kristiano? Ngmekerang a ukltkek e ngosukak el mo meruul a ungil? Mada me bo dosaod a edei el blekeradel el lousbech er a mla muksau el ukltked: (1) ukeruul, (2) omilil me a ongelaod, me a (3) berkel a klumech.

6. Ngera el omelilt a bo doruul el kirel a ukeruul?

⁶ A Biblia a mengelechel er kid el mo mengeroid er kid er aike el tekoi el sebechel el tomellid, e dirrek el mengelechel er kid el mo tabesul a uldesued er a rolel a omengang me a omelim. (Osi. 23:20; 2 Ko. 7:1) Me sel dolengesenges a ulekrael er a Biblia e ngsebechel el ngosukid er a bebil el rolel e kede omekerreu er a klisichel a bedenged. Me nguaisei, engdi kede rokui el mo smecher e mo mechuodel. Me ngera el omelilt a kired el meruul? Ngar er a bebil el beluu, e ngar er ngii a ukeruul el okiu a osbitar me a ukeruul el okiu a kar el ngar er ngii er aike el beluu. Me a branch office er kid a blechoel el ngmai a babilengir a rudam me a rudos el oker el kirel a kakerous el rolel a ukeruul. Me a rebetok a oker el kmo, “Ngsebechel a mesiungel a Jehovah el kongei er tiang me a lechub e ngsel ukeruul?”

7. Ngmekerang a doruul a omelilt er kid el kirel a ukeruul?

7 A branch office er kid me a lechub a remechuodel er a ongdibel a diak a llemeltir el melilt a rolel a ukeruul el kirir a rederta el Kristiano alta te mo olengit a ngeso er tir. (Gal. 6:5) Me nguaisei, engdi a remechuodel a sebechir el melisiich er a Tekingel a Jehovah me bo el sebechir el ngosuir a Kristiano el mo ungil el melilt a tekoi el bo loruul. El ua tiang, a Dios a mengelechel er kid el kmo ngdiak dousbech a rasech. (Rel. 15:29) Tia el omellach a bleketakl el ngosuir a Kristiano el mo medengei el kmo ngdiak el kirel el kongei a ngii di el rolel a ukeruul el ousbech a rasech. E tiang a dirrek el ngar er ngii a lerellii er a  ukltkel a Kristiano sel lolilt el kmo, ngkongei aike el ukeruul el ngar er ngii a dertelngimech el rasech me a lmuut el bebil el ukeruul el mengai er aike el eua el meklou el bliongel er a rasech. * Ngera bebil er a ulekrael er a Biblia el sebechel ngosukid el mo ungil melilt a tekoi el kirel a ukeruul?

8. Ngmekerang a Filipi 4:5 e ngosukid el mo ungil el melilt a tekoi el kirel a klisichel a bedenged?

⁸ A Osisechakl 14:15 a kmo: “A meleolt a rengul chad a oumerang a rokui el tekoi, e a mellomes a rengul a omes er a le bor ngii.” Me chelecha el taem e nglocha ngar er ngii a secher el diak a kerul. Me ngkired el mo kerekikl a ukeruul el lolekoi el kmo ngsebechel el mkerur a secher engdi ngdirkak a olechotel. A Paulus a dilu el kmo: “Mochotii a delemedemekerreng er kemiu el mor a rokuil chad.” (Fil. 4:5) Sel letabesul a uldesued, e ngsebechel el ngosukid el mo kerekikl el melatk er a omengull er kid el mo er a Jehovah, er a bai di dolatk el kirel a klisichel a bedenged. Me a lsekum kede nguu a klisichel a bedenged el mo kot er a chelsel a klengar er kid, e kede mocha di melatk er a di kid. (Fil. 2:4) Kede medengei el kmo ngdiak el sebechel el mo cherrungel a klisichel a bedenged er chelechang. Sei a uchul me ngkired el nguu a omesiunged el mo er a Jehovah el mo kot er a chelsel a klengar er kid.​—Monguiu er a Filipi 1:10.

9. Ngmekerang a Rom 14:13, 19 e ngar er ngii a lerellii er a omelilt er kid el kirel a ukeruul? E mekerang e tiang a sebechel mo uchul a telemellel a kltarreng er kid?

⁹ A tabesul a uldesuel el Kristiano a diak lorrimel er a rebebil el mo meruul a tekoi el ngii a omdasu el kmo ngungil. Ngar er a ta el beluu, e a ta el obekel a millisiich er a rebebil el mo menga bebil el kall e oltirakl er a rolel a diet er tir. Te ulerrimel er a rebebil el rudam el mo meruul el uaisei engdi a rebebil a dimlak el kengei. Me a rebetok el rudam me a rudos a mlo kesib a rengrir er a bo lodengei el kmo aika el tekoi a dimlak a ngera el lerellii er tir. Me tirka el obekel a mla er ngii a llemeltir el melilt er a rolel a diet el di kirir. Me nguaisei, engdi tia el tekoi ngmle melemalt el sebechir el meruul er ngii, e diak bo letemellii a kltarreng er a ongdibel? Ngar er a beluu er a Rom er a irechar e a rebebil el Kristiano a mle kakerous a uldesuir el kirel a bebil el kall me a chedaol sils. Me ngera ngdilu Paulus? Ngdilu el kmo: “A tar a chad a omdasu el kmo a tar a sils a kuk klou a belkul er a ikel kuk bebil, e a kuk tar a chad a omdasu el kmo a rokui el sils a di osisiu. Ng kirel a ta ma tar a chad el mo bleketakl er a rengul a uchul me ng omdasu el ua isei.” Mada bo dekerekikl me lak dolibas er a rebebil.​—Monguiu er a Rom 14:5, 13, 15, 19, 20.

10. Ngera uchul me ngkired el kullii a uldesuel a chad? (Momes er a siasing er a uchelel a suobel.)

¹⁰ A lebebil er a taem e ngmo diak dodengelii a uchul me a chad a millilt el mo meruul er a tekoi. Me kede mo mekerang? Ngkmal diak el kired el di mereched el oukerrekeriil er ngii me a lechub e dorrimel er ngii el mo melodech er a uldesuel.  Nglocha dirk kirel el melisiich er a ukltkel me a lechub e ngtelkib el oberaod tia el tekoi er a rengul. (1 Ko. 8:11, 12) Me a lechub e a ukltkel a dirkak el sal mukeroul. Me a derta er kid a kired el di kid el meruul a omelilt er kid el kirel a ukeruul el dekengei, e dirrek el kongei el mo chelebangel a ngii di el tekoi el mo duubech el omelilt er kid a uchul.

11, 12. Ngmekerang a Biblia e ngosukid el mo ungil el melilt a omilil el doruul?

¹¹ A Jehovah a milebid el sebeched el oldeu a rengud el milil e olengull. A Salomon a milluches el kmo ngar er ngii a “belsechel a deurreng” me a “belsechel a ngloik.” (Oli. 3:4) Me nguaisei, engdi ngdiak el rokui el omilil a mo uchul a klungioled me a lechub a ulengull er a rengud. Ngdirrek el kired el kerekikl me lak dongoit er a klou el temed el di milil. Me ngmekerang a ukltked e ngosukid me ngdmeu a rengud el olengull e milil el meruul aike el tekoi el lekengei a Jehovah?

¹² A Biblia a mengelechel er kid el mo oltngakl “a urerel a klechad.” E aikang a uldimukl er ngii a “ngellengalek, ma klekad, ma omeluluuch el bleob el chelid, ma olai, ma klaucherarou, ma klakoad, ma blechelechelingaorreng, ma ngasechereng, ma cheldesongel, ma blekilekeakl, ma klautok ma klekakeakl, ma chelechei, ma cheltelaol er a rrom, ma klaiueong, ma ikel ua ingii.” Me a Paulus a milluches el kmo: “Tirkel meruul a choua isel tekoi a diak bo le nguu a Rengedel a Dios.” (Gal. 5:19-21) Me ngungil a di lekid el oker el kmo: ‘A ukltkek, ngolengeseu er ngak me ngdiak bo kuruul a klekool el melisiich a uldikel me a klaisichai me a tekoi er a beluu me a dirrek el kdekudel el omeruul? A ukltkek, ngomeklatk er ngak er sel taem el bo el soak el mo omes a mubi el ngar er ngii a siasing er a remeau me a lechub e ngmelisiich er ngak el mo meruul a deleboes e melim el mo cheltelaol me a lechub ak mo meruul a tekoi er a olai?’

13. Ngmekerang a omellach el ngar er a 1 Timothy 4:8 me a Osisechakl 13:20 e ngosukid el mo ungil el melilt a rolel a omilil el doruul?

¹³ A omellach er a Biblia a sebechel el ngosukid el mo omeksau er a ukltked el kirel a tekoi er a omilil. El ua tiang, ngdmu el kmo: “Omerellel a tekoi el melisiich a bedenged a ungil, ngdi omerellel a tekoi el melisiich a rengud el oltirakl a tekingel a Dios a kuk lmuut el ungil.” (1 Ti. 4:8) Me a rebetok a omdasu el kmo sel leblechoel el exercise e ngungil a rengrir e dirrek el uchul e ngmelemolem el mesisiich a bedengir. Me nguaisei, engdi kede mo mekerang a lsekum ngsoad el meruul er tia el tekoi el obengterir a rebebil? Kede mo obengterir a rua techang? A Osisechakl 13:20 a kmo: “Mosuub er a re mellomes a rengrir el chad me bo le mellomes a rengum. Cho mousechelei er a re mekebelung el chad e ke mo metemall.” Me ngbleketakl el kmo ngkmal klou a ultutelel el kired el ousbech er a mla muksau el ukltked el oltirakl a omellach er a Biblia, sel dolilt a omilil el bo doruul.

14. Ngmilekerang a ta el ngeasek el odos e oltaut a omellach el ngar er a Rom 14:2-4?

¹⁴ A Christian me a Daniela a ngar er ngii a reteru el ngeasek el ngelekir el redil. Me a Christian a dmu el kmo: “Ngar er a temel a Omengull el Telungalek er kemam e aki milsaod el kirel a omilil. Me aki kilengei el kmo a bebil el rolel a omilil a ungil e melemalt e a bebil a diak. Me te rua techang a sebeched el omasech er tir el ungil el sechelei? A ngelekek a milsaod el kmo ngar er a temel a ulengull er a skuul, e a rebebil el ngeasek el Sioning a mirruul a tekoi el ngii a ulemdasu el kmo ngmekngit. Ngulemdasu el kmo ngua le mlorimel el mo meruul er tia el tekoi. Me ngmle kiram el mesaod el mo er ngii el kmo a derta er kid a ngar er ngii a ukltked me ngkired el ousbech er ngii el omekrael er kid sel dolilt a tekoi el doruul me a rechad el bo deteloi er tir.”​—Monguiu er a Rom 14:2-4.

15. Ngmekerang a Mateus 6:33 e ngosukid el mo ungil el melilt a omilil el doruul?

¹⁵ Ngua ngera klemengetel el taem a cho mchitii  el milil? Kau ke nguu a miting me a odingel me a omesubel a Biblia el mo kot er a klengar er kau, me a lechub e ke nguu a omilil el mo kot? Ngera klou a ultutelel er kau? A Jesus a dilu el kmo: “Ngar uchei er a bek el tekoi, e bai bo le blak a rengmiu er a Rengedel a Dios ma ikel soal, e a ikal rokui a bo le beskemiu.” (Mt. 6:33) A ukltkem, ngomeklatk er kau er a tekingel a Jesus sel molilt a tekoi el bo moruul?

16. Ngmekerang a ukltked e rullid el mo soad el omerk er a klumech?

¹⁶ A mla muksau el ukltked a diak di longelechel er kid er a mekngit el tekoi e ngdirrek el rullid el mo soad el meruul a ungil el tekoi. E a ta er aikang a sel doldingel a obliil me sel dongedecheduch er a rechad el debetik er tir. Tiaikid a lurruul er ngii a Paulus me ngmilluches el kmo: “Ele tiang a kirek el meruul er ngii el tekoi. Ak di kmal mo chebuul a lsekum ng diak kumerk er a Ebangkelio.” (1 Ko. 9:16) Me a doukerebai er a Paulus e ngmo ungil a ukltked e le kede medengei el kmo kede meruul a melemalt el tekoi. Me sel domerk er a klumech er a ungil chais el mo er a rebebil e ngdirrek el mo melisiich a ukltkir. A Paulus a dilu el kmo: “Aki di beches el melekoi a meral tekoi er a medal a Dios.”​—2 Ko. 4:2.

17. Ngmilekerang a ta el odos e meruul a tekoi el oltirakl er a ukltkel?

¹⁷ Sera dirk el 16 a rekil a Jacqueline e ngmilsuub a biology er a skuul. Me nguaisei, engdi a rengalek er a skuul a milsuub el kirel a osisechakl el kmo kede mla er a mongkii el mei, me ngdilu el kmo: “Ngmle mekngit a ukltkek el kirel tia el tekoi me ngdimlak el sebechek el teloi er a omesodel a suobel el ua bek el taem, e le ngdiak kuumerang er tia el osisechakl. Ak mlo er a sensei er ngak e silbedii er a uldesuek. Ak kilebetiekl e le ngkmal mle ungil a tekingel e dirrek el milskak a techellek el mo mesaod el mo er a class el kirel a blebelel a Dios.” Me a Jacqueline a kmal mlo ungil a rengul e le ngulerrenges e dirrek el uleltirakl er a mla muksau el ukltkel el oltirakl a omellach er a Biblia. Me a ukltkem, ngrullau el mo meruul a melemalt el tekoi?

18. Ngera uchul me ngkirel mo melemalt e ungil a ukltked?

¹⁸ Ngmera el ungil el tekoi sel derellii a turrekong er kid el mo melemolem el olengesenges a ngarbab el llechul a Jehovah me a rolel! Me a ukltked a kmal klou a lerellii er a klengar er kid. Me sel bo leblak a rengud el menguiu e melebedebek a Tekingel a Dios e doltaut er a klengar er kid e kede omeksau er a ukltked. E tiang a klou a ultutelel el tekoi er a klengar er a Kristiano!