Ak milechell er a Paddington, el basio el betok a rechad er ngii el ngar er a London er a beluu er a England. Ak kiliei el obengkel a delak me a retedei el chudelek. A demak a dimlak el blechoel el obengkemam e le ngmla er ngii a mondai er ngii er a omelim el rrom.

Sera kkekerei, e a delak a ulsisecheklak el mo meluluuch er a bek el klebesei. Ngmla er ngii a kekerei el Biblia er ngak el di mle babier er a Psalm a ngar er a chelsel, e ak millibech a hu er ngii me bo el sebechek el mengitakl. Ak dirk melatk er a tekoi el kchiliuii er a ta er a babier el kmo: “A ta er a klebesei e ngmo diak a klukuk.” Aika el tekoi a rirellak me ak di mekar sel klebesei e omdasu el kirel a ngar medak el taem. Ak millatk el kmo: ‘Ngulterekokl el diak el di el tiakid a klengar e lemerekong. Ngera uchul me ak chad?’ Ngdiak el soak el mad!

Ak dirrek el kmal mlo semeriar el kirel a tekoi er a oltuubladek. Ak millasem el mengedecheduch er a rulekoad, e ulebengterir a resechelik el omais a debull e dirrek el omes a kdekudel el mubi. Aki kora mle medakt engdi ngdirrek el kmal mle somam.

Ak ulemuchel el omtok a tekoi er a ledirk 10 a rekik. Ngkmal mlo soak el melamech a dekool. E a uriul, e ak mlo melamech a marijuana. Sera bo el 11 a rekik, e ak mlo melasem a omelim el rrom. Alta ngdimlak el soak a telemtemul, engdi mle soak el mechetelaol. Ngdirrek el mle soak el orrenges a chelitakl e meloik. Sel bo el sebechek, e ak mo er a party me a blil a omilil. Ak ulemart er ngak e tuobed sel klebesei e me remei er a mochu tutau. Me ngmle blechoel el mesaul a bedengek me ak di mengoit er a skuul. E sel kuk bong, e ak blechoel el melim a rrom er a delongelel a klas.

Ngkmal mle mekngit a teng er ngak er a ulebongel el rak er ngak er a skuul. A delak a kmal mle kesib a rengul e le ngdimlak lodengei aika el mekngit omerellek. Me aki mlo kautoketok, e ak tilobed er a blai e mlo kiei el telkib el taem el obengkel a sechelik el sechal el Tony a ngklel. Ngmle Rastafarian, el ngii a klechelid el ulemuchel er a beluu er a Jamaica. Ngika mle merechorech e ulelterau a mekngit el kar, e a rechad a mle medengelii el kmal mle mekngit a blekerdelel. Ngdi mle 16 a rekik e ak mlo dioll e mechelii a ngelekam el sechal.

Ak mlo medengelterir a Resioning er a Jehovah er sera kkiei er a blirir a remesobil el chedil el outolechoi. A kabelment a milskak a blik. A reteru el redil el Sioning a mle blechoel el me oldingel er a rebebil el ngeasek el chedil. A ta er a klebesei, e ak mlo teloi er tir el chadecheduch. Ngmle soak el osiik a cheleuid er tir. Engdi te kmal mle ungil el onger a rokui el kerik el ousbech er a Biblia. Ngkmal mle soak a blekerdelir e le te mle bekokuii e medemedemek. Me ak kilengei el mo mesuub a Biblia el obengterir.

Ak silubii a tekoi el ngar er a Biblia el kmal ngildechii a klengar er ngak. Sera kkekerei el me klou, e ak mle medakt el mad. Engdi ak mlo medengelii a osisecheklel a Jesus el kirel a okiis! (Johanes 5:28, 29) Ak dirrek el silubii el kmo a Dios a omekerreu er ngak. (1 Petrus 5:7) A tekoi el ngar er a Jeremia 29:11 a kmal rirtechii a renguk. Ngmelekoi el kmo: “Ng di ngak el tang a ngar ngii a uldesuek el kiriu. Ng diak luldasu el kirel a mekngit e ng bai uldasu er a klungiaol el mourureng er ngii el kirel a ngar medad el klebesei.” Ak mlo oumerang el kmo ngar er ngii a omeltkek el sebechek el kiei er a Baradis el mo cherechar.​—Psalm 37:29.

A Resioning er a Jehovah a kmal uluubltikerreng el mei er ngak. Sera kkot el mo er a miting er tir, e a rechad a kmal mle ungil a blekerdelir. (Johanes 13:34, 35) E tiang a kmal mle ngodech er sel ikelesia el blo er ngii er a uchei. A Resioning a kmal uluuetkeu er ngak alta ngmle ngodech a blekerdelel a klengar er ngak. Te ulerrenges, e ulemekerreu, e ullengeseu er ngak. Ak mlo omelechesiu er ngak el ta er a chedal a telungalek er tir.

Ngoeak a omesubek er a Biblia e ak mlo medengei el kmo, ngmle kirek el melodech a bebil er a tekoi er a klengar er ngak me bo el sebechek el oltirakl a ngarbab el llechul a Dios. Ngdimlak el beot er ngak a mengoit a omelamech el dekool. Ak dirrek el mlo medengei el kmo a bebil er a chelitakl a rirellak el mo soak el melamech a marijuana, me ak ngilodech a chelitakl el kurrenges. Ngkmal mle soak el mo diak kulim a rrom, me ngmlo diak kumais a party me a blil a omilil. E mlo obengterir a rechad el tir a sebechir el ngosukak el mo ungil a blekerdelel a klengar er ngak.​—Osisechakl 13:20.

A Tony a dirrek el mlo mesuub a Biblia el obengterir a Resioning er a Jehovah. Me sera lousbech er a Biblia el onger a keril, e ngdirrek el mlo oumerang aike el tekoi el losuub. Ngmillodech a meklou el tekoi er a klengar er ngii e mlo diak lobengterir a remekngit el klausechelei, e mlo diak lorechorech, e diak lolamech a marijuana. Aki dirrek el milsa klungel a ultutelel aki bo bechiil me bo el sebecham el odeuir a rengul a Jehovah e ki mketmeklii a ungil delengchokl el kirel a ngelekam. Me aki mlo bechiil er a rak er a 1982.

Ak millatk aike el cheldecheduch el ngar er a Ongkerongel me a Awake! * el milsaod a klengar er a rechad el uai ngak el mle sebechir el melodech a klengar er tir. Aika el cheldechedecherir a kmal millisiich er ngak e ngilsukak el mo melasem er a tkurrebab el sebechek el melodech a blekerdelek. Ak mle blechoel el meluluuch el mo er a Jehovah me lak lechitak. Me ngak me a Tony a mlo metecholb el ta er a Sioning er a Jehovah er a July 1982.

A deleuill er ngak me a Jehovah a ulsebelii a klengar er ngak. Ngak me a Tony a dirrek el mla mesa ngelsuil a Jehovah er a chelsel a meringel el taem. Aki mla mesuub el mo ultuil er a Dios sel ki bo mchelebangel a ringel, me ngsebecham el mesa el kmo, ngblechoel el olengeseu e omekerreu er a telungalek er kemam.​—Psalm 55:22.

Ngkmal dmeu a renguk el mla ngosuir a ngelekek el sechal me a redil el mo medengelii a Jehovah. Chelechang e ngdmeu a renguk el meseterir a rengelekir el dirrek el meruul er a osisiu el tekoi.

Ngmla mo diak mekar a leklebesei el melatk er a ngar medak el taem me a lechub a kodall. Ngak me a Tony er chelechang a oldingel a kakerous el ongdibel er a Resioning er a Jehovah er a bek el sandei el melisiich er tir. Aki obengterir el olisechakl er a rechad el mo olecholt a klaumerang er tir er a Jesus me bo el sebechir el mo oba omelatk er a diak a ulebengelel el klengar.