1 Korintios 7:1-40
7 Iꞌkweꞌsx pẽjxna fxiꞌjniꞌs ãçxh pasyaꞌwath. Piçthẽꞌjaꞌ nyu jiꞌphmée fxiꞌzetewa ew yuhna.
2 Nawa txãꞌwẽ pkal kazx yuuwaꞌjçxáak wala kasejeꞌ naa paꞌga piçthẽꞌjaꞌ nyu jiꞌphuwaꞌjaꞌ, açaꞌ txãꞌwẽy uꞌywa peekx nmiꞌ jiꞌphuwaꞌjaꞌ.
3 Nmiꞌaꞌ zhiçxkwe fxiꞌzewaꞌjaꞌ txãaweꞌsx nyu yakh, açaꞌ nyuaꞌ txãꞌwẽy ew zhiçxkwe fxiꞌzewaꞌjaꞌ txãaweꞌsx nmiꞌ yakh.
4 Nyuaꞌ peekx kakweꞌ sũhna yaakxwaꞌj jiꞌphmeꞌ, txajx kakweꞌ nmiꞌ jĩꞌ naa paꞌga, naapkaçxhaꞌ nmiꞌwa peekx kakweꞌ sũhna yaakxwaꞌj jiꞌphmeꞌ, txajx kakweꞌ nyu jĩꞌ naa paꞌga.
5 Ptamsa yãꞌjaꞌ, ih fxiꞌzeniꞌs puutx waꞌlwaꞌjmeꞌ, naasáa Dxusna orãyyaꞌwaçxa yuuçxáa, maz ençxáawa txutewaꞌjaꞌ. Nawa eꞌsu yãꞌjaꞌ kiꞌ ih fxiꞌzewaꞌjaꞌ, txãꞌwẽmeꞌ eçxthẽꞌj kaypubaꞌjweꞌsxte.
6 Maawa jxukaysa ptamuwaꞌjaꞌs jxkajaꞌçmeeth, nawa ptamuçxa fxiꞌzenik adx yakhaꞌ ew theguꞌ naa paꞌgaçxáath txãꞌjĩꞌ.
7 Jxukay adx naꞌwẽçxaçxáa fxiꞌzewaç, wejx ewna sũjuꞌth. Nawa Dxusaꞌ nasaa iisa fxiyfxiy fxiꞌzewaꞌjaꞌs neꞌ pees, vxitetxiꞌ ptamuçxa fxiꞌzewaꞌj, vxitetxiꞌ ptamumée fxiꞌzewaꞌj.
8 Vxiudaweꞌsx vxiteꞌ ptammeesatxthu yuꞌkxpejeꞌ txãaweꞌsxaꞌ ptamumée adx naꞌwẽçxáa fxiꞌzewaç wejx ewna.
9 Nawa peekx kakwe jxthãasniꞌs neeweyaꞌ ãjasameꞌ ptamuçxa fxiꞌzeni wejx ewna, txãasuçxáa yajkxna fxiꞌzeyaꞌmée.
10 Nawa ãçxhaꞌ ptamsatxthu jxkaajaꞌ: nyuaꞌ nmiꞌ yakh txutewaꞌj jiꞌphmeꞌ. Naꞌwẽ jxkaahniꞌ adx yajkxçxa weꞌwenimeꞌ, Dxusku txãꞌwẽ jxkaajaꞌ.
11 Nawa maa enteyaꞌ maaíi yuꞌ txãꞌwẽ nmiꞌ yakh txutewáana nawa txãa uꞌyaꞌ peena yuꞌ vxite yakh iimiꞌyaꞌ ãjameena. Meeçxaꞌ nmiꞌ yakh kiꞌ yuwee ewuuçxa yuꞌ nmiꞌ tasxtey kiꞌ sxawedxaꞌ ãjana. Txãꞌwẽy nmiꞌwa txajx nyu yakh txuteeyaꞌ ãjameena.
12 Ãçxhaꞌ vxitetxiꞌ adx ũus yaakxni yakhthu yuꞌkxpejeꞌ: Maa yakhthẽꞌj nyuuwa Kristoꞌs ũuste jxpaꞌgasameeçxawa, nmiꞌ yakh waꞌlmée fxiꞌze wẽeyãꞌtheꞌ, nmiꞌaꞌ txutemeete ewna.
13 Txãꞌwẽy nyuaꞌ Kristoꞌs jxpaꞌgasatewa nmiꞌaꞌ Kristoꞌs jxpaꞌgasameeçxawa, nyu yakh waꞌlmée fxiꞌze wẽeyãꞌtheꞌ, txãa nyuaꞌ txutemeete ewna.
14 Nmiꞌ Kristoꞌs jxpaꞌgasameeçxawa, txajx nyuaꞌ Kristoꞌs jxpaꞌgasa yakh waꞌlmée fxiꞌzepaꞌga, txãaweꞌsx ptam fxiꞌzeniꞌ Dxus dxiꞌpte ewsaꞌ. Açaꞌ txãꞌwẽy nyu maꞌk Kristoꞌs jxpaꞌgasamée yuu nawa txajx nmiꞌ Kristoꞌs jxpaꞌgasa yakh waꞌlmée fxiꞌzepaꞌga txãaweꞌsx ptam fxiꞌzeniꞌ Dxus dxiꞌpte ewsaꞌ. Txãꞌwẽmeewaçaꞌ, iꞌkweꞌsx luuçxaꞌ Dxus peeygãanisamée yuutxna. Nawa ewsate íiçxáa iꞌkweꞌsx luuçxaꞌ Dxus peeygãanisataꞌ.
15 Nawa Kristoꞌs jxpaꞌgasamée nmiꞌ maꞌk yuu meeçxaꞌ nyu maꞌk yuu nawa txutee wẽeteꞌ, waꞌlmeete ewna. Txãꞌwẽ yuꞌ txuteeyaꞌ ãjaneꞌkwe, txãa paꞌgatey Dxusaꞌ puutx puiimée fxiꞌzewaꞌjaꞌsku jxkaajaꞌ.
16 Txãꞌwẽ nmiꞌ maꞌk yuu meeçxaꞌ nyu maꞌk yuu nawa txãꞌwẽ peekx nmiꞌaꞌs Dxus jĩi knayuꞌnja sũhna txutemée fxiꞌzeçxawa, jii yuꞌ meek yaꞌfxiꞌzeꞌ Dxusaꞌs jiyuwaꞌjsamanx jiyuwaꞌjsameemanx nawa.
17 Iꞌkweꞌsx fxiꞌzewaꞌjaꞌs maꞌwẽneꞌ Dxus nvxiht açaꞌ txãꞌsçxáa kxtey nwẽeseꞌjna fxiꞌzewaꞌjaꞌ nasa iisa teeçxsa naꞌwẽçxah. Nyafxíi iꞌkweꞌsxtxi Dxus paꞌyaçte maꞌwẽsaneꞌkwe yuꞌ naꞌ txãꞌwẽesa mfxiꞌzewe. Dxusna yaakxsa mteewa pkhaakhesa ũstxna txãaweꞌsxtxiꞌ txãꞌwẽth jxkaajaꞌ.
18 Maaíi yuꞌsaꞌ cirkuncidãynisaꞌs wáa Dxus paꞌyana açaꞌ txãꞌwẽ cirkuncidãyni mneeyũu. Vxiteꞌ cirkuncidãynimeesana wáa Dxus paꞌyana açaꞌ txãꞌwẽesa mneeyũu yaꞌcirkuncidãymée.
19 Yaꞌcirkuncidãy maꞌk meeçxaꞌ yaꞌcirkuncidãymée maꞌk nawa txãꞌ kĩhwa meesaꞌ. Dxus jxthãasniꞌs kxtey yuuna fxiꞌzeteçxáa kĩhwa yuumeena.
20 Nasa iisa maꞌwẽsaçxah neꞌkwe yuꞌ Dxus paꞌyaçteꞌ, txãꞌwẽesa mfxiꞌzewe.
21 Meeçxaꞌ idxaꞌ vxitee kusete jxkaahni fxiꞌzena ũste wáꞌ Dxusaꞌ paꞌya açaꞌ txajũ kasehmée fxiꞌzewaꞌjaꞌ kuh yajkxmée. Nawa txãa selpinijũ kasejxaꞌ ewuweçxteꞌ, mkaaseh txãajũ.
22 Txãꞌwẽ Dxusaꞌ Kristoꞌs ũuste jxpaꞌgayaꞌ paꞌyaçteꞌ, vxitee kusete jxkaahni fxiꞌzena ũssaçxawa, ãçxhaꞌ vxitee jxkaahnijũ kasehçxa Kristoꞌs selpisáa iꞌkwe yuu Dxus dxiꞌpte. Txãꞌwẽy vxitee kusete selpisamée maꞌk yuu nawa ãçxhaꞌ vxitee kusete selpiiyaꞌ uꞌkasa yuuna Kristo tasxte.
23 Iꞌkweꞌsxaꞌ Dxus weynisa iꞌkwe paꞌgate. Txãa paꞌga naa kiwete nasaa nweꞌsxtxi selpisáa ãhmeekwesathaꞌw sũhmée mfxiꞌzewe.
24 Txãꞌwẽꞌ naa paꞌga yakhthẽꞌjweꞌsx, maꞌwẽsaçxah neꞌkwe yuꞌ Dxus paꞌyaçteꞌ, nawa txãꞌwẽesa mfxiꞌzewe nasa iisa teeçxsa naꞌwẽçxah Dxus yakh txutemée.
25 Knaꞌsaweꞌsxtxiꞌ Dxusaꞌ txãꞌwẽk jxkaajaꞌ jĩwaꞌj yuꞌ kĩh yuhwa jiꞌphmeeth. Nawa Dxus yakh ew fxiꞌzesa yuꞌkxpehni ewna sũhçxath adx ũus yaakxniju naꞌwẽ ptaꞌsxiꞌ:
26 Piçtakxaꞌ teeçxçxáa yãꞌj fxiꞌzeççxaꞌ, txãꞌwẽesa fxiꞌzete ewna sũjuꞌth adxaꞌ, naa ensuꞌ fxiꞌzewaꞌj wala thẽyaꞌ txãa paꞌga.
27 Nyu jiꞌphyãꞌjçxaꞌ, txutewaꞌjaꞌs yaakxnu. Nyu jiꞌphmeesaꞌ, nyu yuuwaꞌjsa pakweyaꞌ yaakxnu.
28 Nawa ptamunisaꞌ pkalmeꞌ, açaꞌ knaꞌsa maꞌk ptamuuyaꞌ yajkx nawa txãawa pkalmeꞌ. Nawa ptamusaꞌ naa kiwete nxuswaꞌj thẽysaꞌs pejka jiꞌphutxna, açaꞌ txãatxthu jiꞌphumeewaçaꞌ sũjuꞌ adxaꞌ.
29 Yakhthẽꞌjweꞌsx, naꞌwẽ fxiꞌzewaꞌjaꞌsthu ptaꞌsxiꞌ: Kuh enmeeçxáa yãꞌj ũsaꞌ. Naajũyãꞌjaꞌ ptamçxawa nyu jiꞌphmée naꞌwẽçxáa mfxiꞌzewe.
30 Nxuswaꞌj en paꞌthewa, nxusmée ũssa naꞌwẽçxáa mfxiꞌzewe. Naapkaçxhaꞌ fxiestate ũssaꞌ weçxana ũssa naꞌwẽmée mfxiꞌzewe. Kĩh weyni jiꞌphçxawa txãa weyniꞌ kweꞌsx jĩꞌ sũhmée mfxiꞌzewe.
31 Naa kiwete kĩhwa wala jiꞌphsaꞌ jiꞌphmeesa naꞌwẽçxáa meswe. Txãꞌwẽmeꞌ, naa kiweꞌ pçuuyaꞌwaꞌ.
32 Iꞌkweꞌsxaꞌ peekx yatte thegna fxiꞌzewaꞌjaꞌs jiꞌphmée fxiꞌzewaç wejx ewna sũjuꞌth. Txãꞌwẽ maawa nyu jiꞌphmeesaꞌ yatte thegwaꞌjaꞌs yajkxmée Dxus yakh ew fxiꞌzewaꞌjçxáanak paꞌpçxuna fxiꞌzeꞌ.
33 Nawa nyu jiꞌphsaꞌ peekx yatte thegwaꞌjaꞌsçxáak jxthaakwe paꞌpçxuna fxiꞌzeꞌ, txajx nyu peejxmée fxiꞌzekahn.
34 Txãꞌwẽy uꞌywa nmiꞌ jiꞌphsa vxiteꞌ nmiꞌ jiꞌphmeesaꞌ txãꞌwẽçxaçxáa yajkxna fxiꞌzeꞌçmeetaꞌ. Nmiꞌ jiꞌphmeesaꞌ Dxus jĩiçxáꞌsku jxthaakwe paꞌpçxuna fxiꞌzeꞌ, txajx kakwe txajx ũus yaakxni yãꞌjçxa Dxus dxiꞌpte ew fxiꞌzeyaꞌ. Naapkaçxhaꞌ nmiꞌ jiꞌphsaꞌ naa kiweteweꞌsxaꞌsçxáak wejx jxthaakwe paꞌpçxuna fxiꞌzeꞌ, nmiꞌ weçxakahn.
35 Naꞌwẽth ptaꞌsx nawa iꞌkweꞌsxtxi yupna txãꞌjĩçmeeth, wejxwa iꞌkweꞌsxtxi selpiwaꞌjaꞌs puꞌçxnaçxáath txãꞌjĩꞌ, kxah Dxusaꞌs yuuçxáa wejx thaakwe selpiina fxiꞌzeneꞌkwe sũhçxath txãꞌjĩꞌ.
36 Txãꞌwẽtewa maaíi yuꞌ adx niisaꞌs kmiꞌaꞌthe wejx ewna. Txãꞌwẽmeꞌ eꞌsuyãꞌjaꞌ iimiꞌyaꞌ ewumeena sũhna yaakxsaꞌ, kmiꞌaꞌjaneꞌkwe, iꞌkweꞌsx ũuste maꞌwẽ Dxus kaaũusutheꞌjena txãꞌsnaçxáa kxtey yuuna. Miꞌçxa fxiꞌzeniꞌ pkalsameꞌ.
37 Nawa vxiteꞌ txãꞌwẽ niisaꞌs kmiꞌaꞌj wẽemeesaꞌ, kmiꞌaꞌjmeeneꞌkwe txãꞌsaꞌ kimwa jxkaahmeena açaꞌ kmiꞌaꞌjmeeçxaꞌ, wejxwa ew yũuna.
38 Maawa txãꞌwẽ kmiꞌaꞌjsaꞌ ew íiçxáa yũuna. Nawa kmiꞌaꞌjsameꞌ jxthaakwe ew yũuna.
39 Uꞌy iimiꞌsaꞌ nmiꞌ yakh txuteeyaꞌ ãjameena nmiꞌ nee ĩtxiyte yuꞌ. Txãꞌsaꞌ leyku txãꞌwẽ juunaꞌ jxkaajaꞌ. Nawa nmiꞌ uute yuuçxáa kiꞌ iimiꞌyaꞌ ãjana maa yakhwa, nmiꞌ yuuwaꞌjsa Dxusaꞌs jiisa yakh.
40 Nawa nmiꞌ uuyãꞌtheꞌ peena yuꞌ iimiꞌmeeçxaꞌ, wejx wẽt fxiꞌzena. Adxaꞌ txãꞌwẽth yaakiꞌ, açaꞌ adxaꞌs Dxus Espiritu neꞌ kaaũusutheꞌjeꞌ sũjuꞌth.
