A Kot el Ungil el Oidel a Tekingel a Dios

“A tekingel a Dios a di ngar.”​—HEB. 4:12.

CHELITAKL: 37, 43

NGMEKERANG A OMONGER?

Ngera me ngkirel a ngklel a Dios el ngar er a Biblia?

Ngera uchul me ngtilobed a beches el oidel a New World Translation?

Ngera el klungiaol a bla lengai tirke el menguiu er tia el Biblia?

1. (a) A Dios, ngmilsa a Adam a ngera el ngerachel? (b) A rechedal a Dios, te mekerang a lousbech er a sengk el mo sebechir el mengedecheduch?

 A JEHOVAH EL DIOS a mla mesterir a rechad a sengk el ngii a duch er tir el sebechir el mengedecheduch. Ngar er a sers er a Eden e ngmilsa ngerechelel a Adam el mo omngakl a rokui el charm, me a Adam a millibech a ngklel a derta el charm el ngar er ngii a belkul. (Gen. 2:19, 20) Me seikid el taem el me er chelechang e a rechad a ousbech er tia el sengk el mo mengebkall er a Jehovah e ouchais er a rechad el kirel ngii el Dios. Me ngar er aika el mereko el rak e a rechedal a Dios a mla ousbech er tia el duch er tir el oliuid er a Biblia me bo el sebechir a relmuut el betok el mesuub el kirel ngii el Jehovah.

2. (a) Ngera el ulekrael a kirir tirke el chedal a New World Bible Translation Committee el oltirakl? (b) Ngera kede mo mesuub er tia el suobel?

² Ngar er ngii a betok el telael el oidel a Biblia, e a bebil er ngii a melemalt e a bebil a diak. Me a New World Bible Translation Committee a tilbir el mo oltirakl a edei el ulekrael, el (1) Ngmo mengebkall er a ngklel a Dios e ousbech er ngii el ngar er a Tekingel el di ua ildisel er a lekot el meluches a Biblia. (Monguiu er a Mateus 6:9.) (2) Ngkirel el moiuid el di oltirakl aike el tekoi el medung, e a  lsekum ngdiak el sebechel, e ngmoiuid a melemalt el belkul. (3) Ngousbech a beot el tekoi me ngbeot er a rechad el menguiu e mo medengei a belkul. * (Monguiu er a Nehemia 8:8, 12.) Me aika el edei el ulekrael a luleltirakl tirke el uliuid er a New World Translation el Biblia el ngar er a kuk betok er a 130 el omelekoi. Me ngar tia el suobel e kede mo suubii a rolel e a beches el New World Translation el tilobed er a rak er a 2013 a mileketmokl el oltirakl aika el ulekrael, me a rolel e ngmoiuid el mo er a bebil el bedengel a omelekoi.

A BIBLIA EL MENGEBKALL ER A NGKLEL A DIOS

3, 4. (a) Kede metik er a Tetragrammaton er ker? (b) Ngera te meruul er ngii a rebetok el oliuid er a Biblia?

³ A ngklel a Dios a lulluches er ngii el ousbech a kleuang el llechukl er a Hebru el okedongall el Tetragrammaton. Me ngsebeched el metik aika el llechukl er a chelsel a betok el manuscript el uaike el Dead Sea Scrolls. Ngdirrek el sebeched el metik er a chelsel a bebil el copy er a Greek Septuagint, el mirruul er a bekord el 200 el rak er a uchei er a Kristus el mo lmuut er a bekord el 100 el rak er a uriul er a Kristus. Me a rebetok el chad a kmal mechas a rengrir sel lesa ngklel a Dios el llechukl el betok el taem er a chelsel aike el manuscript er a irechar.

⁴ Me ngbleketakl el kmo a ngklel a Dios a kirel el ngar er a chelsel a Biblia. Me nguaisei, engdi a betok el oidel a Biblia a diak lousbech er ngii el ngakl. El ua tiang, eru el rak er a uriul er a letobed a New World Translation of the Christian Greek Scriptures, e a beches el oidel a American Standard Version a dirrek el tilobed. Sel oidel tia el Biblia er a rak er a 1901 a uluusbech er a ngklel a Dios, engdi sel oidel er a rak er a 1952 a dimlak. E ngera uchul? Tirke el uleiuid er ngii a ulemdasu el kmo “ngkmal mekull” a dousbech er a ngklel a Dios. Me a betok el oidel a Biblia el ngar er a tekoi er a Merikel me a lmuut el bebil el omelekoi a dirrek el diak lousbech er tia el ngakl.

5. Ngera me ngkmal kirel a ngklel a Dios el ngar er a chelsel a Biblia?

⁵ Me a ngklel a Dios, ngklou a ultutelel el kirel el ngar er a Biblia me a lechub e ngdiak? Ngkmal klou a ultutelel, e le Jehovah a ngike el Milluches er a Biblia e soal a rechad a bo lodengelii a ngklel. Me a rungil el oliuid a kirir el medengei el kmo ngera soal ngike el oubabier er tia el babier a loruul er ngii, e tiaikid a uchul e te mo ungil el oidii a babilengel. Ngkmal betok a bades el meketeklii el kmo a ngklel a Dios a kmal klou a ultutelel e kmal kirel el mukebkall. (Exo. 3:15; Psa. 83:18; 148:13; Isa. 42:8; 43:10, 11; Jn. 17:6, 26, NW; Rel. 15:14, NW) Me a Jehovah a ulemekrael er a remilluches er a Biblia el mo ousbech er a ngklel el betok el telael el taem el ngar er aike el manuscript er a irechar. (Monguiu er a Esekiel 38:23.) Me a lsekum a ruliuid er a Biblia a choitii a ngklel a Dios e te ochotii el kmo ngdiak loba omengull el mo er a Jehovah.

6. Ngera me te liluut el dochelii a ngklel a Dios el elolem el taem er a chelsel a beches el oidel a New World Translation?

⁶ Chelechang e ngar er ngii a lmuut el bebil el tekoi el ochotii el kmo ngkmal kired el ousbech er a ngklel a Jehovah. Tia el beches el oidel a New World Translation a ousbech er a ngklel a Dios el 7,216 el taem. Me ngbetok er a elolem el taem el lousbech er tia el ngakl er sel di mla oidel. Te dilechel a eim er ngii e le ngklel a Dios a dirk lebiltik er ngii er a chelsel aike el dirk mlotobed el Dead Sea Scrolls. * E aika sebeched el  metik er a 1 Samuel 2:25; 6:3; 10:26; 23:14, 16. E sel ongelolem er ngii a ngar er a Mengeteklel 19:18, e tiang a lebiltik er ngii el okiu a dmolech el omesubel aike el manuscript er a irechar.

7, 8. Ngera belkul a ngklel a Jehovah?

⁷ Me a remera el Kristiano a oumerang el kmo ngkmal kired el mo ungil el medengelii a belkul a ngklel a Dios. E a belkul ngii el ngakl a “Ngike el Uchul e Omekdubech.” * A babilenged er a uchei a milsaod er a belkul a ngklel a Dios el ousbech er a Exodus 3:14 el kmo: “Ak Mo Ngii Di el Ngerang Me Kutaut a Moktek er Ngak.” (NW) Sel oidel a Biblia er kid el tilobed er a 1984 a milsaod er a Jehovah el kmo ngsebechel el mo ngii di el ngerang me bo lemotaut a telbilel. * Me nguaisei, engdi sel beches el oidel a Biblia a mesaod el kmo: “Alta e a ngklel a Jehovah a uldimukl er tia el uldasu, engdi ngdiak di el seikid a belkul e lemerekong. Ngdirrek el belkul a kmo, ngsebechel el remuul a ngii di el ngerang me a lechub e ngremuul a blebelel el mo oltaut a moktek er ngii.”

⁸ A Jehovah a ousbech a blebelel el meruul a tekoi el kirel el ketmekill me lemotaut a soal. El ua tiang, nguluusbech er a Noah el mo meleketek er a arhe, e uluusbech er a Besalel el mo kot el meduch el chad er a desachel, e rirellii a Gideon el mo kot el mesisiich el chad er a mekemad, e dirrek el rirellii a Paulus el mo missionari. Me a ngklel a Dios a klou a ultutelel er a rechedal a uchul me a New World Bible Translation Committee a ousbech er a ngklel a Dios er a oidel tia el beches el Biblia.

9. Ngera uchul me ngkmal klou a ultutelel el lemoiuid a Biblia el mo er a kuk bebil el omelekoi?

⁹ Ngdirk betok el oidel a Biblia a diak lousbech er tia el ngklel a Dios. Te bai ousbech a tekoi el “Rubak” me a lechub a ngklel a chelid er a belurir. Tiaikid a ta er a ngarbab el uchul me a Chelechad er a Ruungerachel a mesa el kmo, ngklou a ultutelel el kirir a rokui el chad el mo er ngii a Biblia er tir el mengebkall er a ngklel a Dios. (Monguiu er a Malakai 3:16.) Me chelechang e a ngklel a Jehovah a mla mukebkall el okiu a oidel a New World Translation el ngar a kuk betok er a 130 el omelekoi.

A BLEKETAKL E MELEMALT EL OIDEL A BIBLIA

10, 11. Ngera el omelsemai a blo lechelebangel a ruliuid er a New World Translation el mo er a bebil el omelekoi?

¹⁰ Tirke el uliuid er a New World Translation el mo er a tekingir a chillebangel a bebil er a omelsemai. El ua tiang, ngar tia el Biblia el tekoi er a Merikel, e a Olisechakl 9:10 me a lmuut el bebil el bades a uluusbech er a tekoi er a Hebru el “Sheol.” Me a bebil el Biblia el tekoi er a Merikel a dirrek el uaisei. Engdi a rebetok el melekoi a ngodech el bedengel a omelekoi a diak lodengelii tia el tekoi el “Sheol.” Ngdiak lebetik er ngii er a dictionary er tir e a rebebil er tir a omdasu el kmo ngmesaod el kirel a basio. Tiaikid a uchul me te ngiluu a kengei el mo oliuid a tekoi er a Hebru el “Sheol” me a tekoi er a Grik el “Hades” el mo “Debull.” Tiang a melemalt el oidel aika el tekoi e beot el bo dodengelii a belkul.

¹¹ A tekoi er a Hebru me a Grik el mesaod el kirel a “soul,” a dirrek el mle meringel a loliuid er ngii el mo er a bebil el omelekoi, e le tekingir el kirel a “soul” a blechoel el mesaod el kirel a deleb me a lechub e ngkmung ngerang el tuobed er a bedengel a chad sel lemad. Tiaikid a uchul me tirka el oliuid er a Biblia a ngiluu a kengei el mo oidii a tekoi el “soul” el ultuil er a belkul a bades el loliuid er ngii. Me sel appendix er a New World Translation of the  Holy Scriptures​—With References a milsaod a kakerous el belkul a tekoi el “soul.” A lmuut el bebil el omesodel a tekoi er a Grik me a Hebru a lengiluu el loia er a footnote, me ngbeot er a rechad el menguiu er a Biblia e mo medengei a belkul a tekoi el longuiu.

12. Ngera lmuut el bebil el tekoi el mlengodech er a chelsel sel beches el oidel a Biblia er kid el New World Translation? (Dirrek el momes er a suobel el “A beches el oidel a New World Translation el tilobed er a 2013” el ngar er a Watchtower er a December 15, 2015.)

¹² A kerrir tirke el oliuid er a Biblia a dirrek el mileketakl a bebil el tekoi el ngar er a Biblia el sebechel el mo cheleuid a uldesuir a rechad el kirel. Me sera September 2007, e a Chelechad er a Ruungerachel a kilengei me lemukbeches tia el Biblia el tekoi er a Merikel. Me sel committee el mirruul er tia el ureor a milenguiu a betok el telael el kerrir a ruliuid er a Biblia. Me aika el tekoi er a Merikel el dikea lousbech a rechad a lulemtechei el ousbech a tekoi el lodengei er chelechang, me tiang a mlo uchul a melemalt el oidel a Biblia el beot er a rechad el menguiu er ngii. Me a meringel el urerir tirke el uliuid er a Biblia el mo er a bebil el omelekoi a mlo uchul me ngliluut el mo ungil a Biblia el tekoi er a Merikel.​—Osi. 27:17.

TE OBA KLOU EL OMERENG EL SAUL

13. Ngua ngera uldesuir a rebetok el kirel tia el beches el oidel a Biblia er kid el tekoi er a Merikel?

¹³ Ngua ngera uldesuir a rebetok el menguiu er tia el beches el oidel a New World Translation el tekoi er a Merikel? A betok el telael el babier a mla modurokl el mo er sel klou el obis er kid el ngar er a Brooklyn, New York, el mereng a saul el kirel tia el beches el Biblia. A rebetok er tir a ua uldesuel a ta el odos el milluches el kmo: “A Biblia a di ua kiuar el mui er a mekreos el bad. Me sel donguiu er a tekingel a Jehovah el ngar er a beches el Biblia er kid el tilobed er a 2013, e ngdi ua dekerekikl el omes a bek el bedengel me a chiro me a klebekelel a derta er aika el mekreos el bad. Me tia el beot a oidel el Biblia a mla ngosukak el lmuut el mo omes er a Jehovah el ua demak el omechull er ngak e mengedecheduch el mengelaod er ngak.”

14, 15. Ngua ngera uldesuir a rechad el kirel a New World Translation el ngar er a omelekingir?

¹⁴ A rechad el melekoi a ngodech el bedengel a omelekoi a dirrek el oba omereng el saul el kirel a New World Translation. A ta el rubak er a  beluu er a Sofia, Bulgaria, a milsaod er a New World Translation el tekoi er a Bulgaria el kmo: “Ngmla mo betok el rak el kunguiu er a Biblia, engdi tia el oidel a Biblia a kmal beot er ngak el mo medengelii a belkul e sichedekl aika el tekoi er a chelsel a renguk.” Me a ta el odos er a Albania a milluches el kmo: “Ngmera el klebokel a Tekingel a Dios el tekoi er a Albania! Aki kmal ngeltengat e le Jehovah a mengedecheduch er kemam el ousbech a tekingam!”

¹⁵ Ngar er a betok el beluu, e a Biblia a kmal meringel a cheral me a lechub e ngkmal mekesai. Me a rechad a kmal mo dmeu a rengrir sel lebo er ngii a Biblia er tir. A chais el tilobed er a beluu er a Rwanda a milsaod el kmo: “A rebetok er tirke el mesuub el obengterir a rudam a kmal mle meoud el olengeriakl er a omesubir e le ngdimlak a Biblia er tir, e dimlak a ududir el omechar a Biblia er a ikelesia er tir. Ngdirrek el mle meringel er tir el omtab a belkul a bebil el bades.” Me sera letobed a New World Translation el tekoi er tia el beluu, e a ta el telungalek el teua rengelekir a dilu el kmo: “Aki kmal mereng a sulel a Jehovah me a blak a rengul el mesiou el milskemam tia el Biblia. Aki kmal chebuul e dimlak a ududam el mechar a Biblia er kemam el rokui. Engdi chelechang e kemam el rokui a ngar er ngii a Biblia er kemam. Me ngbek el sils el ki mdak el menguiu er a Biblia el ochotii a omereng el saul er kemam el mo er a Jehovah.”

16, 17. (a) Ngera soal a Jehovah el kirir a rechedal? (b) Ngera kired el mo meruul er ngii?

¹⁶ Me a cherengel a taem e a New World Translation a moiuid el mo er a lmuut el bebil el omelekoi. Me alta e a Satan a melasem el merrob er tia el ureor, engdi a Jehovah a soal a rechedal a bo lorrenges er Ngii el okiu a tekoi el medung el ngar er a beot e bleketakl el rolel. (Monguiu er a Isaia 30:21.) Me ngdi kmedung, e a beluulechad a “mo mui er a klemedengei er a RUBAK el di ua ngouaol el mui er a daob.”​—Isa. 11:9.

¹⁷ Mada, bo dungil el ousbech a bek el sengk el lomeskid a Jehovah, el uldimukl er tia el oidel a Biblia el mengebkall er a ngklel. Morrenges er ngii er a bek el sils el oeak a omengiuem er a Biblia. Ngii a kmal sebechel el orrenges a bek el nglunguchem. Aika el omeruul a mo uchul e ke lmuut el mo ungil el medengelii a Jehovah, me ngmengal mukeroul a bltkil a rengum el mo er ngii.​—Jn. 17:3.

[Aike el footnote]

[Aike el Ker er a Suobel]