1 Korintios 12:1-31
12 Naꞌwẽ Dxus Espirituꞌ nasa iisa fxiyfxiyçxah Dxusaꞌs selpiiyaꞌ ãjawaꞌjaꞌs ũsuꞌk txãꞌsna ptaꞌsxyaꞌwath, açaꞌ yakhthẽꞌjweꞌsx jxpaꞌyakx mwẽeseꞌjwe.
2 Iꞌkweꞌsxaꞌ ew jii iꞌkwe Dxusaꞌs jiyumeyçxaꞌ, naa kiwete dxus ĩtximeesatx iꞌkwe nwẽeseꞌjna fxiꞌzeꞌ.
3 Txãa paꞌga ãçxhaꞌ ew mjiyuwe: Jesusaꞌ seenaꞌ ewmeesaꞌ jĩna açeweꞌwesaꞌ Dxus Espiritu kweꞌweꞌthe weꞌwesameena. Saꞌ txãꞌwẽy Jesusaꞌ adxna jxpeꞌjsaꞌ jĩna weꞌwemeena kim yuhwa, txãꞌwẽ Dxus Espiritu kweꞌweꞌjmeete yuꞌ.
4 Kĩhwa yũuyaꞌ ãjawaꞌj ũstaꞌ, açaꞌ nasaꞌ txãatx jxpaꞌgatxna. Nawa txãa ãjawaꞌjtx ũssa yuꞌ, Dxus Espiritu teeçxçxáꞌ.
5 Maꞌwẽwa selpiwaꞌj ũstaꞌ, açaꞌ nasa iisa makwe fxiyfxiyçxah selpiiççxawa, teeçx Dxusçxáanathaꞌw selpiꞌ.
6 Maꞌwẽwa fxiyfxiyçxah mjĩiwaꞌjwa ũstaꞌ, nawa teeçx Dxus yuuçxáak fxiyfxiyçxah mjĩiwaꞌjaꞌswa kaapiyaꞌjaꞌ.
7 Nasa iisa fxiyfxiy selpiwaꞌjaꞌs Dxus Espirituꞌ jxukaysatx peesuꞌsku, nasaa nweꞌsxtxi puꞌçxna fxiꞌzekahn.
8 Dxus Espirituꞌ maaíitxiꞌ Dxus yuweꞌs jxpubamée jiyuyaꞌ ãjawaꞌjaꞌsku ũsuꞌ. Txãa Espiritu íiçxáa maaíitxiꞌ maꞌwẽwa yuꞌkxpejxaꞌ ãjawaꞌjaꞌsku ũsuꞌ.
9 Txãa Espiritu íiçxáa maaíitxiꞌ Dxusaꞌs ũuste jxpubamée yaakxwaꞌjaꞌsku ũsuꞌ. Vxitetxiꞌs ãçaꞌsatx nuyçxhãaçxhawaꞌjaꞌsku ũsuꞌ.
10 Maaíi yuꞌ kim yuhwa ãjanimeesaꞌs ãjawaꞌjaꞌstxi jxpaꞌgaꞌ. Saꞌ vxitetxiꞌs Dxus kĩh yũuyaꞌwatewa dxiikhẽy jiyuçxa ptaꞌsxyaꞌ ãjawaꞌjaꞌsku ũsuꞌ. Vxitetxiꞌs maa txãꞌwẽ Dxus Espirituteꞌ, vxiteꞌ maa Dxus Espiritumeetewa jiyuwaꞌjaꞌsku ũsuꞌ. Açaꞌ vxiteꞌ jxpaꞌgaꞌtx yuwe fxiysaju weꞌweyaꞌ ãjawaꞌjaꞌs, naapkaçxhaꞌ vxiteꞌ txãa yuwe fxiysaju weꞌweniꞌs ãate ptaꞌsxyaꞌ ãjawaꞌjaꞌstxi jxpaꞌgaꞌ.
11 Nawa txãꞌwẽ nasa iisa fxiyfxiy selpiiyaꞌ ãjawaꞌjaꞌs ũssaꞌ Dxus Espiritu teeçx yuuçxáꞌ. Txãa yuuçxáak teeçxsa naꞌwẽçxah kĩh mjĩiyaꞌ ãjawaꞌjsatewa txãatx ũsuꞌ.
Jxukaysa teeçxsa kakweteweꞌsxçxaçxáathaꞌw
12 Kakwewa maꞌwẽ teeçxçxáaçxawa kuh jwed jiꞌphna fxiyfxiysa, açaꞌ Kristowa txãꞌwẽysaꞌ. Makwe kuh jwed fxiyfxiysaçxawa, kxazíi teeçx kakweteweꞌsxçxáataꞌ.
13 Dxus Espiritu txãꞌwẽ kweꞌsx maꞌwẽsatxwa Kristo tasxteçxaçxáa kuutxaꞌtheꞌ, teeçx kakweteweꞌsxçxáathaꞌw yuu. Judiu maꞌk yuu meeçxaꞌ judiumée maꞌk yuu, selpiisáa maꞌk yuu meeçxaꞌ selpiisamée maꞌk yuu nawa txãazkuẽesay Dxus Espiritu teeçxçxáa ũsaꞌ txãaçxaçxáꞌsthaꞌw jxpaꞌgaꞌ jxukaysa.
14 Kakweꞌ teeçx jwedsa yakhçxáa kakwe yuuna paꞌjaꞌçmeꞌ; wala kuh jwed jiꞌphaꞌ.
15 Çxidaꞌ weꞌwewaçaꞌ, naꞌjĩna: Adxaꞌ kusemeeth, saꞌ txãa paꞌga kakweteweꞌsxmeeth jĩna nawa txãꞌwẽ kusemeeçxawa kakweteweꞌsxíiçxáꞌ.
16 Meeçxaꞌ thũꞌwẽꞌ weꞌwewaçaꞌ, naꞌjĩna: Adxaꞌ yafxmeeth, saꞌ txãa paꞌga kakweteweꞌsxmeeth jĩna nawa txãꞌwẽ yafxmeeçxawa kakweteyweꞌsxíiçxáꞌ.
17 Txãꞌwẽ kakweꞌ jxuka yafxçxaçxáawaçaꞌ, ¿maꞌwẽ wẽseꞌjyaꞌ ãjakxthaꞌw? Meeçxawa kakweꞌ jxuka wẽseꞌjnisaçxaçxáawaçaꞌ, ¿maꞌwẽ jxputayaꞌ ãjakxthaꞌw?
18 Nawa Dxusaꞌ kweꞌsx kakweteweꞌsx kuh jwedku kiꞌp, kĩhçxahneꞌ peejx yuꞌ txãatxiꞌ jxuka.
19 Teeçx jwedsaçxáawaçaꞌ, ¿maꞌwẽ kakweꞌ selpiiyaꞌ ãjakx?
20 Txãꞌwẽ kakweteweꞌsxaꞌ kuh jwedsaçxawa teeçx kakweteçxaçxáatx jxukaysa selpiꞌ.
21 Yafxaꞌ kuseꞌs weꞌweçxaꞌ: Idxaꞌsaꞌ jxpeejxmeeth ¿jĩyaꞌ ãjamaꞌk? Txãꞌwẽy dxikthewa çxidatx weꞌweçxaꞌ: Idxaꞌsaꞌ jxpeejxmeeth ¿jĩyaꞌ ãjamaꞌk?
22 Txãꞌwẽmée wejxwa kakweteweꞌsx kĩhtewa seelpimeesa naꞌwẽçxawa, txãaíiçxáa jxthaakwe jxpeejxsataꞌ.
23 Kakweteweꞌsx jxthaakwe yuꞌ peejinimeesawa ũstaꞌ, makwe txãꞌwẽtewa txãatxwa jxpaꞌyakiꞌthaꞌw. Saꞌ txakwe zhiçxkwe pheuꞌjna jxpeꞌjwaꞌjmeesaꞌswa ewthaꞌw pheuꞌjuꞌ, jxthaakwe yuꞌ peejxmeesa naꞌwẽsatewa.
24 Dxusaꞌ txãꞌwẽk jwee peejxmeesa naꞌwẽsatxwa kiꞌpna kakweꞌs pheuꞌj, txãaíiçxáa jxthaakwe selpiwaꞌjsa.
25 Txãꞌwẽ kakweteweꞌsxaꞌ puutx yahçemée kxaazkuẽy jaꞌdaçxah puutx yaꞌpuꞌçxwaꞌjsataꞌ.
26 Kakweteweꞌsx teeçx jwedsa pxthaa yuuçteꞌ, vxitewa jxukaysa nxus puꞌçxhiꞌtx. Kakweteweꞌsx teeçx jwedsa peeygãani yuuçteꞌ, vxitewa weçxweçxatx yaakx puꞌçxhiꞌ.
27 Ãçxhaꞌ mjiyuwe: iꞌkweꞌsxaꞌ nasa iisa teeçxsa naꞌwẽçxah Kristo kakwete selpiisáa iꞌkwe.
28 Txãa paꞌgak Dxusaꞌ txajx luuçxtxiꞌ fxiyfxiy selpiwaꞌjaꞌs peesuꞌs teeçxsa naꞌwẽçxah: Nyafxteweꞌsxaꞌ Kristo jxkaahnisaweꞌsxtxi yuu. Eꞌsteweꞌsxaꞌ Dxus kĩh yũuyaꞌwatewa dxiikhẽy jiyuçxa ptaꞌsxwaꞌjsatx nvxiitni yuu. Tekhteweꞌsxaꞌ kaapiyaꞌjwaꞌjsatx nvxiitni yuu. Txajũꞌ kim yuhwa ãjanimeesaꞌs ãjawaꞌjsatx nvxiitni yuu. Naapkaçxhaꞌ vxiteꞌ ãçaꞌsatx nuyçxhãaçxhayaꞌ ãjawaꞌjsatx nvxiitni yuu. Vxiteꞌ kĩhteçxáawa puꞌçxyaꞌ ãjawaꞌjsatx nvxiitni yuu. Vxiteꞌ jxkaahwaꞌjsa nvxiitnitx yuu, naapkaçxhaꞌ vxiteꞌ yuwe fxiysaju weꞌweyaꞌ ãjawaꞌjsatx nvxiitni yuu.
29 Jxukay yuꞌ Kristo jxkaahnisateweꞌsx yuumeetaꞌ. Jxukay yuꞌ Dxus kĩh yũuyaꞌwatewa dxiikhẽy jiyuçxa ptaꞌsxsa yuumeetaꞌ. Jxukay yuꞌ kaapiyaꞌjsa yuumeetaꞌ. Jxukay yuꞌ kim yuhwa ãjanimeesaꞌs ãjawaꞌjsa yuumeetaꞌ.
30 Jxukay yuꞌ ãçaꞌsatx nuyçxhãaçxhayaꞌ ãjawaꞌjaꞌs jxpaꞌgasa yuumeetaꞌ. Jxukay yuꞌ yuwe fxiysaju weꞌweyaꞌ ãjawaꞌjsa yuumeetaꞌ. Jxukay yuꞌ txãꞌwẽ yuwe fxiysaju weꞌweniꞌs ãate ptaꞌsxyaꞌ ãjawaꞌjsa yuumeetaꞌ. ¿Txãꞌwẽ meetxnaꞌ wakx?
31 Selpiiyaꞌ ãjawaꞌj maaçxah wejx thaakwe peejxsatxna txãatx mpaakwewe. Nawa adxaꞌ txãate jweeíiçxáa thaakwe peejxsaꞌs ptaꞌsxyaꞌwath.
