1 Korintios 1:1-31
1 Adxaꞌ Pablo yaaseth, Dxus peeygãhçxa paꞌyate Jesukristo jxkaahnisa. Txãꞌwẽ yũuwaꞌjaꞌs Dxusku txhitxhçxa nvxiht.
2 Korinto çxhabte yakhthẽꞌjweꞌsxtxi weçxana fxiꞌjaçthu, txãꞌwẽy yakhthẽꞌj Sosteneswa yuwe weçxaakajaꞌk. Iꞌkweꞌsxaꞌ Kristo Jesus yakh txutemée fxiꞌzeyaꞌ utxaapaꞌga Dxus luuçxiꞌkwe. Majũweꞌsxwa kweꞌsxtxi jxpeꞌjsa Jesukristo yasena kxsussa ũstxna txãaweꞌsx yãꞌjçxa jaꞌdaçxah txajx tasxte yuuçxáa fxiꞌzekahnku Dxusaꞌ paꞌya. Txãa Jesukristoꞌ kweꞌsx jxukaysatx jxpeꞌjsaꞌ.
3 Iꞌkweꞌsxtxiꞌ Dxusaꞌ puꞌçxhina vxiteꞌ kweꞌsxtxi jxpeꞌjsa Jesukristowa. Txãa paꞌga Dxus yakhçxáa mfxiꞌzewe.
Jesukristo puꞌçxpaꞌga Dxusaꞌ kĩh yuhwa peejxmée jxukak pees
4 Dxusaꞌs weçxana nesthu yuꞌ iꞌkweꞌsx paꞌgate, txãꞌwẽ Dxusaꞌ iꞌkweꞌsxtxi peeygãhçxa kĩh yuhwa peejxmée jxukak pees Jesukristo puꞌçxpaꞌga.
5 Txãꞌwẽ Kristo yakh fxiꞌzeyaꞌ utxaapaꞌga, Dxusaꞌ txajx dxiꞌpte kĩhtewa jxuka iꞌkweꞌsx sxiigmée fxiꞌzewaꞌjaꞌs jxukak ũs, Dxus yuweꞌs ptaꞌsxwaꞌj maꞌk yuu, meeçxaꞌ maa isa ptaꞌsxsatewa jiyuwaꞌj maꞌk yuu nawa jxuka.
6 Txãa paꞌga Kristo kaapiyaꞌjniꞌs iꞌkweꞌsx ũuste kaavxyaꞌjaꞌiꞌkwe.
7 Txãꞌwẽ Dxus puꞌçxteꞌ, iꞌkweꞌsxaꞌ kĩhte yuhwa sxiigmée iꞌkwe txajx dxiꞌpte fxiꞌzeꞌ Jesukristo kĩiwaꞌj enaꞌs ũythasna.
8 Dxusaꞌ txãꞌwẽ ewçxáa jxpeꞌjna nes yuuna nmeh entepkaçx, kxah Jesukristo kĩi enteꞌ iꞌkweꞌsxaꞌ kĩhte yuhwa yuuwemeesa yuuneꞌkwe.
9 Dxusaꞌ naꞌwẽ ewçxáa jxpeꞌjyaꞌ neeyũuk naꞌ kxtey yuuna. Txãꞌwẽ ewçxáa jxpeꞌjyaꞌ íiçxáak txajx Nçxiꞌk Jesukristo yakh fxiꞌzeyaꞌ paꞌya iꞌkweꞌsxtxiꞌ.
Dxus yakh fxiꞌzesaweꞌsx puutx puiina txuteni
10 Kweꞌsxtxi jxpeꞌjsa Jesukristo dxiꞌpte yakhthẽꞌjweꞌsxtxi yuꞌkxpejeçthu, puutx ewteçxah puutx weꞌweçxa txutemée kxazíi jaꞌdaçxah teeçxsa naꞌwẽçxaçxáa ew yajkxna fxiꞌzekahn.
11 Kloé yatteweꞌsxaꞌ adxaꞌs ptaꞌsxtxi txãꞌwẽ iꞌkweꞌsxaꞌ puiina fxiꞌzena ũstaꞌ jĩna, txãa paꞌgath adx yakhthẽꞌjweꞌsxtxi txãꞌwẽ weꞌweꞌ.
12 Iꞌkweꞌsxaꞌ teeçxsa naꞌwẽçxah fxiyfxiy weꞌwena ũsiꞌkwe: Maaíi yuꞌ, adxaꞌ Pablo yakh uꞌjsath, naapkaçxhaꞌ vxiteꞌ Apolos yakh uꞌjsath. Vxiteꞌ Pedro yakh uꞌjsath, açaꞌ vxiteíi yuꞌ Kristo yakh uꞌjsath jĩna iꞌkwe weꞌweꞌ.
13 Nawa Kristoꞌ ¿teeçx ahteweꞌsx yakhçxáa fxiꞌzewaꞌjsaga yuuáꞌ? ¿Iꞌkweꞌsx paꞌgate Pabloga kluuste uuáꞌ? Meeçxawa ¿iꞌkweꞌsxaꞌ Pablo yaseꞌs kxsusçxakwe yuꞌte bautisãyni yuuáꞌ?
14 Ewçxáa neꞌtka iꞌkweꞌsxtxi maa yuhtxwa yuꞌte bautisãymée, naasáa Krispo vxiteꞌ Gayo txãaweꞌsxçxáatxthu bautisãy.
15 Txãa paꞌga kim yuhwa txãꞌwẽ Pablo yaseꞌs kxsusçxa bautisãynith jĩyaꞌ ãjameetxna.
16 Vxiteꞌ Estefxanasweꞌsxçxáatxthu bautisãy, meeçxaꞌ vxitetx bautisãy wáꞌntka nawa txãa yuutxiꞌ yaakiꞌçmeeth.
17 Kristoꞌ adxaꞌs bautisãyyaꞌ kaahmeꞌ, naasáa kweꞌsx ewte neeyũuwaꞌjaꞌs ptaꞌsxyaꞌçxáak kaah. Nawa naa kiweteweꞌsxaꞌs jiyunisa yakhméek ptaꞌsxkaah. Txãꞌwẽmeꞌ, Kristo kluuste uuniꞌs ptaꞌsxnisaꞌ eꞌskhẽ neeyũuweꞌsxte.
Nweꞌweyaꞌ ãjawaꞌjaꞌs Dxus pheuꞌjçxa nvxiitnisa
18 Kristoꞌ kweꞌsx paꞌgate kluuste uuk jĩna ptaꞌsxniꞌ kĩhwa seelpimeesa naꞌwẽ neꞌ pthũuseꞌ vxituçxa nxus kiwete uꞌjwaꞌjsatxiꞌ. Nawa Dxus yakh ũsyaꞌ uꞌjwaꞌjsa kweꞌsx yuutxiꞌ txãꞌwẽ ptaꞌsxniꞌ seenaꞌ wala seelpisaꞌ, kweꞌsxtxi ewte nvxiitwaꞌjsaꞌ naa paꞌga.
19 Dxus librute weꞌweçxaꞌ:
Ivxiituꞌnja naa kiweteweꞌsxçxáꞌs jiyuniꞌs,
Saꞌ naa kiweteweꞌsxçxáꞌs jiyuniꞌs kĩhte yuhwa selpiiwaꞌjmée nvxiituꞌnja jĩꞌk.
20 Txãꞌwẽꞌ açaꞌ naa kiweteweꞌsxçxáꞌs jiyuniꞌ ¿kĩhte selpiikx? Kĩhtewa jxuka jiisa kaapiyaꞌjsathaꞌw sũhsaꞌ ¿mtee yuutxki? Naa kiwete kĩh ũsna txãꞌsna jxuka jiisathẽꞌj ¿kĩh yuukx? Ãçxhaꞌ txãꞌ ¿kĩhteçxáꞌ selpiimaꞌk? Naa kiweteweꞌsxçxáꞌs jiyunisaꞌs kĩhtewa seelpimeek vxit Dxusaꞌ.
21 Dxusaꞌ jiyuk naa kiweteweꞌsxçxáꞌs jxuka jiyusaꞌ Dxusaꞌs jiyuyaꞌ ãjawaꞌjmeesatewa. Txãasak kĩhtewa jiimeeçxawa txãꞌsna ũusuh jxuka yajkxçxa txajx ptaꞌsxniꞌs waꞌlmée jxpaꞌgateçxáa nweꞌwewaꞌjaꞌs vxit, makwe txajx ptaꞌsxniꞌ vxite yakh yuꞌ seelpimée naꞌwẽtewa.
22 Judiuweꞌsxaꞌ cielujũ seenaꞌsa kaavxyaꞌjaꞌjniꞌstxi uy wẽjeꞌ, naapkaçxhaꞌ griegoweꞌsxaꞌ naa kiwete jiyunisaꞌstxi pakwéꞌ.
23 Nawa kweꞌsxaꞌ Kristoꞌs kluuskhẽ kiꞌpçxa ikhniçxáꞌsthaꞌw ptaꞌsxiꞌ. Judiuweꞌsxaꞌ txãꞌwẽ ptaꞌsxniꞌstxi jxpubaꞌ, naapkaçxhaꞌ griegoweꞌsx yuutxiꞌsaꞌ kĩhtewa seelpimée luuku weꞌweni naꞌwẽ neꞌ pthũuseꞌ.
24 Nawa Dxus txhitxhnisa judiu vxiteꞌ griego txãaweꞌsx yakh yuꞌ, Kristo yuuçxáa nweꞌwewaꞌjsaꞌ, nweꞌwewaꞌjaꞌs Dxus pheuꞌjçxa nvxiitnisa.
25 Naa kiwete nasa jiisa ũstxna txãaweꞌsx yakh yuꞌ, Dxus jiimeesa naꞌwẽsaçxawa, txãaweꞌsxte jxthaakwe jiisaꞌ Dxusaꞌ. Açaꞌ Dxus çxhãçxhameeçxa ãjasamée naꞌwẽsaçxawa, nasa naa kiweteweꞌsxte jxthaakwe çxhãçxhasaꞌ.
26 Yakhthẽꞌjweꞌsx, iꞌkweꞌsxtxi Dxus txhitxhniꞌs mjiyuwe. Iꞌkweꞌsxaꞌ naa kiweteweꞌsxaꞌs yuꞌ walamée jii iꞌkwe saꞌ çxhãçxhasawa kuhmée iꞌkwe, saꞌ jxtuhthesawa kuhmée iꞌkwe.
27 Txãꞌwẽçxawa iꞌkweꞌsxaꞌ Dxus txhitxhnisa iꞌkwe, iꞌkweꞌsxtxi jiimeesataꞌ jĩna naa kiweteweꞌsx nasa weꞌweꞌtx txãaweꞌsxtxi kaythameꞌjwaꞌjsa. Saꞌ txãꞌwẽy naa kiwete nasa weꞌweçxaꞌ: Çxhãçxhamée ãhmeesataꞌ jĩꞌtx txãaweꞌsxtxiwa kaythameꞌjwaꞌjsa.
28 Naa kiwete nasa weꞌweçxaꞌ: Kĩhtewa seelpimeesataꞌ jĩnatx açeweꞌweꞌ txãa açeweꞌwesatx seelpimeekhẽ nvxiitwaꞌjsa iꞌkwe.
29 Txãꞌwẽ iꞌkweꞌsxaꞌ ãhmeekwesatx txhitxhnisa iꞌkwe naꞌ kim yuhwa Dxus dxiꞌpte iiwejçx yajkxna fxiꞌzeyaꞌ ãjameeneꞌkwe.
30 Kristo Jesus yakh fxiꞌzewaꞌjaꞌs Dxusku vxit. Açaꞌ Kristoꞌs jiyuwaꞌjaꞌswa Dxus íiçxáak vxit. Saꞌ txãa Kristopaꞌga yuuçxáa kweꞌsxaꞌ Dxus dxiꞌpte ewtethaꞌw neeyũu, txajx tasxu txutemée fxiꞌzeyaꞌ.
31 Txãa paꞌga Dxus yuuçxáꞌs weçxana tuutheꞌjwaꞌjaꞌs Dxus librute naꞌwẽ fxiꞌjni ũsaꞌ: Maawa jiith sũhna jxtuhthe yaakxwẽjeꞌççxaꞌ, Dxus yuuçxáꞌs weçxana tuutheꞌjwaꞌjaꞌ jĩꞌk.
