1 Juan 4:1-21
4 Adx peeygãanisaweꞌsx mpaꞌyajkxwe, txãꞌwẽ Dxus Espirituꞌs jiꞌpthaꞌw jĩsatxiꞌ txãꞌwẽ yuhtxna sũhmée mfxiꞌzewe. Txãꞌjĩsatxiꞌ ew jiyuwaꞌjaꞌ Dxus Espirituꞌs ũuste jiꞌphdxihtewa jiyuyaꞌ. Txãꞌwẽmeꞌ naa kiwete iiméh wala penaçtaꞌ Dxus yuwe ptaꞌsxsathaꞌw jĩna ĩsxiina uꞌjusa.
2 Naꞌjĩsaçxáa Dxus Espirituꞌs ũuste jiꞌphsa yuuna: Dxus Nçxiꞌk Jesukristoꞌ kweꞌsx naꞌwẽy nasaa yuuçxak vxyaa jĩsa yuuçxáa isa weꞌwesa yuuna.
3 Açaꞌ Jesusaꞌ kweꞌsx naꞌwẽy nasaa yuuçxak vxyaa jĩsameꞌ, txãꞌ Dxus Espirituꞌs ũuste jiꞌphmeena, wejxwa Kristoꞌs açesa yuuna. Iꞌkweꞌsxaꞌ iiwẽseꞌjneꞌkwe txãꞌjĩna weꞌwesa paꞌjatxna jĩniꞌs. Txãasa ũsyãꞌthaꞌ naa kiwete.
4 Adx peeygãanisaweꞌsx, iꞌkweꞌsxaꞌ Dxus luuçxiꞌkwe, txãasaiꞌkwe ĩsxiisatxiꞌ knay, txãa paꞌgatey Dxus Espiritu iꞌkweꞌsx ũuste ũssaꞌ thaakwe çxhãçxhasaꞌ naa kiwete ĩsxiisaweꞌsx ũuste ũssameeçxaꞌ.
5 Txãa ĩsxiisaꞌ naa kiweteweꞌsxtaꞌ. Txãꞌwẽçxaíitx naa kiweteweꞌsxçxáana ptaꞌsxiꞌ, açaꞌ nasa naa kiweteweꞌsxaꞌ nwẽeseꞌjeꞌtx.
6 Nawa kweꞌsxaꞌ Dxus luuçxthaꞌw, açaꞌ maawa Dxusna jiisaꞌ kweꞌsx ptaꞌsxniꞌs nwẽeseꞌjeꞌtx. Nawa Dxus luuçxmeesaꞌ, kweꞌsx ptaꞌsxniꞌs nwẽeseꞌjeꞌçmeetaꞌ. Kxah kweꞌsxaꞌ jiyuꞌnjaꞌw kim Dxus Espirituꞌs isa ũuste jiꞌphtewa, txãꞌwẽy kim kaypubaꞌjsatewa.
Peeygãanisaꞌ Dxus tasxuh yujaꞌ
7 Adx peeygãanisaweꞌsx, puutx yaꞌpeeygãhna fxiꞌzewaꞌj jiꞌpthaꞌw, txãa paꞌgatey peeygãhna fxiꞌzewaꞌjaꞌs Dxusku pees naa paꞌga. Açaꞌ maawa peeygãhna fxiꞌzesaꞌ Dxus luuçxtaꞌ Dxusaꞌs jiisa.
8 Dxusaꞌ peeygãasaꞌ, açaꞌ peeygãawaꞌjaꞌs jiꞌphmeesaꞌ Dxusaꞌs jiimeesaçxa txãꞌwẽ yuuna.
9 Dxusaꞌ kweꞌsxtxi peeygãaniꞌs ãate kaavxyaꞌjaꞌkh txajx Nçxiꞌk teeçxçxáasanawa naa kiwete kaahçxa, txãa nweꞌweteꞌ pçumée ĩtxi fxiꞌzewaꞌjaꞌs kweꞌsx jiꞌphukahn.
10 Naꞌwẽ yũunisaçxáa peeygãaniꞌ yaaseꞌ: Kweꞌsxaꞌ Dxusaꞌs açesatewa, txãa yuꞌ kweꞌsxtxi peeygãhçxak txajx Nçxiꞌk makwe teeçxçxáasatewa kweꞌsx pkalpaꞌgate uuwaꞌjsa vxitçxa kaah.
11 Adx peeygãanisaweꞌsx, Dxusaꞌ txãꞌwẽ kweꞌsxtxi peeygãhteꞌ, kweꞌsxwa txãꞌwẽy puutx yaꞌpeeygãhna fxiꞌzewaꞌj jiꞌpthaꞌw.
12 Kim yuhwa Dxusaꞌs uysa yuꞌ meetxna. Nawa kweꞌsxaꞌ puutx yaꞌpeeygãhna fxiꞌzeꞌnjaꞌw açaꞌ txãꞌwẽ yũuteꞌ, Dxusaꞌ kweꞌsx ũuste nes yuuna, aç yuuçxáa kweꞌsxwa txãa naꞌwẽy ew peeygãasa yuꞌnjaꞌw.
13 Kweꞌsxaꞌ Dxus yakh nes yuuteꞌ, txãawa txãꞌwẽy kweꞌsx ũuste nesku yuꞌ, txãa paꞌgaíiçxáak txajx Espirituꞌs kweꞌsx ũuste nvxiht.
14 Kweꞌsxaꞌ iiuythaꞌw Dxusaꞌ txajx Nçxiꞌkaꞌs kaakh naa kiwete nasatx nweꞌwekahn, txãasathaꞌw kweꞌsxaꞌ ãate ptaꞌsxiꞌ.
15 Maawa Jesusaꞌ Dxus Nçxiꞌkaꞌ jĩna weꞌwesaꞌ txãꞌ Dxus yakh ũssaçxa txãꞌjĩna, açaꞌ Dxuswa txajx ũuste nes yuuna.
16 Ãçxhaꞌ jiyuthaꞌw Dxusaꞌ kweꞌsxtxi txakwe wala peeygãaniꞌs. Dxusaꞌ peeygãasaꞌ, açaꞌ maawa peeygãhna fxiꞌzesaꞌ, Dxus yakh fxiꞌzesa yuuna, açaꞌ Dxuswa txãa yakh nes yuuna.
17 Txajuk kweꞌsx peeygãawaꞌjaꞌs isa jxukate yaꞌjiꞌphuna yaꞌpaꞌjaꞌ. Txãꞌwẽ yũunijũꞌ kastigãywaꞌj enteꞌ ũukhmeꞌnjaꞌw, txãa paꞌgatey naa kiwete kweꞌsxaꞌ Jesukristo naꞌwẽy peeygãasa yuꞌnjaꞌw naa paꞌga.
18 Dxus txakwe wala peeygãasaꞌs ¿maꞌwẽ ũukhwaꞌj yuukx? txãa paꞌgatey txajx peeygãanisaꞌ kweꞌsx ũukhniꞌs jxuka ivxiituꞌk. Açaꞌ ũukhsaꞌ kastigãywaꞌjneꞌtka sũhçxa ũukhuna, saꞌ txãꞌwẽ yaakxsaꞌ kweꞌsxtxi Dxus txakwe wala peeygãaniꞌs açxa ew jiimeeçxa txãꞌwẽ ũukhuna.
19 Dxus khuẽꞌyku kweꞌsxtxi peeygãh, txãa paꞌgathaꞌw ãçxhaꞌ kweꞌsxwa Dxusaꞌs peeygãjaꞌ.
20 Maawa Dxusaꞌs peeygãjaꞌth jĩçxawa yakhthẽꞌjaꞌs ahçena fxiꞌzesaꞌ, ĩsxiisa yuuna. Peekx yakhthẽꞌj uyna fxiꞌzenisaꞌs ahçeçxaꞌ, ¿maꞌwẽ yũuçxa Dxus uynimeesaꞌs peeygãjxaꞌ ãjakx?
21 Dxusaꞌ naꞌwẽk jxkaajaꞌ: Dxusaꞌs peeygãjaççxaꞌ, txãꞌwẽy peekx yakhthẽꞌjnawa peeygãawaꞌjaꞌ jĩꞌk.
