Kau, Ng “Betik a Rengum er a Ngar Bitar Kau el Ua Le Betik a Rengum er Kau”?

“Bo le betik a rengum er a ngar bitar kau el ua le betik a rengum er kau.”​—MT. 22:39.

CHELITAKL: 25, 36

NGSEBECHEM EL ONGER?

Ngera me ngkired el oukerebai er a bltkil a rengul a Jehovah?

Ngua ngera klungel a ultutelel a bltikerreng er a chelsel a chebechiil?

Te mekerang a rechedal a Dios a loubltikerreng el mo er a rengar bita er tir?

1, 2. Ngmekerang a Biblia e ochotii a klungel a ultutelel a bltikerreng?

 A BLTIKERRENG a kot el ngarbab el blekerdelel a Jehovah el Dios. (1 Jn. 4:16) Ngike el kot el blebelel el Jesus Kristus, a kiliei er a eanged el betok el biliol el rak el obengkel a Demal e silubii el kmo a Jehovah a kmal betik a rengul el Dios. (Kol. 1:15) Me a Jesus a dirrek el ulechotii a osisiu el bltikerreng er a chelsel a klengar er ngii er a lengar er a eanged me a dirrek el chutem. Me ngulterekokl a rengud el kmo a Jehovah me a Jesus a mo melemolem el mengedereder el oba bltikerreng.

² A ta el chad er a loker er a Jesus el kmo ngera sel kot el ngarbab el llach, e a Jesus a dilu el kmo: “‘Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.’ Tiaikid a kot el ngarbab el llach e kot el klou a belkul. E a ongerul klou a belkul a di ua ingii, el dmu el kmo, ‘Bo le betik a rengum er a ngar bitar kau el ua le betik a rengum er kau.’”​—Mt. 22:37-39.

3. Me te rua techang a ‘ngar bitar kid’?

 ³ Me ngkmal klou a ultutelel el kired el oubltikerreng el mo er a rechad el rokui. A Jesus a dilu el kmo ngkmal kirel el mo betik a rengud er a Jehovah e dirrek el mo betik a rengud er a rengar bita er kid. Engdi te rua techang a ‘ngar bitar kid’? A lsekum ke bechiil e ngbechim a ngike el ngar bita er kau. Me a rudam me a rudos er kau er a ongdibel a dirrek el kmeed er kau. Me tirke el chad el debetik er tir sel doldingel a dirrek el ngar bita er kid. Me ngar tia el suobel e kede mo mesang a rolel e ngsebeched el oubltikerreng el mo er a rengar bita er kid.

BO LEBETIK A RENGUM ER A BECHIM

4. Ngmekerang a chebechiil e mo ungil alta e a rubekel a diak lemecherrungel?

⁴ A Jehovah a milebii a Adam me a Eva e ulemekbuch er tir. E tiang a mle kot el chebechiil el mloak. A Dios a mle soal a bo ledeu a rengrir er a chebechiielir e bo lomekeek er tia el chutem er a rengelekir. (Gen. 1:27, 28) Me nguaisei, engdi sera bo lak lolengesenges er a Jehovah e te mlo chuarm, me kid el rokui a mlo oudiukes er a klengit me a kodall. (Rom 5:12) Me nguaisei, engdi a chebechiil a sebechel el mo ungil er chelecha el taem. E le ngar er a Biblia e a Jehovah el ngike el Uchul a chebechiil a mesterir a rubekel a kot el ungil el ulekrael el kirel a bechiil el sechal me a redil.​—Monguiu er a 2 Timothy 3:16, 17.

5. Ngua ngera klungel a ultutelel a bltikerreng er a chelsel a chebechiil?

⁵ A Biblia a meketeklii el kmo a bltikerreng a klou a belkul el kirel a ungil el deleuill. E tiang a klemerang el kirel a chebechiil. A apostol el Paulus a milsaod er a bliochel el bltikerreng el kmo: “A bltikerreng a klou a rengul e bekokuii. Ng diak le mechechei, e diak le mead e le kedidai a rengul. Ng diak le debsochel, e diak le bechelechelingaol a rengul, e diak le bekongesengasech a rengul, e diak longemekl. A bltikerreng a diak loldeu er a rengul er a chebirukel el tekoi, e bai oldeu er a rengul er a mera el tekoi. Ng outekangel el diak le toched er a rokui el tekoi, e oumera rokui el tekoi, e melatk e mengiil el diak louedikel a rengul, e klou a rengul el diak le mesim er a rokui el tekoi. A bltikerreng a diak bo le ngemed.” (1 Ko. 13:4-8) Me a lsekum kede melatk a tekingel a Paulus e oltaut er a bek el sils e ngmo ungil a chebechiieled.

6, 7. (a) Ngera ngdmu Biblia el kirel a bdelul a delengchokl? (b) A bechiil el sechal ngkmal kirel el mo ua ngerang a omerellel el mo er a bechil?

⁶ A Jehovah a melilt er ngike el mo bdelul a telungalek. A Paulus a dilu el kmo: “E ngdi soak a  cho bo modenge el kmo a bderrir a re bek el chad a Kristus, e a bdelul a redil a bechil, e a bdelul a Kristus a Dios.” (1 Ko. 11:3) Engdi a Jehovah a mengerechir er a bechiil el sechal el mo betik a rengul er a bechil e ungil a omerellel el mo er ngii. E le ngii el Jehovah a ungil a blekerdelel e betik a rengul el Bdelul a Jesus, me a Jesus a oba klou el omengull el kirel a omengederederel me ngdmu el kmo: “Ng betik a renguk er a Chedam.” (Jn. 14:31) Me a Jesus a locha mo diak el uaisei a uldesuel oleko Jehovah a mekngit a omerellel el bedul ngii.

⁷ Me alta e a bechiil el sechal a bdelul a bechil, engdi a Biblia a mengelechel er ngii el mo mengull er a bechil. (1 Pe. 3:7) Me ngmekerang a bechiil el sechal a loruul er tiang? Ngkirel el melatk aike el lousbech a bechil e dirrek el mengull er a uldesuel. A Biblia a kmo: “Kemiu el sechal, moubltikerreng er a re bechemiu el di ua teletelel a Kristus er a loubltikerreng er a ikelesia me ng uldersii a klengar er ngii el kirel.” (Efe. 5:25) Nguaisei, a Jesus a tilengetengii a klengar er ngii el kirir a rultirakl er ngii. Me a lsekum a bechiil el sechal a oubltikerreng el ua Jesus e ngmo beot er a bechil el mo betik a rengul er ngii e mengull er ngii e dirrek el kongei el orrenges er ngii.​—Monguiu er a Titus 2:3-5.

BO LEBETIK A RENGUM ER A RUDAM ME A RUDOS ER KAU

8. Ngkirel el mo ua ngera uldesued el bedul a rudam me a rudos er kid?

⁸ Me chelecha el taem e te ngar er ngii a rebetok el miliol el chad el meliuekl er a beluulechad el mengull er a Jehovah. Me ngkirel el mo ua ngera uldesued el bedul a rudam me a rudos er kid? A Biblia a kmo: “Sel le bor ngii a techelled, e doruul a ungil el mor a re bek el chad, e a ngar uchei e doruul el mor tirkel bebil er kid el oumerang.” (Gal. 6:10; monguiu er a Rom 12:10.) A apostol el Petrus a milluches el kmo, a lsekum “kom oltirakl er a klemerang” e ngmo uchul a bliochel el bltikerreng er a delongeliu. Ngdirrek el dilu er a rekldemel el Kristiano el kmo: “A ngar uchei er a rokui el tekoi, e bo meral kaubltikerreng.”​—1 Pe. 1:22; 4:8.

9, 10. Ngera uchul me a rechedal a Dios a dmak el ngar er a kltarreng?

⁹ Tia el cheldebecheled a kmal ileakl el cheldebechel. E ngera uchul? E le kede olecholt er a bliochel el bltikerreng er a delongeled. E a ngaruchei, kid el rokui el betik a rengud er a Jehovah e olengesenges a llechul a uchul me ngolengeseu er kid el ousbech er sel kot el klou el klisichel, el ngii a chedaol reng er ngii. E tia el chedaol reng er ngii a ngosuir tia el klodam er kid er a beluulechad el rokir me kede melemolem el oba kltarreng.​—Monguiu er a 1 Johanes 4:20, 21.

¹⁰ A Paulus a milsaod er a klungel a ultutelel a bo dekaubltikerreng er a loluches el kmo: “Mochotii er a klengar er kemiu a klechubechub, ma blekokuiirreng, ma klengariourreng, ma delemedemekerreng, ma kllourreng. Bo lulserechakl a rengmiu, e bo mkausubes a mlo mekngit er a delongeliu, a le bor ngii a ultutakl el kirel a tar a re chad. Ng kiriu el mo kausubes, el ua ia Rubak el mla ousubes a telemelliu. E a ngar uchei, e bo mkaubltikerreng, ele bltikerreng a semesemel a rokui el tekoi el kmal mo ungil el uldak.” (Kol. 3:12-14) Me ngkmal dmeu a rengud e le “bltikerreng a semesemel a rokui el tekoi” er a delongeled alta e kede kakerous el chad el dmak!

11. Ngera olengchelel a cheldebechelel a Dios?

¹¹ Me tia el bliochel el bltikerreng me a kltarreng el lobang a remesiungel a Jehovah a ochotii el kmo te oltirakl er a mera el klechelid. A Jesus a dilu el kmo: “Cho bo mkaubltikerreng, e a rokui el chad a mo medengei el kmo kom obengkek.” (Jn. 13:34, 35) E a apostol el Johanes a milluches el kmo: “Tiakid a meketeklii a klekakerous er a re ngelekel a Dios ma re ngelekel a Diabelong: ngikel diak loruul a melemalt el tekoi ma lechub e ng diak le betik a rengul er a tar  ngii a diak le ngelekel a Dios. Tiakid sel cho mrirengesii er a uchelel el kmo ng kired el kaubltikerreng.” (1 Jn. 3:10, 11) Me a bltikerreng me a kltarreng a olengchelir a Resioning er a Jehovah e le te mera el oltirakl er a Kristus, e tir a lousbech er tir a Dios el omerk er a ungil chais el kirel a Renged el meliuekl er a beluulechad.​—Mt. 24:14.

A “KLOUL SEKED” A MECHEDELANG

12, 13. A “kloul seked” er a rechad, ngera te meruul er ngii er chelechang? E te di kmedu el mo chormii a ngera el tekoi?

¹² Me a ruumesingd el mesiungel a Jehovah er chelechang a chedal a “kloul seked.” Tirkang a ngar er a kakerous el beluu er a beluulechad e dmak el olengeseu el meruul er a ureor er a Renged. “Tirka tirkel chad el silobel er sel meringel el odechelakl. Te sililek a bilir er a rsechel a Ngelekel a Sib me ng mlo becheleleu,” e le tir el ulechotii a klaumerang er tir er a olubet el tengetengel a Jesus. Me tirka el chedal a “kloul seked” a betik a rengrir er a Jehovah me a Ngelekel, e mengull er a Jehovah er a “llomes ma klebesei.”​—Och. 7:9, 14, 15.

¹³ Ngdi kmedung e a Jehovah a mo okngemedii tia el mekngit el blekeradel er a beluulechad el okiu a “kloul ringel.” (Mt. 24:21, BT; monguiu er a Jeremia 25:32, 33.) Engdi ngmo omekerreu e omekrael er a remesiungel el mo soiseb er a beches el beluulechad, e le ngkmal betik a rengul er tir. Me ngua telbilel el ledillii er a bekord el 2,000 el rak er a uchei el kmo: “Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.” Me kau, ke semeriar el omes el beduluchei el mo kiei er a Baradis er a uriul er a bo lak a chelebirukel me a ringel me a kodall?​—Och. 21:4.

14. Ngmla mo ua ngera klungel a kloul seked?

¹⁴ Sera lomuchel a uriul el sils er a rak er a 1914, e te di mle kesai el telael el mesiungel a Dios el ngar er a chutem. Me ngokiu a bltkil a rengrir el mo er a rechad me a ngelsuil a chedaol reng er a Dios, e tirka el kesai el ngellitel el rudam me a rudos a mle blak a rengrir el omerk er a klumech er a Renged alta e te chillebangel a meringel el blekeradel. Me ngera mlo rsel? A klou el ildois er a rechad el mlo oba omelatk el mo kiei er tia el chutem el mo cherechar a mlechudel. Me chelechang e te ngar er ngii a bekord el 8,000,000 el Sioning el ngar er a betok er a 115,400 el ongdibel el meliuekl er a beluulechad, e tia el ildois a di meleketek. El ua tiang, te betok er a 275,500 el beches el Sioning a miltecholb er sera rak er a 2014. Me ngua dedu el kmo te ngar er ngii a 5,300 el chad el mo metecholb er a bek el sandei.

15. Ngoeak a ngera el rolel e a rebetok a rongesii a ungil chais er chelechang?

¹⁵ Me ngkmal mengasireng el tekoi sel domes er a klou el ildois er a rechad el orrenges er a ungil chais el kirel a Renged. Me chelechang e ngar er ngii a babilenged el motobed el ngar er a kuk betok er a 700 el bedengel a omelekoi. E a Ongkerongel a kot el klou a omerusel el babier er a beluulechad el rokir. Me a bek el buil e ngmotobed el kuk betok er a 52,000,000 el ngar er a 247 el bedengel a omelekoi. Me sel babier el dousbech er ngii el mesuub el obengterir a rechad el Ngerang Mera el Lolisechakl a Biblia? a mla moiuid el ngar er a kuk betok er a 250 el omelekoi. Me chelechang e tia el babier a mla motobed el kuk betok er a 200,000,000.

16. Ngera uchul me a cheldebechelel a Jehovah a di meleketek?

¹⁶ Me a cheldebecheled a di meleketek e le kid el oumerang er a Dios e kongei el kmo a Biblia a mlukrael el Tekingel. (1 Th. 2:13) Me a deuil a rengud er a betok el klengeltengat er a Jehovah a melemolem alta e kede chelebangel er a klauketui me a odelecheklel a Satan.​—2 Ko. 4:4.

 DI BLECHOEL EL OUBLTIKERRENG EL MO ER A RECHAD

17, 18. A Jehovah ngmengerechir er kid el mo ua ngera uldesued el bedul tirke el diak longull er ngii?

¹⁷ A rechad a kongei er tia el klumech el domerk er ngii el okiu a kakerous el rolel. A rebebil a kongei el orrenges er kid e a rebebil a kuk chetirir. Me a Jehovah, ngmengerechir er kid el mo ua ngera uldesued el bedul tirke el diak longull er ngii? A uldesuir a rechad el kirel a klumech el domerk er ngii a diak el kirel el rullid me bo lak doltirakl er a uleklatk er a Biblia el kmo: “Ma tekoi el tuobed er a ngeriu bo lungil a delecherul e lomeksemeriar a reng, e bo mungil el medenge el kmo ng kirel el ua ngera cho monger er a re bek el chad.” (Kol. 4:6) Me a lsekum e ngmo kired el mesebechakl er a klaumerang er kid e ngsoad el meruul er ngii “el oba delemedemekerreng ma omengull,” e le ngbetik a rengud er a rengar bita er kid.​—1 Pe. 3:15, 16.

¹⁸ Ngkired el oubltikerreng el mo er a rengar bita er kid e oukerebai er a Jesus el mo lmuut er a taem el rechad a mo kesib a rengrir e oltngakl er a klumech el domerk er ngii. A Jesus er “ser a le motuub e ng dimlak lolaitechei el oltuub; me ser a bo lecharm, me ng dimlak lorrouk.” Ngbai millemolem el ultuil a klaumerang er ngii er a Jehovah. (1 Pe. 2:23) Me ngkired el bek el taem el dolecholt er a klengariourreng e oltaut er a uleklatk el kmo: “Lak momtechei a mekngit el oba mekngit el ka momtechei a mekngit el omelekoi el oba mekngit el omelekoi; bai momekngeltengat.”​—1 Pe. 3:8, 9.

19. Ngkirel el mo ua ngerang a blekerdeled el bedul a recherroued?

¹⁹ A klengariourreng er kid a uchul me ngmo sebeched el olengesenges er a klou a ultutelel el omellach el lebilskid a Jesus. Ngmilsaod er ngii el kmo: “Kom mla rongesii sel meldu el kmo, ‘Moubltikerreng el mor a re sechelimiu, e mouketui er a re cherrouiu.’ Ngdi chelechang e ak dmu er kemiu el kmo, bo le betik a rengmiu er a re cherrouiu e moluluuch el kirir a ruldechelakl er kemiu, me bo mngelekel a Demmiu el ngar a eanged. Ele ng meruul er a sils er ngii me ng dmiich el mor a re chad el di osisiu a re mekngit ma re ungil, e oltengel er a chull el mor a re meruul a ungil ma re meruul a mekngit.” (Mt. 5:43-45) Me kid el mesiungel a Dios a kmal kired el mo betik a rengud er a recherroued alta e ngkmal mekngit a omerellir el bedul kid.

20. Kede mekerang e medengei el kmo a bltikerreng el mo er a Dios me a rengar bita er kid a mo mekekii tia el chutem? (Momes er a siasing er a uchelel a suobel.)

²⁰ Me ngkmal kirel el bek el taem el doubltikerreng el mo er a Jehovah me a rengar bita er kid. Ngmo lmuut er tirke el chad el chetirir kid me tia el klumech el domerk er ngii me ngkired el ngosuterir sel lousbech a ngeso. A apostol el Paulus a milluches el kmo: “Kele bo belsel a ngii di le chad; a di tal kiriu el blals er ngii a klaubltikerreng. Ele ngikel betik a rengul er a tar a re chad a mla churrengelii otireklel a Llach. Ele ikel llach el kmo, ‘Lak bo lemelaok a rengum; lak bo momekoad; lak bo morechorech; lak bo mngibes,’ a ikal rokui, ma lmuut el bebil a di mo modekdak er sel tal llach el kmo, ‘Bo le betik a rengum er a chad el ngar bitar kau.’ A chad el oubltikerreng a diak le rellii a mekngit el mor a chad el ngar bitar ngii; misei ia uchul ma bltikerreng a cherrengelel otireklel a Llach.” (Rom 13:8-10) Me ngar er a chelsel tia el klou a klekakeakl me a uldikel er ngii el beluulechad el longedereder er ngii a Satan, e a remesiungel a Dios a olecholt er a mera el bltikerreng el mo er a rengar bita er tir. (1 Jn. 5:19) Me sel taem el Jehovah a mo okngemedii a Satan me a rechanghel er ngii me tia el mekngit el blekeradel er a beluulechad, e tia el chutem a mo mui er a bltikerreng. Me ngmera el mo klou a klengeltengat er sel taem el rokui el chad el ngar tia el chutem a mo betik a rengrir er a Jehovah me a rengar bita er tir!

[Aike el Ker er a Suobel]