1 Korintios 10:1-33
10 Yakhthẽꞌjweꞌsx miiyajkxwe: nyafxiitey kweꞌsx yaçgaweꞌsxaꞌ jxukay Dxus nweꞌwena jxpeꞌjni tãaph aphnitx fxiꞌzena ũsuꞌ, saꞌ jxukay ĩkhwala bejuywa ew uykhẽwtxi.
2 Jxukay Moises yakh txutemée fxiꞌzeçxa yuuçxáatx jxukay tãaph dxiite Dxus nweꞌweni yuu, saꞌ txãꞌwẽy ĩkhuywa uykhẽwtxi,
3 saꞌ jxukaysatx Dxus sãꞌjĩni fxiꞌzena ũsuꞌ.
4 Txãꞌwẽytxi jxukaysa Dxus yusni yuꞌaꞌswa tudxna fxiꞌzena ũsuꞌ, saꞌ Dxusaꞌ txãaweꞌsx yakh ih dxiꞌthe piꞌkxna uꞌjweççxaꞌ, penxate yuꞌ kutxiꞌjçxa yusku. Açaꞌ txãa penxa yuꞌ Kristok yuꞌ.
5 Txãꞌwẽ Dxusaꞌ ew yũutewa, nasa wejx kuhsa yuꞌ Dxus dxiꞌpte ew fxiꞌzemeetaꞌ, txãa paꞌga Dxus kastigãyte uutx nasa uꞌpnimée kiwesu.
6 Txãꞌwẽ kastigãyni uutx nawa txãa yuꞌ kweꞌsx jxpaꞌyajkxçxa txãaweꞌsx naꞌwẽy ewmée yũukahmençxáak txãꞌwẽ yũu.
7 Txãa paꞌga iꞌkweꞌsxaꞌ dxus ĩtximeesatxiꞌ neeweꞌwenuwe, txãaweꞌsx naꞌwẽ yuꞌ. Txãaweꞌsx dxus ĩtximeesatx neeweꞌweniꞌs naꞌwẽk ptaꞌsxiꞌ Dxus libruꞌ: Nasaꞌ weçxana fxiestaꞌjyaꞌ takhtxi ũꞌna tudxna jĩꞌk.
8 Txãaweꞌsx naꞌwẽ ptamsamée kazx pkal yuuwaꞌj jiꞌphmeethaꞌw. Txãꞌwẽ yũusaꞌ uutx teeçx enteçxáa weintitres mil nasa.
9 Kxtee ũssa maaíi yuꞌ Dxusaꞌs juunaꞌ ũusçxaweꞌwetx, açaꞌ txãꞌwẽ weꞌwepaꞌga ul weesweesa waꞌkxte uutx. Nawa kweꞌsxaꞌ juunaꞌ weꞌwewaꞌj jiꞌphmeethaꞌw Dxusaꞌs.
10 Maaíi yuꞌ Dxusaꞌs açeweꞌwetx ewmeek yũu jĩna. Açaꞌ txãꞌwẽ weꞌwepaꞌga, Dxus kaahni angel txãaweꞌsxtxiꞌ ivxiituk. Nawa kweꞌsxaꞌ txãꞌwẽ açeweꞌwewaꞌj jiꞌphmeethaꞌw.
11 Txãniitey kweꞌsx yaçgaweꞌsxtxi txãꞌwẽk yũu, açaꞌ txãꞌsaꞌ Dxus librute fxiꞌjnik neeyũu kweꞌsxwa jxpaꞌyakx fxiꞌzekahn, nmeh ensaꞌ utxaana uꞌjweçaꞌ txãa paꞌga.
12 Txãꞌwẽ Dxus yakh ew ũsthu sũhna yaakxsaꞌ jxpaꞌyakxwaꞌjaꞌ pkalte weteyaꞌmée.
13 Iꞌkweꞌsxtxi pkalte pẽtxwaꞌjsa paꞌjaꞌneꞌ txãꞌ uꞌsesa thaakwe seenaꞌ thẽysameetaꞌ, jxukaysa txãꞌwẽsaçxaçxáatx jiꞌphusathaꞌw. Nawa Dxusaꞌs piꞌkineꞌkwe açaꞌ txãꞌ iꞌkweꞌsx wantãyyaꞌ çxhãçxhawaꞌjmeesa yuꞌsaꞌ kaavxyaꞌjaꞌjmeena, wejxwa pkalte pẽtxwaꞌjsa paꞌjaçpkaçxhaꞌ, maꞌwẽ txãa pkaluh iyuwaꞌjaꞌswa ih puꞌçxhina Dxusaꞌ.
14 Txãa paꞌga yakhthẽꞌjweꞌsx, dxus ĩtximeesatx neeweꞌwenijũ kasejkahn yuꞌkxpehniꞌs mwẽeseꞌjwe:
15 Iꞌkweꞌsxaꞌ peekx jii iꞌkwe adxaꞌ kĩh yuupaꞌga neꞌtka txãꞌwẽ jxkaajaꞌ nawa adx weꞌweniꞌs mpaꞌyajkxwe.
16 Ũus miiyajkxwe: Kristoꞌ uuççxaꞌ txajx eeaꞌs pkawku açaꞌ txãa uuniꞌs kaayakiꞌjsa wasoteweꞌsxaꞌs jxpaꞌgaçxa oraĩꞌthaꞌw. Txãꞌwẽ yũunisaꞌ Kristo yakh utxaaçxa txãa yakh txutemeethaꞌw fxiꞌzeꞌ jĩnisaꞌ. Txãꞌwẽy Kristoꞌ uuyaꞌ txajx kakweꞌs dukhku açaꞌ txãa uuniꞌs kaayakiꞌjsa panaꞌs peꞌltedeçxa jxtxudeꞌthaꞌw. Txãꞌwẽ yũunisaꞌ Kristo yakh utxaaçxa txãa yakh txutemée ihthaꞌw fxiꞌzeꞌ jĩnisaꞌ.
17 Makwe wala kuhçxawa teeçx panaꞌsçxáa jxukaysathaꞌw ũꞌweꞌ, txãasathaꞌw teeçxçxáa naꞌwẽsa yuuna paꞌjaꞌ.
18 Miiyajkxwe Israelweꞌsxtxi. Txãaweꞌsxaꞌ Dxusna weçxayaꞌ tajkx ikhni çxiçxaꞌs ũꞌsaꞌ Dxus yakh txutemée fxiꞌzesaçxatx txãꞌwẽ yũꞌ.
19 Txãꞌjĩteꞌ, txãꞌwẽ yũuyaꞌ tajkx ikhnisa çxiçxte kĩh pẽethejeneꞌ sũjkahn txãꞌjĩçmeeth, txãa paꞌgatey dxus ĩtximeesaꞌ kĩhwa meesataꞌ.
20 Txãꞌwẽtewa, dxus ĩtximeesatx weçxayaꞌ tajkx ikheꞌtx Dxus cieluteweꞌsxaꞌs jiimeesaꞌ, açaꞌ txãꞌwẽ yũuniꞌ dxus ĩtximeesaçxáatx weçxanisameꞌ, eçxthẽꞌjaꞌs weçxanisaꞌ. Açaꞌ iꞌkweꞌsxaꞌ txãꞌwẽ eçxthẽꞌj yakh utxaaçxa fxiꞌzenuwe jĩçxath txãꞌwẽ weꞌweꞌ.
21 Txãꞌwẽ eçxthẽꞌj yakh utxaaçxa weçxana ũsçxaꞌ, Kristo puuçni mesateweꞌsxaꞌs yuꞌ jxpaꞌgayaꞌ ãjameeneꞌkwe.
22 Kweꞌsxtxi jxpeꞌjsa Jesukristoꞌs kaaũusçxaꞌjwaꞌjsameethaꞌw kweꞌsxaꞌ, txãa paꞌgatey txãate jxthaakwe çxhãçxhasameethaꞌw naa paꞌga.
Kĩhnawa ũꞌyaꞌ ãjawaꞌjsathaꞌw, nawa jxpaꞌyakxwaꞌjaꞌ vxitetx peeygãhçxa
23 Isakweꞌsxaꞌ kĩhnawa ũꞌyaꞌ ãjawaꞌjsa yuhthaꞌw, nawa jxpaꞌyakxwaꞌj jiꞌpthaꞌw. Makwe kĩh ũꞌnawa ũꞌyaꞌ ãjaꞌnjaꞌw nawa txãꞌ Dxus yakh çxhãçxha fxiꞌzewaꞌj yuꞌsaꞌ puꞌçxhiꞌçmeetaꞌ.
24 Peekx fxiꞌzewaꞌjçxáꞌs yajkxmée, vxitetxwa peeygãawaꞌjaꞌ ew kfxiꞌzeꞌjyaꞌ.
25 Merkaute çxiçx maꞌwẽsanawa weyçxa maa sũhmée ũꞌwaꞌjaꞌ,
26 txãa paꞌgatey Dxus jĩiçxaçxáataꞌ naa kiwe, txãꞌwẽy naa kiwete ũssa kĩjkĩhwa jxuka.
27 Meeçxaꞌ Dxusaꞌs jiimeesa piꞌkxteꞌ, iꞌkweꞌsxaꞌ uꞌjçxa kĩh puuçtewa txãꞌsaꞌ ũꞌweçxáaneꞌkwe maa sũhmée.
28 Nawa Dxusaꞌs açxamée ew jiisaꞌ naꞌjĩna weꞌwena: Naa çxiçxaꞌ dxus ĩtximeesatx weçxanisaꞌ naꞌ ewmeena jĩteꞌ, idxaꞌ txãꞌsaꞌ ũꞌmeeneꞌga, txãꞌwẽ ptaꞌsxsaꞌs kaypubaꞌjyaꞌmée.
29 Vxitesa ũus yaakxniꞌs jxpaꞌyakxkahnthu weꞌweꞌ, iidx ũus yaakxniꞌs weꞌweçmeeth.
Nawa Dxusaꞌs sxiigmée ew jiisaꞌ naꞌwẽ pẽyina: Adx kĩhnawa ũꞌyaꞌ ãjaniꞌs ¿kĩh yũuçxa vxitesa neeweyaꞌ ãjakx?
30 Adxaꞌ kĩh ũꞌweççxawa Dxusaꞌs weçxana orãyçxath ũꞌweꞌ, açaꞌ adx ũꞌniꞌs ¿kĩh yũupaꞌga ewmée nuyweꞌwetxki? jĩtxna.
31 Ew yujaꞌ, nawa iꞌkweꞌsx ũꞌnisa maꞌk yuu kĩh yũuççxawa Dxus dxiꞌpte selpiiwaꞌjsaçxáꞌs thegçxa kxtey myũuwe.
32 Judiuweꞌsx vxiteꞌ judiumeesa, meeçxaꞌ Dxus luuçx maatxwa kaypubaꞌjweꞌsxteꞌ mpaꞌyajkxwe.
33 Adxaꞌ naꞌwẽçxáath paꞌpçxuꞌ: peekx wẽt fxiꞌzewaꞌj yuꞌs yajkxmée, vxitesatx puꞌçxwaꞌjaꞌsçxáath pakwena fxiꞌzeꞌ, txãaweꞌsx ũusaꞌ ewte neeyũukahn.
