1 Korintios 11:1-34
11 1 Adxwa maꞌwẽtka Kristo fxiꞌzeniꞌs thegçxa fxiꞌzeꞌ, txãꞌwẽy iꞌkweꞌsxwa adx fxiꞌzeniꞌs thegçxa mfxiꞌzewe.
Uꞌyaꞌ kultote jxpaꞌyakxwaꞌj jiꞌphaꞌ
2 Yakhthẽꞌjweꞌsxtxi weçxaꞌth adxaꞌs peçxkanamée yajkxçxa adx kaapiyaꞌjnitxiꞌ kxtey yuuna fxiꞌzepaꞌga.
3 Nawa naꞌwẽsaꞌswa mjiyuwe: Kristoꞌ Dxusaꞌs nwẽeseꞌjsaꞌ, açaꞌ piçthẽꞌjweꞌsxaꞌ Kristoꞌs nwẽeseꞌjwaꞌjsataꞌ, açaꞌ uꞌyweꞌsxaꞌ nmiꞌtx nwẽeseꞌjwaꞌjsataꞌ.
4 Txãꞌwẽ yũuwaꞌjsaçxah maa piçthẽꞌjwa çxuaꞌaꞌs kiꞌpmée kultote orãyna Dxus yuweꞌs ptaꞌsxna ũsçxaꞌ, Kristoꞌs weeçxsa yuuniꞌ.
5 Txãꞌwẽy maa uꞌywa dxiktheꞌs yaꞌpathmée orãyna Dxus yuweꞌs ptaꞌsxna ũsçxaꞌ, txajx nmiꞌaꞌs weeçxsa yuuniꞌ. Txãꞌwẽ yaꞌpathmeeteꞌ, dxkhasaꞌs kwaakaꞌjni naꞌwẽsaꞌ.
6 Uꞌyaꞌ txãꞌwẽ yaꞌpatheçmée yãꞌjçxaꞌ, teehwed dxkhasaꞌs tee kwaakaꞌj. Nawa uꞌy txãꞌwẽ dxkhasaꞌs kwaakaꞌtheꞌ thaameweçxteꞌ, tee yaꞌpath txajx dxiktheꞌs.
7 Piçthẽꞌjaꞌ dxiktheꞌs yaꞌpathwaꞌjsameꞌ, txãa paꞌgatey Dxus wedxçxak txãa naꞌwẽysa vxit, txajx jxkaahnitx nwẽeseꞌjwaꞌjsa. Naapkaçxhaꞌ uꞌyaꞌ piçthẽꞌj jxkaahnitx nwẽeseꞌjwaꞌjsaꞌ.
8 Dxusaꞌ piçthẽꞌjaꞌs takiꞌjiççxaꞌ, uꞌy kakwejuweꞌsxaꞌs kutxiꞌjçxa pheuꞌjmeꞌ, wejxwa piçthẽꞌj kakwejuweꞌsxaꞌs kutxiꞌjçxak uꞌyaꞌs pheuꞌj.
9 Piçthẽꞌjaꞌ puꞌçxwaꞌjsa peejxku yuꞌ, txãa paꞌgaçxáak uꞌyaꞌ pheuꞌjni yuu. Uꞌy txãꞌwẽ puꞌçxwaꞌjsa peejxte piçthẽꞌjaꞌs pheuꞌjni yuumeꞌ.
10 Txãa paꞌga uꞌyaꞌ piçthẽꞌjaꞌs nwẽeseꞌjwaꞌjsaꞌ jĩni dxikthete yaꞌpathnisa jiꞌphuwaꞌjaꞌ. Txãꞌwẽ yaꞌpathwaꞌjsaçxah kxtey yuumeeteꞌ, Dxus angelesweꞌsx thegna ũstaꞌ.
11 11:11-12 Txãꞌwẽtewa, ew ũus yajkxte yuꞌ, maa yuhwa thaakwesameetaꞌ, txãa paꞌgatey piçthẽꞌjwaçwa uꞌy kakwetemée peekxçxáa yuꞌ naa kiwete upxyaꞌ ãjaꞌçmeꞌ, txãꞌwẽy uꞌywa piçthẽꞌj jiꞌphmée peekxçxáa yuꞌ naa kiwete upxyaꞌ ãjaꞌçmeꞌ. Isayujaꞌ uꞌyaꞌ piçthẽꞌj kakwejuweꞌsxaꞌsku pheuꞌjni yuu, txãꞌwẽy piçthẽꞌjwa uꞌy kakwetek upxyaꞌ ãjaꞌ. Txãasa maa yuhwa thaakwesamée, eꞌzíi Dxus pheuꞌjniçxaçxáataꞌ.
12 —
13 Txãꞌwẽꞌ naa paꞌga iꞌkweꞌsx pweꞌsx ũus miiyajkxwe, aan ewna txãꞌwẽ Dxusaꞌs orãiççxa uꞌyaꞌ dxiktheꞌs yaꞌpathmeete.
14 Piçthẽꞌjaꞌ peekx yuu dxkhas jxuꞌj jiꞌphuwaꞌjmeesaçxa txãꞌwẽ khyuꞌjaꞌtheꞌ, thaame yujaꞌ.
15 Nawa uꞌy txãꞌwẽ dxkhas jxuꞌj jiꞌphteꞌ, zhiçxkwesaꞌ. Txãa paꞌgatey dxiktheꞌs aphwaꞌjíiçxáak dxkhas jxuꞌj nvxiitni yuu.
16 Nawa maaíi yuꞌ dxiktheꞌs yaꞌpathwaꞌjaꞌs jxkaahniꞌs waꞌlsa ũsçxaꞌ, peekx ũus yaakxwaꞌj jiꞌphtaꞌ. Txãꞌwẽmeꞌ kweꞌsx vxiteꞌ Dxus luuçx msuuweꞌsx maa yuhwa jiimeetaꞌ dxiktheꞌs yaꞌpathmée Dxusaꞌs orãyni yuꞌs.
Ewmée yũuyaꞌçxáa Santa Cenaꞌs ũꞌyaꞌ pkhaakheni
17 Naꞌwẽsana ptaꞌsxna fxiꞌjaççxaꞌ, iꞌkweꞌsxaꞌ ew yũusa iꞌkwe jĩna weçxayaꞌ ãjaꞌçmeeth. Iꞌkweꞌsxaꞌ Dxusaꞌs weçxayaꞌ pkhaakheniꞌ selpiipkaçxte, wejx suwsaçxáana sũjuꞌth.
18 Iꞌkweꞌsxaꞌ Dxusaꞌs weçxayaꞌ pkhaakheççxaꞌ, bagaçxtewa iꞌkweꞌsx pweꞌsx puutx fxiifxii txuteeyaꞌçxáatx pkhaakheꞌ jĩꞌtx açaꞌ txãꞌwẽ ptaꞌsxniꞌ isa yuhna sũjuꞌth.
19 Pkhaakhesa iꞌkweꞌsx pweꞌsx txãꞌwẽ fxiifxii txuteniꞌ ew yuhna, txajíiçxáa mtee pkhaakhesa wejx Dxus yakh ew fxiꞌzesatewa yaꞌjiyuna.
20 Nawa Jesukristo mesateweꞌsxaꞌsthaꞌw jxpaꞌgaꞌ jĩççxa txãꞌwẽ fxiifxii txuteeçxa ũsniꞌ txãꞌ Dxus jxthãasnimeꞌ.
21 Txãa paꞌgatey iꞌkweꞌsxaꞌ ih pkhaakheçxa jaꞌdaçxah ũꞌwaꞌj en ãjaçpkaçxhaꞌ, puutx fxii txuteeçxa maaíi yuꞌ yaçte ũꞌweꞌiꞌkwe, vxite jĩi yuꞌ nvxihtmée. Açaꞌ vxiteçxáa txikpkaçx meeçxawa tũunus tudxteꞌ, vxite yuꞌ ũꞌwaꞌj jiꞌphmeetx wẽena neeyũꞌ.
22 Txãꞌwẽçxáa yũuççxaꞌ, iꞌkweꞌsx yat-suywa ũꞌwaꞌjna. Txãꞌwẽmeꞌ, vxitee ũꞌwaꞌj yuꞌ nvxihtmeeçxaꞌ, kxũusuꞌjuꞌiꞌkwe, açaꞌ puutx yaaçeniçxáak kasejeꞌ. Iꞌkweꞌsx txãꞌwẽ yũuna ũsteꞌ, adxaꞌ iꞌkweꞌsxtxiꞌ ew yũuna ũsiꞌkwe jĩna ¿weçxayaꞌ ãjamaꞌth? Naꞌwẽçxáa yũuteꞌ, weçxayaꞌ ãjameꞌnja.
Santa Cenaꞌs ũꞌwaꞌjaꞌs Kristok kaapiyaꞌjçxa nvxiht
23 Adxaꞌ iꞌkweꞌsxtxiꞌ kaapiyaꞌth nawa Jesukristo adxaꞌs maꞌwẽ kaapiyaꞌtheꞌ txãꞌwẽyçxáath kaapiyaꞌj txãꞌ naꞌwẽꞌ: Jesusaꞌs ikhkahn dukhwaꞌj kus ãjaçteꞌ, txãa kusuçte panaꞌs kusete jxpaꞌgak.
24 Saꞌ Dxusaꞌs weçxana orãyçxaꞌ, peꞌltedeçxa naꞌjĩk: Mẽꞌwe. Naa panaꞌ adx kakweꞌs iꞌkweꞌsx paꞌgate peꞌltedenisa naꞌwẽsaꞌ. Txãꞌwẽ myũuwe adx pxthaa yuuçxa uuniꞌs bagaçxtewa yajkxyaꞌ.
25 Ũꞌna jxãꞌjçxaꞌ, txãꞌwẽy wasoꞌs jxpaꞌgaçxa naꞌjĩk: Adx eeaꞌs pkawçxa yuuçxáa iꞌkweꞌsxtxi nweꞌwewaꞌjaꞌs Dxusaꞌ uꞌse pheuꞌjçxa nvxihtku. Açaꞌ naa wasoteweꞌsxaꞌ adx ee iꞌkweꞌsx paꞌgate uwusáa naꞌwẽsaꞌ. Txãꞌwẽ tudx iisa adx pxthaa yuuçxa ee pkawniꞌs bagaçxtewa kaayakiꞌjwaꞌjsaꞌ jĩnak kaapiyaꞌj.
26 Txãꞌwẽ yãꞌtheꞌ, bagaçxtewa naa panaꞌs ũꞌ iisa, naa wasoteweꞌsxnawa tudx iisa iꞌkwe Jesukristo uuniꞌs yajkxna nes yuꞌ, txãa sxawedna kĩhpkaçx.
Santa Cenaꞌs jxpaꞌgayaꞌwaçxaꞌ naꞌwẽ yũuwaꞌjaꞌ
27 Txãꞌwẽ maawa Jesukristo kaapiyaꞌjniꞌs kĩhwameesa naꞌwẽ Dxusaꞌs yajkxmée maa sũhmée wáa panaꞌs ũꞌna wasoteweꞌsxnawa tudxiitxna açaꞌ txãꞌwẽ yũusaꞌ pkalte wetesá yuutxna, txãꞌwẽ Jesukristo kakwe vxiteꞌ txajx ee naꞌwẽsaꞌs kĩhtewa seelpimeesa naꞌwẽçxáa yũupaꞌga.
28 Txãa paꞌga ũus miiyajkxwe teeçxsa naꞌwẽçxah pan vxiteꞌ wasoteweꞌsx txãatx jxpaꞌgamey.
29 Txãꞌwẽmeꞌ nxuste wetewaꞌjaꞌs peekíi pakwesáa yuutxna, txãꞌwẽ Jesukristo kakwe vxiteꞌ txajx ee naꞌwẽsa txãatx kĩhtewa seelpimeesa naꞌwẽ maa sũhmée jxpaꞌgapaꞌga.
30 Txãꞌwẽ jxpaꞌyakxpaꞌgamée iꞌkweꞌsx ksxavxyteweꞌsx maaíi yuꞌ ãçaꞌna çxhãçxhamée ũstaꞌ, naapkaçxhaꞌ vxiteꞌ uuna ũstaꞌ.
31 Peekíi wala jxpaꞌyakxna fxiꞌzewaçaꞌ, txãꞌwẽ nxuste wetewaꞌj en paꞌjmeena.
32 Nawa Dxusaꞌ kweꞌsxtxi peeygãhçxak kastigo kajaꞌ, kiꞌkin txãꞌsna pakweteꞌ, bagaçxte yuhwa Dxus yakh puutx uywaꞌjmeesaweꞌsx yakh kaajxaꞌmée.
33 Naꞌwẽꞌ açaꞌ ãçxhaꞌ adx yakhthẽꞌjweꞌsx, Jesukristo mesateweꞌsxaꞌs ũꞌyaꞌ pkhaakheççxaꞌ, teeçxsa naꞌwẽçxah puutx yaꞌpeeygãhna jaꞌdaçxah ũꞌyaꞌ mũythaswe.
34 Maaíi yuꞌ wala wẽesa ũsçxaꞌ, txajx yatte ũꞌwena, txãꞌwẽ puutx yaꞌpeeygãhmée pkhaakheteꞌ, Dxus kastigãyweꞌsxte. Vxite yuwe ũstaꞌ txãatxiꞌs adx paꞌjçxa pheuꞌjuꞌnja.
