OMESODEL A SUOBEL ER A MEDAL TIA EL BABIER | NGSEBECHEM EL MO UNGIL EL MEDENGELII A BIBLIA

A Babier el Sebeched el Mo Ungil el Medengelii

Ngbleketakl el kmo, a Biblia a babier er a kmal irechar. Ngmilluches er oingerang? A omelechesel a ulemuchel er a bekord el 3,500 el rak er a mla me mong el ngar er aike el beluu er a Middle East. E tiang a mle sel taem el longedereder er a beluu er a Sina a Shang dynasty, e mle bekord el 1,000 el rak er a uchei er a lomuchel a klechelid er a Buddha er a beluu er a India.​—Momes er a baks el “ A Omesodel a Biblia.”

Engdi a lsekum a babier a di mesaod a tekoi el diak el sebechir a rechad el mo medengei, e ngdiak el sebechel el ngosuterir. Me a Biblia a diak leuaisei, ngbai meskid a nger er a meklou a ultutelel el ker el kirel a klengar.

Ngmla ta el molatk el kmo, ‘Ngera me kede ngar tiang?’ A rechad a mla mo betok el telael el rak el lolatk er tia el ker, e dirkak bo lodengelii a nger er ngii. Engdi ngar er aike el kot el eru el bliongel er a Biblia er a babier er a Genesis, e ngsebeched el metik er a nger er tia el ker. Ngar er aika el bliongel e ngmesaod el kirel a uchelel a rokui el tekoi, el ngii sel taem el leblo er ngii a btuch me a sils me a beluulechad. (Genesis 1:1) E sola e ngmo mesaod er a rolel e ngmlo er ngii a eolt, me a dellomel, me a klengar er a beluulechad, me a omebelir a rechad, me a dirrek el moktek er aika el tekoi.

NGBEOT EL DOMTAB ER NGII

A Biblia a ngar er ngii a ulekrael er a chelsel el ngosukid el sumechokl a mondai er kid er a bek el sils. E ngii el ulekrael a beot er kid el omtab. Me bo dosaod a eru el uchul me nguaisei.

A kot, a Biblia a ousbech a beot e bleketakl e ungil el tekoi. Ngdiak lousbech a betok el meringel me a lechub e ngberrotel el tekoi, e ngbai ousbech a tekoi el sebeched el mo medengei a belkul. Ngdirrek el ousbech a tekoi er a bek el sils el ngosukid el mo omtab a dmolech el tekoi.

El ua tiang, a Jesus a mle blechoel el ousbech a okesiu el ultuil er aike el loruul a rechad er a bek el sils, me a osisecheklel a mle sebechel el medalem er a rengrir a rechad. A betok er aika el okesiu a debetik er a chelsel a Cheldecheduch el Ngar er a Rois, el llechukl er a 5 el mo er a 7 el bliongel er a babier er a Mateus. A ta er a chad er a omeluches a milsaod er ngii el kmo, ng “cheldecheduch el mera el ngosukid.” Ngdirrek el dilu el kmo, “ngdiak lomekeek a uldesued er a betok el tekoi, e ngbai meskid a ulekrael el dousbech er a klengar er kid.” Ngsebechem el menguiu aika el bliongel er a chelsel  a di 15 el mo er a 20 el bung, e mo mechas a rengum sel bo modengei el kmo ngbeot e kmal mesisiich a tekingel a Jesus.

Me a ongerung, e ngbeot el domtab er a Biblia e le ngmesaod el kirel a mera el tekoi, el diak el cheldecheduch el chelid. Me sel The World Book Encyclopedia a ouchais el kmo, ngmesaod “el kirir a rengarbab me a rengariou el chad” me a “mondai er tir, me a urungulir, me a cheleuid el leriruul me a dirrek el ungil el tekoi el leriruul.” Me ngbeot er kid el mo medengei aika el cheldecheduch el kirir tirka el chad me a tekoi el dilubech e ngmai a klubeled er ngii.​—Rom 15:4.

NGMO ER A ROKUI EL CHAD

A lsekum ngsoam el menguiu a babier, e ngkirem el menguiu er ngii el ngar er a omelekingem. Me chelechang e nglocha sebechem el menguiu er a Biblia el ngar er a omelekoi el modengelii, el diak lultuil er a kmo ke chad er ker el beluu. Ngmilekerang e mo uaisei?

A Oidel a Biblia. A Biblia a ulemuchel el meluches el tekoi er a Hebru me a Aramaic me a Grik. Me te di mle mekesai el chad a mle sebechir el menguiu er ngii. Tiaikid a uchul me a remelemalt a rengrir el chad a mle blak a rengrir el loliuid er ngii el mo er a bebil el omelekoi. Me kede mereng a sulir er a meringel el urerir el uchul me ngmla mo er ngii a cherrungel me a lechub e ngdertelkib el oidel a Biblia el ngar er a bekord el 2,700 el omelekoi. Me ngbetok er a 90% er a rechad a sebechir el menguiu er ngii el ngar er a omelekingir.

A Otebedel a Biblia. A Biblia a ulemuchel el meluches el ousbech a mechitechut el babier el ua leather me a papyrus. Me ngmle kirir el kerekikl el meluches a copy er aika el babier me bo el sebechel el melemolem el ngar er ngii. E aika el copy er ngii a mle meringel a cheral me te di mle mekesai a sebechir el omechar. Engdi a bekord el 550 el rak er a mla me mong e a Gutenberg a rirellii a printing press er ngii, el uchul me ngmle sebechel a betok el Biblia el motobed. Me chelechang e ngar er ngii er a uldasu el kmo, ngbetok er a 5 el biliol el cherrungel me a lechub e ngdertelkib el oidel a Biblia a mla motobed.

Me ngdiak a ngii di el babier el sebechel el mo mekesiur a Biblia, el kmal sebeched el mo ungil el medengelii. Me nguaisei, engdi a lebebil er a taem e kede ousbech a ngeso el mo medengei a tekoi el losaod er ngii. Me ngsebechem el metik a ngeso er ker? E ke mekerang e mo ngmai a klungiolem er ngii? A ongingil el suobel a mo onger aika el ker.

[Blurb el ngar er a 5 el llel]

A Biblia a meskid a ungil el nger er a betok el meklou a ultutelel el ker el kirel a klengar

[Baks el ngar er a 5 el llel]

 A Omesodel a Biblia

• Ngar er ngii a 66 el babier el ngar er a chelsel.

• Aika uldimukl er a reksi me a llach me a ulaoch me a osisechakl me a chelitakl me a dirrek el tengami er a rechad.

• A omelechesel a ulemuchel er a rak er a 1513 er a uchei er a Kristus e mlo merek er a rak er a 98, e tiang a kuk betok er a 1,600 el rak.

• Ngokiu a ulekrael er a Dios e a rebekord el 40 el chad a milluches er tia el Biblia.

[Baks el ngar er a 4 el llel]

A lsoam a lmuut el omesodel a uchelel a klengar, e momes er a babier el Was Life Created? el mirruul er a Resioning er a Jehovah. Ngdirrek el ngar er ngii er a www.pr418.com.

[Baks el ngar er a 5 el llel]

A lsoam el mesuub a lmuut el betok el kirel a Biblia e momes er a babier el The Bible​—What Is Its Message? el mirruul er a Resioning er a Jehovah. Ngdirrek el ngar er ngii er a www.pr418.com.