1 Korintios 2:1-16
2 Yakhthẽꞌjweꞌsx, adxaꞌ Dxus yuweꞌs kaajiyuꞌjyaꞌ kxtee paꞌjçxaꞌ, jiisa weꞌweni seenaꞌ zhiçxkwesa yakh ptaꞌsxna paꞌjmeeth.
2 Kxtee iꞌkweꞌsx yakh ũsçxaꞌ, naa kiweteweꞌsxaꞌs jiyunisa yakh ptaꞌsxna ũsuꞌçmeeth, naasáa Jesukristoꞌs kluuskhẽ kiꞌpçxa ikhniçxáꞌsthu ptaꞌsxna ũsuꞌ.
3 Iꞌkweꞌsx tasxte paꞌjçxaꞌ, wala jiisa naꞌwẽ paꞌjmée, wejxwa jiimeesa naꞌwẽ ũukhna paꞌjçxath Dxus yuweꞌs iꞌkweꞌsxtxi ptaꞌsx.
4 Nawa naa kiweteweꞌsxaꞌs jiyunisa yakh weꞌweçxa iꞌkweꞌsxtxiꞌ knaymeeth. Txãꞌwẽ yũumée, wejxwa Dxus puꞌçxte txajx Espiritu yakhçxáath kaajiyuꞌjçxa iꞌkweꞌsxtxiꞌ knay.
5 Iꞌkweꞌsxaꞌ naa kiweteweꞌsxaꞌsçxáa piyaçxa Dxusaꞌs jiyumée, wejxwa Dxus íiçxáa puꞌçxte Dxusaꞌs jiyusa yuukahnthu naa kiwete jiyunisa yuꞌsaꞌ weꞌwemée.
Dxus pheuꞌjnitxiꞌ txajx Espiritu yakh íiçxáak yaꞌjiyuꞌ
6 Txãꞌwẽçxawa, Dxusna ew yãꞌj jiisa yakh yuꞌ txãꞌwẽ weꞌweniꞌ seenaꞌ yuh jiisa weꞌwenisataꞌ. Nawa txãꞌwẽ weꞌweniꞌ naa kiweteweꞌsxmeetaꞌ, saꞌ naa kiwete neꞌjweꞌsx skhẽwwaꞌjsa ũstaꞌ wala jiisa txãaweꞌsx weꞌweniwa meetaꞌ,
7 wejxwa naa kiwe meetey bagaçxte yuhwa pçumée kweꞌsx ewte neeyũuwaꞌjaꞌs Dxusaꞌ pheuꞌjçxa jiꞌphyãꞌkh yuꞌ kim yuhwa jiyunimeesa txãꞌsnathaꞌw ptaꞌsxiꞌ.
8 Txãꞌsaꞌ naa kiwete neꞌjweꞌsx kim yuhwa jiyumeetaꞌ. Jiyuwaçaꞌ, kluuskhẽ kiꞌpçxa ikhwaꞌjmée neꞌta yuꞌ kweꞌsxtxi jxpeꞌjsa cielujũweꞌsxaꞌs.
9 Nawa Dxus librute fxiꞌjni ũsyãꞌkh yuꞌ txãꞌwẽ jiyuwaꞌjaꞌsmée, txãa paꞌga neꞌta jiyumée. Txajíik naꞌjĩꞌ:
Dxusna yaakxsaweꞌsx jĩi Dxusaꞌ pheuꞌkh txãa pheuꞌjniꞌs
Kim yuhwa iiuymeetaꞌ, saꞌ iiwẽseꞌjwa meetaꞌ,
Saꞌ ũusteçxáa yuhwa yaakxni jiꞌphuꞌçmeetaꞌ jĩna fxiꞌjniꞌ.
10 Dxusaꞌ txajx Espiritu yakhku txãꞌwẽsatx kweꞌsxtxi kaajiyuꞌj, txãa paꞌgatey txajx Espirituꞌ Dxus pheuꞌjni kim yuhwa jiyuwaꞌjmeesa ũstxna txãatx jxuka jiisaꞌ.
11 Ayga nasaa pweꞌsxçxáa yuhwa ¿kim jiyuyaꞌ ãjakx vxitee ũus yaakxniꞌs? Naasáa txãꞌwẽ yaakxsayçxáa ¿jiyumeemaꞌk? Txãꞌwẽy Dxus Espiritu yuuçxáa jiiaꞌ Dxus yajkxçxa pheuꞌjnisatxiꞌ.
12 Kweꞌsxaꞌ naa kiweteweꞌsxaꞌs jiyunisaꞌs jxpaꞌgaçxa ũsmeethaꞌw. Dxus Espiritu txajx tasxu yuusaꞌsthaꞌw jxpaꞌga, Dxus peeygãhçxa kweꞌsxtxi ew yũuk txãatx jxuka jiyuyaꞌ.
13 Txãasathaꞌw kweꞌsxtxi Dxus ew yũuniꞌs txajx Espiritu kaajiyuꞌthe ptaꞌsxyaꞌ ãjaꞌ, saꞌ naa kiweteweꞌsxaꞌs piyaniꞌs ptaꞌsxiꞌçmeethaꞌw. Dxus jĩitxiꞌ Dxus Espiritu yakhíiçxáathaꞌw ptaꞌsxiꞌ.
14 Nawa Dxus Espirituꞌs ũuste jiꞌphmeesaꞌ Dxus Espiritu weꞌweniꞌs jiyuyaꞌ ãjameetxna. Txãꞌwẽsa yakhaꞌ jiimeekwesa weꞌweni naꞌwẽçxáa pthũusena. Dxus weꞌwenitxiꞌ Dxus Espiritu yakhçxáa yaꞌjiyuna, txãa paꞌga Dxus Espiritu yakhmée yuꞌ jiyuyaꞌ ãjameetxna. Dxus yaakxnitxiꞌ Dxus Espiritu yakhçxáa jiyuyaꞌ ãjatxna.
15 Nawa maawa Dxus Espirituꞌs ũuste jiꞌphsaꞌ jxpubamée ew jiyuyaꞌ ãjatxna, açaꞌ txãꞌwẽ yũusaꞌs jxpubana ũsaꞌ jĩyaꞌ ãjameetxna maa yuhwa.
16 Txãꞌwẽ jiyuyaꞌ ãjawaꞌjmeete íiçxáak Dxus librute naꞌwẽ weꞌweꞌ: ¿Kim jiyuyaꞌ ãjakx Dxus yaakxniꞌs? Dxusaꞌs ¿kim kaapiyaꞌjyaꞌ ãjakx? jĩꞌk. Txãꞌwẽtewa, kweꞌsxaꞌ jiithaꞌw Kristo yaakxniꞌs, Dxus Espiritu kaajiyuꞌphaꞌga.
