A Dart el Rak el Omengederederel a Renged!

“Mada Dios er a budech . . . [le beskemiu] a ikel rokui el ungil el cho mousbech el meruul a soal.”​—HEB. 13:20, 21.

CHELITAKL: 136, 14

NGAR ER A CHELSEL AIKA EL MEREKO EL 100 EL RAK . . .

e ngera el dongu a bla lousbech el omerk er a klumech er a Renged?

e ngera el beches el klekedall a bla lousbech?

e ngera el osisechakl a mla meketmokl el kirir a rumerk er a Renged?

1. Ngmle ua ngera klungel a ultutelel a berkel a klumech er a rengul a Jesus? Mosaod.

 A JESUS a kmal mle semeriar el mesaod el kirel a Rengedel a Dios. E tiang a mle uchul e rsel a cheldechedechal er a dirk lengar er a chutem. Ngmle betok er a 100 el taem el losaod er a Renged er a taem er a omesiungel. Me ngbleketakl el kmo a Renged a mle ta er a kot el klou a ultutelel el tekoi er a klengar er ngii.​—Monguiu er a Mateus 12:34.

2. Te rua techang a locha rirengesii tia el tekoi el medung er a Mateus 28:19, 20, e ngera uchul me kede kongei er tia el tekoi?

² Telkib el taem er a uriul er a lebekiis er a kodall a Jesus, e ngmlo duum er a delongelir a rekuk betok er a 500 el chad. (1 Ko. 15:6) Me tiaikid a locha sel taem el Jesus a ulderecheterir a redisaiplo er ngii el mo omerk er a klumech el “mor a bek el bedengir a re chad er ker me ker.” E tiang a dimlak lebeot el ureor. * Ngdilu er tir el kmo tia el ureor a mo melemolem “el mo lmuut er a ulebongel er a beluulchad.”  Me chelecha el taem e sel momerk er a ungil chais e ke olengeseu el oltaut er tia el ulaoch.​—Mt. 28:19, 20.

3. Ngera edei el tekoi el mla ngosukid el omerk er a klumech?

³ Me a uriul er a loldurech er tir el mo omerk er a klumech, e a Jesus a dilu el kmo: “Ngak a mo obengkemiu.” (Mt. 28:20) Me a Jesus a tilbir el mo er a rulebengkel el kmo ngmo omekrael er tia el ureor, e dirrek el mo ngosuterir me ngsebechir el merkii tia el klumech er a beluulechad el rokir. Me a Jehovah a dirrek el obengked. Ngmla meskid “a ikel rokui el ungil” el tekoi me kede ousbech el meruul er tia el ureor. (Heb. 13:20, 21) Me ngar tia el suobel e kede mo mesaod a edei er aika el ungil el tekoi. Ngmla meskid a (1) dongu er kid, me a (2) beches el klekedall el dousbech er chelechang, e a (3) ngmla meskid a betok el bedengel a osisechakl. Me a kot e bo dosaod el kirel a bebil el dongu el bla dousbech er a chelsel aika el mereko el 100 el rak.

A DONGU EL NGOSUTERIR A REMESIUNGEL A DIOS EL OMERK ER A KLUMECH

4. Ngmekerang a kakerous el dongu e mla ngosukid el mo ungil el omerk er a klumech?

⁴ A Jesus a ulemekesiu er a klumech er a Renged el ua tane el medalem er a kakerous el chutem. (Mt. 13:18, 19) A chad er a sers a ousbech a betok el kakerous el dongu el mengetmokl er a sersel. Me ngdi osisiu, a King er kid a mla meskid a betok el dongu el dousbech el ngosuterir a rechad el mo kongei er a ungil chais. Me a bebil er aika el dongu a mle usbechall el di mle telkib el taem, e a bebil a bla dousbech el betok el rak el me lmuut er chelechang. Engdi ngii el rokui a mla ngosukid el lmuut el mo meduch el omerk er a klumech.

5. Ngera testimony card, e milekerang er a lousbech er ngii?

⁵ Ngar er a rak er a 1933, e a rumerk er a Renged a ulemuchel el ousbech a testimony card. E tiang a ngilsuterir a rebetok el mo omuchel el omerk er a klumech. Tiang a di kekerei el babier el llechukl er ngii a mekedeb e beot el omesodel a klumech er a Biblia. Me a lebebil er taem e te kuk remuul a bebil el ngar er ngii a beches el klumech er a chelsel. A Brother Erlenmeyer a mle bekord el teruich a rekil er a lomuchel el ousbech er a testimony card. Ngdilu el kmo: “Ngkirem el omuchel el dmu el kmo, ‘Ngdiak el soam el choiuii tia el babier?’ Me a uriul er a lechiuii a babier a chad er a blai, e ngkirem el msang a babilengel e merael.”

6. Ngmle ua ngera klungel a ultutelel a testimony card?

⁶ Tia el testimony card a ngilsuterir a rumerk er a Renged er a betok el rolel. El ua tiang, a rebebil a kmal mle merur me ngdimlak lodengei el kmo te mo dmu el kmo ngerang, alta e ngkmal mle sorir el omerk er a klumech. E a rekuk bebil a kmal mle bekeu me ngmle sebechir el dmung a rokui el tekoi er a di chelsel a sesei el bung, engdi ngdiak lungil a delecherul a tekingir. Me tia el card a ngilsuterir a rokui el mo beot er tir el mesaod er a klumech er a Renged.

7. Ngera bebil er a omelsemai el blo lechelebangel a rumerk er a Renged er a lousbech er a testimony card?

⁷ Ngdirrek el mla er ngii a omelsemai el blo lechelebangel. A odos er kid er a Grace Estep a dilu el kmo: “A lebebil e a rechad a oker er kid el kmo, ‘Ngera ngdmu tia el babier? Ka di mouchais er ngak el kirel.’” Me a rebebil a kuk diak el sebechir el menguiu, e a rebebil a kuk di nguu tia el babier e chosmerii a chesimer. A rebebil a kmal chetirir tia el klumech me te nguu a babier el sodelii e mdesii. Me nguaisei, engdi tia el testimony card a ngilsuterir a rumerk er a Renged el mo olisechakl er a rengar bita er tir, e dirrek el mileketeklii el kmo tir a tirke el chad el olisechakl el kirel a Rengedel a Dios.

8. Ngmle ua ngerang a usbechel aika el portable phonograph? (Momes er a siasing er a uchelel a suobel.)

⁸ A ta er a dongu el duluusbech er ngii er a  uriul er a rak er a 1930 a portable phonograph. A rebebil el Sioning a ulemekedong er ngii el Aron e le ngdiak el tir a mengedecheduch e ngbai tia el mesil a mengedecheduch. (Monguiu er a Exodus 4:14-16.) Me a lsekum a chad er a blai a kongei el orrenges e te orelii a kedeb el cheldecheduch el kirel a Biblia e sola e merous a babier el mo er tir. Me a lebebil er a taem e a rokui el chedal a telungalek a mo kldibel e orrenges er a cheldecheduch. E sera rak er a 1934, e a Watch Tower Society a ulemuchel el meruul aika el mesil el kltmokl el kirel a berkel a klumech. Me a cherengel a taem e ngmlo sebechir a rudam el record a 92 el kakerous el cheldecheduch.

9. Ngera mlo klungiolel a portable phonograph?

⁹ Sel taem er a lerengesii a ta er aika el cheldecheduch a Hillary Goslin, e nglilengir a ta er aika el mesil el kirel a ta el sandei e mlo omerk er a klumech el mo er a retonari er ngii. Me tiang a mlo uchul e a rebebil a mlo semeriar er a klemerang e mlo metecholb. E a cherengel a taem e a reteru el redil el ngelekel ngika el odam a mlo er a Skuul er a Gilead e mlo missionari er a uriul. Me aika el mesil a di ua testimony card el ngilsuterir a rebetok el mo omuchel el olisechakl. E a uriul e a Jesus a mlo ousbech er a Skuul el Kirel a Urerel a Dios el olisechakl er a rechedal er a rolel a lomerk er a klumech.

OUSBECH A KAKEROUS EL KLEKEDALL EL OLISECHAKL ER A RECHAD

10, 11. Te milekerang a rumerk er a klumech e ousbech a simbung me a razio, e ngera uchul me aikang a kmal mle ungil el klekedall el kirel a ureor?

¹⁰ Me ngokiu a ulekrael er a King er kid, e a rechedal a Dios a mla ousbech a kakerous el klekedall el omerk er a klumech. E aikang a mle meklou a ultutelel el ileakl er sel taem el di mle kesai a remeruul er tia el ureor. (Monguiu er a Mateus 9:37.) El ua tiang, te uluusbech a simbung er a beluu el omerk er a klumech. Me ngbek el sandei e a Brother Russell a oldurokl a cheldecheduch el kirel a Biblia el mo er a obis er a simbung. E te mo oldurokl er tia el cheldechedechal el mo er aike el siobai el meruul a simbung er a beluu er a Canada me a Europe me a beluu er a Merikel. Me ngar er a rak er a 1913, e a cheldechedechal a Brother Russell a mla motobed er a chelsel a 2,000 el simbung me te mlo er ngii a bekord el 15,000,000 el chad el menguiu aika el cheldechedechal!

¹¹ Kede dirrek el uluusbech a razio el omerk er a klumech. Ngar er a April 16, 1922, e a Brother Rutherford a ultebedii a ta er a kot el cheldechedechal er a razio, e mla er ngii a bekord el 50,000 el chad el ulerrenges er ngii. Me ngdi mle telkib e ngmlo er ngii a razio er kid el ngklel a WBBR, me ngmlo sebeched el otebedii a kot el prokuram er kid er ngii er sera February 24, 1924. Me sera December 1, 1924, e a Watch Tower a ultebedii a tekoi el kmo: “Aki oumerang el kmo a razio a ta er a kot el beot e ungil el rolel e aki omerk er a klumech el kirel a klemerang.” Me a razio a di ua simbung el ngosukid el mo metik er a rebetok el chad el ngar er aike el basio el di kesai a rumerk er a klumech er ngii.

12. (a) Ngera kot el soam el rolel a dousioning er a buai? (b) Ngera sebechel el ngosukid el mo klou a rengud e ousioning er a buai?

¹² A ta er a ungil el rolel e kede mengedecheduch er a rechad a okiu sel dousioning er a buai. Ngbetok a mla meketmokl el kirel a rolel a dongedecheduch er a rechad er a parking lot me a blil a makit me a lmuut el bebil er a basio. Me kau, ke kora bekikl el meruul er tia el ureor? A leuaisei, e moluluuch el olengit a ngeso e molatk er a tekingel a Brother Manera, el ta er a odam el oldingel a ongdibel. Ngdilu el kmo: “Kede omes aika el beches el rolel a berkel a klumech el ta er a rolel a omesiunged el mo er a Jehovah, e ta er a rolel e kede ochotii a blakerreng er kid el mo er ngii, el mo lmuut er a taem el lemeasem a blakerreng er kid. Me kede kmal semeriar  el mo ochotii el kmo kede kongei el meruul a ngii di el ureor el moterekokl er kid.” Me sel bo leklou a rengud e dousbech aika el beches el rolel a omesiou e nglmuut el mo mesisiich a klaumerang er kid er a Jehovah e lmuut el mo meduch el omerk er a klumech.​—Monguiu er a 2 Korinth 12:9, 10.

13. Ngera me a website er kid a kmal ungil el dongu el kirel a berkel a klumech? E ngera ke mla mesang er chelecha el mousbech er tia el klekedall?

¹³ A rebetok el omerk er a Renged a kmal semeriar el ouchais er a rechad el kirel a website er kid el jw.org, el sebechir el mo er ngii e download a cheldecheduch el kirel a Biblia el ngar er a kuk betok er a 700 el bedengel a omelekoi. Bek el sils e te betok er a 1.6 el miliol el chad a mo er tia el website er kid. Me a uchei e kede uluusbech a razio el omerk er a klumech el ngar er aike el basio el meringel a omerael el mo er ngii. E chelecha el taem e a website er kid a meruul er a osisiu el ureor.

OLISECHAKL ER A REMO OMERK ER A UNGIL CHAIS

14. Ngera el osisechakl a luluusbech er ngii a rumerk er a klumech, e ngera el skuul a ngilsuterir el mo meduch el olisechakl?

¹⁴ A dongu me a klekedall el bla desaod a mla kutmokl a betok el ungil el tekoi. Me nguaisei, engdi a rulemerk er a ungil chais a kmal mle kirir el mosisechakl el mo ungil el meruul er tia el ureor. El ua tiang, a lebebil er a taem e a chad er a blai a dimlak lekengei a tekoi el lerirenges el okiu a phonograph. E a rekuk bebil a mlo semeriar er ngii e sorir el lmuut el mesuub a betok. Me a rumerk er a klumech a mle kirir el mesuub el mo meduch el mengedecheduch e olisechakl er a rechad sel bo lechelebangel a chouaika el tekoi. Me ngokiu a chedaol reng er a Dios e a Brother Knorr a miltebengii el kmo, ngklou a ultutelel el kirir a rumerk er a klumech el mesuub el mo meduch el mengedecheduch er a rechad sel loldingel a obliil. Me ngulemuchel er a rak er a 1943, e a bek el ongdibel a ulemuchel el mengetmokl er a Skuul el Kirel a Urerel a Dios. Me tia el skuul a ngilsuterir a rokui el mo meduch el olisechakl.

15. (a) Ngera dilubech el mo er a rebebil el uleltobed a cheldechedecherir er a Skuul el Kirel a Urerel a Dios? (b) Ngmekerang a telbilel a Jehovah el medung er a Psalm 32:8 e mla mo mera el tekoi er a rengum?

¹⁵ A rebetok el odam a dimlak el sau el mengedecheduch er mederir a rebetok el chad. A Brother Ramu a dirk melatk er a kot el cheldechedechal er a rak er a 1944 el milsaod el kirel a chad el ngar er a Biblia el Doeg. Ngdilu el kmo: “Ngmlo omritel a chimak me a bkul a ochik a kaisesiuekl e di omritel a ngerek.” Ngdirrek el dilu el kmo: “Ngmle ketengek el mengedecheduch er mederir a rechad engdi ngdimlak bo lemechitechut a renguk.” Me alta e ngdiak lebeot el tekoi, engdi a rengalek me ngdirrek el mle kirir el oltobed a cheldechedecherir. A Brother Manera a dirk millatk er a ta el kekerei  el buik el mlo oltobed er a kot el cheldechedechal. Ngdilu el kmo: “Ngkmal mle imis el suebek a rengul, me sera lomuchel el mengedecheduch e ngmlo lmangel. Engdi ngkmal mle blak a rengul me ngdi lilangel e rokir a cheldechedechal.” Me alta e ngdiak monger er a temel a miting e le ke locha kmal merur me a lechub e ke omdasu el kmo ngdiak el sebechem. Me a lsekum nguaisei a uldesuem, e molengit er a Jehovah me lengesukau el mo bekeu. Ngkmal sebechel el ngosukau el okiu a Skuul el Kirel a Urerel a Dios el di ua sera lolengeseu er tirke el mle kot el ngalek er a skuul.​—Monguiu er a Psalm 32:8.

16. Ngera moktek er a Skuul er a Gilead (a) er a ngar er a mong? (b) er a rak er a 2011 el mei er chelechang?

¹⁶ A cheldebechelel a Dios a dirrek el mla kutmeklii a ta er a rolel a osisechakl el okiu a Skuul er a Gilead. A ta er a moktek er tia el skuul a ngosuterir a rengalek er a skuul el lmuut el smisiich a urungulir el mo omerk er a klumech. Tia el skuul a ulemuchel er a rak er a 1943, e sel taem el me lmuut er chelechang e te ngar er ngii a 8,500 el mla tuobed er tia el skuul e modurokl el mo mesiou er a chelsel a 170 el kakerous el beluu. Ngulemuchel er a rak er a 2011, e tirke el mengilt el mo er tia el skuul a tirke el mesiou el special pioneer me a rudam el oldingel a ongdibel me a remesiou el ngar er a Bethel me a remissionari el tir a dirkak lebo er tia el skuul.

17. Ngera klungiolel a Skuul er a Gilead?

¹⁷ Me ngar er ngii a klungiolel a Skuul er a Gilead? Ochoi, ngar er ngii. Ka molatk er a beluu er a Siabal. Sera August 1949, e te di mle kesai er a teruich el chad a ulemerk er a klumech er tia el beluu. Engdi ngar er a ulebongel er seikid el osisiu el rak e te mla mo er ngii a 13 el missionari el omerk er a klumech el obengterir. E chelechang e te ngar er ngii a bekord el 216,000 el omerk er a klumech er tia el beluu, e a bekord el 42% er a ildisir a mesiou el pioneer!

18. Ngera lmuut el bebil er a skuul el ngar er ngii er a cheldebecheled?

¹⁸ Ngdirrek el ngar er ngii a lmuut el bebil er a skuul el ua Skuul el Kirir a Remechuodel me a Remesiou er a Ongdibel, me a Skuul el Kirir a re Pioneer, me a Skuul el Kirir a Rumerk er a Rengedel a Dios, me a Skuul el Kirir a Rudam el Oldingel a Ongdibel me a Rebecherir, me a dirrek el Skuul el Kirir Tirke el Chelechad el Omekerreu a Obis er a Resioning er a Jehovah me a Rebecherir. Aika el skuul a mla ngosuterir a rudam me a rudos e dirrek el mla smisiich a klaumerang er tir. Me ngbleketakl el kmo a Jesus a dirk melemolem el olisechakl er a rechedal.

19. Ngmle ua ngera uldesuel a Brother Russell el kirel a berkel a klumech? E mekerang e mla tmaut tia el uldesuel?

¹⁹ A Rengedel a Dios a mla mengedereder el kuk betok er a 100 el rak. Seikid el taem el mei er chelechang e a King er kid el Jesus Kristus a omekrael er a ureor er a berkel a klumech. Me ngar er a rak er a 1916, e a Brother Russell a uluumerang el kmo tia el ungil chais a mo oberk er a beluulechad el rokir. Me ngdilu el kmo: “Tia el ureor a kmal merechedang, e mo melemolem el di meleketek e le ngkirel a ‘ebangkelio el kirel a renged’ el oberk er a beluulechad el rokir el okiu a berkel a klumech.” (Faith on the March, by A. H. Macmillan, er a 69 el llel.) Me chelecha el taem e ngmeketmeklang tia el ureor! Me kede kmal mereng a sulel a Jehovah el Dios er a budech el meskid a rokui el tekoi el dousbech el meruul a soal!

[Footnote]

[Aike el Ker er a Suobel]