1. A apostol Johanes ngmillisiich er a Rekristiano el mo melatk er a ngerang, e ngera uchul?

 NGAR er a 1 Johanes 3:1, e ngika el apostol a melisiich er kid el mo dmolech el melebedebek er sel klou el bltkil a rengul a Jehovah el kired. Ngdilu el kmo: “Ka mosa kmal klou el bltkil a rengul a Dios er kid!” Me sel dolebedebek er a klungel a bltkil a rengul a Jehovah el kired, me sel rolel e ngolecholt er tia el bltkil a rengul, e ngrullid el lmuut el mo kmeed er ngii e mengal mo betik a rengud er ngii.

2. Ngera uchul me ngmeringel er a rebebil el mo medengei el kmo a Dios a betik a rengul er tir?

² Ngklengiterreng, e le rebebil a diak lodengelii a rolel a loubltikerreng a Dios el bedul tir. Me te omdasu el kmo ngdiak lomekerreu er a rechad. Te dirrek el locha oumerang el kmo a Dios a di meruul a llechul, e dirrek el omals er tirke el diak lolengesenges er ngii. Me ngoeak a klsuul el osisechakl e a rebebil a mo omdasu el kmo a Dios a kmal mekngit a blekerdelel, el uchul me ngmeringel er tir el mo betik a rengrir er ngii. E a rekuk bebil a omdasu el kmo a Dios a betik a rengul er a rechad el rokui el diak lultuil er a ngii di el tekoi el loruul. Engdi a omesubem er a Biblia a mla ngosukau el mo medengelii a klemerang el kirel a Jehovah. Me ke mla mo medengei el kmo a bltikerreng a kot el ngaruchei el blekerdelel, e ngii a tilengetengii a  Ngelekel el sechal el mo melubet a kngtim. (Jn. 3:16; 1 Jn. 4:8) Me nguaisei, engdi a tekoi el dilubech er a klengar er kau a sebechel el rullii el mo meringel er kau el melechesuar a bltkil a rengul a Jehovah el bedul kau.

3. Ngera ngosukid el mo medengelii a bltkil a rengul a Jehovah el bedul kid?

³ Ngsebeched el mo medengelii a bltkil a rengul a Jehovah el bedul kid a lsekum kede omuchel el mo medengei el kmo ngii el Jehovah a ulemeob er kid. Ngii a milskid a klengar er kid. (Monguiu er a Psalm 100:3-5.) Seikid a uchul me a Biblia a mesaod er ngike el kot el chad el kmo, “ngelekel a Dios.” Me a Jesus a dirrek el ullisechakl er kid el mo omekedong er a Jehovah el kmo: “Demmam el ngar a eanged.” (Lk. 3:38; Mt. 6:9) Me a Jehovah a Demad e dirrek el kmal betik a rengul er kid el di ua chedam el betik a rengul er a rengelekel.

4. (a) Ngua ngera el Chedam a Jehovah? (b) Ngera kede mo mesaod er tia el suobel me sel ongingil?

⁴ Ngmeringel er a rebebil el mo omdasu er a chedam el ua betik a rengul el chad. Nglocha ngmle mekngit a omerellir a redemerir el mo er tir er a dirk el mekekerei. Engdi a Jehovah a kmal diak el sebechel el uaisei a omerellel el mo er a rengelekel. Ngii a kot el ungil el Chedam. (Psa. 27:10) Ngkmal imis el betik a rengul er kid e dirrek el omekerreu er kid el ngar er a betok el rolel. Me a cherengel a taem el bo dolechesuar a bltkil a rengul a Jehovah el bedul kid, e nglmuut el mo betik a rengud er ngii. (Jak. 4:8) Ngar er tia el suobel e kede mo mesaod a eua el rolel e a Jehovah a ochotii a bltkil a rengul el bedul kid. E ngar sel ongingil el suobel e kede mo mesaod a eua el rolel e ngsebeched el ochotii a bltkil a rengud el mo er ngii.

5. A Dios ngomesterir a rokui el chad a ngerang?

⁵ Sera lengar er a Athens el beluu er a Gris a apostol el Paulus, e ngmiles a betok el bleob el chelid me a rechad a milengull e uluumerang el kmo aika el chelid er tir a milsterir a klengar. Me nguluuchais er tir el kirel a “Dios, el ngikel milebii a beluulchad ma ikel bek el ngar a chelsel.” Ngdirrek el dilu el kmo, ngii el Dios “a omesterir a re bek el chad a klengar, ma telrir, ma bek el tekoi” e “ngii a uchul e kede outeliil, e mengitengtik e ngar ngii a klengar er kid.” (Rel. 17:24, 25, 28) Me a Jehovah a ngike el omeskid a rokui el dousbech me ngsebeched el kiei el dmeu a rengud er a klengar er kid. Me ka di molatk a bebil er a tekoi el lomeskid e le ngii el kmal betik a rengul er kid.

6. Ngua ngera el delengchokl a bla lebeskid a Jehovah? (Momes er a siasing er a uchelel a suobel.)

⁶ El ua tiang, a Jehovah a mla kutmeklii a kmal klebokel el delengchekled. (Psa. 115:15, 16) Tia el chutem a kmal ileakl el ngodech er aike el rokui el planet el lulemeob. A re scientist a mla mesuub el kirel a melidiul e dirrek el mla metik a lmuut el betok el planet, engdi ngdiak a ta er ngii el sebechir a rechad el kiei er a chelsel e melemolem el ngar. Me a Jehovah a dimlak di lebeskid a rokui el tekoi el dousbech me dolemolem el ngar e lemerekong, e ngdirrek el milebii tia el chutem el klebokel e ungil el ulekerreu el basio el dmeu a rengud el kiei er a chelsel. (Isa. 45:18) Me sel dolatk er tia el beluad el Demad el Jehovah a mla meskid, e kede kmal mo melechesuar a klou el bltkil a rengul el bedul kid.​—Monguiu er a Job 38:4, 7; Psalm 8:3-5.

7. Ngmekerang e mocholt a bltkil a rengul a Jehovah el bedul kid el okiu a rolel e ngulemeob er kid?

⁷ A ta er a rolel e a Jehovah a olecholt er a bltkil a rengul el bedul kid a ngii el ulemeob er kid el sebeched el oukerebai er ngii. (Gen. 1:27) E tiang a belkul a kmo ngsebeched el melechesuar a bltkil a rengul e dirrek el ochotii a bltkil a rengud el bedul ngii. Ngmedengei el kmo tia el omeruul a rullid el mo dmeu a rengud. Ngdi osisiu, a rengalek a kmal dmeu a rengrir sel lodengei  el kmo a redemerir me a rederrir a betik a rengrir er tir. Me lak dobes, a Jesus a ullisechakl er kid el kmo ngmo dmeu a rengud sel bo dekeed er a Demad el Jehovah. (Mt. 5:3) Me a Jehovah a “omeskid a rokui el tekoi el kired el oldeu a rengud er ngii.” Me ngbleketakl el kmo ngkmal bekururau e dirrek el kmal betik a rengul er kid.​—1 Ti. 6:17; Psa. 145:16.

8. Ngera uchul me ngsoad a lolisechakl er kid a Jehovah?

⁸ A chedam a betik a rengul er a ngelekel e dirrek el diak el soal a lemecheuid me a lechub e ngmecheblad. Me nguaisei, engdi chelechang e a ruungalek a diak lekengei el loltirakl a omellach er a Biblia el kirel a melemalt me a cheleuid el tekoi. Seikid a uchul me ngdiak el sebechir el mo ungil el omekrael er a rengelekir. E tiang a di mo uchul a klengiterreng me a rraurreng. (Osi. 14:12) Me nguaisei, engdi a Jehovah a mesterir a rengelekel a kot el ungil el ulekrael e le ngii a “bekelatk el Dios.” (Psa. 31:5) Ngkmal dmeu a rengul el olisechakl er kid er a klemerang el kirel me sel rolel kede mengull er ngii. Ngdirrek el ochotii er kid a kot el ungil el rolel a klengar. (Monguiu er a Psalm 43:3.) Me ngera el tekoi a bla losisecheklid er ngii a Jehovah el ochotii el kmo ngkmal betik a rengul er kid?

9, 10. (a) Ngera uchul me a Jehovah a ouchais er kid el kirel? (b) Ngmekerang a lolisechakl er kid el mo oltaut a moktek er ngii?

⁹ Me a kot e a Jehovah a ouchais er kid el kirel, e le ngkmal soal a bo dungil el medengelii. (Jak. 4:8) Me ngochotii a ngklel er kid. Ngar er a chelsel a Biblia e ngar er ngii a ngklel el kuk betok er a ngii di el ngakl. Me ngii el Jehovah a dirrek el ouchais er kid el kmo ngua techa el Dios. Me sel domes a blebelel e kede mo medengei el kmo ngkmal mesisiich e mellomes a rengul el Dios. (Rom 1:20) E sel donguiu er a Biblia e kede mo medengei el kmo ngmelemalt a omerellel e kmal betik a rengul er kid. Me a cherengel a taem el domekeroul er a klemedengei er kid er ngii e kede lmuut el mo kmeed er ngii.

¹⁰ A Jehovah a dirrek el ochotii a moktek er ngii er kid. Ngouchais er kid el kmo kede chedal a telungalek er ngii. Ngdirrek el osisecheklid er aike el tekoi el soal a doruul me bo el sebeched el oba kltarreng me a budech e dmak el oureor el teloi er a rokui el chedal a telungalek er ngii. A Biblia a kmal bleketakl el ochotii el kmo a Dios a dimlak lomeob er kid el kired el di kid el melilt a tekoi el doruul el kirel a ungil me a mekngit. (Jer. 10:23) Ngii a kmal ungil medengei aike el mo uchul a klungioled. Me sel dekengei er a omengederederel e dolengesenges er ngii e ngmo budech e ungil a klengar er kid. Me ngolisechakl er kid er a klemerang el tekoi e le ngkmal betik a rengul er kid.

11. A betik a rengul el Demad ngmla subedid er a ngerang?

¹¹ A betik a rengul el chedam a kerekikl el melatk er a klengar er a rengelekel er a ngar mederir el klebesei, e le ngsoal a bo lungil a klengar er tir. Engdi ngklengiterreng, e le rebetok el chad er chelechang a di suebek a rengrir el kirel a ngar mederir el klebesei me a lechub e te di mengoit a temir el mengereker el kirel a klalo el di mo nguemed. (Psa. 90:10) Me kede kmal oba omereng el saul e le Demad el Jehovah a diak di lolisechakl er kid er a ungil el rolel a klengar, e ngdirrek el mla tibir a ungil el klengar el kired er a ngar medad el klebesei!

12. Ngmilekerang a Jehovah er a lolasem el olengeseu er a Kain me a Baruk?

¹² Sel taem el Jehovah a ulemes er a Kain el mocha er a kdekudel el blekeradel e ngmillasem el olengeseu er ngii me nguleker er ngii el kmo: “Ngera me ng kesib a rengum? E ngera me ng mekngit osengem? Chomko ng mle ungil  omerellem e ng blekebek a medam.” (Gen. 4:6, 7) Engdi a Kain a ultngeklii a ngelsuil a Jehovah me ngmlo uchul a chelebulel. (Gen. 4:11-13) E a kuk ta er a taem e a Jehovah a miltebengii a cheleuid el uldesuel a Baruk el rirellii el mo mechitechut e mesaul a rengul. Me a Jehovah a silbedii el kmo a uldesuel a cheleuid me ngmle kirel el melodech er ngii. Me a Baruk a rirengesii a uleklatk er a Jehovah e ngildechii a uldesuel me ngsilobel.​—Jer. 45:2-5.

13. Ngera te siluub a reblak a rengrir el chedal a Jehovah er a taem el lechilarm?

¹³ A Jehovah a omekrael e mellach er kid e le ngbetik a rengul er kid. Me ngdiak di lomeklemalt er kid sel bo el kirel e ngdirrek el olisechakl er kid. (Heb. 12:6) Ngar er a Biblia e kede menguiu el kirir a reblak a rengrir el mesiungel a Jehovah el mlosisechakl el mo ungil a omerellir el chad. El ua tiang, a Josef me a Moses me a David a mlo chelebangel a meringel el blekeradel er a klengar er tir. Engdi ngar er a chelsel aike el taem e a Jehovah di ulebengterir. Me a tekoi el lesiluub a ngilsuterir er sel taem el Jehovah a mlo omekngerachel er tir er a meklou el ureor. Me sel donguiu er a Biblia el kirel a rolel e a Jehovah a ullengeseu e ullisechakl er a rechedal, e kede mo medengei el kmo ngkmal betik a rengul er kid.​—Monguiu er a Osisechakl 3:11, 12.

14. Kede mekerang e mo melechesuar a bltkil a rengul a Jehovah sel lollach er kid?

¹⁴ A Jehovah a melemolem el olecholt er a bltkil a rengul el bedul kid, el mo lmuut er a taem el deruul a cheleuid. Me a lsekum kede kongei el nguu a omellach er ngii e obult er a mekngit el omerelled e ngousubes er kid. (Isa. 55:7) Me tiang ngera belkul? A tekingel a David el kirel a klausubes er a Jehovah a ochotii el kmo ngmera el chubechubechad el Chedam, e le ngdmu el kmo: “Ng ousubes a rokui el kngtik e omekungil er ngak er a rokui el rektek; ng osebelak er a debull  e omekngeltengat er ngak el oba bltikerreng ma klechubechub. El ua cherridel a delongelel ongos ma ngebard, me ng ua isei a longeroid a kngtid er kid.” (Psa. 103:3, 4, 12) Me a Jehovah a mellach e omekrael er kid el okiu a kakerous el rolel. Me kau, ke kongei el melodech a blekerdelem? Lak mobes el kmo a Jehovah a mellach er kid e le ngkmal betik a rengul er kid.​—Psa. 30:5.

15. Ngera ta er a rolel e a Jehovah a ochotii a bltkil a rengul el bedul kid?

¹⁵ A betik a rengul el chedam a omekerreu er a telungalek er ngii er a kdekudel el tekoi. Tiaikid a loruul er ngii a Demad el Jehovah el kired. A ta er a milluches er a psalm el kirel a Jehovah a kmo: “Ng mesebechakl a klengar er a re chedal; ng olsobel er tir er a chimorir a re dengerenger.” (Psa. 97:10) Ka di molatk er tiang: Sel rechedel a chimam el omekerreu er a chelsul a medam a ochotii el kmo ngmekreos er kau. Me a Jehovah a uaisei el di mereched el omekerreu er a rechedal e le te kmal mekreos er a osengel.​—Monguiu er a Sekaria 2:8.

16, 17. Ngmilekerang a Jehovah e omekerreu er a rechedal er a irechar me chelechang?

¹⁶ A ta er a rolel e a Jehovah a omekerreu er a rechedal er a irechar me chelechang, a okiu a rechanghel er ngii. (Psa. 91:11) A ta el anghel a milekodeterir a 185,000 el soldau er a Asiria er chelsel a ta el kesus e ulsebelterir a rechedal a Dios. (2 Ki. 19:35) Ngar sel taem er a rekot el Kristiano e a rechanghel a ultebedii a Petrus me a Paulus me a relmuut el bebil er a blil a kelebus. (Rel. 5:18-20; 12:6-11) Telkib el taem er a uchei, e ngmla er ngii a kmal klou el mekemad er a ta el beluu er a Africa. Ngkmal mle klou a uldikel el klakoad me a omerechorech me a rulterebek me a rumekoad a uchul. Me alta e ngdimlak a rudam er kid el mad engdi te betok a urriid a rokui el kloklir. Me nguaisei, engdi te mlo melechesuar a bltkil a rengul a Jehovah, e mlo medengei el kmo ngomekerreu er tir. Me alta e te kmal mlo chuarm engdi ngmle dmeu a rengrir. Me sera lebong a ta er tirke el omtechei er sel klou el obis er kid e loker er tir el kmo te ua ngerang, e te rokui el dilu el kmo: “Ngdi ungilbesmam me aki mereng a sulel a Jehovah!”

¹⁷ Me nguaisei, engdi te ngar er ngii a rebebil el mesiungel a Jehovah el ua disaiplo el Stefanus me a relmuut el bebil el mlad el blakerreng er tir a uchul. A Jehovah a diak lorrob aika el tekoi me lak leduubech, engdi ngomekerreu er a rechedal el ua ta el cheldebechel el okiu sel lomeklatk er tir el kirel aike el betok el kakerous el rolel el lousbech a Satan el mengeblad er tir. (Efe. 6:10-12) E aika el uleklatk er ngii a debetik er a Biblia me a dirrek aike el babier el loltobed a cheldebecheled. El ua tiang, kede suubii el kmo ngar er ngii a kdekudel el tekoi el lolisiich er ngii a Internet me a dirrek el ngibes er a udoud me a deleboes el omeruul me a mubi me a babier me a klekool el di melisiich a uldikel me a koadelchad. Me ngkmal bleketakl el kmo a Jehovah a ua betik a rengul el Chedam el soal el omekerreu er kid.

18. Ngua ngera uldesuem el kirel a bltkil a rengul a Jehovah el bedul kau?

¹⁸ Sel taem el Moses a millebedebek aike el rak er a klengar er ngii el mesiou er a Jehovah, e ngmlo ulterekokl a rengul el kmo a Jehovah a kmal betik a rengul er ngii me ngdilu el kmo: “Momekeek er kemam er a bek el tutau er a diak le mengodech el bltikerreng er kau, me ki bo mongitakl e ledeu a rengmam er a klemengetel a klengar er kemam.” (Psa. 90:14) Me kede kmal ngeltengat el mo medengelii e melechesuar a bltkil a rengul a Jehovah el bedul kid. Me ngkmal ileakl a techall el dobang el Jehovah a betik a rengul er kid! Kede di ua uldesuel a apostol el Johanes er a ledu el kmo: “Ka mosa kmal klou el bltkil a rengul a Dios er kid!”​—1 Jn. 3:1.