1, 2. Ngmilekerang a Jehovah e osisecheklid el mo betik a rengud er ngii?

 A KOT el ungil el rolel e a chedam a olisechakl er a rengelekel a okiu a omerellel. Me sel lochotii a bltkil a rengul el mo er a rengelekel e ngolisechakl er tir el mo meduch el oubltikerreng. Ngdiak a chad el sebechel el oubltikerreng el ua blekerdelel a Demad el Jehovah. Me kede mesuub el mo meduch el oubltikerreng e le ngii a “mle kot el oubltikerreng el mer kid.”​—1 Jn. 4:19.

² Me ngokiu a ngera el rolel e a Jehovah a ulechotii el kmo ngii a “mle kot el oubltikerreng el mer kid”? A Biblia a kmo: “Ngdi Dios a ulechotii a bltkil a rengul er kid, ele ser a dirk de ngar a klengit, e a Kristus a mlad el kired.” (Rom 5:8) Me ngika el betik a rengul el Demad el Jehovah a tilengetengii a Ngelekel el mo olubet el tenget el melubet er kid er a klengit me a kodall. Me tia el mekreos el sengk er ngii a mlo uchul me ngsebeched el mo kmeed er a Jehovah e dirrek el mo ochotii a bltkil a rengud el bedul ngii. Me a Jehovah a kiltmeklii a ungil el kerebai er a lerellii tia el kmal klou el rolel a omelenget. Me ngullisechakl er kid el kmo ngkired el mo bekururau e olecholt er a bltikerreng el mera el ngar er a rengud.​—1 Jn. 4:10.

3, 4. Kede mekerang e ochotii el kmo ngbetik a rengud er a Dios?

 ³ A bltikerreng a kot el ngaruchei el blekerdelel a Jehovah. Kede medengelii a uchul me a Jesus a dillii tia el klou a ultutelel el llach el kmo: “Bo le betik a rengum er a Rubak el Dios er kau el oba rengum el rokir, ma klengar er kau el rokir, ma uldesuem el rokir, ma klisichem el rokir.” (Mk. 12:30) Me a Jehovah a soal a bo doubltikerreng el ‘oba rengud el rokir.’ Ngmo mekngit a rengul a lsekum kede nguu a bltkil a rengud el mo er a chad me a lechub e ngklalo el mo er uchei er a bltkil a rengud el mo er Ngii. Engdi a bltkil a rengud el mo er ngii a diak di lultuil er a uldesued e lemerekong. E le Jehovah a mengerechir er a bltikerreng el ngar er a rengud me a klengar er kid me a uldesued me a klisiched el rokir. Me ngbelkul a kmo ngkired el mo betik a rengud er ngii el okiu a uldesued me a omerelled.​—Monguiu er a Mika 6:8.

⁴ Me ngkired el mo betik a rengud er a Jehovah er a rengud el rokir e dirrek el ousbech aike el rokui el ngar er ngii er kid el mesiou er ngii. Me sel denguu el mo kot er a chelsel a klengar er kid e kede ochotii el kmo ngmera el betik a rengud er ngii. Ngar sel mlo merek el suobel e kede milsaod a eua el rolel e a Jehovah a ochotii a klou el bltkil a rengul el mo er a rengelekel. Me chelechang e kede kuk mo mesang el kmo ngmekerang e sebeched el menglou er a bltkil a rengud el mo er a Jehovah e dirrek el ochotii el kmo ngbetik a rengud er ngii.

5. Ngmo soad el mekerang sel dolatk aike el rokui el tekoi el bla leruul a Jehovah el kired?

⁵ A lsekum a chad a meskau a sengk e ke ulterekokl el kmal oba omereng el saul el kirel. Me kau el kmal soam tia el sengk a uchul me ke ousbech er ngii. A Jakobus a milluches el kmo: “A bek el ungil e cherrungel sengk a ngar a eanged el mei; ng mei el ngar a Dios, el ulemeob a llomes el ngar a eanged, el diak le mengodech, ma diak le bor ngii a telkib el milkolk er ngii.” (Jak. 1:17) Me kid a kmal oba omereng el saul e le Jehovah a meskid a rokui el tekoi el dousbech me dolemolem el ngar e dirrek el dmeu a rengud. Me sel bo dodengelii a delechel a bltkil a rengul e ngmo soad el ochotii el kmo ngdirrek el betik a rengud er ngii. Me kau, nguaisei a uldesuem?

6. Ngmle kirir a rechad er a Israel el mekerang a lsekum ngsorir a Jehovah a lolemolem el omekngeltengat er tir?

⁶ A Jehovah a ulemekngeltengat er a rechad er a Israel er a kmal betok el ungil el tekoi. Me ngmle betok el dart el rak el ulemekrael er tir el olab a llechul e milsterir aike el rokui el lousbech er a klengar er tir. (Dut. 4:7, 8) Me tirka el chad a mle sebechir el olecholt er a omereng el saul er tir el okiu sel lolengesenges ngii el llach. El ua tiang, sel lolenget el mo er a Jehovah e ngmle kirir el msang “a ikel kot el ungil er a kot el rodech” el duubech er a chetemir. (Exo. 23:19) Te mle ungil el medengei el kmo a Jehovah a mo melemolem el omekngeltengat er tir a lsekum te olengesenges er ngii e msang aike el kot el ungil er tir.​—Monguiu er a Duteronomi 8:7-11.

7. Ngmekerang a dousbech a “ikel kot el ungil” er kid el ochotii el kmo ngbetik a rengud er a Jehovah?

⁷ Kid me ngdirrek el sebeched el ochotii el kmo ngbetik a rengud er a Jehovah sel debsang a “ikel kot el ungil” er kid. (Osi. 3:9) Kede meruul er tiang sel dousbech aike el ngar er ngii er kid el mengebkall er ngii. El ua tiang, ngsebeched el melenget el olengeseu er a ureor er a Renged el meketmokl er a ongdibel er kid me a dirrek el meliuekl er a beluulechad el rokir. Me kid el rokui a sebeched el ousbech aike el ngar er ngii er kid el ochotii a bltkil a rengud el mo er a Jehovah alta ngbetok me a lechub e ngdi kesai. (2 Ko. 8:12) Engdi ngdirrek el ngar er ngii a lmuut el bebil er a rolel e kede ochotii el kmo ngbetik a rengud er ngii.

8, 9. Ngera ta er a rolel e kede ochotii el kmo ngbetik a rengud er a Jehovah? Ngera ngmirruul er ngii a Mike me a telungalek er ngii?

 ⁸ A Jesus a osisecheklid el nguu a Renged el mo kot er a klengar er kid e mo diak el sebek a rengud er a keled me a biled. Me a Demad a tibir el kmo ngmo meskid aike el rokui el dousbech. (Mt. 6:31-33) Me kid a oumerang er a Jehovah e medengei el kmo ngmo otireklii a telbilel. Nguaisei, a lsekum ngmera el betik a rengud er a chad e kede oumerang er ngii. Me sel loleketek a klaumerang er kid er a Jehovah e ngmengal mo soad el ochotii el kmo ngbetik a rengud er ngii. (Psa. 143:8) Me ngungil a dolatk el kmo: ‘A tekoi el kulatk el mo meruul me a temek me a klisichek el kungoit er ngii, ngolecholt el kmo ngmera el betik a renguk er a Jehovah? Ngak, a kultuil er a Jehovah er a bek el sils el kirel aike el kuusbech?’

⁹ A Kristiano el Mike me a telungalek er ngii a mui el oumerang er a Jehovah. Sera dirk lekekerei e ngmle blechoel el oureng el mo omerk er a klumech er a ta er a beluu. Ngmlo bechiil e mo er ngii a reteru el ngelekel engdi tia el urungulel a dirk mla er ngii. Me sel taem el ngii me a telungalek er ngii a milenguiu el kirir a rudam me a rudos el mesiou er a chelsel aike el beluu el ousbech a ngeso, e te tilbir el mo omekbeot a klengar er tir. Me te ulterur a blirir e millukl el mo kiei er a kekerei el blai. A Mike a dirrek el milengkekerei er a siobai er ngii el mengetmokl a obis e dirrek el miltik er a rolel e ngsebechel el ngar er a ta er a beluu e meruul er a urerel el okiu a Internet. Tiaikid a uchul me ngmlo sebechir el telungalek el melukl el mo er a ta er a beluu, e dirrek el kmal mle dmeu a rengrir el meruul er a omesiungir. Me ngdmu el kmo, “Aki kmal mla mo ungil el medengelii a belkul a tekingel a Jesus el ngar er a Mateus 6:33.”

10. Ngera uchul me kede ua David el ngmai a klungioled a lsekum kede melatk aike el tekoi el desuub el kirel a Jehovah?

¹⁰ A King el David a mle ta el loluches el kmo: “Ngkmal bleketakl a eanged el olecholt er a klebkellel a Dios! Ng kmal bleketakl el olecholt a bla leruul!” Ngdirrek el dilu el kmo: “A llechul a RUBAK a cherrungel; ngmeskid a beches el klengar. A tekingel a RUBAK a sebeched el oumeral ulsirs er ngii, ng mesterir a llomeserreng tirkel diak er tir.” Sel taem el David a melebedebek a llechul a Jehovah me a klebokel el blebelel e ngrullii me nglmuut el mo kmeed er a Jehovah e dirrek el mo soal el ochotii a bltkil a rengul el mo er Ngii. Me ngdilu el kmo: “A tekingek ma uldesuek bo le betechii a rengum, RUBAK el cheuotelek!”​—Psa. 19:1, 7, 14.

11. Ngmekerang a dousbech er a klemedengei el lebilskid a Jehovah el ochotii a bltkil a rengud el mo er ngii? (Momes er a siasing er a uchelel a suobel.)

¹¹ Chelecha el taem, e a Jehovah a olisechakl er kid er a betok el tekoi el kirel me a moktek er ngii me a blebelel me a dirrek el Tekingel. A beluulechad a melisiich er a rechad el mo mesuub, engdi a ngarbab el skuul a di blechoel el rulleterir me ngmo diak lebetik a rengrir er a Dios. Engdi a Jehovah a kuk ngodech e le ngsoal a lebo er ngii a klemedengei er kid, e dirrek el lolengeseu er kid me ngmo mellomes a rengud. Ngsoal a dousbech aike el tekoi el desuub el mo uchul a klungioled e dirrek el mo ngosuterir a rebebil. (Osi. 4:5-7) El ua tiang, ngsoal a bo douchais er a “klemerang” el mo er a rebebil e dengesuterir me bo lesobel. (1 Ti. 2:4) Me kede ochotii a bltkil a rengud el mo er a Jehovah me a rechad el okiu sel dolisechakl er a rebetok el kirel a Rengedel a Dios me aike el tekoi el bo loruul el kirel a klechad.​—Monguiu er a Psalm 66:16, 17.

12. Ngera ngdilu ta el kekerei el odos el kirel a sengk el lengiluu er a Jehovah?

¹² A remekekerei a dirrek el sebechir el melatk aike el bla lebesterir a Jehovah me aike el tekoi el lolisechakl er tir. A Shannon a dirk melatk er a lengar er a ta el klou el ongdibel er a dirk el 11 a rekil me a merrengel a dirk 10 a rekil. Ngar tia  el Klou el Ongdibel el “Godly Devotion,” e a rokui el mekekerei el uldimukl er a Shannon me a merrengel a lulengudel er tir er a ta el basio. Me ngkora mle telkib el suebek a rengul. Engdi ngkmal mlo ungil a rengul er a lorous er a babier el Questions Young People Ask​—Answers That Work el mo er a derta er tir. Me ngmlo ua ngera uldesuel el kirel a Jehovah? Ngdmu el kmo: “Seikid el taem e ak mera mlo medengei el kmo a Jehovah a mera el ngar er ngii, e kmal betik a rengul er ngak. Me ngkmal dmeu a rengud e le ngika el kot el ngarbab el Dios el Jehovah a kmal soal el merous a mekreos el sengk el mei er kid!”

13, 14. Ngmo ua ngera uldesued sel lollach er kid a Jehovah, e ngera uchul?

¹³ A Biblia a omeklatk er kid el kmo: “A RUBAK a mesmechokl er tirkel betik er a rengul, el ua chedam el mesmechokl er a rengelekel sechal el ngikel mekebekii.” (Osi. 3:12) Me sel dekengei a omellach er a Jehovah e debecherei me lolisechakl er kid, e kede mesuub a melemalt el tekoi e dirrek el mo er ngii a budech er a rengud. Me nguaisei, engdi a “rokui el omesmechokl sel le mer kid er chelechang e ng meringel er kid.” (Heb. 12:11) Me ngmo ua ngera uldesued sel lollach er kid a Jehovah? Ngkmal diak el kired el mengemikr a omellach er a Jehovah me a lechub e lolemolem el kesib a rengud a lsekum e ngchetid a omellach el dengiluu. Ngbetik a rengud er a Jehovah me ngsoad el lolengesenges er ngii e dirrek el kongei el melodech a blekerdeled.

¹⁴ Sel taem er a Malakai e a rebetok el chad er a Judea a dimlak lolengesenges er a Jehovah. Ngdimlak lomekerreu er ngii me te di millenget a tenget el diak lodeuir a rengul. Me a Jehovah a mlo meringel el mellach er tir el kirel a omerellir. (Monguiu er a Malakai 1:12, 13.) Ngmle betok el taem el Jehovah a mellach er tir engdi ngdimlak lorrenges er ngii, me ngdilu er tir el kmo: “Ak mo melebeakl er kemiu. Ak mo melebeakl a ikel klungiaol el mngai.” (Mal. 2:1, 2) Me ngkmal bleketakl el kmo a lsekum kede melemolem el diak dolengesenges a omellach er a Jehovah me a lechub e kede omdasu el kmo aika diak a ultutelel, e kede oridii a ungil el deleuill er kid me ngii.

15. Ngera el uldasu a kmal kired el mengeroid er kid er ngii?

¹⁵ A beluulechad er a Satan a melisiich er a rechad el mo mekedidai a rengrir e di melatk er a di tir. Me a rebetok el chad a chetirir sel domeklemalt er tir, me a lechub e domekrael er tir. A rebebil a di kongei el orrenges a uleklatk e le ngkirir el orrenges. Engdi ngdiak el kirel el mo uaisei a uldesued. A Biblia a mengelechel er kid el kmo: “Lak di moltirakl a blekerdelel a tekoi er tia el beluulchad.” Ngbai kired el mo medengei aike el tekoi el Jehovah a mengerechir er kid, e dirrek el mo meruul a tekoi el odeuir a rengul. (Rom 12:2) Ngousbech er a cheldebechelel el omekrael er kid er a ungil el blsechel. El ua tiang, kede muklatk el kirel a blekeradel el meketmokl  er a delongelel a sechal me a redil, me a rolel a dolilt er a remo sechelid me aike el tekoi el dolilt el mo meruul el kirel a ulengull me a omililed. Me sel dekengei a omellach er a Jehovah e dolodech a blekerdeled me bo dodeuir a rengul, e kede ochotii a omereng el saul er kid el kirel a ulekrael el lomeskid, e dirrek el ochotii el kmo ngbetik a rengud er ngii.​—Jn. 14:31; Rom 6:17.

16, 17. (a) Ngera uchul me ngkired el mo medengelii a uldesuel a Jehovah er a uchei er a doruul a tekoi? (b) Ngera te mirruul er ngii a rechad er a Israel e bai dimlak loumerang er a Jehovah?

¹⁶ A remekekerei el ngalek a ultuil er a rechad er a blirir el kirel a ngeso me a ulekerreu. Nguldimukl er a remeklou me te dirrek el mo olengit a ngeso er a rechad er a blirir. Te medengei el kmo ngsebechir el di tir el melilt a tekoi el bo loruul, engdi a rechad er a blirir a sebechir el ngosuterir er a ungil el uldasu. Me a Demad el Jehovah me ngdirrek el meskid a techelled el di kid el melilt a tekoi el doruul. Engdi kid el mui el oumerang er ngii e betik a rengud er ngii a uchul, me kede blechoel el olengit a ngeso er ngii, e dirrek el mo ungil el melatk a soal er a uchei er a doruul a omelilt er kid. Me sel dultuil er a Jehovah e ngmo meskid a chedaol reng er ngii me ngosukid el mo ungil el melilt a tekoi.​—Fil. 2:13.

¹⁷ Sel taem er a Samuel e a rechad er a Israel a mlo mechitechut er a rechad er a Filistia er a mekemad. Ngdimlak loker er a Jehovah er a kirir el meruul e bai mlo kldibel e kmo: “Me mbo de nguu a Blil a Telbiil er a RUBAK el ngar a Silo ma RUBAK bo lobengked el sebecheklid er a re cherroued.” Me ngera dilubech? “Te mle betok el chad a mlad; te mlad a re 30,000 el soldau er a Israel. E a Blil a Telbiil a le ngiluu.” (1 Sa. 4:2-4, 10, 11) Me a rechad er a Israel a ulemdasu el kmo a lenguu a Blil a Telbiil e lorael, e a Jehovah a mo ngosuterir e omekerreu er tir. Engdi ngdimlak lolengit a ngeso er a Jehovah me a lechub e lolasem el mo medengelii a uldesuel. Te bai di mirruul a tekoi el tir a ulemdasu el kmo ngmelemalt a uchul me te kmal mlo chuarm.​—Monguiu er a Osisechakl 14:12.

18. Ngkirel el mo ua ngerang a uldesued el bedul a Jehovah el kirel a ngeso?

¹⁸ A ta er a milluches er a psalm el kmal mle betik a rengul er a Jehovah e ultuil er ngii a dilu el kmo: “Ak mo otilii a omeltkek er a Dios, e seikid e ak lmuut el mo oldanges er ngii el osebelek e Dios er ngak. Ak ngar tiang el mekngit a renguk, e melebedebek er kau.” (Psa. 42:5, 6) Me kau, nguaisei a uldesuem el bedul a Jehovah? Ke melechesukau el kmeed er ngii e dirrek el oumerang er ngii? Nglocha sebechem el lmuut el mekurulii a klaumerang er kau er ngii. A Biblia a ouchais er kid el kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum. Mletkii a RUBAK er a ikel bek el moruul, e ngii a mo ochotii er kau a melemalt el rael.”​—Osi. 3:5, 6.

19. Kede mekerang e ochotii el kmo ngbetik a rengud er a Jehovah?

¹⁹ Me a blekerdelel a Jehovah el ulemuchel el betik a rengul er kid a osisecheklid er a rolel e kede oubltikerreng el mo er ngii. Mada me bo deblechoel el melatk aike el tekoi el bla leruul el kired me a dirrek el sel klou el bltkil a rengul el mei er kid. E bo lsebeched el ochotii el kmo ngbetik a rengud er ngii er a rengud me a klengar er kid me a uldesued me a klisiched el rokir.​—Mk. 12:30.