A Cheldechedecham Bo Luchul a Omelisiich

“A tekingek . . . bo le betechii a rengum, RUBAK el cheuotelek!”​—PSA. 19:14.

CHELITAKL: 21, 35

NGMEKERANG A KEREBIL A JESUS E NGOSUKID EL MO . . .

medengelii a ungil el taem el dongedecheduch?

ungil el melilt a tekoi el dolekoi?

ungil a delecherul a cheldechedechad?

1, 2. Ngera me a Biblia a omekesiu er a churad el mo er a ngau?

 NGAR er a rak er a 1871, e a klou el seseb a mlo er ngii er a chereomel er a beluu er a Wisconsin el di sileseb a bekord el 2 el biliol el kerrekar e mekodeterir a rebetok er a 1,200 el chad. Tiang a milekodeterir a rebetok er a ngii di el seseb el mla ngar er ngii er a beluu er a Merikel. E a omelekoi a kmo nglocha ike el mekerkard el mo er ngii er a ochil a train sel lorael. Me tiang a kora mekltkid er a bades er a babier er a Jakobus el kmo: “Ka momdasu er a ngau el di kekerei e sosebii a klou el oreomel.” (Jak. 3:5) Ngera uchul me ngmillekoi el uaisei?

² Ngmesaod el kmo: “A chur a di ua ia ngau.” (Jak. 3:6) A belkul a tekoi el “chur” a mesaod er tia el duch er kid el mengedecheduch. E le tekoi el dedung a di ua ngau el sebechel el mo uchul a klou el tellemall. A Biblia a ochotii el kmo a tekinged a kmal klou a lerellii, e le ngsebechel el mo uchul a klengar me a lechub e ngkodellel a chad. (Osi. 18:21) Me tiang belkul a kmo ngkmal kired el di lmuk e le kede mo el dmu diak el kired el dmung? Ngdiak leuaisei, kid a ousbech er a ngau el meruul a keled e mengeald er kid e omekllomes er kid, me ngdiak bo lak dousbech er ngii e le kid el  di melatk el kmo kede mo medul. Me ngdi osisiu, a lsekum kede kerekikl a cheldechedechad, e ngsebeched el ousbech er tia el duch er kid el mo kobkellii a Jehovah e dirrek el mo uchul a klungiolir a rechad.​—Psa. 19:14.

3. Ngera edei el tekoi el ngosukid el melisiich er a rechad sel dongedecheduch?

³ A Jehovah a milskid a duch er kid el sebeched el ouchais a uldesued el okiu sel dongedecheduch me a lechub e kede omchim. Me ngmekerang a dousbech er tia el duch er kid el melisiich er a rebebil? (Monguiu er a Jakobus 3:9, 10.) Ngkired el mo medengei el kmo ngoingerang a ungil el taem el kungedecheduch e ngera bo kdung, e mekerang a kungedecheduch.

NGOINGERANG A UNGIL EL TAEM EL DONGEDECHEDUCH?

4. Ngoingerang a ungil el taem el di deluk?

⁴ Ngar er ngii a taem el lungil a di deluk, e a Biblia a dmu el kmo, ngar er ngii a “belsechel el di deluk.” (Oli. 3:7) El ua tiang, ngolechotel a omengull sel longedecheduch a chad e di deluk. (Job 6:24) Ngdirrek el diak lungil a dosaod a berrotel el tekoi el diak el kirir a rechad el mo medengei. (Osi. 20:19) Me sel taem el chad a ongesechii a rengud e ngungil a di dechelellakl e di deluk.​—Psa. 4:4.

5. Kede mekerang e ochotii a omereng el saul er kid er a Jehovah el milskid tia el duch er kid el mengedecheduch?

⁵ Engdi ngar er ngii a taem el kired el mengedecheduch. (Oli. 3:7) Ngtaem el doldanges er a Jehovah e dirrek el melisiich er a rebebil me a lechub e kede ouchais a uldesued e dirrek el olengit a ngeso er a rebebil. (Psa. 51:15) E sel doruul el uaisei e kede ochotii el mo er a Jehovah el kmo kede mereng a sulel el milskid tia el ileakl el sengk er a omengedecheduch. El di ua sel lebeskid a sengk a sechelid e ngsoad el mo ungil el ousbech er ngii.

6. Ngera me ngklou a ultutelel el kired el melilt er a ungil el taem el dongedecheduch?

⁶ Ngera me ngklou a ultutelel el kired el melilt er a ungil el taem el dongedecheduch? A Osisechakl 25:11 a kmo: “A ngesou er a ungil uldasu el medung er sel kirel belsechel a ua kolt el ringngo el ngar a klebokel belatong el silber.” A kolt el ringngo a kmal klebokel, engdi sel denguu el okedii er a klalo el rruul er a silber e nglmuut el mo klebokel. Me ngdi osisiu, nglocha ngar er ngii a ungil el tekoi el soad el dmu er a chad, engdi kede osiik er a ungil el taem e mo dmung, me bo el sebeched el ngosuir ngii el chad. Me ngmekerang a doruul er tiang?

7, 8. Te milekerang a rudam er a Siabal e oukerebai er a Jesus?

⁷ A rechad a sebechir el mo rrau a rengrir me a lechub e ngdiak lekengei a tekoi el dedung er a diak lungil el taem. (Monguiu er a Osisechakl 15:23.) El ua tiang, ngar er a March 2011 e a klou el desiu me a tsunami a tilemall a betok el mats er a beluu er a Siabal, me te kuk betok er a 15,000 el chad a mlad. Me alta e a rebetok el Sioning er a Jehovah a urrideterir a rechederir me a resechelirir, engdi te milengoit a temir el ousbech er a Biblia el olengeseu er a rechad el chilarm a osisiu el mondai. Tirka el Sioning a mle medengei el kmo a rebetok el chad a mle Buddhist me ngdimlak a klemedengei er tir er a Biblia. Me ngdimlak losaod er a taem er a okiis el mo er tir e bai milengelaod er tir e milsaod er a uchul me a mekngit el tekoi a duubech el mo er a rungil el chad.

⁸ Tirka el odam a uluukerebai er a Jesus. Ngmle medengelii a ungil el taem el di lluk, engdi ngdirrek el mle medengelii a taem el kirel el mengedecheduch. (Jn. 18:33-37; 19:8-11) Ngmilengiil er a ungil el taem el bo lolisechakl er a redisaiplo er ngii a bebil el tekoi.  (Jn. 16:12) Me a rudam er a Siabal a dirrek el milengiil er a ungil el taem el bo louchais er a rechad el kirel a okiis. Me a bekord el eru el rak er a uriul er a lebo er ngii a tsunami, e te mlo merous er a tract el Ngmera el Sebechir a Rulekoad el Lmuut el Me Ngar? Me a rebetok a ngiluu tia el babier e mlo mechelaod er a longuiu er ngii. Kid me ngdirrek el kired el melatk a siukang me a klaumerang er a rechad el dongedecheduch er tir me bo el sebeched el medengelii a ungil el taem el dongedecheduch er tir.

9. Ngar er a chelsel a ngera el blekeradel e ngdirrek el kired el mengiil er a ungil el taem el bo dongedecheduch?

⁹ Ngar er a chelsel a ngera el blekeradel e ngdirrek el kired el mengiil er a ungil el taem el bo dongedecheduch? A lsekum a chad a dulii a tekoi el melibas er kid, e ngungil a lak demereched el mengedecheduch el dmu tekoi el diak lungil. Ngbai kired el mo chelellakl e omdasu kmo: ‘Ngika ngmle durengul el melibas er ngak? Me ngak, ngkmal kirek el mo mesaod a tekoi el ledilung?’ Nglocha bai ungil el di deluk. Engdi a lsekum ngkired el mo mengedecheduch er ngii, e ngungil a dongiil el mo er sel taem el bo lechelellakl a rengud. (Monguiu er a Osisechakl 15:28.) Me kid el soad el melisiich er a rechedad el diak el Sioning el mo medengelii a Jehovah a uchul me ngkmal kirel el mo klou a rengud, e kerekikl el omdasu er a uchei er a dongedecheduch, e dirrek el osiik aike el techall el dodengei el kmo ngsebechir el kongei el rongesid.

NGERA KEDE MO DMUNG?

10. (a) Ngera me ngkired el kerekikl a cheldechedechad? (b) Ngera el tekoi a kired el kerekikl me ngdiak dolekoi?

¹⁰ A tekoi el dedung a sebechel el melisiich me a lechub e ngmengitechut er a rechad. (Monguiu er a Osisechakl 12:18.) A rebetok el chad er tia el beluulechad er a Satan a ousbech a ‘mekngit el tekoi’ el ua “kelel a balech” me a lechub e ng “saider” el melemall e olengasech a rengrir a rebebil. (Psa. 64:3) A rebetok er tir a mesuub el mengedecheduch el uaisei el okiu aike el mubi me a show er a TV el lomes. Engdi a Rekristiano a diak el kirir el meringel a tekingir me a lechub e lolekoi a mekngit. E dirrek el diak el kirir el remuul a mekngit el tekingir el mo ua loltobedechur. A oltobedechur el tekoi a diak a kngtil e le ngrullii a cheldecheduch el mo ungil, engdi ngkmal diak el kired el ousbech el kora olturk a tekingel a chad el ua derellii el mo merur me a lechub e doltuub er a tang el di melasem el meruul er a rebebil me te ocherchur. A Biblia a mengelechel er a Rekristiano el kmo: “Lak mousbech a ikel melemall el tekoi, e di molekoi a ikel ngar ngii a le rellii, el ikel ngosuir a chad e ngar ngii a belkul, me bo le sebechel a ikel molekoi el mor ngii a le rellii er tirkel rongesemiu.”​—Efe. 4:29, 31.

11. Kede mekerang e mo ungil el melilt a tekoi el dolekoi?

¹¹ A Jesus a ullisechakl el kmo: “A ikel omichoech er a reng a me tuobed er a ngor.” (Mt. 12:34) Tiang a belkul a kmo a tekinged a ochotii a uldesued. Me a lsekum ngbetik a rengud e omekerreu er a rechad, e kede mo kerekikl a cheldechedechad sel dongedecheduch er tir. Me ngkirel a tekinged el mo ungil e dirrek el melisiich.

12. Kede mekerang e lmuut el mo ungil el melilt a tekoi el dolekoi?

¹² Ngmo sebeched el dmung a ungil el tekoi sel dekerekikl el melatk er a uchei er a dongedecheduch. Alta e a King el Salomon a mle mellomes a rengul, engdi ng “millasem el osiik a ungil er orenges el tekoi” e “meral tirriter a klemerang er ngii.” (Oli. 12:9, 10) Me kede mekerang e mo ungil el mengedecheduch? Ngsebeched el menguiu er a Biblia me aike el babilenged  e mesuub a ungil el rolel e kede mo ungil el mengedecheduch. Ngdirrek el ungil a dosuub el mo medengei a belkul a tekoi el diak dodengei. Ngdirrek el sebeched el mesuub er a rolel a longedecheduch a Jesus el mlo uchul e ngilsuterir a rebebil. Ngmle ungil el medengei a tekoi el lolekoi e le Jehovah a ulsisecheklii el mo sebechel el “melisiich er a re mechitechut.” (Isa. 50:4) Me lak dobes el kmo a tekinged a ngar er ngii a lerellii er a rechad. (Jak. 1:19) Me ngungil a dolatk el kmo: ‘Ngsebechel a chad el mo medengelii a belkul a tekoi el kusaod er ngii? Ngmo ua ngera uldesuel?’

13. Ngera me ngkirel el bleketakl e ungil a cheldechedechad?

¹³ A rechad er a Israel a uluusbech a trombetang el mesubed er a rechad er aike el mo er ngii el tekoi. A ta er a bedengel a debusech a mesubed er a rechad me te mo kldibel. E a kuk tang a belkul a kmo ngkirir el oumekemad. Me ka di molatk aike el mo duubech oleko ngdimlak lebleketakl a debusech el mlo er ngii! A Biblia a dirrek el omekesiu er a bleketakl el debsechel a debusech el mo er a bleketakl el cheldechedechad. A lsekum ngdiak dungil el meketakl a tekoi, e a rechad a mo rrau a rengrir me a lechub e te mo oumerang a klsuul el tekoi. Me ngsoad el meketeklii a uldesued, engdi ngkired el kerekikl me lak dedu mekngit el mo er a chad me a lechub e derellii el mo omdasu el kmo ngdiak dolengmes er ngii.​—Monguiu er a 1 Korinth 14:8, 9.

14. Ngera el tekoi a ochotii el kmo a Jesus a mle beot e bleketakl a cheldechedechal?

¹⁴ A Jesus a ulechotii a ungil el kerebai el mle kerekikl a longedecheduch. Ngar er a cheldechedechal el llechukl er a 5 el mo er a 7 el bliongel er a Mateus, e ngdimlak lolasem el di mengas a rengrir a rechad el ousbech a dmolech el tekoi. Ngdirrek el dimlak di lolekoi a tekoi el melemall a rengrir. Ngbai ullisechakl er tir er a meklou a ultutelel el tekoi el ousbech a beot e bleketakl el cheldecheduch. El ua tiang, ngmle soal el oterekokl a rengrir a redisaiplo er ngii me bo lak lsebek a rengrir el kirel a kelir er a bek el sils. Me ngmilsaod er a rolel er a Jehovah a lomekang a suebek el charm, e a uriul e nguleker er tir el kmo: “Kemiu ng diak mkuk ngarbab er a suebek el charm?” (Mt. 6:26) Me ngoeak a beot el cheldechedechal, e ngilsuterir me te ngiluu a klubelir er tia el tekoi e liluut el mo mesisiich a klaumerang er tir.

NGUA NGERA ROLEL A DONGEDECHEDUCH ER A RECHAD?

15. Ngera uchul me ngkirel el ungil a delecherul a cheldechedechad?

¹⁵ Sel rolel a dongedecheduch er a rechad a dirrek el kmal klou a ultutelel. A rechad a mle ungil a rengrir el orrenges er a Jesus, e le ngmle medemedemek e ungil a rolel a longedecheduch. (Lk. 4:22) Me sel lungil a rolel a dongedecheduch e a rechad a mo sorir el orrenges er kid e dirrek el mo kongei a tekoi el dolekoi. (Osi. 25:15) Ngmo sebeched el ungil el mengedecheduch er a rechad a lsekum kede oba omengull el bedul tir e kerekikl me lak detemall a rengrir. E tiaikid a lurruul er ngii a Jesus. El ua tiang, sera lesa seked el kmal mle blak a rengrir el oltirakl er ngii e le ngmle sorir el orrenges er ngii, e ngkmal mlo chubteterir me ngmilengoit a taem el obengterir e olisechakl er tir. (Mk. 6:34) Ngmo lmuut er a taem el rechad a uleltuub er ngii e ngdimlak lolaitechei a mekngit el omerellir.​—1 Pe. 2:23.

16, 17. (a) Kede mekerang e oukerebai er a Jesus sel dongedecheduch er a rechedad me a resechelid? (Momes er a siasing er a uchelel a suobel.) (b) Ngera mlo klungiolel a ungil el cheldechedechal a ta el chedil?

¹⁶ Me alta ngkmal betik a rengud er a rechedad me a resechelid, engdi kede locha mo mekngit a ngered sel dongedecheduch er tir e le  kid el ungil el medengelterir. Kede locha omdasu el kmo ngdiak a belkul a desal kerekikl a tekoi el dolekoi el mo er tir. Engdi a Jesus a dimlak a ta el bo lemekngit el mengedecheduch er a resechelil. Sel taem er a lekaititekangel er a kmo ngtecha er tir a kot el ngarbab, e ngmle ungil a tekingel el mesmechokl er tir el ousbech er a kerebil a kekerei el buik. (Mk. 9:33-37) Me a remechuodel er a ongdibel a kirir el oukerebai er a Jesus er a taem el lollach er a rebebil.​—Gal. 6:1.

¹⁷ Ngkmal klou a ultutelel a dungil el mengedecheduch er a rechad, el mo lmuut er a taem el longesechii a rengud. (Osi. 15:1) El ua tiang, a ta el mesobil el chedil a mla er ngii a ngeasek el ngelekel el sechal el mle mekngit a omerellel e melasem el leko ngmesiou er a Jehovah. Me a ta er a odos a dimlak el kerekikl a tekingel e dilu er ngii el chedil el kmo: “Ke mera el chebuul, e le ngdimlak mungil el oungalek er a ngelekem.” Me ngika el chedil a di mlo chelellakl el telkib e dmu el kmo: “Alta ngdiak lungil a omerellel er chelechang, engdi ak dirk olisechakl er ngii. Sel bo lemerek a Armakedon e kede lmuut el mo chadecheduch.” Me a ungil el tekingel el mo er ngika el odos a uchul me te millemolem el kausechelei. Me a lmuut el tang, a ngelekel ngika el chedil a rirengesterir el chadecheduch e mlo medengei el kmo a delal a dirk oumera er ngii. Me ngmlo diak lobengterir a remekngit el sechelil, e bai mlo metecholb e a uriul e ngmlo mesiou el ngar er a Bethel. Me ngkmal kired el ungil el mengedecheduch er a bek el taem el dongedecheduch er a rudam er kid me a rechedad me a dirrek el rengodech el chad.​—Kol. 4:6.

18. Kede mekerang e oukerebai er a rolel a longedecheduch a Jesus?

¹⁸ Me tia el duch er kid el sebeched el mengedecheduch a mera el ungil el sengk er a Jehovah el me er kid. Me bo doukerebai er a Jesus el ngiltii a ungil el taem el dongedecheduch, e dekerekikl a tekoi el dolekoi me a rolel a dongedecheduch. Me a tekinged bo luchul a omelisiich el mo er a rebebil e bo lodeuir a rengul a Jehovah.

[Aike el Ker er a Suobel]

[Baks el ngar er a 22 el llel]

A CHELDECHEDECHAM BO LUCHUL A OMELISIICH

NGOINGERANG: Mngiltii a ungil el taem el mongedecheduch

NGERANG: Mkerekikl a tekoi el molekoi

NGMEKERANG: Bo lungil a delecherul a cheldechedecham