A kekerei el ngalek a omes er a chat el me tuobed er a factory e omdasu el kmo ngmeruul a eabed. A chouaisei el telkib el cheleuid el tekoi er a osengel a ngalek a kora ua loltobedechur. Engdi a meklou el cheleuid el tekoi a sebechel klou a lerellii er a klengar er kid. El ua tiang, a bo el cheleuid a omengiued er a omesodel a kerud e ngsebechel el mo uchul a klou el telemall.

A cheleuid el uldasu el kirel a tekoi er a klereng me ngdirrek el sebechel el mo klou el tekoi. El ua tiang, a rebebil er a rechad a mle cheleuid a osengir er a osisecheklel a Jesus. (Johanes 6:48-68) Me ngdimlak losuub a lmuut el betok el kirel a osisecheklel a Jesus, e te bai di uleltngakl. Me ngklou el klengiterreng!

Kau ke menguiu er a Biblia el kirel a ulekrael? Tia kmal ungil el tekoi. Nglocha mo er ngii a taem e ngmo cheleuid a osengem el kirel a tekoi el monguiu? Tia el tekoi a mla duubech el mo er a rebetok el chad. Ka momtab aika el edei el cheleuid el tekoi.

• A rebebil er a rechad a cheleuid a uldesuir el kirel a omellach er a Biblia el kmo “moluu er a Dios.” Te omdasu el kmo tia belkul a kmo ngkirir el mo medakt er a Dios. (Olisechakl 12:13) Engdi a Dios a diak el soal tirke el mengull er ngii a bo lomdasu el uaisei el kirel. Ngmelekoi el kmo: “Lak medakt e ak ubengkem. Ngak a Dios er kau, me lak a ngeral bo medakt er ngii. Ak mo rullau el mo mesisiich, e ngosukau; ak mo sobecheklau e osebelau.” (Isaia 41:10) A bo demedakt er a Dios a belkul a kmo kede oba klou el omengull el kirel.

• A rekuk bebil er a rechad a cheleuid a uldesuir el kirel aika el tekoi el kmo: “A bek el tekoi el duubech el ngar tial beluulchad a duubech er sel belsechel . . . a belsechel a cheroll ma belsechel a kodall.” Te melekoi el kmo a Dios a mla tutkii sel blsechel el lemad er ngii a chad. (Olisechakl 3:1, 2) Engdi tia el bades a melekoi el kirel a blekerdelel a klengar e ouchais el kmo a rokui a di mo mad. A Tekingel a Dios a dirrek el olisechakl el kmo a omelilt er kid a ngar er ngii a lerellii er a klemengetel a klengar er kid. El ua tiang, kede menguiu el kmo: “A omeluu er a RUBAK a komengetii a klengar.” (Osisechakl 10:27; Psalm 90:10; Isaia 55:3) Ngoeak a ngera el rolel? A doba omengull el kirel a Tekingel a Dios a rullid el mo mengeroid er kid er a mekngit el omeruul el uai a cheltelaol er a rrom me a deleboes el omeruul.​—1 Korinth 6:9, 10.

• A rekuk bebil er a rechad a omdasu el kmo sel lolekoi a Biblia el kmo a eanged me a chutem a “medechel el kirel el mo metemall er a ngau,” e ngbelkul a kmo a Dios a mera el mo okngemedii tia el beluulechad. (2 Petrus 3:7) Engdi a Dios a tibir el kmo ngkmal diak bo lolekngemed er tia el beluulechad. Ngmla “toketekii a beluulchad el mesisiich el ngar omekedecheraol er ngii, ng kmal diak bo le mengukl.” (Psalm 104:5; Isaia 45:18) Ngbai tia el mekngit el blekeradel er a beluulechad a mokngemed, el di ua lemedul er a ngau. E a eanged el melekoi el kirel a melidiul me a lechub e ngdelengcheklel a Dios a diak bo lemoknged.

Ngdi ua aika el tekoi el medung er bab, a rechad a blechoel el mo cheleuid a uldesuir el kirel a tekoi el longuiu el ngar er a Biblia. Engdi ngera uchul me a Dios a omechei er a chouaisei el tekoi me ngduubech? A rebebil a locha mo melatk el kmo: ‘A lsekum a Dios a kot el mellomes a rengul e medengei a rokui el tekoi, e ngera me ngdimlak el sebechel el meskid a babier el beot er a rechad a mo ungil medengelii?’ Ka molatk aika el edei el uchul.

1. A Biblia a mileketmokl me bo el sebechir a rengariou a rengrir el chad el sorir el mesuub a tekoi el mo medengelii. A Jesus a dilu er a Demal el kmo: “Chedam, el Rubak er a eanged ma chutem! Ak mereng a sulem ele ke mla ocholt er a re metitur  e diak a skulir a ikel cho bilart er a leko te mellomes a rengrir ma leko te meduch e ngar ngii a skulir.” (Lukas 10:21) A Biblia a milluches me bo el sebechir tirke el tabesul a uldesuir el mo ungil medengelii. A rechad el mekedidai a rengrir, el ngii a blekerdelir a re “mellomes a rengrir ma leko te meduch e ngar ngii a skulir,” a meringel er tir a mo medengelii a Biblia. Engdi a rechad el menguiu er a Biblia el uai a uldesuir a “re metitur e diak a skulir,” el sorir el mesuub a tekoi, a sebechir el mo ungil medengei a tekingel a Dios. Ngoeak tiang, e ngmera el sebeched el mesa llemesel a rengul a Dios!

2. A Biblia a milluches el kirir tirke el olengit a ngelsuil a Dios el mo medengelii. A Jesus a millekoi el kmo a rechad a mo ousbech a ngeso el mo ungil medengei a osisecheklel. Te mekerang e mo nguu tia el ngeso? Ngmilsaod el kmo: “Ngikel Olengeseu, el Chedaol Reng, el bo loderchii a Chedam el mei el oba ngklek, a mo osisecheklemiu er a rokui el tekoi.” (Johanes 14:26) Me a Dios a omesterir a rechad a chedaol reng er ngii, el ngii a oureor el klisichel, el mo ngosuterir el mo medengei aike el longuiu el ngar er a Biblia. Engdi ngdiak lomesterir tia el klisichel el mo er tirke el diak lultuil er ngii el kirel a ngeso me ngmeringel er tir a mo medengelii a Biblia. A chedaol reng a dirrek el rulleterir tirke el Kristiano el klou a klemedengei er tir er a Biblia el mo ngosuterir tirke el diak a kmal klemedengei er tir.​—Rellir 8:26-35.

3. A bebil er a tekoi el ngar er a Biblia a sebechir a rechad el mo medengei a omesodel er sel ungil temel. El ua tiang, a profet el Daniel a mle kirel el meluches a klumech el kirel a ngar medad el taem. A anghel a dilu er ngii el kmo: “Daniel, btekii ngiil babier e mlia semosem el olangch er ngii el dimerkmo le me taem er a ulebongel.” Me ngar er aika el mereko el betok el dart el rak, e a rechad a mla chiuii a babier er a Daniel engdi ngdiak el sebechir el mo ungil medengelii. Ngmo lmuut er a Daniel me ngdimlak lodengei a omesodel aike el lulluches. Ngdi mle ngii el kmo: “Ak rirenges a lullekoi, ngdi dimlak bo kumtab.” Me ngar sel ulterekokl el taem el lengiltii a Dios, e a rechad a mo ungil medengelii a ulochel el lulluches er ngii a Daniel. A anghel a milsaod el kmo: “Ng ungia e morael e Daniel, ele ikal tekoi a kirel berotel el diak bo lecholt el dimerkmo le me ulebongel.” Me ngtecha mo medengei aika el klemechel a Dios? “A re dengerenger a diak bo lomtab a ikal tekoi e di melemolem a delengerengerir; tirkel mellomes a rengrir a mo omtab.” (Daniel 12:4, 8-10) Me ngar sel ungil temel, e a Dios a mo ouchais a belkul a bebil er a tekoi el ngar er a Biblia.

A Resioning er a Jehovah ngmla ta el bo el cheleuid a uldesuir el kirel a Biblia e le ngdimlak a ungil klemedengei er tir er a temel a leduubech a tekoi? Chochoi. Engdi sera bo el temel a Dios el mesmechokl a tekoi, e te kilengei el melodech a uldesuir. Te mlo oukerebai er a rechapostol er a Kristus el uleba klengariourreng e millodech a uldesuir sel lomeklemalt er tir a Jesus.​—Rellir 1:6, 7.

Me a uldesuel ngike el kekerei el ngalek el kirel a rolel e ngmo er ngii a eabed a kora ua el di el telkib el cheleuid el tekoi. Engdi aike el lolisechakl a Biblia a kmal meklou a ultutelel el tekoi el kirem. A klumech el ngar er a Biblia a kmal klou a ultutelel me ngungil a lak el di kau el melasem el mo medengelii. Mosiik a ngeso me bo modengei aike el tekoi el monguiu. Mosiik a ngeso er tirke el ngariou a rengrir el mesuub er a Biblia, e olengit er a chedaol reng er a Dios el mo medengelii, e ulterekokl a rengrir el kmo kede kiei er a taem el Dios a soal a bo dodengei aike el tekoi el ngar er a Biblia. Lak momai er a rengum el mengedecheduch er a Resioning er a Jehovah me a lechub e monguiu aike el bla lorriter el tekoi el ngar er a jw.org el website. A Biblia a tibir el kmo: “Molengit er a sekutaberreng . . . , e [ke] metik er a klemedengei er a Dios.”​—Osisechakl 2:3-5.