1 Korintios 13:1-13
13 Adxaꞌ makwe seenaꞌ wala zhiçxkwe weꞌweyaꞌ jii yuꞌnja naa kiwete nasa walasa naꞌwẽ, txãꞌwẽy angelesweꞌsxte jaꞌda, nawa peeygãawaꞌj yuꞌsaꞌ jiꞌphmée yuꞌnja açaꞌ adx weꞌweniꞌ kĩhte yuhwa selpiimeena.
2 Dxus kĩh yũuyaꞌwatewa dxiikhẽy jiyuyaꞌ ãjawaꞌjaꞌs jiꞌph yuꞌnja, saꞌ kim yuhwa jiyunimeesa kĩjkĩhnawa jxuka jiisa yuꞌnja, saꞌ txãꞌwẽy Dxusaꞌ puꞌçxhina sũhwaꞌj yuuçxáꞌs ũuste yajkxçxa vxiç walatxwa fxiite kiꞌpxaꞌ ãjawaꞌjaꞌs jiꞌphuꞌnja, nawa peeygãawaꞌj yuꞌsaꞌ jiꞌphmée yuꞌnja açaꞌ makwe txãꞌwẽsaçxawa kĩhte yuhwa seelpimeesa yuꞌnja.
3 Txãꞌwẽy adx jiꞌphuniꞌs kĩjkĩhnawa jxuka jxtxuudeꞌnja, saꞌ adx kakwe yuhnawa kabkahn dukhmaꞌth, nawa peeygãawaꞌj yuꞌsaꞌ jiꞌphmeeteꞌ, kxul yuh txãꞌwẽ yaꞌyuuna.
4 Maawa peeygãawaꞌjaꞌs jiꞌphsaꞌ, ũusçxa yaakiꞌçmeꞌ, maa yakhwa jxuka ewsaꞌ, maa yuhtxwa açeꞌçmeꞌ, iiwejçx yaakiꞌçmeꞌ, iiwejçx weꞌweꞌçmeꞌ,
5 vxitetx juunaꞌ yũꞌçmeꞌ, peekx wẽt fxiꞌzewaꞌj yuꞌs pakweꞌçmeꞌ, ũusçxaꞌçwameꞌ, açeyaakiꞌçmeꞌ.
6 Pkalte vxite weteeçteꞌ, txãaweꞌsxtxi npeevxysxijkana weçxaꞌçmeꞌ, naasáa ew fxiꞌzeniçxáꞌsku wẽtwẽt yajkxna weçxáꞌ.
7 Makwe kĩhwa thẽysa paꞌthewa ũukh yajkxmée peeygãawaꞌjçxáꞌs jiꞌphçxaꞌ jxukak wantaĩꞌ, Dxusaꞌ puꞌçxhina sũhna.
8 Dxus kĩh yũuyaꞌwatewa dxĩikhẽy jiyuçxa ptaꞌsxna fxiꞌzenisaꞌ pçuwaꞌj en ãjana, açaꞌ peena yuꞌ txãꞌwẽ yũuwaꞌj peejxmée yuuna, açaꞌ yuwe fxiysajuwa yaꞌweꞌwemeena. Kĩhtewa jxuka jiith sũhnisawa pçuuna. Nawa peeygãanisa yuꞌ bagaçxte yuhwa pçumeena.
9 Txãa pçuwaꞌjsa leꞌçxkwesaçxáatx jxpaꞌgaçxa jiꞌpthaꞌw, txãasathaꞌw jxuka ptaꞌsxyaꞌ yuꞌ ãjaꞌçmée.
10 Nawa kĩhtewa peejxmée jxuka jiyuwaꞌj en ãhteꞌ, txãa pçuwaꞌjsa leꞌçxkwesatx jiꞌpthaꞌw txãꞌ skhẽuutxna.
11 Adxaꞌ luuçxteyaꞌ jiimée luuçx weꞌweniçxáatxthu weꞌweꞌ, saꞌ luuçx ũus yaakxniçxáatxthu jiꞌphuꞌ, saꞌ luuçx naꞌwẽçxáath jii fxiꞌzeꞌ. Nawa jxuka thẽꞌjsa yuuna kãhçxaꞌ, luuçx naꞌwẽ jiimée fxiꞌzeniꞌs nvxihtthu.
12 Txãꞌwẽy íiçxáathaꞌw ãçxhíi yuꞌ ew jiyuꞌçmée, çxhiꞌdxte speejute thegte maꞌwẽ psxũuçxáa vxyaakx txãꞌwẽçxáathaꞌw uyuꞌ. Nawa kĩhte yuhwa peejxmée jxuka ew jiyuwaꞌj en ãhteꞌ, seenaꞌ ew puutx pdxiꞌp ãate uyuꞌnjaꞌw. Ãçxhíi yuꞌ jxukamée leꞌçxkweçxáa jiith. Nawa txãa jxuka jiyuwaꞌj en ãhteꞌ, kĩhte yuhwa peejxmée jxuka jiyuꞌnja Dxuswa maꞌwẽ adxaꞌs ew jiina txãꞌwẽy.
13 Khĩꞌjíi ptaꞌsxthu txãaçxáa pçuuteꞌ, naꞌwẽsa tekh ũstaꞌ txãa yuꞌ bagaçxte yuhwa skhẽwwaꞌjsameetaꞌ: Dxusaꞌ puꞌçxhina sũhna yaakxnisa, vxiteꞌ Dxus yakh puutx uywaꞌjaꞌs ũythasna fxiꞌzenisa, vxiteꞌ peeygãhna fxiꞌzenisa. Nawa txãa tekhsatx kxsusthu txãate thaakwesaꞌ peeygãhna fxiꞌzenisaꞌ.
