1. (a) Ngera dilubech el mo er a Petrus er a lengar er a Daob er a Galilea? (Momes er a siasing er a uchelel a suobel.) (b) Ngera uchul me a Petrus a ulemuchel el orresors?

 A TA ER a kesus, e a apostol el Petrus me a rebebil el disaiplo a millikes er a bos el mo imuul er a Daob er a Galilea e kmal mle meses a eolt. Te milsang a Jesus el di merael er a bebul a daob. Me a Petrus a uleldiu el mo er a Jesus el olengit me bo el sebechel el merael el bedul ngii. Me a Jesus a kilengei er ngii me ngmiltengel er a bos e merael el bedul a Jesus. Engdi uriul e a Petrus a rirsors. E ngera uchul? E le ngulemes er a eolt me a meklou el chedesaoch e mlo medakt. Me nguleldiu el olengit a ngeso er a Jesus me ngdi mle mereched el orekedii a chimal e kursii e dirrek el dilu er ngii el kmo: “Kau a diak msal oumerang! Ngera uchul me ng mlo suebek a rengum?”​—Mt. 14:24-32.

2. Ngera kede mo mesaod er chelechang?

² Me bo dosaod a edei el rolel a klaumerang el sebeched el ngmai a klubeled er ngii el okiu a tekoi el dilubech el mo er a Petrus. Me a (1) sel rolel e a Petrus a uluumerang el kmo a Jehovah a sebechel el ngosuir, (2) sel uchul me a Petrus a urridii a klaumerang er ngii, me a (3) a tekoi el silisichii a klaumerang er a Petrus. Kede mo merriter aika el tekoi me lengesukid el mo medengelii a rolel e ngsebeched el lmuut el mo “mesisiich el oumerang.”​—1 Ko. 16:13.

3. Ngera uchul me a Petrus a miltengel er a bos, e ngera el osisiu el tekoi a bla derellii?

³ A Petrus a kmal mle mesisiich a klaumerang er ngii. Ngera uchul me ngsebeched el melekoi el uaisei? E le sel taem er a loleker er ngii a Jesus e ngmiltengel er a bos e mirrael er a bebul a daob. Nguluumerang el kmo a Dios a mo msa klisichel me ngmo sebechel el meruul er a tekoi el ua lurruul er ngii a Jesus. Me ngdi osisiu, sera lomekedong er kid a Jesus el mo oltirakl er ngii e kede mlo tuib a rengud el mo er a Jehovah e mlo metecholb. E ngera uchul? Ngklaumerang er kid er a Jehovah me a Jesus a uchul. Me kid a dirrek el uluumerang el kmo te mo olengeseu er kid.​—Jn. 14:1; monguiu er a 1 Petrus 2:21.

4, 5. Ngera uchul me a klaumerang a mekreos el tekoi?

⁴ A klaumerang a mekreos el tekoi. A klaumerang er a Petrus a rirellii el mo sebechel el merael er a bebul a daob, el ngii a tekoi el diak el sebechir a rechad el meruul er ngii. Me a klaumerang a dirrek el sebechel el ngosukid el mo meruul a tekoi, el rechad a omdasu el kmo ngdiak el sebechel el meketmokl. (Mt. 21:21, 22) A rebebil er kid a mla ngmodech a uldesued me a omerelled el uchul me a rechad el mle medengelkid er a uchei a meringel er tir el dongchid. Kede millodech a blekerdeled el bltkil a rengud el mo er a Jehovah a uchul e Ngii a dirrek el ngilsukid el mo melodech aika el blekerdeled. (Monguiu er a Kolose 3:5-10.) Me a klaumerang er kid a rirellid el mo tuib a rengud el mo er a Jehovah e mo sechelil, e tiang a tekoi el sebeched el rullii el di okiu a ngelsuil a Jehovah.​—Efe. 2:8.

⁵ A klaumerang er kid a smisichid. El ua tiang, ngsebechel el ngosukid el mo omtok a odechelakl er a Diabelong, el ngike el mesisiich el cherroued. (Efe. 6:16) Me a lmuut el tang, kid el oumerang er a Jehovah a uchul me ngdiak el sal mo suebek a rengud sel lebo er ngii a mondai er kid. A Jehovah a tibir el kmo ngmo meskid a ngeso el kirel aike el dousbech a lsekum kede oumerang er ngii, e nguu a Rengedel el mo kot. (Mt. 6:30-34) E a ngaruchei, e ngokiu tia el klaumerang er kid e a Jehovah a mo meskid a kot el ungil el sengk, el ngii a diak a ulebengelel el klengar.​—Jn. 3:16.

6, 7. (a) Ngsebeched el omekesiu er a eolt me a chedesaoch el mo er a ngerang? (b) Ngera me kede medengei el kmo ngsebechel el mo mechitechut a klaumerang er kid?

⁶ Sera lorael er bebul a Daob er a Galilea a Petrus e ngmlo medakt. E ngera uchul? Ngmlo medakt er a eolt me a chedesaoch. Aikang a dirrek el sebeched el omekesiu el mo er a betok el omelsemai me a omengesuseu el lechelebangel a Rekristiano er chelechang. Me alta e ngmo meringel aika el mondai, engdi ngsebeched el mo mesisiich er ngii el okiu a ngelsuil a Jehovah. Engdi lak mobes er a tekoi el dilubech el mo er a Petrus. Ngdimlak el omuchel el orresors el eolt me a chedesaoch a uchul. A Biblia a mesaod el kmo: “Ser a lesa klisichel a eolt, e ng mlo medakt.” (Mt. 14:30) Me a Petrus a mlo diak loltaut a osengel er a Jesus e bai mlo kerekikl el omes er a klisichel a eolt. Sei a uchul me ngmlo mechitechut a klaumerang er ngii. Me ngdi osisiu, a lsekum kede di mo melatk a mondai er kid e ngsebeched el mo omdasu el kmo a Jehovah a diak bo lengesukid.

⁷ Ngkired el medengei el kmo ngsebechel el mo mechitechut a klaumerang er kid. E ngera uchul? E le Biblia a melekoi el kmo ngsebechel el mo diak a klaumerang er kid e le ngar er ngii a “klengit el [mesisiich] el omereked er ngii er kid.” (Heb. 12:1) Me kid a di ua Petrus, a lsekum kede di mo omdasu a klengit el durruul e ngsebechel a klaumerang er kid el mo mechitechut. Me kede mekerang e mo medengei el kmo a klaumerang er kid a mechitechetong? A ker el bo dosaod er chelechang a ngosukid el mo ungil el merriter er kid.

8. Ngmekerang a telbilel a Dios e mo ua lak lemera el tekoi er a rengud?

⁸ A telbilel a Dios, ngmera el tekoi er a renguk er chelechang el di ua ngar er a mong? El ua tiang, a Dios a tilbir el kmo ngmo okngemedii a beluulechad er a Satan. Me nguaisei, engdi kid kede kmal mla mo mechesang er a betok el bedengel a  tekoi er a ongelaod er tia el beluulechad er a Satan? A lsekum nguaisei e kede locha mo oumededenger el kmo a ulebongel a kmedang. (Hab. 2:3) Ka kuk molatk er a ta er a tekoi. A Jehovah a tibir el kmo ngmo ousubes a kngtid el okiu a olubet el tenget el lekiltmeklii. Engdi a lsekum kede di melemolem el melatk a klengit el deriruul er a uchei, e ngrullid el mo oumededenger el kmo a Jehovah a mla ousubes a kngtid. (Rel. 3:19) E sel bo deuaisei, e ngsebechel el mo diak el ledeu a rengud el mesiou er a Dios e dirrek el mo diak domerk er a klumech el mo er a rechad.

9. Ngera sebechel el mo duubech a lsekum kede di mo mechesang el meruul a soad?

⁹ Ngak, ak msang a Jehovah aike el kot el ungil er ngak? Sel leblak a rengud el mesiou er a Jehovah e ngosukid el mo oltaut a osenged er a ngar medad el klebesei. Engdi kede mekerang a lsekum kede di mo mechesang el meruul aike el soad el tekoi? El ua tiang, kede locha kongei er a ureor el ungil a udoud er ngii engdi ngmocha kesai a temed el mesiou er a Jehovah. Tia sebechel el choitechetur a klaumerang er kid me kede mo “mesaik” el meruul er a omesiunged el mo er a Jehovah.​—Heb. 6:10-12.

10. Kede mekerang e ochotii a klaumerang er kid er a Jehovah sel dousubes er a rebebil?

¹⁰ Ngak, ngmeringel er ngak el ousubes? A lsekum a rebebil a melibas er ngak me a lechub e te tomellii a renguk, e ngmo kesib a renguk er tir e mo diak kungedecheduch er tir? A lsekum nguaisei a uldesued e ngbelkul a kmo kede di melatk er a di kid. Me sel dousubes er a rebebil e kede ochotii el kmo kede oumerang er a Jehovah. El okiu a ngera el rolel? A chad el rullii a mekngit el bedul kid a mocha belsed. Me kid sel derellii a mekngit er medal a Jehovah e kede mocha belsel. (Lk. 11:4) Me sel dousubes a kngterir a rebebil e ngbelkul a kmo kede oumerang er a Jehovah. Kede oumerang el kmo ngmo omekngeltengat er kid e a klengeltengat el denguu er ngii a kuk mekreos er a omeruul el chad a mengkad er a belsel er kid. A redisaiplo er a Jesus a dirrek el silubii el kmo ngkirir el mo oumerang e mo sebechir el ousubes er a rebebil. Me sera ledu er tir  a Jesus el kmo ngkirir el ousubes er tirke tomall a rengrir el betok el taem, e te ullengit er ngii el kmo: “Mrellemam el mo mesisiich el oumerang.”​—Lk. 17:1-5.

11. Ngmekerang e mo diak denguu a klungioled er a uleklatk el denguu?

¹¹ Ngmo kesib a renguk sel lomeklatk er ngak a chad? Mnguu a klungiolem er a uleklatk el mngiluu e lak momes er a cheleuid el ngar er a uleklatk me a lechub e molatk er a chelitechetul a chad el ulemeklatk er kau. (Osi. 19:20) Mousbech a bek el techellem el mesuub el mo omdasu a tekoi el ua Jehovah!

12. Ngolechotel a ngerang a lsekum a chad a blechoel el mengeremrum er tirke el olab a ngerachel er a chelsel a ongdibel?

¹² Ngak, ak mengeremrum er tirke el olab a ngerachel er a chelsel a ongdibel? A rechad er a Israel er sera di lolatk a mekngit el chais el ledilung a reteruich el mlo ourabek, e te mlo mengeremrum el kirel a Moses me a Aron. Me a Jehovah a uleker er a Moses el kmo: “Ng ua ngera klteketel el di lokor el oumera el ulsirs er ngak”? (Ule. 14:2-4, 11) A Jehovah a mle medengei el kmo ngdimlak loumera er ngii e le tir el milengeremrum el kirel a Moses me a Aron, el Ngii a millutk er tir. Me ngdi osisiu, a lsekum kede di blechoel el mengeremrum er tirke el lousbech er tir a Jehovah el omekrael er a rechedal er chelechang, e ngochotii el kmo a klaumerang er kid er Ngii a mechitechetong.

13. Ngera me ngdiak el kirel el mo mekngit a rengud a lsekum ngmo mechitechut a klaumerang er kid?

¹³ Me sel bo dungil el melatk aika el ker e lak bo lemekngit a rengud a lsekum ngmo mechitechut a klaumerang er kid. Lak mobes, a apostol el Petrus me ngdirrek el mlo medakt e mlo mechitechut a klaumerang er ngii. E dirrek el mla er ngii a taem el Jesus a milellach er a rechapostol er ngii el kmo, “kemiu a diak msal oumerang!” (Mt. 16:8) Me nguaisei, engdi ngar er ngii a klubeled el denguu er a tekoi el dilubech el mo er a Petrus. Ka molatk er a tekoi el lerirellii er a uriul er lemechitechetong a klaumerang er ngii me bocha lorresors er a chelsel a daob.

14, 15. (a) Ngmilekerang a Petrus er sera bocha lorresors? (b) Kede mekerang e ‘oturk a osenged’ er a Jesus?

¹⁴ Ngmilekerang a Petrus er sera bocha lorresors? Ngikang a mle meduch el mengikai, me ngmle sebechel el mengikai el mo er a bos. (Jn. 21:7) Me ngera uchul me ngdimlak longikai? E le ngdimlak di lultuil er a klisichel, e ngbai uleltaut a osengel er a Jesus e kilengei er a ngelsuil. Me a lsekum ngmocha mechitechut a klaumerang er kid e ngkmal kired el oukerebai er a Petrus. Me kede mekerang e mo sebeched el rullii tia el tekoi?

¹⁵ A Petrus a di mle ultaut a osengel er a Jesus el kirel a ngeso, me ngkired el mo uai ngii el di ‘oturk a osenged er a Jesus.’ (Monguiu er a Hebru 12:2, 3.) Engdi kid a diak el sebeched el mesang a Jesus el ua Petrus. Me kede mekerang e ‘oturk a osenged’ er a Jesus? Ngsebeched el mesuub el kirel aike el osisecheklel me a tekoi el lurruul e dirrek el melasem el oukerebai er ngii. E sel doruul el uaisei, e ngmo sebeched el ngmai a ngeso el dousbech el smisichii a klaumerang er kid. Mada me bo dosaod a bebil el rolel e ngsebeched el oukerebai er a Jesus.

16. Ngmekerang a Biblia e ngosukid el smisichii a klaumerang er kid?

¹⁶ Msisichii a klaumerang er kau er a Biblia. A Jesus a kmal mle ulterekokl a rengul el kmo a Biblia a Tekingel a Dios e dirrek el meskid a kot el ungil el ulekrael. (Jn. 17:17) Me a lsoad el oukerebai er a Jesus e ngkmal kired el menguiu er a Biblia er a bek el sils e mesuub er ngii e melebedebek aike el tekoi el desuub. Ngdirrek el kmal kired el merriter er ngii me bo el sebeched el metik a nger er a kerid. El ua tiang, kau ke oumerang el kmo kede kiei er a taem er a uriul sils? Molisiich er a klaumerang er kau el kirel tia el uriul sils el okiu sel mosuub a ulaoch el ngar er a Biblia el oterekeklii el kmo kede kiei er a taem er a uriul sils. Ngsoam el melisiich er a klaumerang er kau er a telbilel a Dios el kirel a ngar medad el klebesei? Mada mosuub er a Biblia el kirel a ulaoch el mla tmaut. Kau ke oumerang el kmo a Biblia a klou a ultutelel el babier er chelecha el taem? Ngsebechem el menguiu a tekoi el kirir a rudam me a rudos  el tir a ngilodech a blekerdelel a klengar er tir el okiu a ngeso el lengilai er a Biblia. *​—1 Th. 2:13.

17. Ngmilekerang a Jesus e mlo sebechel el outekangel a meringel el odechelakl, e mekerang e mo sebechem el oukerebai er ngii?

¹⁷ Motaut a osengem er a klengeltengat el bla letib a Jehovah. A Jesus a di mle ultaut a osengel er a klengeltengat er a ngar medal el klebesei, e aikang a ngilsuir el mo sebechel el outekangel a meringel el odechelakl el blo lechelebangel. (Heb. 12:2) Ngdimlak a ta el lebechei a tekoi er tia el beluulechad me longesang er ngii. (Mt. 4:8-10) Me ngmekerang a doukerebai er a Jesus? Bo dolatk aike el ungil el tekoi el bla letib a Jehovah el kired. Molatk er kau el ngar er a chelsel a beches el beluulechad. Molasem el meluches a sunga er kau me aike el tekoi el bo moruul er a chelsel a Baradis. Me a lechub e mluches a ngklir tirke el chad el soam el mo mengedecheduch er tir sel lebekiis me aike el tekoi el soam el mo melekoi er tir. Bo mua uldesuel a Jesus el omes aika el telbilel a Dios el diak di lebo er a rokui el chad e ngbai ileakl el di kirem.

18. Ngmekerang a nglunguuch e lmuut el smisichii a klaumerang er kau?

¹⁸ Moluluuch me lluut el mo mesisiich a klaumerang er kau. A Jesus a ullisechakl er a redisaiplo er ngii el mo meluluuch el olengit er a chedaol reng er a Jehovah. (Lk. 11:9, 13) Me sel molengit er a chedaol reng er a Dios, e moluluuch me lluut el mo mesisiich a klaumerang er kau. Tiang a ta er aike el ngarbab el blekerdelel a Dios. Bo lebleketakl a tekoi el molengit er ngii. El ua tiang, a lsekum ngmeringel er kau el ousubes er a rebebil e molengit a ngeso er a Jehovah me lolisiich er a klaumerang er kau e lengesukau el mo sebechem el ousubes er tir.

19. Ngmekerang a dolilt er a remo sechelid?

¹⁹ Molilt er a resechelim el mesisiich a klaumerang er tir. A Jesus a mle kerekikl sel lolilt er a resechelil. Tirke el mle kmeed el sechelil el mle apostol er ngii, a mle blak a rengrir e melemalt e ullengesenges er ngii. (Monguiu er a Johanes 15:14, 15.) Me moukerebai er a Jesus el mo kerekikl sel molilt er a remo sechelim. Ngkirir el mesisiich a klaumerang er tir e blak a rengrir el olengesenges er a Jesus. A remera el sechelid a melemalt a omerellir er a bek el taem el mo lmuut er a taem el bo lekirir el omeklatk me a lechub e ngkirir el kongei el ngmai a uleklatk.​—Osi. 27:9.

20. Ngera mo duubech a lsekum ke ngosuterir a rebebil el smisiich a klaumerang er tir?

²⁰ Mngesuterir a rebebil el smisiich a klaumerang er tir. A Jesus a ngilsuterir a redisaiplo er ngii el smisiich a klaumerang er tir, el okiu a tekingel me a omerellel. (Mk. 11:20-24) Me ngkired el oukerebai er a Jesus. A doruul el uaisei e kede smisichii a klaumerang er kid me a rebebil. (Osi. 11:25) Ke mekerang e ngosuterir a rechad el ngar er a basio el momerk er a klumech er ngii? Sel molisechakl er tir el ousbech er a Biblia e beketeklii el kmo a Dios a mera el ngar er ngii, e betik a rengul e omekerreu er kid, me a Biblia a dirrek el Tekingel a Dios. E ke mekerang e ngosuterir a rudam me a rudos er kau el mo mesisiich a klaumerang er tir? A lsekum ke rongesii a ta er tir el mengeremrum er a rudam el olab a ngerachel er a ongdibel, e lak mongeroid er kau er ngii. Bo mungil el mengedecheduch er ngii, e mngesuir el lmuut el smisichii a klaumerang er ngii. (Jude 22, 23) Me a lsekum ke ngar er a skuul e a sensei er kau a mesaod el kirel a osisechakl el kmo kede mla er a mongkii el mei, e bo bekeu e mosebechakl er a klaumerang er kau el kirel a blebelel a Dios. Ke locha mo kibetiekl er a uldesuel me a osengel a sensei er kau me a dirrek el rengalek er a skuul.

21. Ngera el tekoi a bla letibir a Jehovah el mo er a derta er kid?

²¹ A Jehovah me a Jesus a ngilsuir a Petrus el mo mesisiich a klaumerang er ngii e mo bekeu. Me a uriul, e a kerebai er a mesisiich el klaumerang er ngii a millisiich er a rebebil. Me ngdi osisiu, a Jehovah a olengeseu er kid el rokui me ngmelemolem el mesisiich a klaumerang er kid. (Monguiu er a 1 Petrus 5:9, 10.) Ngbetok a tekoi el ketmekill me bo lemesisiich a klaumerang er kid, engdi a Jehovah a mo omekngeltengat er kid a lsekum ngmo blak a rengud el meruul aike el kired el meruul.