1 Korintios 16:1-24
16 Nyafxíi Galaciate ũsçxaꞌ, Dxus luuçxtxi kaapiyaꞌth Dxus yakh fxiꞌzesatx puꞌçxwaꞌj maꞌwẽ vxyuꞌs pkhakhwaꞌjaꞌswa açaꞌ txãꞌsaꞌ kxtey myũuwe.
2 Kiꞌsen iisa teeçxsa naꞌwẽçxah iꞌkweꞌsx jiꞌphuniꞌs makwe ũswaꞌjaꞌswa txuhdeçxa jxaawna meꞌjwe, adx paꞌthe pkhakhna ũsyaꞌmée.
3 Kxte adx paꞌjçxaꞌ txãa pkhakhni vxyuꞌsaꞌ Jerusalenna kajaꞌnja, açaꞌ uꞌjwaꞌjsa pakweeneꞌkwe txãaweꞌsxtxi karta ũsuꞌnja, Jerusalente yakhthẽꞌjweꞌsxtxi dukhkahn petx txãa vxyu yãꞌjçxa.
4 Meeçxaꞌ adx yuu wáa uꞌjwaꞌj kasejena açaꞌ uꞌjweꞌnja, nawa txãaweꞌsxwa adx yakh piꞌkxna yuweetxna.
Pablo uꞌjyaꞌ yaakxni
5 Adxaꞌ yuhçxaꞌ, Macedonia kiwey uykhẽwna yuweꞌnja iꞌkweꞌsx tasxte paꞌjyaꞌ.
6 Kxte paꞌjçxaꞌ maz en jxthẽeyuuwáꞌnja meeçxaꞌ nus en skhẽwpkaçx. Açaꞌ iꞌkweꞌsxaꞌ puꞌçxhineꞌkwe txãajũ adx kiꞌ uꞌjwaꞌjaꞌs.
7 Dudteçxáa iꞌkweꞌsx yakh puutx uyyaꞌ yuu wẽjeꞌçmeeth. Kxte txaçxthu ũs wẽjeꞌ iꞌkweꞌsx yakh, Dxus txãꞌwẽ wedxwaçaꞌ.
8 Nawa ayte Efxesote nee ũsyaꞌwath, Pentekostes fxiesta skhẽwpkaçx.
9 Txãꞌwẽ açesa ũstewa, Dxus jĩi mjĩiwaꞌj wala ew yuuçaꞌ naa paꞌga txãꞌsaꞌ ivxiitumeꞌnja sũjuꞌth.
10 Timoteo paꞌjawáana açaꞌ mpuꞌçxwe, kĩhtewa nxusmée wẽt iꞌkweꞌsx yakh ũskahn. Txãꞌwẽmeꞌ, txãawa adx naꞌwẽyçxáa Jesukristoꞌs selpisáꞌ.
11 Txãa paꞌga kimwa açenuwe, wejxwa mpuꞌçxwe dxiꞌthe peejxmée yuuwaꞌjaꞌs, kxah adx tasxte kiꞌ sxawedna paꞌjyaꞌ ãjana. Txãꞌwẽmeꞌ, adxaꞌ Timoteoꞌs ũythasna ũsthu ayte yakhthẽꞌjweꞌsx yakh.
12 Apolosaꞌs wala pxthaa weꞌweth yakhthẽꞌjweꞌsx yakh iꞌkweꞌsxtxi puutx uyyaꞌ uꞌkhan. Nawa ãçxhíi yuꞌ duduuçmeꞌ, saꞌ maa ente uꞌjwaꞌj kasehteçxáawa yuweena.
Yuwe weçxaa kaahnitx ptaꞌsxna fxiꞌjni
13 Jxpaꞌyakx çxhãçxha mfxiꞌzewe, Dxus yuuçxáꞌs ũuste peçxkanamée yajkxna.
14 Kĩh yũuççxawa peeygãawaꞌjaꞌs yuuçxáa yajkxna txãꞌwẽ myũuwe.
15 Yakhthẽꞌjweꞌsx, jiineꞌkwe Akaya kiwete nyafxçxah Kristo yuwe ewsaꞌs jxpaꞌgasaꞌ Estefxanasweꞌsxtaꞌ, saꞌ txãaweꞌsxaꞌ wala selpiitx Dxus tasxte utxasaaweꞌsxtxi puꞌçxna.
16 Açaꞌ iꞌkweꞌsxaꞌ peeygãawaꞌj jiꞌphiꞌkwe txãaweꞌsxtxiꞌs meeçxaꞌ maawa txãaweꞌsx naꞌwẽy puꞌçxna selpisaatx.
17 Adxaꞌ wala weçxaꞌth, Estéfxanas, Fxortunato, Akáiko txãaweꞌsx ayte paꞌphaꞌga. Iꞌkweꞌsxaꞌ ayte adx yakh ũsmeeçxaꞌ, adxaꞌs puꞌçxyaꞌ ãjaꞌçmeeiꞌkwe.
18 Nawa txãaweꞌsxaꞌ adxaꞌs kçxhãaçxhaꞌjtx Dxus yakh weçxana fxiꞌzewaꞌjaꞌs, saꞌ iꞌkweꞌsxtxiwa txãꞌwẽy neꞌta yuu. Açaꞌ nasa txãaweꞌsx naꞌwẽysatxiꞌ peeygãawaꞌjaꞌ.
19 Dxus yakh fxiꞌzesaweꞌsxaꞌ Asia kiwete yuwe weçxaa kajaꞌtx. Txãꞌwẽy Akila ptamwa yuwe weçxaa kajaꞌtx, kxtee pkhaakhesaweꞌsx yãꞌjçxa.
20 Yakhthẽꞌjweꞌsx jxukaysa yuwe weçxaa kaahniꞌs mpaꞌgawe, saꞌ teeçxsa naꞌwẽçxah puutx mweeçxawe.
21 Pablo yaasesath adx kuseju fxiꞌjaꞌ iꞌkweꞌsxtxi weçxana.
22 Maaíi yuꞌ Jesukristoꞌs açesa ũswáatxna, açaꞌ txãaweꞌsxtxiꞌ Dxus kastigote ivxiituwaꞌj yuutxna. Kweꞌsxtxi jxpeꞌjsa Jesukristo dud kĩhwaçaꞌ sũjuꞌth.
23 Jesukristoꞌ iꞌkweꞌsxtxi bedekĩina.
24 Iꞌkweꞌsx jxukaysatxthu adx peeygãaniꞌs kajaꞌ, Jesukristoꞌs neeweꞌwena.
