1 Korintios 8:1-13
8 Ãçxhaꞌ Dxus ĩtximeesa ũstaꞌ txãatx weçxaawaꞌj tajkx ikhnisaꞌs ptaꞌsxyaꞌwath. Txãa çxiçxaꞌ kĩhwa suwwaꞌjsameetewa txãꞌsaꞌ ew jiithaꞌw kweꞌsxaꞌ. Nawa txãꞌwẽ jiith sũhnisaꞌ weeçx weꞌwewaꞌjçxáak kasejeꞌ, açaꞌ puutx yaꞌpeeygãhna Dxus yakh çxhãçxha fxiꞌzewaꞌj yuꞌ yaꞌjiꞌphuꞌçmeꞌ.
2 Maawa txãꞌsçxáana jiiçxa jiith sũhna fxiꞌzesaꞌ, kĩhwa jiimeetaꞌ ew jiisa naꞌwẽ yuꞌ.
3 Nawa txãꞌwẽ yũumée, Dxusaꞌsçxáa ũusuh jxuka yaakxsaꞌs Dxusaꞌ jiiaꞌ txãꞌwẽ yũusaꞌs.
4 Txãꞌwẽ dxus ĩtximeesatx weçxayaꞌ tajkx ikhnisa çxiçxaꞌs ũꞌte ¿ewmée dxihmanx? Ew ũus miiyajkxwe. Txãa dxus ĩtximeesaꞌ naa kiwete kĩh yuhwa meesataꞌ, naasáa teeçx Dxus yuuçxáa ĩtxisa ũsaꞌ, peena vxite yuꞌ meetaꞌ.
5 Dxus yaasesa naa kiwete vxiteꞌ cielute ũswáatxna txãꞌwẽ yaakxsa yakh yuꞌ.
6 Nawa kweꞌsx yakh yuꞌ, teeçx Dxus yuuçxáa ũsaꞌ kweꞌsx Tata cielute ũssa. Txãak kĩh yuhwa peejxmée jxuka takiꞌjçxa nvxiht, açaꞌ kweꞌsxaꞌ txãa paꞌgaçxáathaꞌw ĩtxi fxiꞌzeyaꞌ ãjaꞌ. Txãꞌwẽy kweꞌsxtxi jxpeꞌjsawa teeçxçxáa ũsaꞌ, txãꞌ Jesukristoꞌ. Kĩhwa jxuka txajx thegna jxpeꞌphaꞌgaçxáa ũstaꞌ, txãa paꞌga kweꞌsxwa txajx jxpeꞌjnisa íiçxáathaꞌw.
7 Açaꞌ txãa yakh ũssa yakhaꞌ çxiçx txãꞌwẽsaꞌs ũꞌtewa, kĩh yuhwa suwwaꞌjsameetewa txãꞌsaꞌ jiimeetaꞌ jxuka yuꞌ. Txãasatx naa kiwete dxus ĩtximeesatx nyafxíi neeweꞌwesaweꞌsx Dxusaꞌs açxamée ew jiisaꞌ çxiçx txãꞌwẽsaꞌs ũꞌteꞌ, ewmeena sũjuꞌ.
8 Nawa kweꞌsx ũꞌniꞌ Dxus dxiꞌpte ewsa vxitwaꞌjsameꞌ. Açaꞌ txãꞌwẽ ũꞌçxaꞌ ewsawa yuumeꞌnjaꞌw, saꞌ ewmeesawa yuumeꞌnjaꞌw.
9 Txãꞌwẽtewa, mpaꞌyajkxwe, iꞌkweꞌsx txãꞌwẽ kĩhnawa ũꞌyaꞌ ãjaꞌnjaꞌw sũhçxa txãa çxiçxaꞌs ũꞌpaꞌgaçxáa Dxusaꞌs açxamée ew jiisatx pkalte kweeteꞌjweꞌsxte.
10 Meeçxawa naꞌwẽ wáa yuuneꞌga: dxus ĩtximeesatx weçxanisa çxiçx txweyniꞌs wáa ũꞌyaꞌ kaçxhiineꞌga, açaꞌ Dxusaꞌs açxamée ew jiisa uyçxaꞌ, txãawa txãꞌwẽy ũꞌwena.
11 Açaꞌ iidxpaꞌgaçxáa Dxusaꞌs açxamée ew jiisa iidx yakhthẽꞌj ũusaꞌ vxituna, txajx paꞌgate makwe Kristo uutewa.
12 Açaꞌ Dxusaꞌs açxamée ew jiisa yakhthẽꞌjtx pkalte kweeteꞌjçxaꞌ, idxwa Kristo dxiꞌpte yuuwesa yuuneꞌga.
13 Txãa paꞌga adx yakhthẽꞌj pkalte weteweꞌsxte çxiçx txãꞌwẽsaꞌs bagaçxte yuhwa ũꞌmeꞌnja pkalte kweeteꞌjyaꞌmée.
