1 Juan 2:1-29
2 Adx luuçxweꞌsx, pkalte fxiꞌzekahmenthu ptaꞌsxna fxiꞌjaꞌ. Txãꞌwẽtewa maaíi yuꞌ pkalte wetewáꞌkwe nawa Dxus tasxte kweꞌsx juꞌgu weꞌwe puꞌçxsa jiꞌpthaꞌw, txãꞌ Jesukristoꞌ isasa yuꞌs jxuka kxtey yuusáa.
2 Jesukristok kweꞌsx pkal paꞌgate vxiteꞌ naa kiwete nasa jxukaysa pkal paꞌgate yãꞌjçxa yaꞌdukhçxa uu.
3 Dxus jxkaahnitxiꞌs kxtey yuuna fxiꞌzeçxa yuuçxáa Dxusaꞌs jiiyuhth sũhwaꞌjaꞌs yaꞌjiꞌphuna.
4 Nawa maaíi yuꞌ Dxusaꞌs jiith jĩwáana nawa txajx jxkaahnitx kxtey nwẽeseꞌjsameꞌ txãꞌ ĩsxiisa yuuna.
5 Maawa Dxus jxkaahnitx kxtey nwẽeseꞌjena txãꞌ Dxus peeygãaniꞌs ũuste jxuka jiꞌphsaçxa txãꞌwẽ yuuna. Txãꞌwẽ yuuçxáa Dxus yakh fxiꞌzena ũsneꞌtkaꞌw sũhwaꞌjaꞌs yaꞌjiꞌphuna.
6 Dxus yakh fxiꞌzena ũsthu jĩsaꞌ, Jesukristo naꞌwẽy kĩh pkal yuhwa jiꞌphmée fxiꞌzena.
Dxus jxkaahni uꞌsesa
7 Adx peeygãanisaweꞌsx, iꞌkweꞌsxtxiꞌ Dxus jxkaahni uꞌsesa ptaꞌsxna fxiꞌjaçmeeth, Dxus jxkaahni nyafxíi ptaꞌsxte iiwẽseꞌjyãꞌjiꞌkwe txãaíiçxáꞌ.
8 Txãꞌwẽçxawa naꞌwẽ nyafxíi jxkaahniꞌs kaayakiꞌjna fxiꞌjaçthu txãꞌ uꞌsesa naꞌwẽ yuh kasejeꞌk. Txajíiçxáa iꞌkweꞌsxaꞌ Kristoꞌs ũusuh jxuka peeygãhçxaꞌ, iꞌkweꞌsx pweꞌsxwa txãꞌwẽy yũuna fxiꞌzeçiꞌkwe. Txãa paꞌga ãçxhaꞌ skhẽuuçaꞌ jxpubana çxhiꞌdxte fxiꞌzenisaꞌ, açaꞌ jxpubamée fxiꞌzeni eenaꞌsa vxyaaçaꞌ.
9 Maaíꞌ jxpubamée eenaꞌte ũsthu jĩçxawa txajx yakhthẽꞌjaꞌs açena, txãꞌ jxpubana çxhiꞌdxte fxiꞌzesaçxa txãꞌwẽ yuuna.
10 Jxpubamée eenaꞌte fxiꞌzesaꞌ txajx yakhthẽꞌjaꞌs ahçemée peeygãhna fxiꞌzena, kĩh yuhwa pkalte kweeteꞌjwaꞌj yuꞌsaꞌ vxitmée.
11 Nawa txajx yakhthẽꞌjaꞌs ahçena fxiꞌzesaꞌ çxhiꞌdxte uyyaꞌ ãjamée mtee paꞌjwaꞌjaꞌs yuuwa jiimée jxpubana fxiꞌzesaçxa txãꞌwẽ yuuna.
12 Adx luuçxweꞌsx, iꞌkweꞌsx pkalaꞌ peltunãynitx yuu Jesukristo uuteꞌ, txãa paꞌgath fxiꞌjaꞌ.
13 Txãꞌwẽy thẽꞌjsaweꞌsx, iꞌkweꞌsxaꞌ naꞌwẽ nyafxíi entey Jesukristoꞌ ũsyãꞌkh yuꞌ txãꞌsna jiyupaꞌgath fxiꞌjaꞌ. Saꞌ piçtakxweꞌsx, eçxthẽꞌjaꞌs knayiꞌkwe txãa paꞌgath fxiꞌjaꞌ.
Adx luuçxweꞌsx, Dxusaꞌs jiyuiꞌkwe txãa paꞌgath fxiꞌjaꞌ.
14 Thẽꞌjsaweꞌsx, naꞌwẽ nyafxíi entey Jesukristoꞌ ũsyãꞌkh yuꞌ txãꞌsna jiyupaꞌgath fxiꞌjaꞌ. Saꞌ piçtakxweꞌsx, Dxus ptaꞌsxniꞌs ũuste yuꞌakhçxa eçxthẽꞌjaꞌs ũukhmée knayiꞌkwe txãa paꞌgath fxiꞌjaꞌ.
15 Ãçxhaꞌ kxazsay mpaꞌyajkxwe, naa kiweteweꞌsxaꞌs yajkxyaꞌmée. Maawa naa kiweteweꞌsxaꞌs yaakxsaꞌ Dxusaꞌs yaakxsameeçxa txãꞌwẽ yuuna.
16 Txãa paꞌgatey naa kiweteꞌ naꞌwẽ yaakxnisaçxáa ũstaꞌ: naa kakweꞌ kazx yũuna fxiꞌzeni, yafxju uyçxa kazx ũus yaakxni, kĩhwa jiꞌphçxaꞌ iiwejçx iiwejçx yajkxna fxiꞌzenisaçxáa ũstaꞌ. Txãꞌwẽ ewmeesa yuuçxáꞌsku naa kiweꞌ ũsuꞌ, açaꞌ txãꞌwẽsaꞌ Dxus jxthãasnisameꞌ.
17 Naa kiwete txãꞌwẽ yũuwaꞌjçxáana yajkxna fxiꞌzesaꞌ jxuka pçuwaꞌjsataꞌ petx naa kiwe yãꞌjçxa. Nawa Dxus jxthãasniçxáꞌs kxtey yuusaꞌ, bagaçxte yuhwa pçumée ĩtxi fxiꞌzewaꞌjaꞌs jiꞌphutxna.
Dxus Espirituꞌ kaajiyuꞌjuꞌk maa ĩsxiinisatewa, txãꞌwẽy maa isasatewa
18 Adx luuçxweꞌsx, ãçxhaꞌ nmeh en ãjk. Iꞌkweꞌsxaꞌ iiwẽseꞌjneꞌkwe Kristoꞌs açesa paꞌjana jĩniꞌs. Txãasa ãçxhaꞌ wala kuh ũstaꞌ Kristoꞌs açesa. Txãa paꞌgathaꞌw jiyuꞌ nmeh en yuuçtewa.
19 Txãaweꞌsxaꞌ kweꞌsx yakh ũswaꞌjsamée neꞌta yuꞌ, txãasatx kweꞌsx ksxavxyuh kaseh. Kweꞌsx yakh ũswaꞌjsawaçaꞌ, txuteewaꞌjmée neꞌta yuꞌ. Jxukay yuꞌ kweꞌsx yakh fxiꞌzewaꞌjsameetxna, txãasatx txãꞌwẽ txutee.
20 Nawa iꞌkweꞌsxaꞌ Dxus Espirituꞌs ũuste jiꞌphiꞌkwe, txãasa maa isasatewa txãꞌsaꞌ jxpubawaꞌjsamée iꞌkwe.
21 Iꞌkweꞌsxaꞌ isasaꞌs jxpubawaꞌjsamée iꞌkwe naa paꞌgaíiçxáath fxiꞌjaꞌ, peekx jii iꞌkwe ĩsxiinisaꞌ bagaçxte yuhwa isa kasejeꞌçmeꞌ.
22 ¿Kim txãꞌwẽ ĩsxiisa yuukx? Jesusaꞌ Dxus kaahnisameꞌ jĩna weꞌwesa txãꞌwẽ ĩsxiisa yuuna. Txãꞌwẽ weꞌwesaꞌ Dxus Nçxiꞌknawa jxpaꞌgamée yãꞌjçxaꞌ, Neynawa jxpaꞌgasameeçxa txãꞌwẽ yuuna.
23 Maawa Dxus Nçxiꞌkaꞌs açesaꞌ, Neynawa açesa yuuna. Nawa Dxus Nçxiꞌkaꞌs jxpaꞌgasaꞌ, Neynawa jxpaꞌgasa yuuna.
24 Txajíi nyafxíi ptaꞌsxni Dxus yuwe isasaꞌs iꞌkweꞌsx ũuste ew mjxaawwe. Txãꞌwẽ yũuçxaꞌ Dxus Nçxiꞌk yakh txutemée fxiꞌzeneꞌkwe, saꞌ Ney yakhwa txãꞌwẽy txutesamée yuuneꞌkwe.
25 Açaꞌ txãꞌwẽ yũusatxiꞌ Jesukristoꞌ peesyaꞌ neeyũuk bagaçxte yuhwa pçumée ĩtxi fxiꞌzewaꞌjaꞌs.
26 Iꞌkweꞌsxtxi maawa kaypubaꞌjweꞌsxteth ptaꞌsxiꞌ jxpaꞌyakxkahn.
27 Nawa iꞌkweꞌsxaꞌ Dxus Espirituꞌs ũuste jiꞌphiꞌkwe naꞌ maa ĩsxiinisana açaꞌ vxiteꞌ maa isasatewa thẽymée jiyuneꞌkwe, txãa paꞌgatey Dxus Espirituꞌ kĩhtewa jxukak kaajiyuꞌjuꞌ, saꞌ txajx kaapiyaꞌjniꞌ ĩsxiinisameetaꞌ. Txãꞌwẽ jiyuçxaꞌ, Kristo yakh txutemée fxiꞌzeneꞌkwe.
28 Adx luuçxweꞌsx, ãçxhaꞌ Kristo yakh txutemée mfxiꞌzewe. Txãꞌwẽ fxiꞌzeçxaꞌ, thaamemée weçxana jxpaꞌgaꞌnjaꞌw Kristoꞌ naa kiwete kĩhçxa vxyaatewa.
29 Iꞌkweꞌsxaꞌ jiiyãꞌjiꞌkwe Jesukristoꞌ kĩhtewa jxuka ew yũusaatewa, açaꞌ maawa txãa naꞌwẽy kĩhtewa jxuka ew yũuna fxiꞌzeçxaꞌ, Dxus luuçxçxa txãꞌwẽ yuuna.
