1 Juan 1:1-10
1 Nyafxiitey ũsyãꞌkh yuꞌ txãꞌsna kaajiyuꞌjna fxiꞌjaçthu iꞌkweꞌsxtxi. Kweꞌsxaꞌ iiwẽseꞌthaꞌw saꞌ kweꞌsx yafxju yuu iiuythaꞌw. Ĩꞌneeçxáa uymée, kweꞌsx kusejuwa iijxaꞌdxthaꞌw Dxus Nçxiꞌk ĩtxi kaafxiꞌzeꞌjwaꞌjsaꞌs.
2 Itxi kaafxiꞌzeꞌjwaꞌjsaꞌ vxyaak, açaꞌ uyçxaꞌ txãa vxyaaniꞌs kweꞌsxaꞌ ptaꞌsxiꞌthaꞌw. Txãasathaꞌw ãçxhaꞌ iꞌkweꞌsxtxiwa kaajiyuꞌjuꞌ, bagaçxte yuhwa pçumée ĩtxi kaafxiꞌzeꞌjwaꞌjsa Ney yakh ũssa kweꞌsxtxi vxyaapaꞌga.
3 Kweꞌsx wẽseꞌjçxa yafxjuwa uyniꞌs ãate ptaꞌsxiçthaꞌw, iꞌkweꞌsxwa kweꞌsx yakh utxaaçxa fxiꞌzekahn, kweꞌsxwa maꞌwẽtkaꞌw Dxus kweꞌsx Tata yakh vxiteꞌ Nçxiꞌk Jesukristo yakh utxaaçxa fxiꞌzeꞌ txãꞌwẽy.
4 Txãꞌwẽthaꞌw kaajiyuꞌjna fxiꞌjaꞌ, iꞌkweꞌsxwa weçxana fxiꞌzewaꞌjaꞌs jiꞌphukahn.
Dxusaꞌ eenaꞌsaꞌ
5 Jesukristo naꞌwẽk kaapiyaꞌj txãꞌsna iꞌkweꞌsxtxi ptaꞌsxiçthaꞌw: Dxusaꞌ eenaꞌsaꞌ. Txãa paꞌga txajx tasxteꞌ kĩh yuhwa çxhiꞌdxsa meeaꞌ jĩꞌk.
6 Açaꞌ maawa Dxus yakh fxiꞌzena ũsthu jĩçxawa, Dxus jxkaahniꞌs nwẽeseꞌjmée çxhiꞌdxte fxiꞌzeçxaꞌ, ĩsxiisa yuuna.
7 Nawa Dxuswa maꞌwẽ eenaꞌte ũsna txãꞌwẽy kweꞌsxwa eenaꞌte fxiꞌzeteꞌ, kweꞌsx pweꞌsx puutx puiimée zhiçxkwe fxiꞌzewaꞌj kasejena, açaꞌ Dxus Nçxiꞌk Jesukristo eeaꞌ kweꞌsx pkaltxi jxuka khukhuna.
8 Txãꞌjĩteꞌ, kĩh pkal yuhwa jiꞌphmeethaꞌw jĩwáꞌnjaꞌw naꞌ peekíiçxáa yaꞌĩsxiisa yuꞌnjaꞌw.
9 Nawa txãꞌwẽ yajkxmée, pkalsayuhth sũhna Dxusaꞌs perdon pẽyiꞌnjaꞌw açaꞌ txãꞌwẽ yũusaꞌs kim yuhnawa waꞌlmée jxuka kxtey peltunãyçxa ewmeesaꞌs jxuka nuyaateena.
10 Txãꞌjĩteꞌ kĩh yuhwa ewmée yũusameethaꞌw jĩꞌnjaꞌw naꞌ Dxus weꞌweçxaꞌ: Ewmeesataꞌ jĩçxaꞌ ĩsxiijaꞌk jĩsa yuꞌnjaꞌw.
