1 Korintios 15:1-58
15 Ãçxhaꞌ naꞌwẽ Kristo yuwe ewte nvxiitwaꞌjsaꞌs ptaꞌsxthu txãꞌ maꞌwẽsatewa ew kaajiyuꞌjyaꞌwath yakhthẽꞌjweꞌsxtxi. Iꞌkweꞌsxaꞌ txãa ptaꞌsxniꞌs jxpaꞌgaçxa txãajũ txutemée ũsiꞌkwe.
2 Txãa Kristo yuwe ewsapaꞌga iꞌkweꞌsxaꞌ nweꞌweni ewte neeyũuwaꞌjsaiꞌkwe, adx ptaꞌsxniꞌs kxulteçxáamée ũusuh jxuka jxpaꞌgaçxa yuꞌ.
3 Kristo yuwe ewte nvxiitwaꞌjsa jĩniꞌs adxna maꞌwẽ kaapiyaꞌtheꞌ iꞌkweꞌsxtxiwa txãꞌwẽyçxáath kaapiyaꞌj txãꞌ naꞌwẽk yuꞌ: Dxus librute maꞌwẽneꞌ fxiꞌjni ũsuꞌ açaꞌ txãꞌsaꞌ kxtey yuuna Kristoꞌ kweꞌsx pkalsa paꞌgate uuk.
4 Txajũꞌ pedaniik yuu nawa tekh enteꞌ kiꞌ ĩtxi yuuk, Dxus librute maꞌwẽneꞌ fxiꞌjni ũsuꞌ txãꞌwẽy.
5 Kiꞌ ĩtxi yuuçxaꞌ, Pedroꞌs vxyaak. Txajũꞌ vxite txajx jxkaahnisa docesatxwa vxyaak.
6 Txãa eꞌsuꞌ yakhthẽꞌjweꞌsx kinientos thaakwetx ũsuꞌ teeçx ahte txãatxwa vxyaak, açaꞌ txãꞌwẽ uysáꞌ wala kuh nee ĩtxiytaꞌ makwe vxiteꞌ yuꞌ uutewa.
7 Txãa eꞌsu kiꞌ vxyaaçxaꞌ, Jakoboꞌsku vxyaa, saꞌ txajx jxkaahnisatxwa kiꞌ vxyaak jxukaysatx.
8 Nmehteꞌ adxnawa vxyaak, adxaꞌ en ãhmey upxsa seelpimeesa naꞌwẽsatewa.
9 Txãasa adxaꞌ Jesus jxkaahnisateweꞌsx vxite yakh yuꞌ, wala ãhmeekwesath, saꞌ Jesus jxkaahnisa naꞌwẽ yuuwa yaꞌkxsuswaꞌjmeesath, txãꞌwẽ Dxus luuçxtxith ahçena fxiꞌze naa paꞌga.
10 Makwe txãꞌwẽsatewa, Dxusaꞌ adxaꞌs peeygãhçxa txhitxhku txajx peeygãaniꞌ kxul yuumeꞌ adx yakh. Txãꞌwẽsaçxawa adxthu vxitesate wejx jxthaakwe mjĩi. Nawa ew yajkxte yuꞌ txãꞌ adxçxáa mjĩinisa yuꞌçmeꞌ, Dxusku adxaꞌs peeygãhçxa txutemée ũsuꞌ txãa paꞌgaçxáath txãꞌwẽ mjĩi.
11 Nawa txãa yuꞌ kĩh yuumeena, Jesus jxkaahnisaweꞌsx maꞌtx jxthaakwe mjĩi, meeçxaꞌ adx maꞌth jxthaakwe mjĩi. Nawa jxukaysa fxiymée txãꞌwẽçxaçxáathaꞌw Kristo nweꞌwewaꞌjaꞌs ptaꞌsxiꞌ, açaꞌ txãꞌsna iꞌkwe iꞌkweꞌsxaꞌ ũuste jxpaꞌga.
Uusaaweꞌsx kiꞌ ĩtxi yuuwaꞌj
12 Kweꞌsx ptaꞌsxniꞌ Kristo ĩtxi yuuniꞌsku kaajiyuꞌjni yuu açaꞌ iꞌkweꞌsx yakh ũssa maaíi yuꞌ ¿maꞌwẽta uusaaweꞌsxaꞌ ĩtxi yuuwaꞌjsameetaꞌ jĩna weꞌweꞌ?
13 Uusaaweꞌsx ĩtxi yuuwaꞌjsameeteꞌ, Kristowa ĩtxi yuumeeneꞌga.
14 Kristo ĩtxi yuumeeteꞌ, kweꞌsx ptaꞌsxniꞌ kxul yuhna, açaꞌ Kristoꞌ kweꞌsxtxi nweꞌwesaꞌ sũhna iꞌkweꞌsx yaakxnisawa kxul yuhna.
15 Txãꞌwẽ Kristoꞌ ĩtxi yuumée wáꞌ açaꞌ kweꞌsxaꞌ Dxus dxiꞌpte ĩsxiisa yuꞌnjaꞌw, Dxusaꞌ Kristoꞌs ĩtxi vxitku jĩna ptaꞌsxpaꞌga. Txãꞌwẽ uusaaweꞌsx ĩtxi yuuwaꞌjsameeteꞌ, Dxuswa Kristoꞌs ĩtxi vxitmeeneꞌga.
16 Naꞌjĩꞌth naꞌ: uusaaweꞌsx ĩtxi yuuwaꞌjsameeteꞌ, Kristowa ĩtxi yuumeeneꞌga.
17 Saꞌ Kristo ĩtxi yuumeeteꞌ, iꞌkweꞌsx ũuste yajkxçxa Kristoꞌ kweꞌsxtxi nweꞌwesaꞌ sũhnisaꞌ kxul yuh yuuneꞌ, açaꞌ iꞌkweꞌsx pkalaꞌ ãçxpkaçx Dxus peltunãynimée ũstxna.
18 Txãꞌwẽ ĩtxi yuumée wáꞌ açaꞌ Kristoꞌs ũuste jxpaꞌgaçxa uusaaweꞌsxaꞌ vxituneꞌta.
19 Kristo yakh fxiꞌzeniꞌ naa kiweteçxáa selpiwaꞌjsateꞌ, maatewa jxthaakwe kxulsaꞌ kweꞌsx neꞌtkaꞌw.
20 Nawa txãꞌwẽmeꞌ. Kristoꞌ ĩtxi yuuyujk. Uusaaweꞌsx nyafxte ĩtxi yuusaꞌ txãak yuꞌ.
21 Maꞌwẽga naa kiwete uuwaꞌjwa teeçx nasate takh, txãꞌwẽy uuçxa kiꞌ ĩtxi yuuwaꞌjwa teeçx nasatek takh.
22 Teeçxsa Adanpaꞌgaçxáa jxukaysatx uuwaꞌjaꞌs jiꞌphu, txãꞌwẽy teeçxsa Kristopaꞌgaçxáa jxukaysatx kiꞌ ĩtxi yuuwaꞌjaꞌswa jiꞌphu.
23 Nawa txãaweꞌsx ĩtxi yuuwaꞌj en ãhte fxiifxiiçxah ĩtxi yuutxna. Nyafxteꞌ Kristo khuẽꞌyku yaçte ĩtxi yuu. Txãa eꞌsuh Kristo kiꞌ kĩijana naapkaçx Kristoꞌs jxpaꞌgaçxa uusaaweꞌsx ĩtxi yuutxna.
24 Txãa eꞌsu nmehsa paꞌjana, txajũ Kristoꞌ naa kiweteweꞌsx vxiteꞌ cieluteweꞌsx maꞌtx yuu nawa kĩh yuhwa nvxihtmée jxuka kaapçuꞌjuꞌjçxa txajx jxkaahniꞌs jxuka dukhena Neyaꞌs, txãa yuuçxáa jxkaakhan.
25 Nawa txãꞌwẽ yuumey yuꞌ Kristo khuẽꞌy jxkaahwaꞌjsaꞌ, txãꞌwẽ Dxusaꞌ açesa jxukaysatx Kristoçxaçxáꞌs nwẽeseꞌjwaꞌjaꞌs vxitpkaçx.
26 Txãꞌwẽ jxukaysatx Kristoçxaçxáꞌs nwẽeseꞌjwaꞌjaꞌs vxitçxa, nmehteꞌ uuwaꞌjaꞌswa Dxusaꞌ ivxiituna.
27 Dxus librute weꞌweçxaꞌ: Jxukaysa Kristoꞌs nwẽeseꞌjwaꞌjsataꞌ jĩꞌk açaꞌ Dxuswa Kristo jxkaahni yuuna sũjuwáꞌkwe, nawa txãꞌwẽmeꞌ.
28 Açesa jxukaysa Kristoçxaçxáꞌs nwẽeseꞌjeçpkaçxhaꞌ, Dxus Nçxiꞌk Kristoíiwa Ney tasxte nwẽeseꞌjyaꞌ yaꞌdukhena Ney makwe neꞌ ũs petx txãa yãꞌjçxa jxuka. Txãꞌwẽ yũute, Dxusaꞌ txãaçxaçxáa jxkaajana.
29 Txãꞌwẽ uusaaweꞌsx ĩtxi yuuwaꞌjsameeteꞌ, ¿kĩjxaꞌçxáata txãꞌwẽ yaꞌbautisaĩꞌ ĩtxi yuuwaꞌjaꞌs yajkxçxa?
30 Txãꞌwẽ ĩtxi yuuwaꞌjmeeteꞌ, kweꞌsxaꞌ ¿kĩjxaꞌçxáatkaꞌw een isa ikh wẽeni fxiꞌzeꞌ, ĩtxi yuuwaꞌjaꞌs ptaꞌsxna kxulteçxáa?
31 Adxaꞌ txãꞌwẽ yuh een isa ikh wẽeni fxiꞌzeꞌth txãꞌ ĩsxiinimeꞌ. Nawa, yakhthẽꞌjweꞌsx, Jesukristoꞌs ũuste jiꞌphiꞌkwe txãa paꞌgaçxáath txãꞌwẽ yuꞌ weçxana.
32 Efxesoteweꞌsxaꞌ yuꞌkh eçx naꞌwẽ seenaꞌ weesweesataꞌ jĩꞌtx txãaweꞌsx yakh iipuiith. Nawa adxaꞌ ¿kĩh yũuçxatka uuwaꞌjaꞌs ũukhuꞌçmée? Txãꞌwẽ uuyãꞌjçxaꞌ peena yuꞌ ĩtxi yuuwaꞌjmée dxihteꞌ, isa yuh weꞌweꞌneꞌta naꞌwẽ weꞌwesaꞌ: Ũꞌna tudxna fxiꞌzega, uuçxa kxtee pçuwaꞌjsaçxáathaꞌw jĩsaꞌ.
33 Txãꞌwẽ ĩtxi yuuwaꞌjmeꞌ jĩniꞌs txãꞌwẽ dxihna sũhna jxpubanuwe. Txãꞌwẽmeꞌ, namikuweꞌsx ewmeesaꞌ kaypubaꞌjatxna ew fxiꞌzesaꞌs jĩꞌtx txãꞌ kxtey yuuna.
34 Iꞌkweꞌsxaꞌ jxpubamée fxiꞌzenite sxawedçxa, peena yuꞌ pkalte fxiꞌzenuwe. Txãꞌwẽ yũumeeçxaꞌ iꞌkweꞌsx maaíi yuꞌ ãçxpaꞌjwa Dxusaꞌs jiimeeiꞌkwe. Txãꞌwẽth ãate weꞌweꞌ thaameçxa jxpaꞌyakx fxiꞌzekahn.
¿Uusáa kiꞌ ĩtxi yuuwaꞌjaꞌ maꞌwẽkx?
35 Nawa maaíi yuꞌ pẽyiwáatxna naꞌjĩna: Uusáa kiꞌ ĩtxi yuuwaꞌjaꞌ ¿maꞌwẽkx? Kakwe ¿maꞌwẽsa jiꞌphutxki? jĩtxna.
36 Jiyuyaꞌ ãjaꞌçmeewáꞌkwe. Iꞌkweꞌsxaꞌ peekx jiineꞌkwe kĩh nxinxaꞌswa uuhteꞌ, txãa nxinx kajkwekhẽweꞌsxaꞌ çxibiꞌk, naapkaçxhaꞌ dxiiteweꞌsx ũusçxáak buçxáꞌ.
37 Skuutxh nxinx maꞌk yuu meeçxaꞌ fxtũu nxinx maꞌk yuu nawa uuhteꞌ txãa nxinxíiçxáa ãate kãawaꞌjsameꞌ, txãa nxinxte ũusçxáa buçxawaꞌjsaꞌ.
38 Açaꞌ txãa nxinxuh buçxasaꞌ kakwe maꞌwẽsaçxah jiꞌphuwaꞌjsatewa txãꞌwẽsak Dxusaꞌ ũsuꞌ, kĩh nxinxtewa txãa iisa fxiyfxiyçxah.
39 Txajíi kakwe maꞌwẽsawa ũstaꞌ, nawa txãꞌwẽçxaçxáa meetaꞌ. Nasaa kakweꞌ fxiytaꞌ, açaꞌ niimal kakwewa fxiytaꞌ. Txãꞌwẽy fxuusáa kakwewa fxiytaꞌ, açaꞌ yuꞌgaweꞌsx wedx kakwewa fxiytaꞌ.
40 Txãꞌwẽy ẽe walatewa ũstaꞌ, naapkaçxhaꞌ naa kiwetewa ũstaꞌ. Nawa ẽe walateweꞌsxaꞌ fxiy zhiçxkwetaꞌ naa kiweteweꞌsxte.
41 Sek kweethni vxiteꞌ aꞌte kweethniwa fxiytaꞌ. Txãꞌwẽy estrelxa kweethni vxiteꞌ sek kweethniwa fxiytaꞌ. Saꞌ estrelxa pweꞌsx kweethniwa puutx fxiyçxaçxáataꞌ.
42 Txãꞌwẽy kweꞌsx kakwewa fxiy yuuwaꞌjsaꞌ kiꞌ ĩtxi yuunijũꞌ. Uuteꞌ, kakwe pçuwaꞌjsaꞌs yaꞌpedaꞌk, naapkaçxhaꞌ txãa pedaniijũ kiꞌ ĩtxi yuꞌk peena yuꞌ uuwaꞌjmée kakwe yakh.
43 Kakwe kazxsaꞌs yaꞌpedaꞌk, nawa txajũ kiꞌ ĩtxi yuuçxaꞌ, seenaꞌ zhiçxkwesak yuꞌ. Kakwe selpimeesaꞌsku yaꞌpedaꞌ, nawa txãajũ kiꞌ ĩtxi yuuçxa bagaçxte yuhwa pçumée selpiwaꞌjsak yuꞌ.
44 Naa kiwete fxiꞌzeni kakweꞌ vxiteꞌ, açaꞌ Dxus tasxte fxiꞌzewaꞌj kakwewa vxiteꞌ. Txãa paꞌga kakwe naa kiweteweꞌsxaꞌs yaꞌpedaꞌk, naapkaçxhaꞌ kiꞌ ĩtxi yuusáa kakweꞌ Dxus tasxte ũswaꞌjsaꞌ.
45 Txajíik Dxus librute weꞌweçxaꞌ: Nyafxte piçthẽꞌj Adanaꞌ naa kiwete ĩtxi fxiꞌzewaꞌjaꞌsçxáak jiꞌphuꞌ jĩꞌ. Nawa nmehteweꞌsx Adanaꞌ pçumée ĩtxi fxiꞌzewaꞌjaꞌs peessaꞌ.
46 Nawa nyafxte kakweꞌ Dxus tasxte fxiꞌzewaꞌjsa yuꞌçmeꞌ. Nyafxteweꞌsxaꞌ naa kiwete fxiꞌzeni kakweçxáak yuꞌ, naapkaçxhaꞌ nmehte kakweꞌ Dxus tasxte fxiꞌzewaꞌjsaꞌ.
47 Nyafxte piçthẽꞌj Adanaꞌ kiweꞌsku pheuꞌjnisa yuꞌ naa kiweteweꞌsx, naapkaçxhaꞌ eꞌsteweꞌsxaꞌ Kristok yuꞌ cielujũweꞌsx.
48 Naa kiwete jxukaysa nasaa kakweꞌ nyafxte Adan kakwewa maꞌwẽga kiwe yuꞌ, txãꞌwẽysa íiçxáataꞌ, naapkaçxhaꞌ cielute ũswaꞌjsa kakweꞌ cielujũweꞌsx kakwe naꞌwẽy yuuwaꞌjsaꞌ.
49 Maꞌwẽtkaꞌw ãçxwa nyafxte Adan kakweꞌs íiçxáa jiꞌphuyaꞌ ãjaꞌ, txãꞌwẽy Kristo kakweꞌs íiçxáa jiꞌphuyaꞌ ãjaꞌnjaꞌw txãꞌwẽ yuuwaꞌj en ãhteꞌ.
50 Yakhthẽꞌjweꞌsx, iꞌkweꞌsxtxi ãateth ptaꞌsxiꞌ: Naa kakwe yakhaꞌ cielute Dxus jxkaahnite uꞌkayaꞌ yaꞌãjameena. Naa kiwete pçuwaꞌjsaꞌ ¿maꞌwẽ bagaçxte yuhwa pçuwaꞌjmée ĩtxi fxiꞌzenite ũsyaꞌ ãjakx?
51 Ãçxhaꞌ ptaꞌsx yaꞌwath: Maaíi yuꞌ nee uumée ũssaꞌ naa dudte korneta tukani nmeh susuçpkaçxhaꞌ, naa kakweꞌs yuꞌpthehni yuuçxa vxite kakwe jxpaꞌgaꞌnjaꞌw jxukaysa.
52 Txãꞌwẽ korneta susuçpkaçxhaꞌ, uusaaweꞌsxaꞌ kiꞌ ĩtxi yuutxna peena yuꞌ uuyaꞌmée, naapkaçxhaꞌ naa dudte yaakxni yuumeete nee uumée ĩtxi ũssa kakweꞌ yuꞌpthehni yuutxna.
53 Txãa paꞌgatey kakwe pçuusáa uuniijũꞌ vxite kakwe bagaçxte yuhwa pçuwaꞌjmeesaꞌs jxpaꞌgawaꞌj jiꞌphaꞌ. Saꞌ kweꞌsx kakwe uuwaꞌjsaꞌs yuꞌpthehçxa bagaçxte yuhwa uuwaꞌjmeesaꞌs jxpaꞌgawaꞌjaꞌ.
54 Txãꞌwẽ kakwe pçuusáꞌ vxite kakwe bagaçxte yuhwa pçuwaꞌjmeesaꞌs jxpaꞌgaçxa kweꞌsx kakwe uuwaꞌjsaꞌs yuꞌpthehçxa bagaçxte yuhwa uuwaꞌjmeesaꞌs jxpaꞌganijũꞌ Dxus librute weꞌweçxaꞌ: Uuwaꞌjaꞌs ivxiitunik yuu, peena yuꞌ uu en paꞌkhamen jĩꞌk txãꞌ kxtey yuuna.
55 Uuwaꞌjaꞌ bagaçxte yuhwa mee yuukahn jxuka ivxiituteꞌ, ¿maꞌwẽ uuwaꞌj en paꞌjaꞌkx uuwaꞌjaꞌs jiꞌphuwaꞌjsamée yãꞌjsaꞌs?
56 Uuwaꞌj enaꞌ pkalpaꞌgaçxáak paꞌj, açaꞌ txãa pkalaꞌs kçxhãaçxhaꞌjsaꞌ nyafxíi leyku txãꞌwẽ yuu.
57 Txãꞌwẽtewa, Dxus txakwe ewte kweꞌsxtxi jxpeꞌjsa Jesukristo puꞌçxpaꞌga uuwaꞌjaꞌs peena yuꞌ jiꞌphuwaꞌjsameethaꞌw.
58 Txãa paꞌga adx yakhthẽꞌjweꞌsx, bagaçxte yuhwa puꞌvxitumée Dxus yakh mfxiꞌzewe, Jesukristoꞌs jwee íiçxáa çxhãçxha selpiina, txãa paꞌgatey Jesukristoꞌs selpinisaꞌ kxulsameꞌ.
