1 Juan 3:1-24
3 Dxus peeygãaniꞌ seenaꞌ yuh walaꞌ txãꞌsna miiyajkxwe. Txãꞌwẽçxaíik adx luuçxweꞌsx jĩna kxsusuꞌ kweꞌsxtxiꞌ. Açaꞌ kweꞌsxaꞌ txajx luuçx yuhthaꞌw. Txãa paꞌgatx naa kiweteweꞌsxaꞌ kweꞌsxtxiꞌ jiyuꞌçmée, Dxusaꞌs jiimeetaꞌ naa paꞌga.
2 Adx peeygãanisaweꞌsx, kweꞌsxaꞌ Dxus luuçx yãꞌthaꞌw. Nawa Kristo kĩhteꞌ, maꞌwẽ seenaꞌ zhiçxkwe neeyũuwaꞌjsa neꞌtkaꞌw txãa yuꞌsaꞌ ũus yajkxçxa kpajkxyaꞌ yuꞌ ãjaꞌçmeethaꞌw. Nawa Jesukristo vxyaateꞌ, txãa maꞌwẽsateꞌ weh yuhwa fxiymée txãa naꞌwẽy neeyũuwaꞌj yuꞌsaꞌ jiithaꞌw.
3 Açaꞌ maawa txãa naꞌwẽy yuu wẽesaꞌ pkal jiꞌphmée fxiꞌzena, Jesukristowa maꞌwẽ kĩh pkal yuhwa jiꞌphmeesana txãꞌwẽy.
4 Maawa pkalte fxiꞌzesaꞌ Dxus jxkaahnitx nwẽeseꞌjmée ũsçxa txãꞌwẽ yuuna, açaꞌ Dxus jxkaahnitx kxtey yuumée ũsniꞌ pkal íiçxáꞌ.
5 Iꞌkweꞌsxaꞌ jii iꞌkwe Jesukristoꞌ kweꞌsx pkaltxi txuhdeyaꞌk naa kiwete kĩh, nawa txãa yuꞌ kĩh pkal yuhwa jiꞌphmeesak yuꞌ.
6 Txãa paꞌga maawa Jesukristo yakh fxiꞌzesaꞌ pkalte fxiꞌzeꞌçmeꞌ. Açaꞌ maawa pkalte fxiꞌzesaꞌ Jesukristoꞌs iiuymeena, saꞌ txãa maꞌwẽsatewa jiimeesaçxa txãꞌwẽ yuuna.
7 Adx luuçxweꞌsx, mpaꞌyajkxwe, iꞌkweꞌsxtxi maawa kaypubaꞌjweꞌsxte. Jesukristo naꞌwẽy ew yũuna fxiꞌzesa yuuçxáa, ewsa yuuna.
8 Nawa pkalte fxiꞌzesaꞌ eçxthẽꞌj yakh ũssaçxa txãꞌwẽ yuuna, txãa paꞌgatey eçxthẽꞌjaꞌ nyafxiitey pkalsak yuꞌ. Txajíiçxáak Dxus Nçxiꞌkaꞌ eçxthẽꞌj mjĩiniꞌs ivxiituyaꞌ kĩh naa kiwete.
9 Dxus luuçxaꞌ maa yuhwa pkalte fxiꞌzeꞌçmeetaꞌ, txãa paꞌgatey txãaweꞌsx ũusaꞌs Dxus yuꞌpthehçxa nvxiitnisataꞌ naa paꞌga. Txãasa pkalte fxiꞌzewaꞌjsameetaꞌ Dxus luuçx yãꞌjaꞌ.
10 Txãa paꞌgak yaꞌjiyuꞌ maa Dxus luuçxtewa. Saꞌ maa txãꞌwẽ eçxthẽꞌj luuçxtxiwa yaꞌjiyuꞌk: Maawa ewmeeçxáa yũuna txajx yakhthẽꞌjweꞌsxtxi ahçena fxiꞌzesaꞌ txãaweꞌsxaꞌ Dxus luuçx meetaꞌ.
Teeçxsa naꞌwẽçxah puutx yaꞌpeeygãhna fxiꞌzewaꞌjaꞌ
11 Iꞌkweꞌsxaꞌ Kristo kaapiyaꞌjniꞌs iiwẽseꞌjneꞌkwe txãꞌ naꞌwẽk yuꞌ: Teeçxsa naꞌwẽçxah puutx yaꞌpeeygãhnak fxiꞌzewaꞌj yuꞌ.
12 Eçxthẽꞌj yakh ũssa Kainaꞌ txajx nyakhaꞌs ikhku, nawa kweꞌsxaꞌ txãa naꞌwẽy yuuwaꞌjsameethaꞌw. ¿Kĩh yuutega ikh wakx? Kain mjĩiniꞌ ewmeek yuꞌ, açaꞌ nyakh mjĩiniꞌ ewsak yuꞌ txãa paꞌga yuuçxáak ikh.
13 Adx yakhthẽꞌjweꞌsx, kuh yaakxnuwe naa kiweteweꞌsx ahçetewa.
14 Txãa paꞌgatey kweꞌsxaꞌ vxituwaꞌju kasehçxa bagaçxte yuhwa pçumée ĩtxi fxiꞌzewaꞌthe paꞌjsathaꞌw, txãasa íiçxáathaꞌw yakhthẽꞌjweꞌsxtxi peeygãjaꞌ. Nawa maawa txajx yakhthẽꞌjaꞌs peeygãasameꞌ, txãa vxituwaꞌju kasehsameeçxa txãꞌwẽ yuuna.
15 Maawa txãaweꞌsx yakhthẽꞌjweꞌsxtxi ahçena fxiꞌzesaꞌ, nasaꞌs ikhsa naꞌwẽysa íiçxáꞌ. Açaꞌ iꞌkweꞌsxaꞌ jii iꞌkwe nasaa ikhsaꞌ kim yuhwa pçumée ĩtxi fxiꞌzewaꞌjaꞌs jiꞌphumeetxna.
16 Jesukristoꞌ kweꞌsxtxi peeygãhçxa nweꞌweyaꞌ txajx ĩtxi fxiꞌzeniꞌs ivxiituk. Txãa txãꞌwẽ peeygãani yaaseꞌ. Açaꞌ kweꞌsxwa txãꞌwẽy kweꞌsx yakhthẽꞌjtx peeygãhçxa kweꞌsx ĩtxi fxiꞌzeniꞌs ivxiituwaꞌj jiꞌpthaꞌw.
17 Nawa kweꞌsx yakhthẽꞌj peejiina ũste uyçxawa kĩhçxáawa iijxtxuhdemeeçxaꞌ, ¿maꞌwẽ Dxus peeygãaniꞌs kweꞌsx ũuste jiꞌpthaꞌw jĩyaꞌ ãjakxthaꞌw?
18 Adx luuçxweꞌsx, kweꞌsx peeygãaniꞌ yuwejuçxáa peeygãa weꞌwewaꞌjmeꞌ. Isa peeygãjaççxaꞌ, ãate kaavxyaꞌjaꞌjwaꞌjaꞌ kĩhçxáawa puꞌçxna.
Kweꞌsx ũuste ewçxáa ũusutheçxaꞌ, Dxus dxiꞌpte jxpubamée ũste txãꞌwẽ yuuna
19 Txãꞌwẽ yũuçxaꞌ, isa Dxus luuçxçxa txãꞌwẽ yuꞌnjaꞌw, saꞌ Dxus dxiꞌptewa jxpubamée ũsneꞌtkaꞌw sũhwaꞌjaꞌs jiꞌphuꞌnjaꞌw.
20 Nawa kĩhteçxáawa jxpubaaçteꞌ, kweꞌsx ũusçxáa yuhwa kaayakiꞌjiꞌk açaꞌ Dxusaꞌ kweꞌsx ũuste jxthaakwe ew jiisaꞌ açaꞌ txajx dxiꞌpte ĩsxiiyaꞌ ãjameꞌnjaꞌw.
21 Adx peeygãanisaweꞌsx, kweꞌsx ũuste ewçxáa ũusuthena açaꞌ Dxusaꞌ pasuna sũhçxa
22 Dxusaꞌs pẽyiꞌnjaꞌw açaꞌ txãꞌ jxuka ũsuna txajx jxkaahnitx nwẽeseꞌjçxa Dxus jxthãasniꞌs kxtey yuuna fxiꞌzesatxiꞌ.
23 Dxusaꞌ naꞌwẽ yũuwaꞌjaꞌsku jxkaajaꞌ: txajx Nçxiꞌk Jesukristoꞌs ũuste jxpaꞌgaçxa, teeçxsa naꞌwẽçxah puutx yaꞌpeeygãhnak fxiꞌzekaah.
24 Dxus jxkaahnitx nwẽeseꞌjsaꞌ Dxus yakh fxiꞌzesa yuuna, açaꞌ Dxuswa txãaweꞌsx yakh fxiꞌzena. Dxusaꞌ kweꞌsxtxi txajx Espirituꞌs peesku, txãa paꞌga kweꞌsxaꞌ jiithaꞌw Dxusaꞌ kweꞌsx yakh ũswaꞌjsatewa.
