1 Juan 5:1-21
5 Maawa Jesusaꞌ Dxus tasxu yuusa Kristona sũhnaçxáa ũuste yaakxsaꞌ, Dxus luuçxçxa txãꞌwẽ yaakina. Dxusnawa peeygãjaççxaꞌ, Dxus luuçxtxiwa peeygãhna fxiꞌzewaꞌjaꞌ.
2 Dxusaꞌs peeygãhna txajx jxkaahnitxiꞌ nwẽeseꞌjçxaꞌ, Dxus luuçxtxiwa peeygãasaçxa txãꞌwẽ yuꞌnjaꞌw.
3 Dxusna peeygãani txãꞌwẽ txajx jxkaahnitx nwẽeseꞌjnisaꞌ. Txajx jxkaahniꞌ jxthaakwe yuꞌ thẽysameetaꞌ.
4 Maawa Dxus luuçxaꞌ naa kiwete ewmeesaꞌs nwẽeseꞌjmée jxuka knayuꞌtx. Jesukristoꞌs ũusuh jxuka yaakxpaꞌga yuuçxáak naa kiwete ewmeesaꞌs yaꞌknayuꞌ.
5 Maawa Jesusaꞌ Dxus Nçxiꞌkna sũhna ũusuh jxuka yaakxsa yuuçxáa, naa kiwete ewmeesaꞌs nwẽeseꞌjmée knayuutxna.
Jesukristoꞌ Dxus nçxiꞌktewa kaajiyuꞌjsaꞌ naataꞌ
6 Jesukristo naa kiwete kĩisaꞌ Dxus Nçxiꞌktewa kaajiyuꞌjsaꞌ naataꞌ: Yuꞌte bautisãyni vxiteꞌ kluuste uuni. Nawa yuꞌte bautisãynijũçxáa yuꞌ açxaméek ew yaꞌjiyuꞌ, naasáa kluuste uuniisa yakh txãa eꞌz jwedsa yakh yuuçxáak isa ew yaꞌjiyuꞌ Dxus Nçxiꞌktewa. Txãꞌsaꞌ Dxus Espirituk txãꞌjĩꞌ. Txajx weꞌweniꞌ isasataꞌ.
7 Jesukristoꞌ Dxus Nçxiꞌktewa jiisa cieluteꞌ tekhtaꞌ: Dxusaꞌ, vxiteꞌ Jesukristo íiçxáꞌ, vxiteꞌ Dxus Espirituꞌ. Açaꞌ txãa tekhsaꞌ txãa naꞌwẽçxaçxáatx weꞌweꞌ.
8 Txãꞌwẽy Jesukristoꞌ Dxus Nçxiꞌktewa jiisa naa kiweteꞌ tekhtaꞌ: Dxus Espiritu, vxiteꞌ yuꞌte bautisãynisa vxiteꞌ kluuste uuniisa. Açaꞌ txãa tekhsaꞌ txãa naꞌwẽçxaçxáatx weꞌweꞌ.
9 Piçthẽꞌjweꞌsx ptaꞌsxniçxáa yuhnawa isa yuh weꞌweneꞌ sũhnathaꞌw jxpaꞌgaꞌ. Açaꞌ Dxus weꞌweni yuꞌ wejx jxthaakwe isasa yuhna sũhna jxpaꞌgawaꞌj jiꞌpthaꞌw, txãa paꞌgatey Dxus yuuk weꞌweçxaꞌ: Jesukristoꞌ Adx Nçxiꞌkaꞌ jĩꞌ naa paꞌga.
10 Jesukristoꞌ Dxus Nçxiꞌkaꞌ sũhna fxiꞌzesaꞌ, Dxus Nçxiꞌkaꞌs ũuste jxpaꞌgasaçxa txãꞌwẽ yaakina. Nawa Dxus weꞌweçxaꞌ: Jesukristoꞌ Adx Nçxiꞌkaꞌ jĩniꞌs maawa jxpaꞌgasameꞌ, Dxusaꞌ ĩsxiijaꞌk jĩsa yuuna, txãꞌwẽ Dxusaꞌ isaneꞌ weꞌweꞌ sũhmeeçxa.
11 Jesukristoꞌ Dxus Nçxiꞌkaꞌ jĩna weꞌweçxaꞌ, Dxusaꞌ kweꞌsxtxiꞌ pçumée ĩtxi fxiꞌzewaꞌjaꞌs peesku jĩnisaꞌ, txãa yuuçxáa pçumée ĩtxi fxiꞌzewaꞌjaꞌs jiꞌphsaꞌ naa paꞌga.
12 Txãa paꞌga maawa Dxus Nçxiꞌkaꞌs ũuste jxpaꞌgasaꞌ, pçumée ĩtxi fxiꞌzewaꞌjaꞌs jiꞌphsa yuutxna. Nawa Dxus Nçxiꞌkaꞌs ũuste jxpaꞌgasameꞌ, pçumée ĩtxi fxiꞌzewaꞌjaꞌs jiꞌphmeesa yuutxna.
Pkal perdon jiꞌphmeesawa ũstaꞌ
13 Dxus Nçxiꞌkaꞌs ũuste jxpaꞌgasaꞌ, pçumée ĩtxi fxiꞌzewaꞌjaꞌs jiꞌphneꞌtkaꞌw sũhna jiyukahnthu iꞌkweꞌsxtxi ptaꞌsxna fxiꞌjaꞌ.
14 Açaꞌ txãꞌwẽ yaakxsatxiꞌ Dxusaꞌ pasuꞌk txajx jxthãasniçxáꞌs pxthaa weꞌwena pẽjxteꞌ txãꞌsaꞌ ew jiithaꞌw.
15 Kweꞌsx pxthaa weꞌweniꞌs Dxusaꞌ wẽseꞌjna ũstewa maꞌwẽ ew jiitkaꞌw txãꞌwẽy kweꞌsx pẽyniꞌs jxpaꞌgawaꞌjaꞌswa ew jiithaꞌw.
16 Yakhthẽꞌj pkalte fxiꞌzena ũstewa txãa pkalaꞌ perdon jiꞌphte uyçxaꞌ, maawa Dxusaꞌs neeweꞌwewaꞌjaꞌ txãa pkalsa paꞌgate, açaꞌ yakhthẽꞌj txãꞌwẽ fxiꞌzesaꞌs Dxusaꞌ ĩtxi fxiꞌzewaꞌjaꞌs peesuna. Nawa pkal perdon jiꞌphmeesa ũstaꞌ txãꞌwẽsate fxiꞌzena ũste yuꞌ, Dxusaꞌs neeweꞌwewaꞌjaꞌs jxkajaꞌçmeeth.
17 Kĩhwa ewmée yũuniꞌ pkalçxaçxáataꞌ, nawa perdon jiꞌphtaꞌ.
18 Kweꞌsxaꞌ jiithaꞌw maawa Dxus luuçx yãꞌjaꞌ peena yuꞌ pkalte fxiꞌzeꞌçmeꞌ. Txãꞌwẽ yũuweꞌsxte Dxus Nçxiꞌkaꞌ txajx kusetek jxaawuꞌ eçxthẽꞌj suwkahmén. Txãa paꞌgak pkalte fxiꞌzeꞌçmée.
19 Kweꞌsxaꞌ Dxus luuçx yuhthaꞌw, nawa naa kiwete nasa jxukaysa Dxusna yajkxmée fxiꞌzesaꞌ eçxthẽꞌj kuseteweꞌsxtaꞌ txãꞌsaꞌ jiithaꞌw.
20 Jiithaꞌw Dxus Nçxiꞌk naa kiwete kĩhçxaꞌ, Dxus ĩtxisaꞌs jiyuwaꞌjaꞌs kweꞌsxtxi ũsku. Txãa paꞌga Dxus ĩtxisa Nçxiꞌk Jesukristo yakh fxiꞌzena ũsthaꞌw. Txãa Dxus ĩtxisaꞌ bagaçxte yuhwa pçumée ĩtxi fxiꞌzewaꞌjaꞌs kweꞌsxtxi peessaꞌ.
21 Adx luuçxweꞌsx, mpaꞌyajkxwe dxusmeeçxáꞌs yaakxniꞌs.
